gharoñ meñ qaid haiñ bastī ke shorafā

saḌak par haiñ fasādī aur ġhunDe

gharon mein qaid hain basti ke shorafa

saDak par hain fasadi aur ghunDe

kyuuñ na 'tanvīr' phir iz.hār kī jur.at kiije

ḳhāmushī bhī to yahāñ bā.is-e-rusvā.ī hai

kyun na 'tanwir' phir izhaar ki jurat kije

KHamushi bhi to yahan bais-e-ruswai hai

apne kāñdhe pe liye phirtī hai ehsās kā bojh

zindagī kyā kisī maqtal kī tamannā.ī hai

apne kandhe pe liye phirti hai ehsas ka bojh

zindagi kya kisi maqtal ki tamannai hai

farzī qissoñ jhūTī bātoñ se akasr

sachchā.ī ke qad ko naapā kartā huuñ

farzi qisson jhuTi baaton se akasr

sachchai ke qad ko napa karta hun

apnī sūrat bhī kab apnī lagtī hai

ā.īnoñ meñ ḳhud ko dekhā kartā huuñ

apni surat bhi kab apni lagti hai

aainon mein KHud ko dekha karta hun

fikr kī aañch meñ pighle to ye ma.alūm huā

kitne pardoñ meñ chhupī zaat kī sachchā.ī hai

fikr ki aanch mein pighle to ye malum hua

kitne pardon mein chhupi zat ki sachchai hai