مدتوں خود سے ملاقات نہیں ہوتی ہے

رات ہوتی ہے مگر رات نہیں ہوتی ہے

سو بار ٹوٹنے پہ بھی ہارا نہیں ہوں میں

مٹی کا اک چراغ ہوں تارا نہیں ہوں میں

اس نے اتنا کیا نظر انداز

سب کی نظروں میں آ گئے ہیں ہم

مجھ سے ناراض بھی نہیں ہے وہ

اور اس کو منا رہا ہوں میں

فضائیں رقص میں ہیں اور برس رہی ہے شراب

کسی نے جام سوئے آسماں اچھالا ہے

ایک چہرہ ترا دیکھنے کے لیے

کتنے چہروں سے ہم کو گزرنا پڑا

اپنے ہونے کا ہے احساس ترے ہونے سے

غیر ممکن ہے مرا تجھ سے جدا ہو جانا

اب بھی روشن ہیں بزرگوں کی حویلی کے چراغ

ہم کسی نقش کو دھندلا نہیں ہونے دیتے

پہلے رخصت ہوئی چمن سے بہار

اور اب غیرت چمن بھی گئی

میں دن کے اجالے میں تجھے سوچ رہا ہوں

محسوس یہ ہوتا ہے کہ کچھ روشنی کم ہے

مرا سایہ بھی مجھ سے دور ہے اور تیری یادیں بھی

میں اب اس سے زیادہ اور تنہا ہو نہیں سکتا

عشق کی کون سی منزل پہ جنوں لایا ہے

ہوش خود آ کے یہ کہتا ہے مجھے ہوش نہیں

دور تک آواز دے آیا ہوں میں

دیکھنا یہ ہے کہ آتا کون ہے

احسان خاک صحرا پہ مجنوں کا ہے بہت

ورنہ فلک پہ اس کا پہنچنا محال تھا

گلوں کی طرح مہکتے ہیں باغ میں کانٹے

عجیب رنگ میں دور بہار آیا ہے