Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "rijhaane"

Nazm MATCHES FOR "rijhaane"

Nazm

aam muafi ke liye

bain kartii aurato.n se
ham puuchh rahe hai.n 'miir' ke sher kaa matlab
beghar bhau.nro.n se kah rahe hai.n
shakuntlaa ko rijhaane ke liye
luu bharii dopahar me.n
kuukne kaa taqaaza kar rahe hai.n koyal se
is mushkil vaqt me.n
kuchh log kah rahe hai.n ham se
apnii vafaadaarii saabit karne ke liye
ek TuuTe hu.e bartan ko
chaak se vafaadaarii saabit karne ke liye
kuchh log taaliyaa.n bajaa rahe hai.n
kuchh hairaan ho kar dekh rahe hai.n
un kii aur hamaarii shakl
ye maasuum hai.n
inhe.n mu.aaf kar denaa mere KHudaa
aur mumkin ho to hame.n bhii
ki ham jii rahe hai.n
is mushkil vaqt me.n bhii

Nomaan Shauque
Nazm

itna husn kya karoge

chitvane.n rijhaane vaalii
saadgii sataane vaalii
har adaa lubhaane vaalii
kaun sii adaa karoge
itnaa husn kyaa karoge

Mahboob Khizan
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

mirza ghaalib

fikr-e-insaa.n par tirii hastii se ye raushan hu.aa
hai par-e-murG-e-taKHayyul kii rasaa.ii taa-kujaa
thaa saraapaa ruuh tuu bazm-e-suKHan paikar tiraa
zeb-e-mahfil bhii rahaa mahfil se pinhaa.n bhii rahaa
diid terii aa.nkh ko us husn kii manzuur hai
ban ke soz-e-zindagii har shai me.n jo mastuur hai
mahfil-e-hastii tirii barbat se hai sarmaaya-daar
jis tarah naddii ke naGmo.n se sukuut-e-kohsaar
tere firdaus-e-taKHayyul se hai qudrat kii bahaar
terii kisht-e-fikr se ugte hai.n aalam sabza-vaar
zindagii muzmar hai terii shoKHi-e-tahriir me.n
taab-e-goyaa.ii se jumbish hai lab-e-tasviir me.n
nutq ko sau naaz hai.n tere lab-e-ejaaz par
mahv-e-hairat hai surayyaa rif.at-e-parvaaz par
shaahid-e-mazmuu.n tasadduq hai tire andaaz par
KHanda-zan hai Guncha-e-dillii gul-e-shiiraaz par
aah tuu uj.Dii hu.ii dillii me.n aaraamiida hai
gulshan-e-viimar me.n teraa ham-navaa KHvaabiida hai
lutf-e-goyaa.ii me.n terii ham-sarii mumkin nahii.n
ho taKHayyul kaa na jab tak fikr-e-kaamil ham-nashii.n
haa.e ab kyaa ho ga.ii hindostaa.n kii sar-zamii.n
aah ai nazzaara-aamoz-e-nigaah-e-nukta-bii.n
gesu-e-urduu abhii minnat-paziir-e-shaana hai
sham.a ye saudaa.i-e-dil-sozi-e-parvaana hai
ai jahaanaabaad ai gahvaara-e-ilm-o-hunar
hai.n saraapaa naala-e-KHaamosh tere baam dar
zarre zarre me.n tire KHvaabiida hai.n shams o qamar
yuu.n to poshiida hai.n terii KHaak me.n laakho.n guhar
dafn tujh me.n ko.ii faKHr-e-rozgaar aisaa bhii hai
tujh me.n pinhaa.n ko.ii motii aabdaar aisaa bhii hai

Allama Iqbal
Nazm

o des se aane wale bata

o des se aane vaalaa hai bataa
o des se aane vaale bataa
kis haal me.n hai.n yaaraan-e-vatan
aavaara-e-Gurbat ko bhii sunaa
kis rang me.n hai kan.aan-e-vatan
vo baaG-e-vatan firdaus-e-vatan
vo sarv-e-vatan raihaan-e-vatan
o des se aane vaale bataa

