مونچھ میں اٹکے ایک قطرے کی کہانی

ناک کی سیدھ میں جاتی سڑک کو کنارے کنارے کھڑے درختوں کی شاخوں نے مل کر محراب دار کر دیا تھا۔ دونوں قطار درخت ایسے گھنے اور آپس میں گتھے ہوے تھے کہ جیسے نہر کا بلند پشتہ۔ یہ کچی سڑک سیدھے جا کرگاؤں کے پاؤں کو چھوتی اور پھر دائیں طرف منھ کر کے دیگر گوٹھوں کی طرف چلی جاتی۔ گاؤں ایک ٹیلے اور اس کی اترائی پر کھڑا تھا۔ ہیئت ایسی کہ درمیانی حصہ کسی گنبذ (گنبد) کی طرح دور سے نظر آنے لگتا اور قریب جاؤ تو گھروں کی کچی اور ٹیڑھی میڑھی دیواروں کا ایسا بے ہنگم مجموعہ جیسے مختلف قد کے ایک صورت لوگ قطار میں سیدھا کھڑے ہونے پر قادر نہ ہوں۔ زیادہ سے زیادہ سو گھر ہوں گے، کچی اینٹوں سے بنے، جن پر گارے کا لیپ انھیں یک جان کر دیتا تھا۔ محراب دار سڑک جس جگہ گاؤں کو چھو کر مڑتی تھی وہاں گھیراؤ میں ایک میدان تھا جس پر جٹا دار برگد چھاؤں کیے کھڑا تھا۔ برگد کی اونچائی دو منزلہ گھر سے کم نہ ہوگی اور چھاؤں ایسی میٹھی کہ اس کے نیچے بیٹھتے اونگھ آنے لگتی۔ کلو موالی کا قول تھا کہ اس برگد کو بھنگ پلا کر بڑا کیا گیا ہے۔ برگد کے گرد ایک مختصر چبوترا بنا تھا جو اس کے جسیم تنے کے گھوم جاتا تھا۔ یہ چبوترا بیٹھنے اور لیٹنے کے کام آتا۔ اس پر ایک گھڑونچی رکھی تھی جس پر تین مٹکے پیٹ پھلائے پڑے رہتے تھے۔ ماما پیرل کا پورا خیال ہوتا کہ ایک بھی خالی نہ رہے۔ ماما پیرل علائقے (علاقے) والوں کے لیے تو پیرل ترخان تھا مگر گاؤں بھر ماما پیرل کے نام سے ہی اسے جانتا تھا۔ حتیٰ کہ اس کے اپنے بچے بھی اسے ماما ہی کہتے۔ ماما کا چھپر برگد کے مغربی طرف کھڑا تھا جس کے اگواڑ ایک لمبا ٹیبل نما تخت رکھا تھا جس پر وہ دروازے، کھڑکیاں، چارپائیاں، گھڑونچیاں اور کلہاڑی کے دستے وغیرہ بنانے کا کام انجام دیتا تھا۔ چھپر کے اندر ایک صندوق اور ایک لکڑی کی الماری رکھی تھی جو دونوں بغیر تالے بند رہتی تھیں۔ صندوق کے اندر ماما پیرل کے اوزار بھرے تھے اور الماری روز مرہ کی اشیا، تیل صابن سے زیادہ بچوں کے کھانے پینے کی چیزوں سے بھری تھی۔ گاؤں میں ایک بڑا اور ایک چھوٹا ہٹ بھی موجود تھا لیکن گاؤں بھر کے بچوں کا رخ ماما پیرل کی طرف ہوتا تھا۔ بِکری اتنی تھی کہ روز صبح شہر سے سامان خریدنے جانا پڑتا۔ وہ اپنی بنا بریک سائیکل کے کیریئر پر دونوں طرف سامان رکھنے والے ڈول لٹکائے، محراب دار سڑک پر واپس آتادکھائی دیتا تو اس کے انتظار میں برگد کے نیچے کھڑے بچے اس کی جانب دوڑ پڑتے۔ پھر اسی طرح اچھلتے کودتے اس کی سائیکل کے ساتھ ساتھ واپس آتے۔ ماما پیرل ترنگ میں لہکتے ہوے سائیکل چلاتا آتا۔ سائیکل کے ایک پیڈل کو دباتے ہوے وہ اپنے چھوٹے قد کے ساتھ اس طرف ڈولنے لگتا اور پھر دوسری طرف کا پیڈل اسے اپنی طرف کھینچنے لگتا۔ ڈولتے ہوے اس کے سانولے منھ سے بچوں کے لیے تواتر سے ایک آواز ابھرتی جاتی، ’’ہٹ جاؤ تمھاری نانی مر جائے، ہٹ جاؤ تمھاری نانی مر جائے۔‘‘ مگر اس کی اس بات کا کھلکھلاتے بچے کوئی اثر نہ لیتے۔ وہ اس کے آگے اور دائیں بائیں دوڑتے آتے۔ برگد کے نیچے پہنچ کر وہ اپنے گول مٹول اور تھلتھلاتے وجود کے ساتھ سائیکل سے اترتا اور اپنی بنا بریک سائیکل روکتے گھسٹتا جاتا۔ کبھی کوئی بیٹھا ہوا سائیکل کی حالت پر جملہ نکال بیٹھتا،

’’ماما، اب تو جباب (جواب) دے گئی ہے۔ چھوڑ اس کی جان۔‘‘

’’یار، ہم کوئی بھگا کے لے آئے ہیں اسے جو جان چھوڑ دیں؟‘‘

ماما کے جواب پر بیٹھے ہنس پڑتے۔

’’ہلا! پھر اس کہ بریک تو لگوادے۔‘‘

’’ہم ہی بنا بریک ہوگئے ہیں۔ سنے گا؟‘‘ یہ کہہ کر ماما ایک خاص صورت بناتا۔ کہنے والا بھاگنے کے چکر میں پڑتا مگر وہاں موجود کوئی ایک اسے پکڑ کر ماما کے قریب لے جاتا۔ ماما ایک پاد داغ کر بدبو مٹھی میں کرتا اور لے جا کر اس کی ناک پر چھوڑتا۔ ہنسی کا غل مچ جاتا۔

’’اسے تو دیکھو! ہماری ہی بریک ڈھیلی ہو گئی ہے اور یہ یار چلا ہے سائیکل میں بریک لگوانے۔ آیا مزہ؟‘‘ ماما بات کے آخر میں پھر ایک سوال اسی کی طرف اچھالتا۔ جواب میں اس شخص کو ہاکار میں سر ہلانا پڑتا ورنہ ایک اور پاد داغے جانے کے لیے تیار ہوتا۔

