Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "rijhaane"

نظم کے متعلقہ نتیجہ "rijhaane"

نظم

بین کرتی عورتوں سے
ہم پوچھ رہے ہیں میرؔ کے شعر کا مطلب
بے گھر بھونروں سے کہہ رہے ہیں
شکنتلا کو رجھانے کے لیے
لو بھری دوپہر میں
کوکنے کا تقاضہ کر رہے ہیں کوئل سے
اس مشکل وقت میں
کچھ لوگ کہہ رہے ہیں ہم سے
اپنی وفاداری ثابت کرنے کے لیے
ایک ٹوٹے ہوئے برتن کو
چاک سے وفاداری ثابت کرنے کے لیے
کچھ لوگ تالیاں بجا رہے ہیں
کچھ حیران ہو کر دیکھ رہے ہیں
ان کی اور ہماری شکل
یہ معصوم ہیں
انہیں معاف کر دینا میرے خدا
اور ممکن ہو تو ہمیں بھی
کہ ہم جی رہے ہیں
اس مشکل وقت میں بھی

نعمان شوق
نظم

چتونیں رجھانے والی
سادگی ستانے والی
ہر ادا لبھانے والی
کون سی ادا کرو گے
اتنا حسن کیا کرو گے

محبوب خزاں
نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال
نظم

فکر انساں پر تری ہستی سے یہ روشن ہوا
ہے پر مرغ تخیل کی رسائی تا کجا
تھا سراپا روح تو بزم سخن پیکر ترا
زیب محفل بھی رہا محفل سے پنہاں بھی رہا
دید تیری آنکھ کو اس حسن کی منظور ہے
بن کے سوز زندگی ہر شے میں جو مستور ہے
محفل ہستی تری بربط سے ہے سرمایہ دار
جس طرح ندی کے نغموں سے سکوت کوہسار
تیرے فردوس تخیل سے ہے قدرت کی بہار
تیری کشت فکر سے اگتے ہیں عالم سبزہ وار
زندگی مضمر ہے تیری شوخی تحریر میں
تاب گویائی سے جنبش ہے لب تصویر میں
نطق کو سو ناز ہیں تیرے لب اعجاز پر
محو حیرت ہے ثریا رفعت پرواز پر
شاہد مضموں تصدق ہے ترے انداز پر
خندہ زن ہے غنچۂ دلی گل شیراز پر
آہ تو اجڑی ہوئی دلی میں آرامیدہ ہے
گلشن ویمر میں تیرا ہم نوا خوابیدہ ہے
لطف گویائی میں تیری ہم سری ممکن نہیں
ہو تخیل کا نہ جب تک فکر کامل ہم نشیں
ہائے اب کیا ہو گئی ہندوستاں کی سر زمیں
آہ اے نظارہ آموز نگاہ نکتہ بیں
گیسوئے اردو ابھی منت پزیر شانہ ہے
شمع یہ سودائی دل سوزئ پروانہ ہے
اے جہان آباد اے گہوارۂ علم و ہنر
ہیں سراپا نالۂ خاموش تیرے بام در
ذرے ذرے میں ترے خوابیدہ ہیں شمس و قمر
یوں تو پوشیدہ ہیں تیری خاک میں لاکھوں گہر
دفن تجھ میں کوئی فخر روزگار ایسا بھی ہے
تجھ میں پنہاں کوئی موتی آبدار ایسا بھی ہے

علامہ اقبال
نظم

او دیس سے آنے والا ہے بتا
او دیس سے آنے والے بتا
کس حال میں ہیں یاران وطن
آوارۂ غربت کو بھی سنا
کس رنگ میں ہے کنعان وطن
وہ باغ وطن فردوس وطن
وہ سرو وطن ریحان وطن
او دیس سے آنے والے بتا

اختر شیرانی
نظم

اس سے پہلے کہ تیری چشم کرم
معذرت کی نگاہ بن جائے
اس سے پہلے کہ تیرے بام کا حسن
رفعت مہر و ماہ بن جائے
پیار ڈھل جائے میرے اشکوں میں
آرزو ایک آہ بن جائے
مجھ پہ آ جائے عشق کا الزام
اور تو بے گناہ بن جائے
میں ترا شہر چھوڑ جاؤں گا
اس سے پہلے کہ سادگی تیری
لب خاموش کو گلہ کہہ دے
میں تجھے چارہ گر خیال کروں
تو مرے غم کو لا دوا کہہ دے
تیری مجبوریاں نہ دیکھ سکے
اور دل تجھ کو بے وفا کہہ دے
جانے میں بے خودی میں کیا پوچھوں
جانے تو بے رخی سے کیا کہہ دے
میں ترا شہر چھوڑ جاؤں گا
چارۂ درد ہو بھی سکتا تھا
مجھ کو اتنی خوشی بہت کچھ ہے
پیار گو جاوداں نہیں پھر بھی
پیار کی یاد بھی بہت کچھ ہے
آنے والے دنوں کی ظلمت میں
آج کی روشنی بہت کچھ ہے
اس تہی دامنی کے عالم میں
جو ملا ہے وہی بہت کچھ ہے
میں ترا شہر چھوڑ جاؤں گا
چھوڑ کر ساحل مراد چلا
اب سفینہ مرا کہیں ٹھہرے
زہر پینا مرا مقدر ہے
اور ترے ہونٹ انگبیں ٹھہرے
کس ترا تیرے آستاں پہ رکوں
جب نہ پاؤں تلے زمیں ٹھہرے
اس سے بہتر ہے دل یہی سمجھے
تو نے روکا تھا ہم نہیں ٹھہرے
میں ترا شہر چھوڑ جاؤں گا
مجھ کو اتنا ضرور کہنا ہے
وقت رخصت سلام سے پہلے
کوئی نامہ نہیں لکھا میں نے
تیرے حرف پیام سے پہلے
توڑ لوں رشتۂ نظر میں بھی
تم اتر جاؤ بام سے پہلے
لے مری جان میرا وعدہ ہے
کل کسی وقت شام سے پہلے
میں ترا شہر چھوڑ جاؤں گا

