zamīñ uThegī nahīñ āsmāñ jhukegā nahīñ

anā-parast haiñ donoñ ke ḳhāndān bahut

zamin uThegi nahin aasman jhukega nahin

ana-parast hain donon ke KHandan bahut

chhupā rahtā hai dast-e-ārzū ḳhuddār logoñ kā

baḌī mushkil se apnī zaat kā iz.hār karte haiñ

chhupa rahta hai dast-e-arzu KHuddar logon ka

baDi mushkil se apni zat ka izhaar karte hain

bas ik nishān sā baaqī thā kachche āñgan meñ

parinda lauT ke aaya to mar chukā thā daraḳht

bas ek nishan sa baqi tha kachche aangan mein

parinda lauT ke aaya to mar chuka tha daraKHt

ḳhizāñ aane nahīñ dūñgā kabhī maiñ apne phūloñ par

gulistāñ ko lahū de kar sañvārūñgā ye vā'da hai

KHizan aane nahin dunga kabhi main apne phulon par

gulistan ko lahu de kar sanwarunga ye wa'da hai

sab log chal rahe the saḌak par milā ke haath

dekhā jo ġhaur se to kisī kā koī na thā

sab log chal rahe the saDak par mila ke hath

dekha jo ghaur se to kisi ka koi na tha

ye sāzishoñ kā daur hai ai tishna-lab hayāt

paanī talāsh karnā samundar ko chhoḌ kar

ye sazishon ka daur hai ai tishna-lab hayat

pani talash karna samundar ko chhoD kar

koī kaise pā sakegā sā.ebānī meñ sukūn

dhuup jab baiThī huī ho sāya-e-dīvār meñ

koi kaise pa sakega saebani mein sukun

dhup jab baiThi hui ho saya-e-diwar mein

ab un se paa.ī hai taklīf to shikāyat kyā

hamīñ ne sar pe chaḌhāyā thā kuchh kamīnoñ ko

ab un se pai hai taklif to shikayat kya

hamin ne sar pe chaDhaya tha kuchh kaminon ko

har daur kā shahīd tire qāfile meñ hai

hotī nahīñ husain tirī karbalā tamām

har daur ka shahid tere qafile mein hai

hoti nahin husain teri karbala tamam

bas ek pal kī tamannā-e-vasl kī ḳhātir

tamām 'umr lagā dī ga.ī sañvarne meñ

bas ek pal ki tamanna-e-wasl ki KHatir

tamam 'umr laga di gai sanwarne mein

hamīñ se ajnabī lahje meñ baat kartī hai

hamāre ghar kī hamāre dayār kī miTTī

hamin se ajnabi lahje mein baat karti hai

hamare ghar ki hamare dayar ki miTTi

ye kise zanjīr-basta kar ke laa.ī hai hayāt

qaid-ḳhāna ho rahā hai kyoñ munavvar dekhnā

ye kise zanjir-basta kar ke lai hai hayat

qaid-KHana ho raha hai kyon munawwar dekhna

ek hī rang meñ jiine kā hunar sīkhā hai

ham se har baat pe chehra nahīñ badlā jaatā

ek hi rang mein jine ka hunar sikha hai

hum se har baat pe chehra nahin badla jata

is bhiiḌ meñ duniyā kī ham tum na bichhaḌ jaa.eñ

maiñ tum pe nazar rakkhūñ tum mujh pe nazar rakhnā

is bhiD mein duniya ki hum tum na bichhaD jaen

main tum pe nazar rakkhun tum mujh pe nazar rakhna

aaya na phir bhī chāñd utar kar zamīn par

karte rahe daraḳht ishāre tamām raat

aaya na phir bhi chand utar kar zamin par

karte rahe daraKHt ishaare tamam raat

ahl-e-junūñ pasand na the us ko is liye

Thukrā diyā gayā mujhe majzūb dekh kar

ahl-e-junun pasand na the us ko is liye

Thukra diya gaya mujhe majzub dekh kar

ab ye ḳhvāhish hai kareñ log hamārī ġhībat

phail jaa.eñ tirī galiyoñ meñ ḳhabar kī sūrat

ab ye KHwahish hai karen log hamari ghibat

phail jaen teri galiyon mein KHabar ki surat

ġhanīmat jaan ghar ke is sukūñ ko

daraḳhtoñ kā abhī saayā ghanā hai

ghanimat jaan ghar ke is sukun ko

daraKHton ka abhi saya ghana hai