Akhtar Shirani
Nazm

wada

is se pahle ki terii chashm-e-karam
ma.azarat kii nigaah ban jaa.e
is se pahle ki tere baam kaa husn
rif.at-e-mehr-o-maah ban jaa.e
pyaar Dhal jaa.e mere ashko.n me.n
aarzuu ek aah ban jaa.e
mujh pe aa jaa.e ishq kaa ilzaam
aur tuu be-gunaah ban jaa.e
mai.n tiraa shahr chho.D jaa.uu.ngaa
is se pahle ki saadgii terii
lab-e-KHaamosh ko gila kah de
mai.n tujhe chaaragar KHayaal karuu.n
tuu mire Gam ko laa-davaa kah de
terii majbuuriyaa.n na dekh sake
aur dil tujh ko bevafaa kah de
jaane mai.n be-KHudii me.n kyaa puuchhuu.n
jaane tuu be-ruKHii se kyaa kah de
mai.n tiraa shahr chho.D jaa.uu.ngaa
chaara-e-dard ho bhii saktaa thaa
mujh ko itnii KHushii bahut kuchh hai
pyaar go jaavedaa.n nahii.n phir bhii
pyaar kii yaad bhii bahut kuchh hai
aane vaale dino.n kii zulmat me.n
aaj kii raushnii bahut kuchh hai
us tahii-daamanii ke aalam me.n
jo milaa hai vahii bahut kuchh hai
mai.n tiraa shahr chho.D jaa.uu.ngaa
chho.D kar saahil-e-muraad chalaa
ab safiina miraa kahii.n Thahre
zahar piinaa miraa muqaddar hai
aur tire ho.nT a.ngbii.n Thahre
kis tiraa tere aastaa.n pe rukuu.n
jab na paa.nv tale zamii.n Thahre
us se behtar hai dil yahii samjhe
tuu ne rokaa thaa ham nahii.n Thahre
mai.n tiraa shahr chho.D jaa.uu.ngaa
mujh ko itnaa zaruur kahnaa hai
vaqt-e-ruKHsat salaam se pahle
ko.ii naama nahii.n likhaa mai.n ne
tere harf-e-payaam se pahle
to.D luu.n rishta-e-nazar me.n bhii
tum utar jaa.o baam se pahle
le mirii jaan meraa va.ada hai
kal kisii vaqt shaam se pahle
mai.n tiraa shahr chho.D jaa.uu.ngaa

Saifuddin Saif
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

autograph

mai.n ajnabii mai.n be-nishaa.n
mai.n paa-ba-gil
na rif.at-e-maqaam hai na shohrat-e-davaam hai
ye lauh-e-dil ye lauh-e-dam
na is pe ko.ii naqsh hai na is pe ko.ii naam hai

Majeed Amjad
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

tanhai

tanhaa.ii-e-shab me.n hai hazii.n kyaa
anjum nahii.n tere ham-nashii.n kyaa
ye rif'at-e-aasmaan-e-KHaamosh
KHvaabiida zamii.n jahaan-e-KHaamosh
ye chaa.nd ye dasht-o-dar ye kohsaar
fitrat hai tamaam nastaran-zaar
motii KHush-rang pyaare pyaare
yaa'nii tire aa.nsu.o.n ke taare
kis shai kii tujhe havas hai ai dil
qudrat tirii ham-nafas hai ai dil

Allama Iqbal
Nazm

ye kis dayar-e-adam mein

nahii.n hai yuu.n to nahii.n hai ki ab nahii.n paidaa
kasii ke husn me.n shamshiir-e-aaftaab kaa husn
nigaah jis se milaa.o to aa.nkh dukhne lage
kisii adaa me.n adaa-e-KHiraam-e-baad-e-sabaa
jise KHayaal me.n laa.o to dil sulagne lage
nahii.n hai yuu.n to nahii.n hai ki ab nahii.n baaqii
jahaa.n me.n bazm-gah-e-husn-o-ishq kaa mela
binaa-e-lutf-o-mohabbat, rivaaj-e-mehr-o-vafaa
ye kas dayaar-e-adam me.n muqiim hai.n ham tum
jahaa.n pe muz.daa-e-diidaar-e-husn-e-yaar to kyaa
naved-e-aamad-e-roz-e-jazaa nahii.n aatii
ye kis KHumaar-kade me.n nadiim hai.n ham tum
jahaa.n pe shorish-e-rindaan-e-mai-gusaar to kyaa
shikast-e-shiisha-e-dil kii sadaa nahii.n aatii