سیف الدین سیف
نظم

پھر چلی ہے ریل اسٹیشن سے لہراتی ہوئی
نیم شب کی خامشی میں زیر لب گاتی ہوئی
ڈگمگاتی جھومتی سیٹی بجاتی کھیلتی
وادی و کہسار کی ٹھنڈی ہوا کھاتی ہوئی
تیز جھونکوں میں وہ چھم چھم کا سرود دل نشیں
آندھیوں میں مینہ برسنے کی صدا آتی ہوئی
جیسے موجوں کا ترنم جیسے جل پریوں کے گیت
ایک اک لے میں ہزاروں زمزمے گاتی ہوئی
نونہالوں کو سناتی میٹھی میٹھی لوریاں
نازنینوں کو سنہرے خواب دکھلاتی ہوئی
ٹھوکریں کھا کر لچکتی گنگناتی جھومتی
سر خوشی میں گھنگروؤں کی تال پر گاتی ہوئی
ناز سے ہر موڑ پر کھاتی ہوئی سو پیچ و خم
اک دلہن اپنی ادا سے آپ شرماتی ہوئی
رات کی تاریکیوں میں جھلملاتی کانپتی
پٹریوں پر دور تک سیماب جھلکاتی ہوئی
جیسے آدھی رات کو نکلی ہو اک شاہی برات
شادیانوں کی صدا سے وجد میں آتی ہوئی
منتشر کر کے فضا میں جا بجا چنگاریاں
دامن موج ہوا میں پھول برساتی ہوئی
تیز تر ہوتی ہوئی منزل بمنزل دم بہ دم
رفتہ رفتہ اپنا اصلی روپ دکھلاتی ہوئی
سینۂ کہسار پر چڑھتی ہوئی بے اختیار
ایک ناگن جس طرح مستی میں لہراتی ہوئی
اک ستارہ ٹوٹ کر جیسے رواں ہو عرش سے
رفعت کہسار سے میدان میں آتی ہوئی
اک بگولے کی طرح بڑھتی ہوئی میدان میں
جنگلوں میں آندھیوں کا زور دکھلاتی ہوئی
رعشہ بر اندام کرتی انجم شب تاب کو
آشیاں میں طائر وحشی کو چونکاتی ہوئی
یاد آ جائے پرانے دیوتاؤں کا جلال
ان قیامت خیزیوں کے ساتھ بل کھاتی ہوئی
ایک رخش بے عناں کی برق رفتاری کے ساتھ
خندقوں کو پھاندتی ٹیلوں سے کتراتی ہوئی
مرغ زاروں میں دکھاتی جوئے شیریں کا خرام
وادیوں میں ابر کے مانند منڈلاتی ہوئی
اک پہاڑی پر دکھاتی آبشاروں کی جھلک
اک بیاباں میں چراغ طور دکھلاتی ہوئی
جستجو میں منزل مقصود کی دیوانہ وار
اپنا سر دھنتی فضا میں بال بکھراتی ہوئی
چھیڑتی اک وجد کے عالم میں ساز سرمدی
غیظ کے عالم میں منہ سے آگ برساتی ہوئی
رینگتی مڑتی مچلتی تلملاتی ہانپتی
اپنے دل کی آتش پنہاں کو بھڑکاتی ہوئی
خودبخود روٹھی ہوئی بپھری ہوئی بکھری ہوئی
شور پیہم سے دل گیتی کو دھڑکاتی ہوئی
پل پہ دریا کے دما دم کوندتی للکارتی
اپنی اس طوفان انگیزی پہ اتراتی ہوئی
پیش کرتی بیچ ندی میں چراغاں کا سماں
ساحلوں پر ریت کے ذروں کو چمکاتی ہوئی
منہ میں گھستی ہے سرنگوں کے یکایک دوڑ کر
دندناتی چیختی چنگھاڑتی گاتی ہوئی
آگے آگے جستجو آمیز نظریں ڈالتی
شب کے ہیبت ناک نظاروں سے گھبراتی ہوئی
ایک مجرم کی طرح سہمی ہوئی سمٹی ہوئی
ایک مفلس کی طرح سردی میں تھراتی ہوئی
تیزئی رفتار کے سکے جماتی جا بجا
دشت و در میں زندگی کی لہر دوڑاتی ہوئی
ڈال کر گزرے مناظر پر اندھیرے کا نقاب
اک نیا منظر نظر کے سامنے لاتی ہوئی
صفحۂ دل سے مٹاتی عہد ماضی کے نقوش
حال و مستقبل کے دل کش خواب دکھلاتی ہوئی
ڈالتی بے حس چٹانوں پر حقارت کی نظر
کوہ پر ہنستی فلک کو آنکھ دکھلاتی ہوئی
دامن تاریکئ شب کی اڑاتی دھجیاں
قصر ظلمت پر مسلسل تیر برساتی ہوئی
زد میں کوئی چیز آ جائے تو اس کو پیس کر
ارتقائے زندگی کے راز بتلاتی ہوئی
زعم میں پیشانی صحرا پہ ٹھوکر مارتی
پھر سبک رفتاریوں کے ناز دکھلاتی ہوئی
ایک سرکش فوج کی صورت علم کھولے ہوئے
ایک طوفانی گرج کے ساتھ ڈراتی ہوئی
ایک اک حرکت سے انداز بغاوت آشکار
عظمت انسانیت کے زمزمے گاتی ہوئی
ہر قدم پر توپ کی سی گھن گرج کے ساتھ ساتھ
گولیوں کی سنسناہٹ کی صدا آتی ہوئی
وہ ہوا میں سیکڑوں جنگی دہل بجتے ہوئے
وہ بگل کی جاں فزا آواز لہراتی ہوئی
الغرض اڑتی چلی جاتی ہے بے خوف و خطر
شاعر آتش نفس کا خون کھولاتی ہوئی