ماما کی شہر سے واپسی ہوگئی ہے مگر اس کے گراہک اپنی اپنی جگہ چبوترے پر جمے بیٹھے ہیں۔ کسی کو چارپائی کا پایہ ٹھکوانا ہے تو کسی نے بیلوں کے لیے پنجاری بنوانی ہے مگر انھیں اس وقت تک انتظار کرنا ہے جب تک ماما بچوں کو ان کی کھٹی میٹھی اشیا دے کر فارغ نہیں ہو جاتا۔ بچوں نے وڑو، میٹھی گولیاں اور بنانا بسکٹ اپنے ہاتھوں میں تھام رکھے ہیں۔ کچھ لائی کو دانتوں سے کتر رہے ہیں تو کچھ کے ہاتھ مٹھائی سے سنے ہوے ہیں، مگر سب کے سب جتھے کی صورت بنائے برگد تلے کھڑے ہوے ہیں۔

’’اڑے، جاتے کیوں نہیں؟‘‘ ماما مصنوعی غصے سے پوچھتا ہے۔

’’نہیں جائیں گے!‘‘ بچے اکڑ کر جواب میں چلّاتے ہیں۔

’’نہیں جاؤگے؟‘‘

’’نہیں جائیں گے!‘‘ سب یک زباں ہو کر کہتے ہیں۔

’’کروں کاروائی؟‘‘ ماما جھک کر تہبند کو پنڈلی سے گھٹنوں تک اٹھاتا ہے۔

’’بھلے کرو!‘‘ بچوں کے منھ سے ہنسی ابلی آرہی ہے۔ ماما جھک کر ایک بڑا پاد چھوڑتا ہے۔ آواز کی گونج سنتے ہی قہقہے مارتے بچے اوندھا اوندھ ہوتے برگد سے گاؤں کی طرف اوپر چڑھتے راستے پر دوڑ پڑتے ہیں۔ اب ماما کے گراہک قریب ہو کر اپنا کام کہہ سکتے ہیں۔

’’ماما، تو نہیں سدھرے گا!‘‘ کوئی ہنستے ہوے چوٹ مارنے کی کوشش میں ہے۔

’’تو سدھرے گا کہ نہیں؟‘‘ ماما پھر خاص انداز اپنانے لگتا ہے۔

’’نہ نہ! بس بس! ماما، میری کیا میرے باپ کی توبہ۔‘‘

’’جھل دب!‘‘ کہتے ماما اوزاروں کی پیٹی کھولنے لگتا ہے۔ اتنے میں دین محمد عرف دینو نے پنجاری تختے پر آ رکھی۔

’’ہاؤ دینو چاچا۔ کر خبر؟کیا کرنا ہے؟ دو ٹکڑے کہ تین؟‘‘

’’ماما، تین کر کے دو، چاچی کو جلانے میں سہولت ہوگی!‘‘ علی حسن جو اپنی چارپائی بنوانے آیا ہوا ہے، بول پڑتا ہے۔

’’تیرے باپ کی ہے جو ٹکڑے کروا رہا ہے؟‘‘ یہ بات سن کر دینو کا انگارے جیسا مزاج سلگنے لگتا ہے۔

’’چاچا، بابے کی پنجاری ہوتی تو تجھے نہ جوت دیتے اس میں۔‘‘

’’اور بھونک اور! میں تو کب سے کہہ رہا تھا کہ علو اور گوہ نہ کھائے، ایسا تو ہو نہیں سکتا۔ اور تُو منھ بند کیے کھڑا ہے، ہاں؟میں تیری دکان پر آیا ہوں نا؟تیرے سامنے میری بے عزتی ہو رہی ہے اور تو ایسے ہی کھڑا ہے؟‘‘ چاچا دینو علو کے ساتھ ماما کے لتے لینے لگا۔

’’اڑے علو اٹھ! چاچے سے مافی(معافی)مانگ۔‘‘

’’چاچا دینو، ماف کرنا، مڑئی گتھو لفظ زبان سے نکل گیا۔ زبان چام کی، کسی نہ کام کی۔‘‘ علو اٹھا اور کندھے پر پڑا پھولدار رومال چاچے دینو کے پاؤں پر رکھ دیا۔

’’مافی مانگنے آیا ہے! شکل ہے مافی والی؟حرامی کس جائے کا! میں بس جا رہا ہوں۔‘‘ دینو نے تختے پر رکھی ٹوٹی پنجاری کندھے پر رکھ دی۔

’’اڑے چاچا، بس بس! ٹھنڈا ہو۔ گریب(غریب) نے مافی تو مانگی ہے، اور کیا کرے؟‘‘ ماما نے چاچے دینو سے پنجاری چھین کر تختے پر ڈال دی۔

’’یہ کوئی مافی ہے؟‘‘

’’تو بھلا اونٹھ پاؤں بنائے؟‘‘

’’چاچا دینو، تو کہے تو اونٹھ پاؤں بناؤں، قسم سے!‘‘ علو اونٹھ پاؤں بنانے کے لیے اٹھنے لگا۔

’’اڑے بڑی خبر ہے تیرے اونٹھ پاؤں کی! بڑوں کی کوئی شرم حیا ہی نہیں۔‘‘ چاچا دینو غصے کی منزل سے اتر کر روٹھنے پر آپہنچا ہے۔

’’چاچا، بس کیا کروں، قسم سے جس دن میں پیدا ہوا اس دن ساری شرم تقسیم ہو گئی تھی۔‘‘ یہ دیکھ کر علو پھر پر تولنے لگا۔

’’منھ بند نہیں کرتا لوسی!‘‘ ماما نے علو کو گھرکی دی۔ ’’چاچا دینو، مجھے یہ بتا یہ ٹاہلی کی لکڑی ہے، ٹوٹی کیسے؟‘‘

’’یار، بس کیا بتاؤں، منڈی سے وہ جو پار سال تھری بیل نہیں لایا تھا؟کل ریج کے بعد سانھر گھما رہا تھا، بھٹارے نے گردن جو جھٹکی، پنجاری توڑ کر رکھ دی۔ اب کھیت میں ریج لگا پڑا ہے، پنجاری بنے تو سانھر گھماؤں۔‘‘

’’چاچا، ابھی بن جاتی ہے۔ تو فکر ہی نہ کر۔‘‘

’’ادا دینو، ونگار بنگار کی ہے یا نہیں؟‘‘ یہ میاں فضل محمد تھا۔ بارعب، قدآور۔ ویسے تو گاؤں میں کوئی وڈیرا ننڈھیر ا نہ تھا پر سارے میاں فضل محمد کو آگے رکھتے تھے۔

