phir baji-jaan bhaDwe ne jhagDa kiya shuru

phir baajī jaan bhaḌve ne jhagḌā kiyā shurū'

maiñ chāhtī thī ḳhatm ho ulTā huā shurū'

husn-o-shabāb yaar kā phaTnā huā shurū'

guyyañ ġhazab ki ho gayā fitna nayā shurū'

un ko ye ḳhabt mujh se ho āġhāz-e-dāstāñ

maiñ is ḳhayāl meñ ki kareñ dil-rubā shurū'

maanā ki ham ne saut ko karvā diyā haqīr

ye to batāo kis ne ye jhagḌā kiyā shurū'

dūlhā kī tāk-jhāñk ne begam jhukā diyā

jā jā ke chauk kar diyā phir jhāñknā shurū'

anjām jab ba-ḳhair ho tab jānūñ ḳhair hai

dahlā rahā hai dil ko muī baat kā shurū'

ham ko na chheḌo kah diyā ro ro ke varna ham

kar deñge dūlhā yaar rahe kosnā shurū'

phir shaiḳh-jī ne paañv nikāle haiñ peT se

phir vo sharārteñ muā karne lagā shurū'

kyā jaane aage chal ke vo bhaḌvā karegā kyā

achchhā nahīñ nigoḌe kā jab ai buā shurū'

kyuuñ kar na nūr-e-husn se ho chaudhvīñ kā chāñd

dulhan kā chaud.hvāñ huā nām-e-ḳhudā shurū'

'mohsin' nahīñ vo fitna-e-ḳhvābīda hai buā

mujh ko ye Dar hai hashr na kar de muā shurū'

phir baji jaan bhaDwe ne jhagDa kiya shuru'

main chahti thi KHatm ho ulTa hua shuru'

husn-o-shabab yar ka phaTna hua shuru'

guyyan ghazab ki ho gaya fitna naya shuru'

un ko ye KHabt mujh se ho aaghaz-e-dastan

main is KHayal mein ki karen dil-ruba shuru'

mana ki hum ne saut ko karwa diya haqir

ye to batao kis ne ye jhagDa kiya shuru'

dulha ki tak-jhank ne begam jhuka diya

ja ja ke chauk kar diya phir jhankna shuru'

anjam jab ba-KHair ho tab jaanun KHair hai

dahla raha hai dil ko mui baat ka shuru'

hum ko na chheDo kah diya ro ro ke warna hum

kar denge dulha yar rahe kosna shuru'

phir shaiKH-ji ne panw nikale hain peT se

phir wo shararten mua karne laga shuru'

kya jaane aage chal ke wo bhaDwa karega kya

achchha nahin nigoDe ka jab ai bua shuru'

kyun kar na nur-e-husn se ho chaudhwin ka chand

dulhan ka chaudhwan hua nam-e-KHuda shuru'

'mohsin' nahin wo fitna-e-KHwabida hai bua

mujh ko ye Dar hai hashr na kar de mua shuru'