اسرار الحق مجاز
نظم

میں اجنبی میں بے نشاں
میں پا بہ گل
نہ رفعت مقام ہے نہ شہرت دوام ہے
یہ لوح دل یہ لوح دم
نہ اس پہ کوئی نقش ہے نہ اس پہ کوئی نام ہے

مجید امجد
نظم

اے مجاز اے ترانہ بار مجاز
زندہ پیغمبر بہار مجاز
اے بروۓ سمن وشاں گل پوش
اے بہ کوۓ مغاں تمام خروش
اے پرستار مہ رخان جہاں
اے کماں دار شاعران جواں
تجھ سے تاباں جبین مستقبل
اے مرے سینۂ امید کے دل
اے مجاز اے مبصر خد و خال
اے شعور جمال و شمع خیال
اے ثریا فریب و زہرہ نواز
شاعر مست و رند شاہد باز
ناقد عشوۂ شباب ہے تو
صبح فردا کا آفتاب ہے تو
تجھ کو آیا ہوں آج سمجھانے
حیف ہے تو اگر برا مانے
خود کو غرق شراب ناب نہ کر
دیکھ اپنے کو یوں خراب نہ کر
شاعری کو تری ضرورت ہے
دور فردا کی تو امانت ہے
صرف تیری بھلائی کو اے جاں
بن کے آیا ہوں ناصح ناداں
ایک ٹھہراؤ اک تکان ہے تو
دیکھ کس درجہ دھان پان ہے تو
ننگ ہے محض استخواں ہونا
سخت اہانت ہے ناتواں ہونا
استخوانی بدن دخانی پوست
ایک سنگین جرم ہے اے دوست
شرم کی بات ہے وجود سقیم
ناتوانی ہے اک گناہ عظیم
جسم اور علم طرفہ طاقت ہے
یہی انسان کی نبوت ہے
جو ضعیف و علیل ہوتا ہے
عشق میں بھی ذلیل ہوتا ہے
ہر ہنر کو جو ایک دولت ہے
علم اور جسم کی ضرورت ہے
کثرت بادہ رنگ لاتی ہے
آدمی کو لہو رلاتی ہے
خوش دلوں کو رلا کے ہنستی ہے
شمع اختر بجھا کے ہنستی ہے
اور جب آفت جگر پہ لاتی ہے
رند کو مولوی بناتی ہے
مے سے ہوتا ہے مقصد دل فوت
مے ہے بنیاد مولویت و موت
کان میں سن یہ بات ہے نشتر
مولویت ہے موت سے بد تر
اس سے ہوتا ہے کار عمر تمام
اس سے ہوتا ہے عقل کو سرسام
اس میں انساں کی جان جاتی ہے
اس میں شاعر کی آن جاتی ہے
یہ زمین آسمان کیا شے ہے
آن جائے تو جان کیا شے ہے
گوہر شاہ وار چن پیارے
مجھ سے اک گر کی بات سن پیارے
غم تو بنتا ہے چار دن میں نشاط
شادمانی سے رہ بہت محتاط
غم کے مارے تو جی رہے ہیں ہزار
نہیں بچتے ہیں عیش کے بیمار
آن میں دل کے پار ہوتی ہے
پنکھڑی میں وہ دھار ہوتی ہے
جوئے عشرت میں غم کے دھارے ہیں
یخ و شبنم میں بھی شرارے ہیں
ہاں سنبھل کر لطافتوں کو برت
ٹوٹ جائے کہیں نہ کوئی پرت
دیکھ کر شیشۂ نشاط اٹھا
یہ ورق ہے ورق ہے سونے کا
کاغذ باد یہ نگینہ ہے
بلکہ اے دوست آبگینہ ہے
ساغر شبنم خوش آب ہے یہ
آبگینہ نہیں حباب ہے یہ
روک لے سانس جو قریب آئے
ٹھیس اس کو کہیں نہ لگ جائے
تیغ مستی کو احتیاط سے چھو
ورنہ ٹپکے گا انگلیوں سے لہو
مستیوں میں ہے تاب جلوۂ ماہ
اور سیہ مستیاں خدا کی پناہ
خوب ہے ایک حد پہ قائم نشہ
ہلکا پھلکا سبک ملائم نشہ
ہاں ادب سے اٹھا ادب سے جام
تاکہ آب حلال ہو نہ حرام
جام پر جام جو چڑھاتے ہیں
اونٹ کی طرح بلبلاتے ہیں
زندگی کی ہوس میں مرتے ہیں
مے کو رسوائے دہر کرتے ہیں
یاد ہے جب جگرؔ چڑھاتے تھے
کیا الف ہو کے ہن ہناتے تھے
میری گردن میں بھر کے چند آہیں
پاؤں سے ڈالتے تھے وہ بانہیں
عقل کی موت علم کی پستی
الاماں لعنت سیہ مستی
اف گھٹا ٹوپ نشے کا طوفان
بھوت عفریت دیو جن شیطان
لات گھونسہ چھڑی چھری چاقو
لب لباہٹ لعاب کف بدبو
طنز آوازہ برہمی افساد
طعن تشنیع مضحکہ ایراد
شور ہو حق ابے تبے ہے ہے
اوکھیاں گالیاں دھماکے قے
مس مساہٹ غشی تپش چکر
سوز سیلاب سنسنی صرصر
چل چخے چیخ چناں چنیں چنگھاڑ
چخ چخے چاؤں چاؤں چیل چلھاڑ
لپا ڈکی لتام لام لڑائی
ہول ہیجان ہانک ہاتھا پائی
کھلبلی کاؤں کاؤں کھٹ منڈل
ہونک ہنگامہ ہمہمہ ہلچل
الجھن آوارگی ادھم اینٹھن