’’نہ ادا فضل نہ! بس دو تیلے ہیں، خود لگالیں گے۔‘‘

ماما پیرل پنجاری کو ٹھیک کرنے میں جت گیا۔ چبوترے پر چلتی باتوں میں اپنا حصہ بھی ڈال رہا تھا۔ پنجاری بنا کر چاچے دینو کو تھمائی گئی۔ چاچا کندھے پر رکھے گاؤں کی طرف چڑھائی پر جانے لگا۔

’’اڑے علو! لے آ اپنی چارپائی۔ دیکھیں تو اسے۔‘‘ ماما نے علو کو آواز دی۔

’’علو! چارپائی تیرے باپ نے توڑی ہے یا تو نے؟‘‘ کندھے میں پنجاری ڈالے جاتا چاچا دینو حساب برابر کرنے کھڑا ہو گیا۔

’’چاچا دینو، بس کیا بتاؤں۔ ابے کی عمر تو نے دیکھی ہے، تجھ سے کوئی سال دو چھوٹا ہوگا۔ اب چارپائی توڑنے کے لیے جو طاقت چاہیے وہ تو ابے کے پاس تیری طرح بچی نہیں۔ اب چارپائی میں توڑتا ہوں، ابا تیری طرح مٹکے توڑتا ہے۔‘‘ علو کی بات نشانے پر لگی۔ پورا چبوترا ہنسا۔

’’ایسا شک ہے تو رات سو میرے ساتھ۔ پیٹ سے نہ کروں تو کہنا!‘‘ چاچا دینو لوٹ آیا۔

’’چاچا، چھوڑ اب باتیں۔ بھلا ایسی بات ہے تو پہلے چاچی کو پیٹ کر کے دکھا۔ پھر تیرے ساتھ میں نہ سوئوں تو کہنا۔‘‘

’’اڑے چاچا، اب تو جا۔ ریج لگا پڑا ہے۔ چھوڑ ان باتوں کو۔ اس حرامی کے منھ کوئی لگتا ہے؟‘‘ ماما پیرل نے چاچا دینو کو دھکیل کر روانہ کیا جو علو کی ماں بہن ایک کر رہا تھا۔ ’’اڑے علو، لخ لعنت ہو! نہ چھوٹوں کو بخشتے ہو نہ بڑوں کو۔‘‘ ماما پیرل نے علو کے منھ پر لعنت رکھی۔

’’ماما، بھلا تم چھوڑتے ہو؟‘‘ علو ہنسی میں شرابور تھا۔

’’اڑے اب بس کر! یا کروں کاروائی؟‘‘

’’چھوڑ ماما! اب تیرے عضوے بھی ڈھیلے پڑے ہوے ہیں۔ ایسا نہ ہو جو تو کاروائی کے خیال میں ہو اور کچرا باہر آ پڑے۔‘‘ علو کی اس بات پر اتنا زوردار قہقہہ پڑا کہ برگد کی جٹا دار شاخیں ہل کر رہ گئیں۔

’’بڑا بے حیا ہے تو! ایسا کنجر میں نے حیاتی میں نہ دیکھا۔‘‘ ماما پیرل کام چھوڑ کر پھر ایک بار علو کے منھ پر لعنت رکھنے آیا۔ ’’اب ایک بات بتاتا ہوں تم لوگوں کو پچھلے سال کی۔‘‘ ماما چبوترے پر پھسکڑا مار کر بیٹھ گیا۔

’’میری چارپائی والا کام تو پورا کر ماما!‘‘

’’تو اس وقت اس پر جاکے سوئے گا؟ لوسی کہیں کا۔ چپ کر کے سن بات۔‘‘

ایک دو اور نے بھی علو کو گالی دے کر منھ بند کرنے کا کہا۔ سب ماما پیرل کی بات کی طرف متوجہ ہوگئے۔

’’یہ پچھلی گرمیوں کی بات ہے جب میں نے دوسری شادی کی تھی۔ میں شادی کا سامان لینے گیا تھا بڑے شہر۔ کپڑے وپڑے، برتن ورتن، جوتے چپل لے کر گٹھڑی سر پر رکھی اور اسٹاپ کی طرف آرہا تھا۔ بیچ بازار میں تھا کہ ہوا کا خیال ہوا۔ ہمیں اپنے گوٹھ کی عادت، مروٹا سروٹا دے کر میں نے کاروائی کردی۔ ابا کیا بتاؤں، پتا مجھے تب لگا جب ایڑی چپل سے چپکنے لگی۔ شہر پرایا، لوگ پرائے۔ بیچ بازار! میں نے کہا، پیرل، آج تو نہ مرے تو کب مرے؟سارے ملک میں خوار ہوگاتو!‘‘

برگد کے نیچے ہنسی کا جہاں آباد تھا۔ لوگ ہاتھ پہ ہاتھ مار کر ہنسی میں ڈوبے جا رہے تھے۔

’’پھر کیسے نبھائی بات ماما؟‘‘

’’یار، حد کرتے ہو! گُو کی بات ہے، نبھانا وری کیسا؟بس میں بھی چوروں کی طرح تلیوں پر چلنے لگا۔ پر یار کوئی گاڑے والا تھا سؤر، اس کی نگاہ پڑگئی۔ حرامی بڑے منھ سے بولتا ہے، چاچا دھوتی سنبھال دھوتی! میں نے دیکھا ہی نہیں، بس جباب دیا، ہاں ہاں، بھینس کا گوبر لگا ہے۔‘‘

لوگوں کو پھر ہنسی کا دورہ پڑا۔

’’پھر ماما؟‘‘

’’اور کیا منھ کالا کروں اپنا؟ساری بات تو بتا دی۔‘‘

’’گوٹھ کیسے پہنچے؟‘‘

’’ہاؤ یار، یہ بات رہ گئی! وہ اپنا رئیس کنال نہیں ہے؟بس اس کے کنارے جا کر اس میں چھلانگ ماری۔ دھو دھلا کر نکلا۔ جوتی ووتی دھو کر بس میں آ بیٹھا۔ گھر آکر دیکھا تو نشان سارے پیلے لگے پڑے تھے۔ بس وہ دن اور یہ دن، اب کاروائی میں زور زبردستی کا خیال کرنا پڑتا ہے۔ سو علو، عمر برابر عمر ہوتی ہے۔‘‘ ماما علو کی پیٹھ تھپک کر تختے کی طرف اٹھ گیا۔ ’’بھلا علو، تیری چارپائی کی ملم پٹی (مرہم پٹی)کروں یا پورا بازو بدلوں؟‘‘ ماما وہیں سے پکارا۔

