choTi pe teri sanp ki hai lahar do-gana

choTī pe tirī saañp kī hai lahar do-gānā

khātī huuñ tire vāste maiñ zahr do-gānā

chitvan tirī bas dekhte hī yaad paḌī hai

dillī kī vahī chahl vahī nahr do-gānā

noj aise kahīñ aur hoñ ghar khoj miTe log

sab taaḌ ga.ī hai ye burā shahr do-gānā

ban baiThe haiñ dūlhā dulhan is vaqt jo ham tum

to laakh ruupe kā to bañdhe mehr do-gānā

maiñ tujh se samajh lūñgī bhalā kaun hai 'inshā'

allāh rī tū haigī baḌī qahr dogānā

choTi pe teri sanp ki hai lahar do-gana

khati hun tere waste main zahr do-gana

chitwan teri bas dekhte hi yaad paDi hai

dilli ki wahi chahl wahi nahr do-gana

noj aise kahin aur hon ghar khoj miTe log

sab taD gai hai ye bura shahr do-gana

ban baiThe hain dulha dulhan is waqt jo hum tum

to lakh rupe ka to bandhe mehr do-gana

main tujh se samajh lungi bhala kaun hai 'insha'

allah ri tu haigi baDi qahr dogana