husain aap ke afkar se talluq hai

husain aap ke afkār se ta'alluq hai

so har yazīd ke inkār se ta'alluq hai

tumhārā jabr kī sarkār se ta'alluq hai

hamārā sabr ke darbār se ta'alluq hai

hamāre ghar pe jo lahrā rahā hai haq kā 'alam

hamārā ek 'alam-dār se ta'alluq hai

ham is liye to shifā bāñTte haiñ logoñ meñ

hamārā ‘ābid-e-bīmār se ta'alluq hai

ham apne sar meñ na kyoñ ḳhāk-e-karbalā Dāleñ

hamārā shahr-e-'azā-dār se ta'alluq hai

yazīd-e-vaqt laraztā hai is liye ham se

hamārā haidar-e-karrār se ta'alluq hai

hamārī qabr ke katbe pe yā-husain likho

ki un kā hashr ke darbār se ta'alluq hai

'alī kā nā'ra lagā kar bahisht meñ jaao

'alī ke nā'roñ kā us paar se ta'alluq hai

ham is liye to manāte haiñ jashn-e-ġham 'vāsif'

hamāre ġham kā bhī ġham-ḳhvār se ta'alluq hai

husain aap ke afkar se ta'alluq hai

so har yazid ke inkar se ta'alluq hai

tumhaara jabr ki sarkar se ta'alluq hai

hamara sabr ke darbar se ta'alluq hai

hamare ghar pe jo lahra raha hai haq ka 'alam

hamara ek 'alam-dar se ta'alluq hai

hum is liye to shifa banTte hain logon mein

hamara ‘abid-e-bimar se ta'alluq hai

hum apne sar mein na kyon KHak-e-karbala Dalen

hamara shahr-e-'aza-dar se ta'alluq hai

yazid-e-waqt larazta hai is liye hum se

hamara haidar-e-karrar se ta'alluq hai

hamari qabr ke katbe pe ya-husain likho

ki un ka hashr ke darbar se ta'alluq hai

'ali ka na'ra laga kar bahisht mein jao

'ali ke na'ron ka us par se ta'alluq hai

hum is liye to manate hain jashn-e-gham 'wasif'

hamare gham ka bhi gham-KHwar se ta'alluq hai