بھونک بھوں بھوں بھنن بھنن بھن بھن
دھول دھپا دھکڑ پکڑ دھتکار
تہلکہ تو تڑاق تف تکرار
بو بھبھک بھیے بکس برر بھونچال
دبدبے دندناہٹیں دھمال
گاہ نرمی و لطف و مہر و سلام
گاہ تلخی و ترشی و دشنام
عقل کی موت علم کی پستی
الاماں لعنت سیہ مستی
صرف نشے کی بھیگنے دے مسیں
ان کو بننے نہ دے کبھی مونچھیں
الاماں خوفناک کالا نشہ
اوہ ریش و بروت والا نشہ
اژدر مرگ او دیو خوں خواری
الاماں نشۂ ''جٹادھاری''
نشے کا جھٹ پٹا ہے نور حیات
جھٹپٹے کو بنا نہ کالی رات
نشے کی تیز روشنی بھی غلط
چودھویں کی سی چاندنی بھی غلط
ذہن انساں کو بخشتا ہے جمال
نشہ ہو جب یہ قدر نور ہلال
غرفۂ عقل بھیڑ تو اکثر
پر اسے کچ کچا کے بند نہ کر
رات کو لطف جام ہے پیارے
دن کا پینا حرام ہے پیارے
دن ہے عفریت آز کی کھنکا
رات پازیب نازکی جھنکار
دن ہے خاشاک خاک دھول دھواں
رات آئینہ انجمن افشاں
دن مسلح دواں کمر بستہ
رات طاق و رواق و گلدستہ
دن ہے فولاد سنگ تیغ علم
رات کمخواب پنکھڑی شبنم
دن ہے شیون دہائیاں دکھڑے
رات مست انکھڑیاں جواں مکھڑے
دن کڑی دھوپ کی بد آہنگی
رات پچھلے پہر کی سارنگی
دن بہادر کا بان بیر کی رتھ
رات چمپاکلی انگوٹھی نتھ
دن ہے طوفان جنبش و رفتار
رات میزان کاکل و رخسار
آفتاب و شراب ہیں بیری
بوتلیں دن کو ہیں پچھل پیری
کر نہ پامال حرمت اوقات
رات کو دن بنا نہ دن کو رات
پی مگر صرف شام کے ہنگام
اور وہ بھی بہ قدر یک دو جام
وہی انساں ہے خرم و خورسند
جو ہے مقدار و وقت کا پابند
میرے پینے ہی پر نہ جا مری جاں
مجھ سے جینا بھی سیکھ ہیں قرباں
اس کے پینے میں رنگ آتا ہے
جس کو جینے کا ڈھنگ آتا ہے
یہ نصائح بہت ہیں بیش بہا
جلد سو جلد جاگ جلد نہا
باغ میں جا طلوع سے پہلے
تا نگار سحر سے دل بہلے
سرو و شمشاد کو گلے سے لگا
ہر چمن زاد کو گلے سے لگا
منہ اندھیرے فضائے گلشن دیکھ
ساحل و سبزہ زار و سوسن دیکھ
گاہ آوارہ ابر پارے دیکھ
ان کی رفتار میں ستارے دیکھ
جیسے کہرے میں تاب روئے نکو
جیسے جنگل میں رات کو جگنو
گل کا منہ چوم اک ترنم سے
نہر کو گدگدا تبسم سے
جسم کو کر عرق سے نم آلود
تاکہ شبنم پڑھے لہک کے درود
پھینک سنجیدگی کا سر سے بار
ناچ اچھل دندنا چھلانگیں مار
دیکھ آب رواں کا آئینہ
دوڑ ساحل پہ تان کر سینہ
مست چڑیوں کا چہچہانا سن
موج نو مشق کا ترانہ سن
بوستاں میں صبا کا چلنا دیکھ
سبزہ و سرو کا مچلنا دیکھ
شبنم آلود کر سخن کا لباس
چکھ دھندلکے میں بوئے گل کی مٹھاس
شاعری کو کھلا ہوائے سحر
اس کا نفقہ ہے تیری گردن پر
رقص کی لہر میں ہو گم لب نہر
یوں ادا کر عروس شعر کا مہر
جذب کر بوستاں کے نقش و نگار
ذہن میں کھول مصر کا بازار
نرم جھونکوں کا آب حیواں پی
بوئے گل رنگ شبنمستاں پی
گن گنا کر نظر اٹھا کر پی
صبح کا شیر دغدغہ کر پی
تاکہ مجرے کو آئیں کل برکات
دولت جسم و علم و عقل و حیات
یہ نہ طعنہ نہ یہ الہنا ہے
ایک نکتہ بس اور کہنا ہے
غیبت نور ہو کہ کثرت نور
ظلمت تام ہو کہ شعلۂ طور
ایک سا ہے وبال دونوں کا
تیرگی ہے مآل دونوں کا
درخور صاحب مآل نہیں
ہر وہ شے جس میں اعتدال نہیں
شادمانی سے پی نہیں سکتا
جس کو ہوکا ہو جی نہیں سکتا
اے پسر اے برادر اے ہم راز
بن نہ اس طرح دور کی آواز
کوئی بیمار تن نہیں سکتا
خادم خلق بن نہیں سکتا
خدمت خلق فرض ہے تجھ پر
دور ماضی کا قرض ہے تجھ پر
عصر حاضر کے شاعر خوددار
قرض داری کی موت سے ہشیار
ذہن انسانیت ابھار کے جا
زندگانی کا قرض اتار کے جا
تجھ پہ ہندوستان ناز کرے
عمر تیری خدا دراز کرے

