mere husain se jo bad-guman ho jae

mire husain se jo bad-gumān ho jaa.e

mirī du'ā hai ki vo be-nishān ho jaa.e

karūñgā phir 'alī-akbar pe guftugū tujh se

ḳhudā kare tirā beTā javān ho jaa.e

munāfiqoñ kī tasallī bahut zarūrī hai

ġhadīr-e-ḳhum kā zarā phir bayān ho jaa.e

'alī ke ruup meñ hotā hai yā-'alī paidā

koī makān agar lā-makān ho jaa.e

ḳhudā sulātā hai nafsunnabī ko bistar par

jab apne ghar meñ nabī be-amān ho jaa.e

maiñ jab bhī zikr karūñ shaam ke asīroñ kā

lahū lahū mire dil kī fuġhān ho jaa.e

the saare ummatī par ek ummatī bhī na thā

jo qaidiyoñ ke liye sā.ebān ho jaa.e

barahna pusht pe naaqa kī ik bañdhā bīmār

barā.e-nasl-e-'alī sārbān ho jaa.e

ḳhamosh aisā ki jaise ġhilāf meñ qur.āñ

jo lab-kushā ho to nutq-e-azān ho jaa.e

agar na buġhz ho dil meñ to kaise mumkin hai

bayān-e-hubb-e-'alī chīstān ho jaa.e

hamāre 'ahd kā har ek mīsam-e-tammār

yazīdī chāhte haiñ be-zabān ho jaa.e

adā ye rasm-e-'azā yuuñ karo 'azā-dāro

ki ik shigāf sar-e-āsmān ho jaa.e

ba-nām-e-āl-e-'alī-murtazā ba-nām-e-husain

shahīd kaash mirā ḳhāndān ho jaa.e

salām likhte hue hichkiyoñ se kī hai du'ā

ki mujh sā bad-sadā ratb-ul-lisān ho jaa.e

maiñ ahl-e-bait kī nusrat likhūñ to aise likhūñ

ki harf harf mirā nardbān ho jaa.e

faroġh fikr-e-husainī ko itnā duuñ 'vāsif'

ki mujh se raazī shah-e-do-jahān ho jaa.e

likhī hai manqabat ik rājpūt shā'ir ne

zarā sī daad shah-e-sayyedān ho jaa.e

mere husain se jo bad-guman ho jae

meri du'a hai ki wo be-nishan ho jae

karunga phir 'ali-akbar pe guftugu tujh se

KHuda kare tera beTa jawan ho jae

munafiqon ki tasalli bahut zaruri hai

ghadir-e-KHum ka zara phir bayan ho jae

'ali ke rup mein hota hai ya-'ali paida

koi makan agar la-makan ho jae

KHuda sulata hai nafsunnabi ko bistar par

jab apne ghar mein nabi be-aman ho jae

main jab bhi zikr karun sham ke asiron ka

lahu lahu mere dil ki fughan ho jae

the sare ummati par ek ummati bhi na tha

jo qaidiyon ke liye saeban ho jae

barahna pusht pe naqa ki ek bandha bimar

barae-nasl-e-'ali sarban ho jae

KHamosh aisa ki jaise ghilaf mein quran

jo lab-kusha ho to nutq-e-azan ho jae

agar na bughz ho dil mein to kaise mumkin hai

bayan-e-hubb-e-'ali chistan ho jae

hamare 'ahd ka har ek misam-e-tammar

yazidi chahte hain be-zaban ho jae

ada ye rasm-e-'aza yun karo 'aza-daro

ki ek shigaf sar-e-asman ho jae

ba-nam-e-al-e-'ali-murtaza ba-nam-e-husain

shahid kash mera KHandan ho jae

salam likhte hue hichkiyon se ki hai du'a

ki mujh sa bad-sada ratb-ul-lisan ho jae

main ahl-e-bait ki nusrat likhun to aise likhun

ki harf harf mera nardban ho jae

farogh fikr-e-husaini ko itna dun 'wasif'

ki mujh se raazi shah-e-do-jahan ho jae

likhi hai manqabat ek rajput sha'ir ne

zara si dad shah-e-sayyedan ho jae