yun pyase qafile ki pyas ka matam manaunga

yuuñ pyāse qāfile kī pyaas kā mātam manā.ūñgā

lab-e-dariyā maiñ do āñkhoñ se sau dariyā bahā.ūñgā

mire bachchoñ kī asġhar se shanāsā.ī zarūrī hai

maiñ in ko hurmula ke tiir kā qissa sunā.ūñgā

zarūrī hai ye bachpan meñ hī mafhūm-e-vafā samjheñ

maiñ kuufa jā ke un ko be-vafāoñ se milā.ūñgā

safar kyā thā musāfir kaun the in ko batā kar maiñ

najaf se karbalā tak dam-ba-dam paidal chalā.ūñgā

mujhe in kī basārat ko basīrat meñ badalnā hai

maiñ in ko nainvā kī ġham-zada miTTī dikhā.ūñgā

husain ibn-e-'alī ke rauza-e-aqdas pe le jā kar

maiñ sab bachchoñ ko un ke haath pe bai'at karā.ūñgā

furāt-e-bā-jafā ne kyā kiyā pyāsī sakīna se

kaTe kaise mire ‘abbās ke baazū batā.ūñgā

jahāñ girya huā thā us jagah girya karūñgā maiñ

jahāñ ḳheme jale the us jagah ḳhema jalā.ūñgā

maiñ kar jā.uñgā hijrat jānib-e-karb-o-balā 'vāsif'

vahāñ maiñ zā.iroñ ko 'umr-bhar paanī pilā.ūñgā

yun pyase qafile ki pyas ka matam manaunga

lab-e-dariya main do aankhon se sau dariya bahaunga

mere bachchon ki asghar se shanasai zaruri hai

main in ko hurmula ke tir ka qissa sunaunga

zaruri hai ye bachpan mein hi mafhum-e-wafa samjhen

main kufa ja ke un ko be-wafaon se milaunga

safar kya tha musafir kaun the in ko bata kar main

najaf se karbala tak dam-ba-dam paidal chalaunga

mujhe in ki basarat ko basirat mein badalna hai

main in ko nainwa ki gham-zada miTTi dikhaunga

husain ibn-e-'ali ke rauza-e-aqdas pe le ja kar

main sab bachchon ko un ke hath pe bai'at karaunga

furaat-e-ba-jafa ne kya kiya pyasi sakina se

kaTe kaise mere ‘abbas ke bazu bataunga

jahan girya hua tha us jagah girya karunga main

jahan KHeme jale the us jagah KHema jalaunga

main kar jaunga hijrat jaanib-e-karb-o-bala 'wasif'

wahan main zairon ko 'umr-bhar pani pilaunga