Faiz Ahmad Faiz
Nazm

mahatma-gandhi

bhalaa.ii sab kii ho jis se vo kaam us kaa hai
jahaa.n bhii jaa.o vahii.n ehtiraam us kaa hai
uThaa.e sar ko.ii kyaa sar uThaa nahii.n saktaa
muqaable ke liye aage aa nahii.n saktaa
kisii se us ko mohabbat kisii se ulfat hai
kisii ko us kii hai us ko kisii kii hasrat hai
vafaa-o-lutf tarahhum kii KHaas aadat hai
Garaz karam hai mudaaraat hai inaayat hai
kisii ko dekh hii saktaa nahii.n hai mushkil me.n
ye baat kyuu.n hai ki rakhtaa hai dard vo dil me.n
vo rashk-e-sham-e-hidaayaat hai anjuman ke liye
vo misl-e-ruuh-e-ravaa.n unsur-e-badan ke liye
vo ek saaGar-e-nau mahfil-e-kuhan ke liye
vo KHaas maslah-e-kul shaiKH-o-barahman ke liye
lagan use hai ki sab maalik-e-vatan ho jaa.e.n
qafas se chhuuT ke ziinat-dah-e-chaman ho jaa.e.n
jafaa-shi.aar se hotaa hai bar-sar-e-paikaar
na paas top na golaa na qabze me.n talvaar
zamaana taaba-e-irshaad hukm par tayyaar
vo paak shakl se paidaa hai.n josh ke aasaar
kisii KHayaal se charKHe ke bal pe la.Dtaa hai
kha.Dii hai fauj ye tanhaa magar aka.Dtaa hai
tarah tarah ke sitam dil par apne sahtaa hai
hazaar ko.ii kahe kuchh KHamosh rahtaa hai
kahaa.n shariik hai.n aa.nkho.n se KHuun bahtaa hai
suno suno ki ye ik kahne vaalaa kahtaa hai
jo aabruu tumhe.n rakhnii ho josh me.n aa.o
raho na be-KHud-o-be-hosh hosh me.n aa.o
usii ko ghere amiir-o-Gariib rahte hai.n
nadiim-o-muunish-o-yaar-o-habiib rahte hai.n
adab ke saath adab se adiib rahte hai.n
nasiib-var hai.n vo ba.De KHush-nasiib rahte hai.n
ko.ii bataa.e to yuu.n dekh-bhaal kis kii hai
jo us se baat kare ye majaal kis kii hai
rifaah-e-aam se raGbat hai aur matlab hai
anokhii baat niraalii ravish nayaa Dhab hai
yahii KHayaal thaa pahle yahii KHayaal ab hai
faqat hai diin yahii bas yahii to maz.hab hai
agar bajaa hai to 'bismil' kii arz bhii sun lo
chaman hai saamne do-chaar phuul tum chun lo

