تلاش رزق کا یہ مرحلہ عجب ہے کہ ہم

گھروں سے دور بھی گھر کے لیے بسے ہوئے ہیں

بنا رہا ہوں ابھی گھر کو آئنہ خانہ

پھر اپنے ہاتھ میں پتھر بھی دیکھنا ہے مجھے

تمہارے ہجر میں مرنا تھا کون سا مشکل

تمہارے ہجر میں زندہ ہیں یہ کمال کیا

ہوس نہ جان تجھے چھو کے دیکھنا یہ ہے

تجھے ہی دیکھ رہے ہیں کہ خواب دیکھتے ہیں

اک برس ہو گیا اسے دیکھے

اک صدی آ گئی ہے سال کے بیچ

سبو میں عکس رخ ماہتاب دیکھتے ہیں

شراب پیتے نہیں ہم شراب دیکھتے ہیں

ابھی تو میں نے فقط بارشوں کو جھیلا ہے

اب اس کے بعد سمندر بھی دیکھنا ہے مجھے

اپنے ہی پیروں سے اپنا آپ روند

اپنی ہستی کو مٹا کر رقص کر

ایک پردہ ہے بے ثباتی کا

آئنے اور ترے جمال کے بیچ

اسی کی بات لکھی چاہے کم لکھی ہم نے

اسی کا ذکر کیا چاہے خال خال کیا

یہ مٹی میرے خال و خد چرا کر

ترا چہرہ بناتی جا رہی ہے

خون کتنا بہا تھا مقتل میں

میری آنکھوں میں خون اترنے تک

عجب تھا نشۂ وارفتگیٔ وصل اسے

وہ تازہ دم رہا مجھ کو نڈھال کر کے بھی