’’ماما، یہ ملم پٹی اپنی چارپائی پر کرنا۔ ہمارا زور زور ہے۔ بازو بدل بازو!‘‘

’’اڑے اب بس کر! ہم ہیں سچے گھی کی جم پل۔ تو ڈالڈا کی پیداوار!‘‘

’’ماما، ایسی بات نہیں۔ ہم بھی گھی مکھن پر بڑے ہوے ہیں۔‘‘

’’گھی مکھن پر بڑے ہوے ہیں۔۔۔‘‘ ماما نے اس کی نقل اتاری۔ ’’پتا ہے تیرے مکھن کا، گائے کا مکھن کھاتا ہے! وہ بھی کوئی مکھن ہے؟ادا، بھلا تم انصاف کرو، ہے کوئی مقابلہ گائے کا بھینس سے؟‘‘ ماما وہاں بیٹھے ہوے لوگوں سے مخاطب ہوا۔

’’نہ سائیں! کہاں بھینس کہاں گائے۔ کوئی مقابلہ ہے ہی نہیں۔‘‘

’’ماما، کون سی بھینس تیرے گھر کھڑی ہے؟‘‘ علو نے ماما پر چڑھائی کی۔

’’اڑے میرے گھر نہیں تو کیا ہوا؟بہن کے گھر تو ہے نا۔ اس کا اور میرا گھر کوئی الگ بات ہے؟‘‘ اتنی دیر میں گاؤں سے اترتے راستے پر کوئی دوڑا آیا۔

’’ماما، ماما! ماسی پوچھ رہی ہے مچھی لے آئے؟‘‘ یہ فرید تھا۔ ماما کا اپنا بیٹا۔

’’اڑے گھوڑا! دیکھا علو، تیری باتوں سے میں بالکل بھول گیا۔ اڑے وارو کر، فرو(فرید)۔ یہ چھلی سائیکل میں ٹنگی ہے۔ جلدی لے جا، مچھی خراب نہ ہو جائے۔‘‘ ماما بوکھلا گیا۔

’’ماما پیرل، پھر مطلب کہ کام مچھی پر چل رہا ہے؟‘‘ علو معنی خیز انداز میں بول پڑا۔

’’لخ لعنت ہوتم پر! اڑے حرامی، گھر والی کے مٹ مائٹ(رشتے دار) آرہے ہیں۔ لیکن بات تو سُن۔۔۔‘‘ ماما نے رخ علو کی جانب کیا۔ ’’یہ بتا، تجھے مچھی کے اثر کا پتا کیسے لگا؟ہوں؟‘‘ ماما کی بات پر علو کی مونچھیں جیسے ڈھلک پڑیں۔ قہقہے تھمنے کے بعد بھی علو سے بات بن نہ پائی۔

ماما پیرل رندے سے لکڑی چھیلے جا رہا تھا۔ رندے کا لوہی بلیڈ لکڑی کی پرتیں اتارے جا رہا تھا۔ جب بلیڈ پرت اتارتا تو رندے کی آواز بدل جاتی اور لکڑی کے باریک ذرّے ہوا میں اڑنے لگتے۔ تختے پر رکھی لکڑی کے، جسے لوہے اور لکڑی کے شکنجے جکڑے ہوے تھے، آس پاس ان ذرّوں کی ریشم جیسی نرم ڈھیریاں بن رہی تھیں۔ ماحول میں چھلتی لکڑی کی خوشبو تھی۔ چڑھتے سورج کے ساتھ برگد کے نیچے آمد رفت زیادہ ہو گئی تھی۔ آتا جاتا سلام اور حال احوال کرنے برگد کے نیچے رکتا اور پھر سانس لے کر، پانی پی کر اپنے کام چل دیتا۔ ماما پیرل رندا تیز تیز چلا رہا تھا۔ اس کے من میں جلد گھر جانے کا خیال تھا۔ آج بیوی کے رشتے دار آنے تھے۔ اس کا خیال تھا کہ گھر پہنچ کر مہندی رنگ لے۔ یہ کام بھی اس نے دوسری شادی کے بعد شروع کیاتھا۔

ماما نے پہلی بیوی کے گزر جانے کے بعد دوسری کی تھی جو اگر چہ اس کے قوم قبیلے کی نہ تھی مگرپیرل اس پر جی جان سے عاشق ہو گیا تھا۔ وہ کام کے دوران بھی گھر جانے کے بہانے ڈھونڈتا رہتا۔ پہلے جو پینگھا وہ دنوں میں بناتا تھا، اب ایک ماہ کا وقت لے جاتا۔ اس وقت علو کی چارپائی کا بازو مکمل کرتے اسے گھر جانے کا خیال لگا ہوا تھا۔ کام مکمل کر کے اس نے چارپائی علو کے حوالے کی اور کلہاڑی کا دستہ بنوانے آئے ہوے دوست محمد عرف دوسو کو کلہاڑی تختے پر چھوڑنے اور شام کو لے جانے کا بول کر گھر چل پڑا۔ گھر پہنچتے ہی مہندی کا کٹورا لے کر آنگن میں نیم کے نیچے آبیٹھا۔ ویسے تو پیرل جمعے کے جمعے مہندی کرتا تھا مگر اس نے کل شام شیشے میں دیکھا تھا کہ مہندی مونچھوں کی جڑ چھوڑ چکی تھی، اس لیے رات کو ہی اس نے بیوی کو مہندی بھگو دینے کا کہہ دیا تھا۔ مہندی بھی وہ بیوی سے لگواتا تھا مگر اب مچھی دیر سے بھیجنے کی وجہ سے بیوی کام میں لگی ہوئی تھی۔ اسے بھی کہنے کا من نہ ہوا، حالانکہ دل اس کا بہت کر رہا تھاکہ وہ اپنی دل کی رانی سے مہندی لگوائے۔ وہ جب اپنی انگلیوں سے اس کی مونچھوں اور سر کے بالوں میں مہندی لگاتی تھی تو پیرل پر نشہ چھا جاتا تھا۔ خمار میں آکر اسے دنیا بھول جاتی۔ لذت کی لہریں اس کے جسم میں کپکپا جاتیں۔ وہ سکون میں آجاتا۔ پیرل نے پہران اتار کر بیر کی شاخ میں ٹانگا اور مہندی والا کٹورا لے کر کھٹولی پر بیٹھ گیا۔

’’ماما، میں مہندی لگاؤں؟‘‘ اس سے سکینہ نے سوال کیا جو اس کی پہلی بیوی سے پہلوٹی اولاد تھی۔

’’اماں، تو مہندی لگالے گی؟‘‘

’’جیسے ماسی نہیں لگاتی، وہ میں نے دیکھی ہے۔ لگالوں گی۔‘‘

’’ٹھیک ہے اماں۔ یہ پکڑ۔‘‘ پیرل نے اس کے ہاتھ میں مہندی والا کٹورا پکڑا دیا۔ سکینہ جو پہلی بار باپ کو مہندی لگانے کھڑی ہوئی تھی، اناڑی پن کے ساتھ باپ کے سر پر مہندی تھوپنے لگی۔