Bismil Allahabadi
Nazm

aahang-e-nau

ai javaanaan-e-vatan ruuh javaa.n hai to uTho
aa.nkh us mahshar-e-nau kii nigaraa.n hai to uTho
KHauf-e-be-hurmatii-o-fikr-e-ziyaa.n hai to uTho
paas-e-naamuus-e-nigraan-e-jahaa.n hai to uTho
uTho naqqaara-e-aflaak bajaa do uTh kar
ek so.e hu.e aalam ko jagaa do uTh kar
ek ik samt se shab-KHuun kii tayyaarii hai
lutf kaa va.ada hai aur mashq-e-jafaa-kaarii hai
mahfil-e-ziist pe farmaan-e-qazaa jaarii hai
shahr to shahr hai gaa.nv pe bhii bambaarii hai
ye fazaa me.n jo garajte hu.e tayyaare hai.n
barsar-e-dosh-e-havaa maut ke harkaare hai.n
is taraf haatho.n me.n shamshiire.n hii shamshiire.n hai.n
us taraf zehn me.n tadbiire.n hii tadbiire.n hai.n
zulm par zulm hai.n taaziiro.n pe ta.aziire.n hai.n
sar pe talvaar hai aur paa.nv me.n zanjiire.n hai.n
ek ho ek ki ha.ngaama-e-mahshar hai yahii
arsa-e-ziist kaa hangaama-e-akbar hai yahii
apnii sarhad pe jo aGyaar chale aate hai.n
sho.ala-afshaa.n o sharar-baar chale aate hai.n
KHuun piite hu.e sarshaar chale aate hai.n
tum jo uTh jaa.o to be-kaar chale aate hai.n
KHuu.n jo bah niklaa hai us KHuu.n me.n bahaa do un ko
un kii khodii hu.ii KHandaq me.n giraa do un ko
ra.ng-e-gul-haa-e-gulistaan-e-vatan tum se hai
sorish-e-na.ara-e-rindaan-e-vatan tum se hai
nashsha-e-nargis-e-KHuubaan-e-vatan tum se hai
iffat-e-maah-e-jabiinaan-e-vatan tum se hai
tum ho Gairat ke amii.n tum ho sharaafat ke amii.n
aur ye KHatre me.n hai.n ehsaas tumhe.n hai ki nahii.n
ye darinde ye sharaafat ke puraane dushman
tum ki ho haamil-e-aadaab-o-rivaayaat-e-kuhan
jaada-paimaa ke liye KHizr ho tum ye rahzan
tum ho KHirman ke nigahbaan ye barq-e-KHirman
KHitta-e-paak me.n zinhaar na aane paa.e.n
aa hii jaa.e.n jo ye zinda to na jaane paa.e.n
mard-o-zan piir-o-javaa.n in ke mazaalim ke shikaar
KHuun-e-ma.asuum me.n Duubii hu.ii in kii talvaar
ye qayaamat ke havasnaak Gazab ke KHuu.n-KHaar
in ke isyaa.n kii na had hai na jaraa.em kaa shumaar
ye tarahhum se na dekhe.nge kisii kii jaanib
in kii topo.n ke dahan kar do unhii kii jaanib
ye to hai.n fitna-e-bedaar dabaa do in ko
ye miTaa de.nge tamaddun ko miTaa do in ko
phuu.nk do in ko jhulas do ki jilaa do in ko
shaan-e-shaayaan-e-vatan ho ye bataa do in ko
yaad hai tum ko kin aslaaf kii tum yaade.n ho
tum to KHaalid ke pisar bhiim kii aulaade.n ho
tum to tanhaa bhii nahii.n ho ka.ii dam-saaz bhii hai.n
ruus ke mard bhii hai.n chiin ke jaa.n-baaz bhii hai.n
kuchh na kuchh saath fara.ngii ke fusuu.n-saaz bhii hai.n
aur ham jaise bahut zamzama-pardaaz bhii hai.n
duur insaan ke sar se ye musiibat kar do
aag dozaKH kii bujhaa do ise jannat kar do

Asrarul Haq Majaz
Nazm

aazadi

sub.h ke zarrii.n tabassum me.n ayaa.n hotii huu.n mai.n
rif.at-e-arsh-e-barii.n se par-fishaa.n hotii huu.n mai.n

Ali Sardar Jafri
Nazm

doshiza malan

tham tham ke zau-fishaa.n hu.aa zarro.n pe aaftaab
chhi.Dkaa havaa ne sabza-e-KHvaabiida par gulaab
murjhaa.ii pattiyo.n me.n machalne lagaa shabaab
larzish hu.ii gulo.n ko barasne lagii sharaab
rindaan-e-mast aur bhii sarmast ho ga.e
tharraa ke ho.nT jaam me.n paivast ho ga.e
doshiiza ek KHush-qad o KHush-ra.ng-o-KHuub-ruu
maalan kii nuur-diida gulistaa.n kii aabruu
mahkaa rahii hai phuulo.n se daamaan-e-aarzuu
tiflii liye hai god me.n tuufaan-e-ra.ng-o-buu
ra.ngiiniyo.n me.n khelii gulo.n me.n palii hu.ii
nauras kalii me.n qaus-e-quzah hai Dhalii hu.ii