جوش ملیح آبادی
نظم

تنہائیٔ شب میں ہے حزیںؔ کیا
انجم نہیں تیرے ہم نشیں کیا
یہ رفعت آسمان خاموش
خوابیدہ زمیں جہان خاموش
یہ چاند یہ دشت و در یہ کہسار
فطرت ہے تمام نسترن زار
موتی خوش رنگ پیارے پیارے
یعنی ترے آنسوؤں کے تارے
کس شے کی تجھے ہوس ہے اے دل
قدرت تری ہم نفس ہے اے دل

علامہ اقبال
نظم

نہیں ہے یوں تو نہیں ہے کہ اب نہیں پیدا
کسی کے حسن میں شمشیر آفتاب کا حسن
نگاہ جس سے ملاؤ تو آنکھ دکھنے لگے
کسی ادا میں ادائے خرام بادصبا
جسے خیال میں لاؤ تو دل سلگنے لگے
نہیں ہے یوں تو نہیں ہے کہ اب نہیں باقی
جہاں میں بزم گہ حسن و عشق کا میلہ
بنائے لطف و محبت، رواج مہر و وفا
یہ کس دیار عدم میں مقیم ہیں ہم تم
جہاں پہ مژدۂ دیدار حسن یار تو کیا
نوید آمد روز جزا نہیں آتی
یہ کس خمار کدے میں ندیم ہیں ہم تم
جہاں پہ شورش رندان مے گسار تو کیا
شکست شیشۂ دل کی صدا نہیں آتی

فیض احمد فیض
نظم

بھلائی سب کی ہو جس سے وہ کام اس کا ہے
جہاں بھی جاؤ وہیں احترام اس کا ہے
اٹھائے سر کوئی کیا سر اٹھا نہیں سکتا
مقابلے کے لئے آگے آ نہیں سکتا
کسی سے اس کو محبت کسی سے الفت ہے
کسی کو اس کی ہے اس کو کسی کی حسرت ہے
وفا و لطف ترحم کی خاص عادت ہے
غرض کرم ہے مدارات ہے عنایت ہے
کسی کو دیکھ ہی سکتا نہیں ہے مشکل میں
یہ بات کیوں ہے کہ رکھتا ہے درد وہ دل میں
وہ رشک شمع ہدایات ہے انجمن کے لئے
وہ مثل‌ روح رواں عنصر بدن کے لئے
وہ ایک ساغر نو محفل کہن کے لئے
وہ خاص مصلح کل شیخ و برہمن کے لئے
لگن اسے ہے کہ سب مالک وطن ہو جائیں
قفس سے چھوٹ کے زینت دہ چمن ہو جائیں
جفا شعار سے ہوتا ہے بر سر پیکار
نہ پاس توپ نہ گولا نہ قبضے میں تلوار
زمانہ تابع ارشاد حکم پر تیار
وہ پاک شکل سے پیدا ہیں جوش کے آثار
کسی خیال سے چرخے کے بل پہ لڑتا ہے
کھڑی ہے فوج یہ تنہا مگر اکڑتا ہے
طرح طرح کے ستم دل پر اپنے سہتا ہے
ہزار کوئی کہے کچھ خموش رہتا ہے
کہاں شریک ہیں آنکھوں سے خون بہتا ہے
سنو سنو کہ یہ اک کہنے والا کہتا ہے
جو آبرو تمہیں رکھنی ہو جوش میں آؤ
رہو نہ بے خود و بیہوش ہوش میں آؤ
اسی کو گھیرے امیر و غریب رہتے ہیں
ندیم و مونس و یار و حبیب رہتے ہیں
ادب کے ساتھ ادب سے ادیب رہتے ہیں
نصیب ور ہیں وہ بڑے خوش نصیب رہتے ہیں
کوئی بتائے تو یوں دیکھ بھال کس کی ہے
جو اس سے بات کرے یہ مجال کس کی ہے
رفاہ عام سے رغبت ہے اور مطلب ہے
انوکھی بات نرالی روش نیا ڈھب ہے
یہی خیال تھا پہلے یہی خیال اب ہے
فقط ہے دین یہی بس یہی تو مذہب ہے
اگر بجا ہے تو بسملؔ کی عرض بھی سن لو
چمن ہے سامنے دو چار پھول تم چن لو