’’ماما، یہ مہندی میں ماسی سرسوں کا تیل کیوں ڈالتی ہے؟‘‘

’’اماں، اس سے مہندی کھال پر نہیں چڑھتی۔ تو ایسے نہ لگا اماں، تھوڑی تھوڑی اٹھا کر جڑوں میں لگا۔ بالوں کے اوپر نہیں، اماں۔ یہ دیکھ، ایسے۔‘‘ پیرل بیٹی کو مہندی لگا کر سمجھانے لگا۔ اتنی دیر میں ہانڈی چولھے میں الجھی سلیمت کی نظر مُڑس پر پڑی۔

’’ائی! مجھے کیوں نہیں کہا؟‘‘ وہ ہوا کے جھونکے کی طرح سر پر آکھڑی ہوئی۔ ’’مجھے دے مہندی، سکیناں۔ تو جا کر دیگچی دیکھ، میں تیرے باپ کو مہندی کر کے ابھی آئی۔‘‘

’’تو اپنا کام دیکھ دِلڑی، مہندی خود لگ جائے گی،‘‘ پیرل نے سلیمت سے کہا جو اب کٹورا سنبھال کر مہندی لگانے لگی۔ اس کی انگلیوں نے مہندی کرتے پیرل کے بالوں کی جڑوں کو چھوا تو پیرل کے اندر پھریری دوڑ گئی۔ اس کے روئیں کھڑے ہوگئے۔ سسکاریاں نکلنے لگیں۔ ’’تیرے مٹ مائٹ پہنچنے والے ہوں گے، تو ڈوئی سنبھال!‘‘ پیرل نے پھر کہا مگر اب کے کہنے میں ایک ناز تھا جوجواب سننے کے شوق میں تھا۔

’’نہ سائیں! مجھے مٹ مائٹ تم سے بڑھ کر ہیں کیا؟‘‘

پیرل کے دل میں پھوار برسی۔ وہ کھٹولی پر اور پھیل کر جم گیا۔ بیری کے نیچے بیٹھا پیرل مہندی کی ٹھنڈک اپنے اندر اترتی محسوس کر رہا تھا۔ ابھی بیری پر پھل آنے کا وقت کافی دور تھا ورنہ اس کے بیر کترتے طوطے ’ٹیوں ٹیوں ‘کا راگ الاپ رہے ہوتے۔ اس بیری کے عاشق صرف طوطے ہی نہ تھے بلکہ یہ صوفی بیر گاؤں بھر کے بچوں کی پسند تھی۔ بیری کے اس قسم پر لگنے والے بیر عام بیروں سے جسامت میں بڑے اور رس دار ہوتے تھے، جیسے ان کے اندر شیرہ بھرا ہوا ہو۔ ورنہ گاؤں، کھیتوں میں بیریاں تو بہت۔ اکثر بیریاں تُرش، گلا جا پکڑتیں۔ اس بیری پر بیر آنے لگتے تو گھر میں بچوں کی آمد رفت بڑھنے لگتی۔ وہ آتے اور بیروں کے پکنے کا اندازہ کرکے لوٹ جاتے اور پھر شام میں آکر بیروں کو گھورنے لگتے۔ انھیں سمجھ نہ آتی کہ اتنی دیر کے باوجود وہ ویسے کا ویساکیسے ہے؟وہ پھر مایوس مایوس واپس ہو جاتے۔ یہی بیری اگر کسی اور جگہ ہوتی تو ا س پر پتھر روڑے برسانے لگتے لیکن یہ تو ان کی اپنی تھی۔ اس لیے اگر کوئی زیادہ اُتاؤلا ہو جاتا تو ماموں پیرل سے جھول جاتا۔

’’ماما، یہ بیر پک کیوں نہیں جاتے؟کب پک جائیں گے بھلا؟‘‘

’’بابا، دیر ہی نہ لگے گی۔ بس شام یا کل!‘‘ ماما کا جواب ہمیشہ ایسا ہی ہوتا۔ وہ خوش خوش جا کر خواب میں بیر کھانے لگتے۔

جیسے جیسے بیر پیلے ہو کر سبز پتوں میں دمکنے لگتے، بچوں کے ہونٹوں کے کونے رال بہانے لگتے۔ ماما سے بیروں کی فرمائشیں بڑھتی جاتیں۔ بیر توڑنے والے دن تو گھر کے باہر بڑے بوڑھے بھی انتظار کرنے لگتے۔ اس دن بیری کے نیچے وہ شور پڑتا کہ طوطے بھی بیر بھول کر بھاگ جاتے۔ ماما بیری کے تنے سے اٹکا ہوا ہے۔ درخت ہلا ہلا کر بیر گرانے ہیں۔ بھلا پتھر جوتا مار کر کوئی کھانے کی چیز ہاتھ کی جاتی ہے؟ماما تنے کو ایک طرف سے جھنجھوڑنے میں لگا ہوا ہے تو دوسری طرف سے بچے اپنا زور لگائے جا رہے ہیں۔ خوشی میں بھرے بچے تنے سے چمٹ کر’’آ! آ!‘‘ کی آوازیں لگاتے جوش میں تنے پر چڑھ جاتے۔ بیری کے نیچے موجود ہر سر اوپر اٹھا ہوا ہے۔ فائدہ مند جگہ کے لیے دھکم دھکا ہو رہی ہے۔ ہر ایک نے جھولی پھیلائی ہوئی ہے۔ بیروں کو ہاتھ کرنے کے لیے تتلی کی مانند اِدھر اُدھر اڑے جا رہے ہیں۔ حبو (حبیب)کی جھولی بھر جاتی ہے۔ بھری جھولی دیکھ کر صدورا خود کو روکنے سے معذور ہو گیا۔ اس نے حبو کی جھولی سے مٹھی بھرلی۔ اِدھر حبو کی ’’آں‘‘ ابھری، اُدھر سے ماما کڑکا، ’’اوئے صدورے، تیری نانی مر جائے، واپس رکھ!‘‘ صدورے کی شکل بھیگے مرغے کی طرح ہو گئی۔ اس نے مٹھی واپس پھینکی اور ماما کی نظروں سے بچنے کے لیے ہجوم میں غوطہ مار کر دوسری طرف جا نکلا۔

’’دیکھ رہا ہوں، دیکھ رہا ہوں تجھے صدورے پدورے!‘‘ ماما کی نظر سے کوئی کیسے بچے۔ اب بیر ٹپاٹپ گر رہے ہیں۔ جو جھولی سے بچ کر نیچے گر جاتا ہے اس پر بچے یوں جھپٹتے ہیں جیسے باکو جلیبی والے کی جلیبیوں پر مکھیاں۔