Kaifi Azmi
Nazm

ek jila-watan ki wapsi

phir KHabar garm hai vo jaan-e-vatan aataa hai
phir vo zindaanii-e-zindaan-e-vatan aataa hai
vo KHaraab-e-gul-o-raihaan-e-vatan aataa hai
misr se yuusuf-e-kan.aan-e-vatan aataa hai
''ko.ii ma.ashuuq ba-sad-shaukat-o-naaz aataa hai
surKH bairaq hai samundar me.n jahaaz aataa hai''
ri.nd-e-be-kaif ko thii baada-o-saaGar kii talaash
naazir-e-manzar-e-fitrat ko thii manzar kii talaash
ek bha.nvre ko KHizaa.n me.n thii gul-e-tar kii talaash
KHud sanam-KHaana-e-aazar ko thii aazar kii talaash
muzhda ai dost ki vo jaan-e-bahaar aa pahu.nchaa!
apne daaman me.n liye barq-o-sharaar aa pahu.nchaa!
apnaa parcham vo kuchh is andaaz se lahraataa hai
ra.ng aGyaar ke chehro.n se u.Daa jaataa hai
ko.ii shaadaa.n, ko.ii hairaa.n, ko.ii sharmaataa hai
kaun ye saahil-e-mashriq pe nazar aataa hai
apne maiKHaane kaa ik mai-kash-e-behaal hai ye
haa.n vahii mard-e-javaa.n-baKHt o javaa.n-saal hai ye
mard-e-sarkash tujhe aadam kii kahaanii kii qasam
ruuh-e-insaa.n ke taqaazaa-e-nihaanii kii qasam
jazba-e-aish kii har shorish-e-faanii kii qasam
tujh ko apnii isii bad-mast javaanii kii qasam
aa ki ik baar gale se to lagaa le.n tujh ko
apne aaGosh-e-mohabbat me.n uThaa le.n tujh ko
nutq to ab bhii hai par shola-fishaa.n hai ki nahii.n
soz-e-pinhaa.n se tirii ruuh tapaa.n hai ki nahii.n
tujh pe ye baar Gulaamii kaa giraa.n hai ki nahii.n
jism me.n KHuun javaanii kaa ravaa.n hai ki nahii.n
aur agar hai to phir aa tere parastaar hai.n ham
jins-e-aazaadii-e-insaa.n ke KHariidaar hai.n ham
saaqii o rind tire hai.n mai-e-gulfaam tirii
uTh ki aasuuda hai phir hasrat-e-naakaam tirii
barhaman tere hai.n kul millat-e-islaam tirii
sub.h-e-kaashii tirii, sa.ngam kii hasii.n shaam tirii
dekh shamshiir hai ye saaz hai ye jaam hai ye
tuu jo shamshiir uThaa le to ba.Daa kaam hai ye
dekh badlaa nazar aataa hai gulistaa.n kaa samaa.n
saaGar o saaz na le, ja.ng ke na.are hai.n yahaa.n
ye du.aa.e.n hai.n vo mazluum kii aaho.n kaa dhu.aa.n
maa.il-e-ja.ng nazar aataa hai har mard-e-javaa.n
sarfaroshaan-e-balaa-kash kaa sahaaraa ban jaa
uTh aur aflaak-e-baGaavat kaa sitaaraa ban jaa