بسمل الہ آبادی
نظم

اے جوانان وطن روح جواں ہے تو اٹھو
آنکھ اس محشر نو کی نگراں ہے تو اٹھو
خوف بے حرمتی و فکر زیاں ہے تو اٹھو
پاس ناموس نگاران جہاں ہے تو اٹھو
اٹھو نقارۂ افلاک بجا دو اٹھ کر
ایک سوئے ہوئے عالم کو جگا دو اٹھ کر
ایک اک سمت سے شبخون کی تیاری ہے
لطف کا وعدہ ہے اور مشق جفا کاری ہے
محفل زیست پہ فرمان قضا جاری ہے
شہر تو شہر ہے گاؤں پہ بھی بمباری ہے
یہ فضا میں جو گرجتے ہوئے طیارے ہیں
برسر دوش ہوا موت کے ہرکارے ہیں
اس طرف ہاتھوں میں شمشیریں ہی شمشیریں ہیں
اس طرف ذہن میں تدبیریں ہی تدبیریں ہیں
ظلم پر ظلم ہیں تعزیروں پہ تعزیریں ہیں
سر پہ تلوار ہے اور پاؤں میں زنجیریں ہیں
ایک ہو ایک کہ ہنگامۂ محشر ہے یہی
عرصۂ زیست کا ہنگامۂ اکبر ہے یہی
اپنی سرحد پہ جو اغیار چلے آتے ہیں
شعلہ افشاں و شرر بار چلے آتے ہیں
خون پیتے ہوئے سرشار چلے آتے ہیں
تم جو اٹھ جاؤ تو بے کار چلے آتے ہیں
خوں جو بہہ نکلا ہے اس خوں میں بہا دو ان کو
ان کی کھودی ہوئی خندق میں گرا دو ان کو
رنگ گلہائے گلستان وطن تم سے ہے
سورش نعرۂ رندان وطن تم سے ہے
نشۂ نرگس خوبان وطن تم سے ہے
عفت ماہ جبینان وطن تم سے ہے
تم ہو غیرت کے امیں تم ہو شرافت کے امیں
اور یہ خطرے میں ہیں احساس تمہیں ہے کہ نہیں
یہ درندے یہ شرافت کے پرانے دشمن
تم کہ ہو حامل آداب و روایات کہن
جادہ پیما کے لیے خضر ہو تم یہ رہزن
تم ہو خرمن کے نگہبان یہ برق خرمن
خطۂ پاک میں زنہار نہ آنے پائیں
آ ہی جائیں جو یہ زندہ تو نہ جانے پائیں
مرد و زن پیر و جواں ان کے مظالم کے شکار
خون معصوم میں ڈوبی ہوئی ان کی تلوار
یہ قیامت کے ہوس ناک غضب کے خوں خار
ان کے عصیاں کی نہ حد ہے نہ جرائم کا شمار
یہ ترحم سے نہ دیکھیں گے کسی کی جانب
ان کی توپوں کے دہن کر دو انہی کی جانب
یہ تو ہیں فتنۂ بیدار دبا دو ان کو
یہ مٹا دیں گے تمدن کو مٹا دو ان کو
پھونک دو ان کو جھلس دو کہ جلا دو ان کو
شان شایان وطن ہو یہ بتا دو ان کو
یاد ہے تم کو کن اسلاف کی تم یادیں ہو
تم تو خالد کے پسر بھیم کی اولادیں ہو
تم تو تنہا بھی نہیں ہو کئی دم ساز بھی ہیں
روس کے مرد بھی ہیں چین کے جاں باز بھی ہیں
کچھ نہ کچھ ساتھ فرنگی کے فسوں ساز بھی ہیں
اور ہم جیسے بہت زمزمہ پرداز بھی ہیں
دور انسان کے سر سے یہ مصیبت کر دو
آگ دوزخ کی بجھا دو اسے جنت کر دو

اسرار الحق مجاز
نظم

صبح کے زریں تبسم میں عیاں ہوتی ہوں میں
رفعت عرش بریں سے پرفشاں ہوتی ہوں میں

علی سردار جعفری
نظم

تھم تھم کے ضو فشاں ہوا ذروں پہ آفتاب
چھڑکا ہوا نے سبزۂ خوابیدہ پر گلاب
مرجھائی پتیوں میں مچلنے لگا شباب
لرزش ہوئی گلوں کو برسنے لگی شراب
رندان مست اور بھی سرمست ہو گئے
تھرا کے ہونٹ جام میں پیوست ہو گئے
دوشیزہ ایک خوش قد و خوش رنگ و خوبرو
مالن کی نور دیدہ گلستاں کی آبرو
مہکا رہی ہے پھولوں سے دامان آرزو
طفلی لئے ہے گود میں طوفان رنگ و بو
رنگینیوں میں کھیلی گلوں میں پلی ہوئی
نورس کلی میں قوس قزح ہے ڈھلی ہوئی

