yun gulu-e-KHushk se nata hai gahra pyas ka

yuuñ gulū-e-ḳhushk se naatā hai gahrā pyaas kā

kaT nahīñ saktā kabhī ḳhanjar se rishta pyaas kā

haa.e kitnī tishnagī thī karbalā ke dasht meñ

'umr bhar paḌhte rahe sajjād nauha pyaas kā

ḳhushk ho jaatī hamesha ke liye nahr-e-furāt

gar milā detā vo pyāsā ek qatra pyaas kā

zikr-e-'abbās-o-sakīna kījiyegā bā-vazū

ek qur.ān-e-vafā hai ik sahīfa pyaas kā

garmī-e-‘āshūr meñ thā hashr kā manzar 'ayāñ

vo savā neze pe sūraj aur vo ġhalba pyaas kā

nāgahāñ āñkhoñ meñ tasvīr-e-sakīna aa ga.ī

jab tasavvur ne mire khīñchā hai naqsha pyaas kā

gird-e-marqad aaj bhī paanī hai masrūf-e-tavāf

turbat-e-'abbās hai yā hai ye kā'ba pyaas kā

maiñ ne likkhā thā faqat kāġhaz pe 'mohkam' yā-husain

ban gayā ahl-e-‘azā ke haq meñ nauha pyaas kā

yun gulu-e-KHushk se nata hai gahra pyas ka

kaT nahin sakta kabhi KHanjar se rishta pyas ka

hae kitni tishnagi thi karbala ke dasht mein

'umr bhar paDhte rahe sajjad nauha pyas ka

KHushk ho jati hamesha ke liye nahr-e-furaat

gar mila deta wo pyasa ek qatra pyas ka

zikr-e-'abbas-o-sakina kijiyega ba-wazu

ek quran-e-wafa hai ek sahifa pyas ka

garmi-e-‘ashur mein tha hashr ka manzar 'ayan

wo sawa neze pe suraj aur wo ghalba pyas ka

nagahan aankhon mein taswir-e-sakina aa gai

jab tasawwur ne mere khincha hai naqsha pyas ka

gird-e-marqad aaj bhi pani hai masruf-e-tawaf

turbat-e-'abbas hai ya hai ye ka'ba pyas ka

main ne likkha tha faqat kaghaz pe 'mohkam' ya-husain

ban gaya ahl-e-‘aza ke haq mein nauha pyas ka