Asrarul Haq Majaz
Nazm

pyare pyare

pa.Dhnaa likhnaa sikhaa.e
achchhii raah bataa.e
bad se hame.n bachaa.e
achchhaa bachcha banaa.e
bhayyaa pyaaraa pyaaraa
ghanTii KHuub bajaa.e
basta bhii laTkaa.e
maktab le kar jaa.e
jaldii se pahu.nchaa.e
rickshaw pyaaraa pyaaraa
phuulo.n par itraa.e
KHushbuu bhii bikhraa.e
ghar aa.ngan mahkaa.e
hariyaalii bhii laa.e
gamlaa pyaaraa pyaaraa
bhayyaa le kar jaa.e
circus bhii dikhlaa.e
laDDuu bhii khilvaa.e
jo chaaho mil jaa.e
mela pyaaraa pyaaraa
jab jab ye lahraa.e
sab kii shaan ba.Dhaa.e
jis ke haath ye aa.e
aage ba.Dhtaa jaa.e
jhanDaa pyaaraa pyaaraa
taariikii me.n aa.e
bistar tak pahu.nchaa.e
lorii bhii sunvaa.e
sapne bhii dikhlaa.e
sonaa pyaaraa pyaaraa
sab ko maar bhagaa.e
jo dekhe Dar jaa.e
ulTii shaamat laa.e
dushman ko.ii aa.e
Da.nDaa pyaaraa pyaaraa
baarish me.n kaam aa.e
baahar le kar jaa.e
KHud to bhiigaa jaa.e
lekin hame.n bachaa.e
chhaataa pyaaraa pyaaraa
jagmag ruup dikhaa.e
chandaa riijhaa jaa.e
rasta bhii batlaa.e
lekin haath na aa.e
taaraa pyaaraa pyaaraa
tal kar munnaa khaa.e
KHaagiina banvaa.e
saalan me.n pak jaa.e
munnii ko lalchaa.e
anDaa pyaaraa pyaaraa
jab ye mausam aa.e
sehat KHuub banaa.e
Dhero.n kap.De laa.e
phir bhii duur na jaa.e
jaa.Daa pyaaraa pyaaraa
khaanaa jab bhii aa.e
aage ba.Dh kar laa.e
ham ko sab khilvaa.e
KHud bhuukaa rah jaa.e
chamcha pyaaraa pyaaraa
baazaaro.n me.n nikle
haath me.n sab ke laTke
jo kuchh bhii ye dekhe
apne peT me.n rakhe
thailaa pyaaraa pyaaraa
miiThaa miiThaa khaa.o
munnaa bole laa.o
jaldii se pakvaa.o
saaraa chaT kar jaa.o
halva pyaaraa pyaaraa
chaahe ko.ii bulaa.e
sab kii god me.n jaa.e
dekhe to lalchaa.e
toffee biscuit chaa.e
nanhaa pyaaraa pyaaraa
paanii ThanDaa kar de
sar pe kaToraa rakhe
dau.De aa.e.n pyaare
jo chaahe vo pii le
maTkaa pyaaraa pyaaraa
suurat rang bira.ngii
haalat bhii hai achchhii
bistar kaa hai saathii
aadat me.n hai narmii
takiya pyaaraa pyaaraa
garmii duur bhagaa.e
ThanDaa mausam laa.e
tho.Dii bijlii khaa.e
behtar kaam banaa.e
pa.nkhaa pyaaraa pyaaraa
cham cham chamkaa jaa.e
bijlii saa lahraa.e
jaldii jaldii aa.e
saath me.n chaltaa jaa.e
juutaa pyaaraa pyaaraa
sab se pahle jaage
pe.D pe cha.Dh ke baiThe
diivaaro.n par bhaage
kuuk.Duu.n kuuk.Duu.n chiiKHe
murGaa pyaaraa pyaaraa
ghar me.n dau.D lagaa.e
baahar bhaag ke jaa.e
billii par Gurraa.e
nanhe ko bahlaa.e
kuttaa pyaaraa pyaaraa
piiTh pe hame.n biThaa.e
sarpaT dau.D ke jaa.e
manzil par pahu.nchaa.e
tab jaa kar sustaa.e
gho.Daa pyaaraa pyaaraa
jaldii se uTh jaa.e
chiiKHe aur chillaa.e
daana patte khaa.e
phir bhuukaa rah jaa.e
bakraa pyaaraa pyaaraa
pinjre me.n par tole
Thumak Thumak kar Dole
jab bhii mu.nh ko khole
miiThii bolii bole
totaa piyaare pyaaraa
ru.ii ko lipTaa.e
dhaagaa bantaa jaa.e
haatho.n me.n bal khaa.e
bal khaa kar lahraa.e
taklaa pyaaraa pyaaraa
choro.n se la.D jaa.e
Daaku se Takraa.e
jo bhii chaabii laa.e
us ke bas me.n aa.e
taalaa pyaaraa pyaaraa
sa.Dke.n bhii dikhlaa.e
galiyo.n me.n le jaa.e
kaun kidhar ko jaa.e
bhed ye sab batlaa.e
naqsha pyaaraa pyaaraa
kaliyo.n par manD laa.e
phuulo.n se batlaa.e
naache jhuume gaa.e
mastii me.n lahraa.e
bhau.nraa pyaaraa pyaaraa
shab ko mu.nh dikhlaa.e
suuraj se sharmaa.e
baadal me.n chhup jaa.e
raat hote hii aa.e
chandaa pyaaraa pyaaraa
jhiil ke paas hii baiThe
chhoTii machhlii pak.De
hans ho ko.ii jaise
motii khaane aa.e
bagulaa pyaaraa pyaaraa
aa.nkho.n se lag jaa.e
raahat hii pahu.nchaa.e
kaale kaale shiishe
abr ke Tuk.Do.n jaise
chashma pyaaraa pyaaraa
meraa hamdam saathii
aisaa na hogaa ko.ii
suurat bhii hai pyaarii
siirat bhii hai achchhii
basta pyaaraa pyaaraa
vaqt pe so kar uThe
vaqt pe apne khele
vaqt pe pa.Dhne jaa.e
avval number aa.e
bachcha pyaaraa pyaaraa

