rang saare aa ga.e 'āriz pe mere

jab kahā us ne mujhe holī mubārak

rang sare aa gae 'ariz pe mere

jab kaha us ne mujhe holi mubarak

jab se Tāñgī hai tirī tasvīr dil kī alganī par

yaañ tabhī se din meñ titlī baiThtī hai shab meñ jugnū

jab se Tangi hai teri taswir dil ki algani par

yan tabhi se din mein titli baiThti hai shab mein jugnu

rakh liyā thā maiñ ne roza jaañ tumhāre naam kā

tum ko dekhā ḳhvāb meñ aur merī sehrī ho ga.ī

rakh liya tha main ne roza jaan tumhaare nam ka

tum ko dekha KHwab mein aur meri sehri ho gai

dekh saktā huuñ binā chashme ke maiñ

dost terī bevafā.ī saaf saaf

dekh sakta hun bina chashme ke main

dost teri bewafai saf saf

chāhiye thī aap kī tasvīr so

khīñch lī tasvīr maiñ ne chāñd kī

chahiye thi aap ki taswir so

khinch li taswir main ne chand ki

daf'atan maiñ Thiik ho saktā huuñ chārāgar mire

tū mujhe pahnā de us ke naam kā tā'vīz gar

daf'atan main Thik ho sakta hun chaaragar mere

tu mujhe pahna de us ke nam ka ta'wiz gar

aaj kī shab ḳhvāb meñ bāteñ huī haiñ jin se merī

yā-ḳhudā ik roz ho jaa.e mujhe dīdār un kā

aaj ki shab KHwab mein baaten hui hain jin se meri

ya-KHuda ek roz ho jae mujhe didar un ka

tīrgī-e-zīst kar dī ḳhatm is ne

raushnī hai phuul sī bachchī hamārī

tirgi-e-zist kar di KHatm is ne

raushni hai phul si bachchi hamari

ham tirā naam bench par apnī

roz likhte haiñ aur miTāte haiñ

hum tera nam bench par apni

roz likhte hain aur miTate hain

raushnī bhī tīrgī bhī saath hai yā yuuñ kaheñ

zindagī ḳhush hai magar ḳhush bhī tavā.if kī tarah

raushni bhi tirgi bhi sath hai ya yun kahen

zindagi KHush hai magar KHush bhi tawaif ki tarah

udāsī rāstā batlā rahī hai haath pakḌe yuuñ

pata mā'lūm ho jaise hamārī maut kā is ko

udasi rasta batla rahi hai hath pakDe yun

pata ma'lum ho jaise hamari maut ka is ko

jab lage ḳhud ko kabhī bīmār se ham

lag ke ro.eñ haiñ dar-o-dīvār se ham

jab lage KHud ko kabhi bimar se hum

lag ke roen hain dar-o-diwar se hum

dil kā kamra raushnī se bhar gayā

jab jalā dīpak tumhārī yaad kā

dil ka kamra raushni se bhar gaya

jab jala dipak tumhaari yaad ka

banā hogā kisī bhī roz to patthar banā hogā

kahīñ phir baa'd meñ vo shaḳhs chārāgar banā hogā

bana hoga kisi bhi roz to patthar bana hoga

kahin phir ba'd mein wo shaKHs chaaragar bana hoga

tumhāre bin nahīñ lete kabhī karvaT akele ham

tumhārī yaad bhī karvaT hamāre saath letī hai

tumhaare bin nahin lete kabhi karwaT akele hum

tumhaari yaad bhi karwaT hamare sath leti hai