کیفی اعظمی
نظم

پھر خبر گرم ہے وہ جان وطن آتا ہے
پھر وہ زندانیٔ زندان وطن آتا ہے
وہ خراب گل و ریحان وطن آتا ہے
مصر سے یوسف کنعان وطن آتا ہے
''کوئی معشوق بصد شوکت و ناز آتا ہے
سرخ بیرق ہے سمندر میں جہاز آتا ہے''
رند بے کیف کو تھی بادہ و ساغر کی تلاش
ناظر منظر فطرت کو تھی منظر کی تلاش
ایک بھونرے کو خزاں میں تھی گل تر کی تلاش
خود صنم خانۂ آذر کو تھی آذر کی تلاش
مژدہ اے دوست کہ وہ جان بہار آ پہنچا!
اپنے دامن میں لیے برق و شرار آ پہنچا!
اپنا پرچم وہ کچھ اس انداز سے لہراتا ہے
رنگ اغیار کے چہروں سے اڑا جاتا ہے
کوئی شاداں، کوئی حیراں، کوئی شرماتا ہے
کون یہ ساحل مشرق پہ نظر آتا ہے
اپنے میخانے کا اک میکش بے حال ہے یہ
ہاں وہی مرد جواں بخت و جواں سال ہے یہ
مرد سرکش تجھے آدم کی کہانی کی قسم
روح انساں کے تقاضائے نہانی کی قسم
جذبۂ عیش کی ہر شورش فانی کی قسم
تجھ کو اپنی اسی بد مست جوانی کی قسم
آ کہ اک بار گلے سے تو لگا لیں تجھ کو
اپنے آغوش محبت میں اٹھا لیں تجھ کو
نطق تو اب بھی ہے پر شعلہ فشاں ہے کہ نہیں
سوز پنہاں سے تری روح تپاں ہے کہ نہیں
تجھ پہ یہ بار غلامی کا گراں ہے کہ نہیں
جسم میں خون جوانی کا رواں ہے کہ نہیں
اور اگر ہے تو پھر آ تیرے پرستار ہیں ہم
جنس آزادیٔ انساں کے خریدار ہیں ہم
ساقی و رند ترے ہیں مے گلفام تری
اٹھ کہ آسودہ ہے پھر حسرت ناکام تری
برہمن تیرے ہیں کل ملت اسلام تری
صبح کاشی تری، سنگم کی حسیں شام تری
دیکھ شمشیر ہے یہ ساز ہے یہ جام ہے یہ
تو جو شمشیر اٹھا لے تو بڑا کام ہے یہ
دیکھ بدلا نظر آتا ہے گلستاں کا سماں
ساغر و ساز نہ لے، جنگ کے نعرے ہیں یہاں
یہ دعائیں ہیں وہ مظلوم کی آہوں کا دھواں
مائل جنگ نظر آتا ہے ہر مرد جواں
سرفروشان بلاکش کا سہارا بن جا
اٹھ اور افلاک بغاوت کا ستارا بن جا

اسرار الحق مجاز
نظم

پڑھنا لکھنا سکھائے
اچھی راہ بتائے
بد سے ہمیں بچائے
اچھا بچہ بنائے
بھیا پیارا پیارا
گھنٹی خوب بجائے
بستہ بھی لٹکائے
مکتب لے کر جائے
جلدی سے پہنچائے
رکشا پیارا پیارا
پھولوں پر اترائے
خوشبو بھی بکھرائے
گھر آنگن مہکائے
ہریالی بھی لائے
گملا پیارا پیارا
بھیا لے کر جائے
سرکس بھی دکھلائے
لڈو بھی کھلوائے
جو چاہو مل جائے
میلہ پیارا پیارا
جب جب یہ لہرائے
سب کی شان بڑھائے
جس کے ہاتھ یہ آئے
آگے بڑھتا جائے
جھنڈا پیارا پیارا
تاریکی میں آئے
بستر تک پہنچائے
لوری بھی سنوائے
سپنے بھی دکھلائے
سونا پیارا پیارا
سب کو مار بھگائے
جو دیکھے ڈر جائے
الٹی شامت لائے
دشمن کوئی آئے
ڈنڈا پیارا پیارا
بارش میں کام آئے
باہر لے کر جائے
خود تو بھیگا جائے
لیکن ہمیں بچائے
چھاتا پیارا پیارا
جگ مگ روپ دکھائے
چندا ریجھا جائے
رستہ بھی بتلائے
لیکن ہاتھ نہ آئے
تارا پیارا پیارا
تل کر منا کھائے
خاگینہ بنوائے
سالن میں پک جائے
منی کو للچائے
انڈا پیارا پیارا
جب یہ موسم آئے
صحت خوب بنائے
ڈھیروں کپڑے لائے
پھر بھی دور نہ جائے
جاڑا پیارا پیارا
کھانا جب بھی آئے
آگے بڑھ کر لائے
ہم کو سب کھلوائے
خود بھوکا رہ جائے
چمچہ پیارا پیارا
بازاروں میں نکلے
ہاتھ میں سب کے لٹکے
جو کچھ بھی یہ دیکھے
اپنے پیٹ میں رکھے
تھیلا پیارا پیارا
میٹھا میٹھا کھاؤ
منا بولے لاؤ
جلدی سے پکواؤ
سارا چٹ کر جاؤ
حلوہ پیارا پیارا
چاہے کوئی بلائے
سب کی گود میں جائے
دیکھے تو للچائے
ٹافی بسکٹ چائے
ننھا پیارا پیارا
پانی ٹھنڈا کر دے
سر پہ کٹورا رکھے
دوڑے آئیں پیارے
جو چاہے وہ پی لے
مٹکا پیارا پیارا
صورت رنگ برنگی
حالت بھی ہے اچھی
بستر کا ہے ساتھی
عادت میں ہے نرمی
تکیہ پیارا پیارا
گرمی دور بھگائے
ٹھنڈا موسم لائے
تھوڑی بجلی کھائے
بہتر کام بنائے
پنکھا پیارا پیارا
چم چم چمکا جائے
بجلی سا لہرائے
جلدی جلدی آئے
ساتھ میں چلتا جائے
جوتا پیارا پیارا
سب سے پہلے جاگے
پیڑ پہ چڑھ کے بیٹھے
دیواروں پر بھاگے
ککڑوں ککڑوں چیخے
مرغا پیارا پیارا
گھر میں دوڑ لگائے
باہر بھاگ کے جائے
بلی پر غرائے
ننھے کو بہلائے
کتا پیارا پیارا
پیٹھ پہ ہمیں بٹھائے
سرپٹ دوڑ کے جائے
منزل پر پہنچائے
تب جا کر سستائے
گھوڑا پیارا پیارا
جلدی سے اٹھ جائے
چیخے اور چلائے
دانہ پتے کھائے
پھر بھوکا رہ جائے
بکرا پیارا پیارا
پنجرے میں پر تولے
ٹھمک ٹھمک کر ڈولے
جب بھی منہ کو کھولے
میٹھی بولی بولے
طوطا پیارے پیارا
روئی کو لپٹائے
دھاگا بنتا جائے
ہاتھوں میں بل کھائے
بل کھا کر لہرائے
تکلا پیارا پیارا
چوروں سے لڑ جائے
ڈاکو سے ٹکرائے
جو بھی چابی لائے
اس کے بس میں آئے
تالا پیارا پیارا
سڑکیں بھی دکھلائے
گلیوں میں لے جائے
کون کدھر کو جائے
بھید یہ سب بتلائے
نقشہ پیارا پیارا
کلیوں پر منڈ لائے
پھولوں سے بتلائے
ناچے جھومے گائے
مستی میں لہرائے
بھونرا پیارا پیارا
شب کو منہ دکھلائے
سورج سے شرمائے
بادل میں چھپ جائے
رات ہوتے ہی آئے
چندا پیارا پیارا
جھیل کے پاس ہی بیٹھے
چھوٹی مچھلی پکڑے
ہنس ہو کوئی جیسے
موتی کھانے آئے
بگلا پیارا پیارا
آنکھوں سے لگ جائے
راحت ہی پہنچائے
کالے کالے شیشے
ابر کے ٹکڑوں جیسے
چشمہ پیارا پیارا
میرا ہمدم ساتھی
ایسا نہ ہوگا کوئی
صورت بھی ہے پیاری
سیرت بھی ہے اچھی
بستہ پیارا پیارا
وقت پہ سو کر اٹھے
وقت پہ اپنے کھیلے
وقت پہ پڑھنے جائے
اول نمبر آئے
بچہ پیارا پیارا

