dars-e-shabbir ke sanche mein jo Dhal jaega

dars-e-shabbīr ke sāñche meñ jo Dhal jā.egā

sarhad-e-fikr se aage vo nikal jā.egā

dekh 'abbās ke neze ko 'asā-e-mūsā

azhdahā ban ke ye faujoñ ko nigal jā.egā

'ālam-e-tishnagī-e-hazrat-e-shabbīr na pūchh

aisī garmī hai ki sūraj bhī pighal jā.egā

ik gunahgār ‘atash ḳhema-e-baḳhshish kī taraf

pairoñ ke bal nahīñ vo āñkhoñ ke bal jā.egā

sabr ke paañv tale phuul khileñge har-sū

ḳhushk sahrā bhī ye gulshan meñ badal jā.egā

har qadam diin ko āzād karegī zanjīr

aabla raah ke kāñToñ ko kuchal jā.egā

ḳhushk hoñToñ pe zabāñ phereñge apnī asġhar

'alqama dam tirī maujoñ kā nikal jā.egā

sar-e-qirtās likhūñ shām-e-ġharībāñ kaise

Dar hai ki ḳhema-e-alfāz bhī jal jā.egā

karbalā jā ke mujhe chain milegā 'mohkam'

jo machaltā hai mirā dil vo sañbhal jā.egā

dars-e-shabbir ke sanche mein jo Dhal jaega

sarhad-e-fikr se aage wo nikal jaega

dekh 'abbas ke neze ko 'asa-e-musa

azhdaha ban ke ye faujon ko nigal jaega

'alam-e-tishnagi-e-hazrat-e-shabbir na puchh

aisi garmi hai ki suraj bhi pighal jaega

ek gunahgar ‘atash KHema-e-baKHshish ki taraf

pairon ke bal nahin wo aankhon ke bal jaega

sabr ke panw tale phul khilenge har-su

KHushk sahra bhi ye gulshan mein badal jaega

har qadam din ko aazad karegi zanjir

aabla rah ke kanTon ko kuchal jaega

KHushk honTon pe zaban pherenge apni asghar

'alqama dam teri maujon ka nikal jaega

sar-e-qirtas likhun sham-e-ghariban kaise

Dar hai ki KHema-e-alfaz bhi jal jaega

karbala ja ke mujhe chain milega 'mohkam'

jo machalta hai mera dil wo sanbhal jaega