کشمیر کی وادی میں بے پردہ جو نکلے ہو

کیا آگ لگاؤ گے برفیلی چٹانوں میں

اتنا ناراض ہو کیوں اس نے جو پتھر پھینکا

اس کے ہاتھوں سے کبھی پھول بھی آیا ہوگا

شہرت کی فضاؤں میں اتنا نہ اڑو ساغرؔ

پرواز نہ کھو جائے ان اونچی اڑانوں میں

اس کے جذبات سے یوں کھیل رہا ہوں ساغرؔ

جیسے پانی میں کوئی آگ لگانا چاہے

شام ڈھلے یہ سوچ کے بیٹھے ہم اپنی تصویر کے پاس

ساری غزلیں بیٹھی ہوں گی اپنے اپنے میر کے پاس

تم سے ملتی جلتی میں آواز کہاں سے لاؤں گا

تاج محل بن جائے اگر ممتاز کہاں سے لاؤں گا

بیٹھے تھے جب تو سارے پرندے تھے ساتھ ساتھ

اڑتے ہی شاخ سے کئی سمتوں میں بٹ گئے

کس طرح بھلائیں ہم اس شہر کے ہنگامے

ہر درد ابھی باقی ہے ہر زخم ابھی تازہ ہے

یہ جو دیوار پہ کچھ نقش ہیں دھندلے دھندلے

اس نے لکھ لکھ کے میرا نام مٹایا ہوگا

پھولوں سے بدن ان کے کانٹے ہیں زبانوں میں

شیشے کے ہیں دروازے پتھر کی دکانوں میں

تم کیا جانو اپنے آپ سے کتنا میں شرمندہ ہوں

چھوٹ گیا ہے ساتھ تمہارا اور ابھی تک زندہ ہوں

مجھ میں اور تجھ میں ہے یہ فرق تو اب بھی قائم

تو مجھے چاہے مگر تجھ کو زمانہ چاہے

دیوتا میرے آنگن میں اتریں گے کب زندگی بھر یہی سوچتا رہ گیا

میرے بچوں نے تو چاند کو چھو لیا اور میں چاند کو پوجتا رہ گیا