مگر یہ وقت ابھی دور ہے۔ ابھی تو ماما مہندی لگوا کر برآمدے میں بیٹھا مہندی سوکھنے کا منتظر ہے۔ اس کی بیوی سلیمت اور بیٹی سکینہ مہمانداری کے بندوبست میں ہیں۔ مچھلی کا سالن، لیس دار سفید چاول، چاولوں پر ڈالنے کے لیے پسا ہوا گڑ، مکھن اور شہد اور چاول کی بنی روٹیاں۔ ان کے بن جانے تک پیرل بھی مہندی اتار کر نئی دھاری دار انگرکھے کی دھوتی، سفید کھلا کھلا پہران پہنے تیار ہو گیا ہے۔ پہران کے گریبان پر سفید ریشم سے پھول پتیوں کی باریک بیل بنی ہوئی ہے جو اس کی بیوی نے پورے دو ماہ لگا کر سوئی دھاگے سے کڑھائی کر کے بنائی ہے۔

زوال کے قریب مہمان بھی پہنچ گئے۔ شہر سے گاؤں تک پنھوں تانگے والا چھوڑ گیا۔ مل ملا کر حالی احوالی ہوے۔ برآمدے میں بیٹھ کر کھانا کھانے لگے۔ پیرل اور اس کا سسر ایک ہی چارپائی پر بیٹھے۔ بیوی نے ان کے آگے مچھلی کا سالن، چاولوں کاتھال، پیالہ بھرا پسا ہوا گڑ اور پِنڈی میں مکھن سے تربتر چاولوں کی روٹی لا کر رکھی۔ کھانا شروع ہو گیا۔ کھانے والے بڑے بڑے لقمے نگلتے رہے۔ توجہ معیار سے زیادہ مقدار پر تھی۔ ساتھ ساتھ پیرل اور اس کے سسر کی باتیں چلتی رہیں۔ سلیمت کی ماں اور بہن دوسری طرف بیٹھ کر کھانا کھانے لگیں۔ سلیمت اور سکینہ دونوں طرف خالی تھال اور پنڈی بھرتی رہیں۔ پیرل اور اس کے سسر دونوں نے پلیٹ مچھلی، مکھن کے ایک ایک پیڑے کے علاوہ چاولوں کے دو تھال اور لاتعداد روٹیاں کھا کر ختم کیں اور وہیں چارپائیوں پر لیٹ گئے۔ ان کی باتیں غنودگی کے رنگ میں ڈھلنے لگیں اور کچھ ہی دیر وہ اندر پڑے سوگئے۔ سلیمت نے کھانا کھایا، برتن سمیٹے اور ماں بہن کو لے کر کمرے میں جا بیٹھی۔ کچی اینٹ اور گارے سے بنا لپائی کیا ہوا کمرہ اندر سے ٹھنڈا تھا۔ کھلے دروازے پر رلی ٹنگی تھی جو تاریکی کی وجہ بن رہی تھی۔ ماں چارپائی پر لیٹ گئی۔ سلیمت نے پاؤں دبانا شروع کیے۔ ماں کے خراٹے پیرل اور اس کے سسر کے خراٹوں کے ساتھ ہم آواز ہو گئے۔ ماں کے سونے کے بعد دونوں بہنیں ساتھ لیٹ کر سس پھس کرنے لگیں۔

’’مڑس اچھا لگتا ہے بھلا؟‘‘

’’یہ کوئی بات ہے بھلا! کبھی مڑس برا لگتا ہے کیا؟‘‘ سلیمت نے الٹا سوال کردیا۔

’’ائی! ایسے نہیں۔ میں ویسے پوچھ رہی تھی اندھی۔ کیسا لگتا ہے؟‘‘

’’مڑس ہے، سِر کا سائیں ہے۔ سب کچھ وہی تو ہے۔‘‘

’’پر سر تو سفید لگا پڑا ہے، جبھی تو مہندی کرتا ہے۔‘‘

’’تو کیا ہوا؟مرد کی عمر ہوتی ہے کیا؟‘‘

’’ہاں، یہ تو سچی بات ہے۔ بھلا سنا، ہلت چلت کا کیسا ہے؟‘‘

’’ائی! بڑی ادی، کیا بتاؤں! اتنا اچھا ہے، اتنا اچھا کہ کیا بتاؤں۔ کپڑے لتے، کھانا پینا، کوئی کمی نہیں کرتا۔ اور ہاں، ایک بات بتاتی ہوں، تُو مانے گی ہی نہیں۔‘‘

’’کیا؟‘‘

’’اس نے آج تک مجھ پر لاٹھی کیا، ہاتھ بھی نہیں اٹھایا۔‘‘

’’چل جھوٹی کسی جگہ کی! مرد اور ہاتھ نہ اٹھائے! یہ جھوٹ جا کر کسی اور سے بول۔‘‘

’’نہ بڑی ادی، قسم دستگیر کا، مجھے ڈانٹتا بھی نہیں۔‘‘

’’سچی؟‘‘ بہن کا ہاتھ حیرت میں منھ پر جم گیا۔

’’ایسا اچھا ہے، ایسا اچھا ہے جو بس ہنساتا رہتا ہے۔‘‘ سلیمت کے لہجے میں گدگدی بھری ہوئی تھی۔

’’قسم اٹھا سرخ قرآن کا!‘‘ بہن سلیمت کو جھنجھوڑبیٹھی۔

’’قسم سرخ پاک قرآن کا۔ جب شہر جاتا ہے نا، تو میرے لیے پتا نہیں کیا کیا لاتا ہے۔ کبھی جلیبی، کبھی مٹھائی، کبھی ماوا، کبھی ریوڑی، کبھی نبات۔ کیا بتاؤں۔ ایسی ایسی چیزیں لاتا ہے!‘‘

’’ائی، کیسی قسمت والی ہے! ہم تو بس موچڑوں میں۔‘‘

’’میں تو شکر کرتی ہوں میری جان چھوٹی۔‘‘

ہاں سچی۔ تُو تو اپنے مڑس کے پاؤں دھو کر پی۔ ایسا مڑس تو میں نے کبھی سنا ہی نہیں۔ میرا مرحیات مڑس، اللہ اسے جنت میں جائے دے، ایسا تھا جو لاٹھی بانٹھا اٹھاتا تو اصل رکھتا ہی نہیں تھا۔‘‘

