ek aisa dard ka chashma baha gae hain husain

ik aisā dard kā chashma bahā ga.e haiñ husain

hamārī āñkhoñ ko dariyā banā ga.e haiñ husain

koī to hur kī tarah nikle shab ke ḳheme se

mujhe hī sub.h kā taara banā ga.e haiñ husain

kisī bhī nuur kā maslak se kyā ta'alluq hai

charāġh har kisī ghar meñ jalā ga.e haiñ husain

hamāre ashkoñ kī me'rāj hai 'azā-dārī

in āñsuoñ ko bhī jiinā sikhā ga.e haiñ husain

udaas lamhoñ kī tārīkiyoñ se bāhar aa

tire nasīb ko hur jagmagā ga.e haiñ husain

sipāh-e-shām meñ dahshat sī chhā.ī hai 'shārib'

saroñ se apne jo maqtal sajā ga.e haiñ husain

ek aisa dard ka chashma baha gae hain husain

hamari aankhon ko dariya bana gae hain husain

koi to hur ki tarah nikle shab ke KHeme se

mujhe hi subh ka tara bana gae hain husain

kisi bhi nur ka maslak se kya ta'alluq hai

charagh har kisi ghar mein jala gae hain husain

hamare ashkon ki me'raj hai 'aza-dari

in aansuon ko bhi jina sikha gae hain husain

udas lamhon ki tarikiyon se bahar aa

tere nasib ko hur jagmaga gae hain husain

sipah-e-sham mein dahshat si chhai hai 'shaarib'

saron se apne jo maqtal saja gae hain husain