Aadil Aseer Dehlvi
Nazm

autograph

khilaa.Diyo.n ke KHud-navisht dastaKHat ke vaaste kitaabche liye hu.e
kha.Dii hai.n muntazir hasiin la.Dkiyaa.n
Dhalakte aa.nchalo.n se be-KHabar hasiin la.Dkiyaa.n
muhiib phaaTako.n ke Dolte quarter chiiKH uThe
ubal pa.De ulajhte baazu.o.n chaTaKHtii pasliyo.n ke pur-hiraas qaafile
gire ba.Dhe mu.De bha.nvar hujuum ke
kha.Dii hai.n ye bhii raaste pe ik taraf bayaaz-e-aarzuu-ba-kaf
nazar nazar me.n naa-rasaa parastisho.n kii daastaa.n
laraz rahaa hai dam-ba-dam kamaan aabruu.o.n kaa KHam
ko.ii jab ek naaz-e-be-niyaaz se kitaabcho.n pe khii.nchtaa chalaa gayaa
Huruuf-e-kaj-taraash kii lakiir sii
to tham ga.ii.n labo.n pe muskuraahaTe.n shariir sii
kisii aziim shaKHsiyat kii tamkanat
hinaa.ii u.ngliyo.n pe kaa.npte varaq pe jhuk ga.ii
to zar-nigaar pallu.o.n se jhaa.nktii kalaa.iyo.n kii tez nabz ruk ga.ii
vo bowler ek mahvasho.n ke jamghaTe me.n ghir gayaa vo safha-e-bayaaz par
ba-sad Guruur kilk-e-gauharii.n phire.n
hasiin jhilmilaahaTo.n ke darmiyaa.n wicket girii
mai.n ajnabii mai.n be-nishaa.n mai.n paa-ba-gil
na rif.at-e-maqaam hai na shohrat-e-davaam hai ye lauh-e-dil pe lauh-e-dil
na us pe ko.ii naqsh hai na us pe ko.ii naam hai

Majeed Amjad
Nazm

KHakam-ba-dahan

mai.n aazim-e-mai-KHaanaa thii kal raat ki dekhaa
ik kuucha-e-pur-shor me.n as.haab-e-tariiqat
the dast o girebaa.n
KHaakam-ba-dahan pech amaamo.n ke khule the
fatvo.n kii vo bochhaa.D ki tabqaat the larzaa.n
dastaan-e-mubaarak me.n thii.n riishaan-e-mubaarak
muu-haa-e-mubaarak the fazaa.o.n me.n pareshaa.n
kahte the vo baaham ki hariifaan-e-siyah-ruu
kuffaar hai.n bad-KHuu
zindiiq hai.n mal.uun hai.n bante hai.n musalmaa.n
haatif ne kahaa ro ke ki ai rab-e-samaavaat!
laa-raib saraasar hai.n bajaa dono.n ke fatvaat
KHilqat hai bahut un ke azaabo.n se hiraasaa.n
ab un kii ho.n amvaat!

Fahmida Riaz
Nazm

sar-e-tur

shauq kii had magar chaa.nd tak to nahii.n
hai abhii rif.at-e-aasmaa.n aur bhii
hai surayyaa ke piichhe surayyaa ravaa.n
kahkashaa.n se pare kahkashaa.n aur bhii
jhaa.nktii hai.n fazaa.o.n ke pechaak se
ra.ng aur nuur kii vaadiyaa.n aur bhii
aur bhii manzile.n, aur bhii mushkile.n
hai.n abhii ishq ke imtihaa.n aur bhii

Ali Sardar Jafri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now