’’دعا دے اس سانپ کو جس نے اسے ڈنک مارا۔ تیری جان تو چھوٹی۔‘‘

’’ائی ایسے نہ کہہ! جیسا تھا، میرے سر کا سائیں تھا۔ مارتا تھا تو اس میں اُس کا کیاقصور؟ بس جو لکھے کا نصیب۔ چل، میں سوتی ہوں۔ اتنے دور سے آئے ہیں، لاری نے صفا تھکا دیا ہے۔‘‘

’’پاؤں دباؤں کیا تیرے؟‘‘

’’نہ ڑی! اتنی بوڑھی نہیں میں۔ تُو گھر کا دیکھ جا کر۔‘‘

وہ کروٹ بدل کر سوگئی۔

ادھر پیرل نیند سے اٹھا تو اس کا سسر چارپائی پر بیٹھا پن والی بیڑی مونٹھ میں دبائے پیے جا رہا تھا۔ وقفے وقفے سے وہ زور سے چٹکی بجا کر راکھ جھاڑتا۔ پیرل نے اٹھتے ہی تیاری کی۔ وہ اپنی دکان کی طرف جانے لگا۔

’’ابا کہاں؟‘‘ سسر نے بلغمی آواز میں پوچھا۔

’’چاچا، ایسے مڑئی کام وام دیکھ لوں۔ ابھی آتا ہوں۔‘‘

’’ابا، پھر مجھے زائفائوں کے ساتھ کیوں چھوڑے جا رہے ہو؟ ٹھیر جا، میں بھی ساتھ چلتا ہوں۔‘‘

وہ ٹرک کے پرانے ٹائرز کے ربر کو کاٹ کر بنائی گئی جوتی پہن کر اٹھ کھڑا ہوا۔

’’چاچا، میں ابھی آجاؤں گا۔ تُو یہاں بیٹھ۔ وہاں کیا کرے گا؟‘‘

’’نہ ابا، مرد کا کیا کام گھر میں؟وہڑے وا۔ باہر کوئی دیکھ ریکھ ہو جائے گی۔‘‘

چاچا پیرل کے ساتھ گلی میں باہر آیا۔ وہ گاؤں سے باہر نکلتی گلی میں چلنے لگے۔ گلی کافی کشادہ تھی، اتنی کہ اس میں سے بیل گاڑی یا گدھا گاڑی آرام سے گزر جاتی تھی۔ پیرل کا دراز قد سسر ایک ٹانگ سے ذرا لنگڑاتا، دونوں ہاتھ کمر کے پیچھے باندھے، سست رفتار سے چل رہا تھا۔ اس کے سر کے بال، دو انگل داڑھی، مونچھیں اور گہری بھنویں، سب کی سب مہندی سے رنگی بالکل سرخ رنگت کی تھیں۔ گلی میں آتا جاتا ہر ایک ماما کو دیکھ کر شوخ ہو کر سلام مارتا جاتا، لیکن وہ ماما پیرل جس کا معمول ہر ایک سے مذاق مسخری کا راستہ تھا، آج خاموش خاموش سلام کا جواب دے کر جیسے گزرنے والے کو پرایا لگ رہا تھا۔ پیرل کے اندر فکر کی مشین چل رہی تھی۔ اس کے سسر کو دیکھ کر لوگ کیا کہیں گے؟ان کی قوم قبیلے کے رواج میں بہن بیٹی کے گھر شادی کے بعد جانا بے غیرتی تھی۔ یہ تصور ہی نہ تھا کہ کوئی اپنے بیٹی کی ڈیوڑھی بھی پار کرے، چہ جائیکہ روٹی پانی کرنا۔ اسی وجہ سے پیرل نے سسر کو گھر ٹکے رہنے پر زور دیا تھا۔ پر بوڑھے آدمی کو کون سمجھائے؟اس وقت تو شہر گیا واپس ہوتا تھا اور کام والا بھی کھانا وانا کر کے برگد کے نیچے آبیٹھتا۔ اب یہ سب کیا ہوگا؟پورے گوٹھ کو اس بات کی خبر بھی ہوگئی ہوگی۔ لوگ پتا نہیں کیا کیا کہیں گے۔ اور اب یہ ساتھ چلا آیا ہے چاچا۔ سنتا بھی نہیں۔

برگد کے قریب آئے تو اچھے خاصے لوگ چبوترے کو ٹھکانہ بنائے ہوے تھے۔ چاچا علی حیدر کو دیکھ کر پیرل کو بُرا لگا، جیسے چاول کھاتے منھ میں کنکر آجائے۔ اس نے اٹ پٹے پن سے سب کو واحد سلام کیا اور اپنے چھپر کی طرف چلا گیا۔ تختے پر اوزار اور دوسو کی کلہاڑی اسی جگہ پڑے تھے جہاں وہ چھوڑ گیا تھا۔ اس نے دستہ بنانے کے لیے لکڑی چھیلنا شروع کی۔ پیرل کا یہ رویہ سسر کے لیے عجب تھا۔ اسے پیرل کی غیریت نے اچنبھے میں ڈالا۔ وہ سر موڑ کر اسے چھپر میں جاتے دیکھتا رہا۔ نہ کسی سے میل کروایا نہ واقفیت، یہ کو ئی طریقہ ہے؟ایسا ہوتا ہے مائٹی میں؟

چبوترے پر بیٹھے لوگ بھی ماما کی دوری سے حیرت زدہ ہوے۔ ماما کا معمول ایک ایک کو سلاوالیکم کرنا ہی نہیں تھا بلکہ وہ وہاں بیٹھے ہوؤں کو ٹہوکے دیتا جملے کستا جاتا۔ لوگ بھی ماما کو تاکے جا رہے تھے اور اس کے ساتھ آیا ہوا مہمان کچھ کے لیے نئی صورت تھا۔ وہ لنگڑاتا ہوا چبوترے کے قریب ہوا تو چاچا علی حیدر گوٹھ میں نئی صورت آتی دیکھ کر آدر بھاؤکے لیے اٹھ کھڑا ہوا۔ وہاں بیٹھے ہوؤں میں سب سے بڑی عمر والا ہونے کی وجہ سے اس نے یہ اپنی ذمے داری سمجھی۔

’’ادا، بھلی کرے آیا۔ خُش؟چنگو بھلو؟سب خیر؟کون مُڑس ہو، اَدا؟‘‘

چاچا علی حیدر اٹھ کر نووارد سے ملنے لگا۔ وہ برگد کو ٹیک لگائے، گاؤں کو پیٹھ دیے بیٹھا تھا اس لیے اس نے اسے پیرل کے ساتھ آتے نہیں دیکھاتھا۔

’’ادا، میں۔۔۔ہوں، قادر بحق(قادر بخش)۔‘‘ اس نے نام سے پہلے قوم بتائی۔

اتنی دیر میں دوسرے بھی اٹھ اٹھ کر اس سے ملنے لگے۔ پیرل اپنے کام میں لگ گیا تھا مگر اس کی پوری توجہ برگد کے نیچے تھی۔