عادل اسیر دہلوی
نظم

کھلاڑیوں کے خود نوشت دستخط کے واسطے کتابچے لیے ہوئے
کھڑی ہیں منتظر حسین لڑکیاں
ڈھلکتے آنچلوں سے بے خبر حسین لڑکیاں
مہیب پھاٹکوں کے ڈولتے کوارٹر چیخ اٹھے
ابل پڑے الجھتے بازوؤں چٹختی پسلیوں کے پر ہراس قافلے
گرے بڑھے مڑے بھنور ہجوم کے
کھڑی ہیں یہ بھی راستے پہ اک طرف بیاض آرزو بکف
نظر نظر میں نارسا پرستشوں کی داستاں
لرز رہا ہے دم بدم کمان آبروؤں کا خم
کوئی جب ایک ناز بے نیاز سے کتابچوں پہ کھینچتا چلا گیا
حروف کج تراش کی لکیر سی
تو تھم گئیں لبوں پہ مسکراہٹیں شریر سی
کسی عظیم شخصیت کی تمکنت
حنائی انگلیوں پہ کانپتے ورق پہ جھک گئی
تو زرنگار پلوؤں سے جھانکتی کلائیوں کی تیز نبض رک گئی
وہ بالر ایک مہوشوں کے جمگھٹے میں گھر گیا وہ صفحۂ بیاض پر
بصد غرور کلک گوہریں پھریں
حسین جھلملاہٹوں کے درمیاں وکٹ گری
میں اجنبی میں بے نشاں میں پا بہ گل
نہ رفعت مقام ہے نہ شہرت دوام ہے یہ لوح دل پہ لوح دل
نہ اس پہ کوئی نقش ہے نہ اس پہ کوئی نام ہے

مجید امجد
نظم

میں عازم مے خانہ تھی کل رات کہ دیکھا
اک کوچۂ پر شور میں اصحاب طریقت
تھے دست و گریباں
خاکم بدہن پیچ عماموں کے کھلے تھے
فتووں کی وہ بوچھاڑ کہ طبقات تھے لرزاں
دستان مبارک میں تھیں ریشان مبارک
موہائے مبارک تھے فضاؤں میں پریشاں
کہتے تھے وہ باہم کہ حریفان سیہ رو
کفار ہیں بد خو
زندیق ہیں ملعون ہیں بنتے ہیں مسلماں
ہاتف نے کہا رو کے کہ اے رب سماوات!
لا ریب سراسر ہیں بجا دونوں کے فتوات
خلقت ہے بہت ان کے عذابوں سے ہراساں
اب ان کی ہوں اموات!

فہمیدہ ریاض
نظم

شوق کی حد مگر چاند تک تو نہیں
ہے ابھی رفعت آسماں اور بھی
ہے ثریا کے پیچھے ثریا رواں
کہکشاں سے پرے کہکشاں اور بھی
جھانکتی ہیں فضاؤں کے پیچاک سے
رنگ اور نور کی وادیاں اور بھی
اور بھی منزلیں، اور بھی مشکلیں
ہیں ابھی عشق کے امتحاں اور بھی

علی سردار جعفری
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے