آپ کو خون کے آنسو ہی رلانا ہوگا

حال دل کہنے کو ہم اپنا اگر بیٹھ گئے

تم اپنی زلف سے پوچھو مری پریشانی

کہ حال اس کو ہے معلوم ہو بہو میرا

وہ پردہ نشینی کی رعایت ہے تمہاری

ہم بات بھی خلوت سے نکلنے نہیں دیتے

فرقت میں کار وصل لیا واہ واہ سے

ہر آہ دل کے ساتھ اک ارماں نکل گیا

نہ آئے سامنے میرے اگر نہیں آتا

مجھے تو اس کے سوا کچھ نظر نہیں آتا

تیرے کہنے سے میں اب لاؤں کہاں سے ناصح

صبر جب اس دل مضطر کو خدا نے نہ دیا

کر دیا تیروں سے چھلنی مجھے سارا لیکن

خون ہونے کے لیے اس نے جگر چھوڑ دیا

کھویا غم رفاقت دیکھو کمال اپنا

بہکا دیا ہے سب کو دکھلا کے حال اپنا

دم کا آنا تو بڑی بات ہے لب پر عارفؔ

ضعف نے حرف شکایت کبھی آنے نہ دیا

گلشن خلد میں ہر چند کہ دل بہلایا

کوچۂ یار مگر دل سے بھلایا نہ گیا

سونپ کر خانۂ دل غم کو کدھر جاتے ہو

پھر نہ پاؤ گے اگر اس نے یہ گھر چھوڑ دیا

لائے جب گھر سے تو بے ہوش پڑا تھا عارفؔ

ہو گیا آن کے ہشیار ترے کوچے میں

تمہاری رہ کا رہا ہم کو ہر طرف دھوکا

چلے جدھر کو سو بے اختیار ہو کے چلے

ہوں تشنہ کام دشت شہادت زبس کہ میں

گرتا ہوں آب خنجر و شمشیر دیکھ کر

پانی نکل کے دشت میں جاری ہے جا بجا

یارب گیا ہے کون یہ سر پر اڑا کے خاک

بیچ میں ہے میرے اس کے تو ہی اے آہ حزیں

صلح کیونکر ہووے جب تک درمیاں کوئی نہ ہو