’’آؤ ادا، آؤ۔ بیٹھو۔‘‘ چاچا علی حیدر نے قادر بخش کو ہاتھ سے پکڑ کر ساتھ بٹھایا۔ ’’کوئی لسی پانی ہو جائے ادا؟‘‘

’’نہ ادا، نہ! صفا طلب ہی نہیں۔‘‘

’’وری بھی ادا، آئے ہو، کچھ تو پیو۔‘‘

’’نہ ادا، نہ!‘‘

’’ہاں تو ادا، دے حال احوال؟خیر خبر؟کیسے آنکلے ہو؟کس میں کام وام ہے؟‘‘

’’نہ ادا، کام وام کیسا؟یہ اپنا پیرل نہیں ہے؟اس کے پاس آیا ہوا ہوں۔‘‘ قادر بخش جملہ پورا کر کے کھانسنے لگا۔

’’ہاں؟ اڑے پیرل، اتنا بھی نہیں سیکھا؟ آئے گئے کو ملایا جاتا ہے، کوئی واقفیت، کوئی عزت۔ ابھی تک تُو نہیں سدھرا؟‘‘ چاچا علی حیدر پیرل پر گرم ہو کر بولا۔

’’چاچا، یہ ماما پیرل کا سسر ہے۔ اس کے گھر آیا ہے،‘‘ ساتھ بیٹھے نے سرگوشی کرتے چاچا علی حیدر کو آگاہی دی۔

’’ہاں؟ یہ وری کیا کہا تو نے؟پیرل کا سسر؟بیٹی کے گھر آیا ہے؟‘‘ چاچے علی حیدر نے سرگوشی کرنے والے کو گھور کر دیکھا اور پے در پے سوالات کی بوچھاڑ کردی۔ ہر سوال کے جواب میں بولنے کی جگہ تائیداً سر ہلایا گیا۔

’’اڑے یہ کیا کہہ رہا ہے بشو(بشیر)؟‘‘ چاچے نے وہاں اور بیٹھے ہوے لوگوں سے بے یقینی کے عالم میں تصدیق چاہی۔

’’ہاؤ چاچا، ہاؤ!‘‘ گدھے گاڑی والے شیر محمد عرف شیرل نے واضح الفاظ میں بتایا۔

’’بے گیرتی(بے غیرتی) کی بھی کوئی حد ہوتی ہے!‘‘ چاچے علی حیدر کی بات ماحول میں کڑکی۔ ’’یہ تو ہے باہر والا، اسے کیا کہیں۔ تو پیرو ٹیرو، یہ تو نے مائٹی کہاں کی ہے بے گیرت؟ہم بکری بھینس بھی دیکھ کر لیتے ہیں۔ یہ تو نے کیا کِیا ہے اندھی کے بچے؟لخ لعنت ہو تجھ پر!‘‘

چاچا علی حیدر غیظ و غضب کی حالت میں پیرل کے تختے کے پاس چلا گیا۔ پیرل کے پاس بولنے کو کچھ نہ تھا، اور اگر ہوتا تب بھی چاچے علی حیدر کے آگے زبان کھولنا ممکن نہ تھا۔ دبلا پتلا چاچا علی حیدر انتہائی گرم طبیعت اور بات بات پر آپے سے باہر ہونے والے مزاج کا مالک تھا۔ ہر چیز میں الجھنا اور ہر ایک کی پگڑی اتارنا اس کا معمول تھا۔

’’چاچا چھوڑ! مہمان ہے، کچھ خیال کر۔‘‘

دو تین چاچے کو چپ کروانے اٹھ آئے۔

’’کاہے کا ڑے مہمان؟نہ گیرت نہ شرم!‘‘

’’چاچا چھوڑ اب۔ کیا کر رہا ہے؟‘‘ کسی نے چاچے کو کھینچ کر لے جانا چاہا۔

’’اڑے چھوڑ مجھے! مجھے کہہ رہا ہے؟ اس بے گیرت کو کچھ نہیں کہتاجو بیٹی کے گھر آیا ہے!‘‘ چاچے نے اس بار قادر بخش کو نشانہ بنایا جو چبوترے سے اٹھ کر آیا تھا۔

’’تُو ڑے، بول کیا رہا ہے بڈھے؟ہوش میں ہے یا نہیں؟‘‘ قادر بخش چاچے علی حیدر پر جھپٹا۔

’’چاچا، چھوڑ تُو اس کو۔ یہ اَدھ مغزی ہے۔‘‘

پیرل نے، جو تختے پر سر جھکائے کام میں لگا تھا، تیر کی طرح سسر کے پاس پہنچ کر اسے روکا۔

’’ادھ مغزی ہے تو اپنے گھر ہوگا۔ کتے کی طرح بھونکتا ہے یہ!‘‘

’’چاچا چل، گھر چلتے ہیں۔‘‘ پیرل سسر کو لے جانے لگا۔

’’ہاں ہاں، لے جا گھر بے گیرت! اولاد بھی ایسی بدنسلی پیدا ہوگی نا!‘‘ چاچا علی حیدر اپنے پکڑنے والوں سے چھڑانے کی کوشش کرتا پھنکارا۔

’’اس کنجر کو تو میں دیکھتا ہوں!‘‘ پیرل کا دراز قد سسر لنگڑاتاہوا پھر علی حیدر کی طرف دوڑا۔

’’چاچا بیلی، چھوڑ دے اسے۔ میں تیرے ہاتھ جوڑتا ہوں۔‘‘

’’اڑے پیرل! تُو اس بڈھے کا منھ بندنہیں کرتا اور مجھے روک رہا ہے؟‘‘ سسر پیرل پر چلّایا۔

’’چاچا باپ کی عمر کا ہے، اس کے اوپر آدمی نہ ہاتھ اٹھاسکے نہ گردن۔‘‘

پیرل سسر کو کھینچتا گوٹھ کی طرف اوپر لے جا رہا تھا۔

’’چاچا ماف کرنا، ایسا چریا ہے چاچا علی حیدر۔ تم ایسا ویسا مت سمجھنا۔‘‘ ایک دو گاؤں والے ان کے پیچھے پیچھے آکر پیرل کے سسر کے آگے ہاتھ جوڑنے لگے۔

’’چریا ہے تو باندھ دو نا اسے۔ کھلا کیوں چھوڑا ہے؟‘‘ قادر بخش کا غصہ کم نہ ہوا۔

’’چاچا، یہ ہمارے ہاتھ دیکھ۔ تُو بھی بڑا ہے، وہ بھی بڑا ہے، ہم کریں کیا!‘‘ کسی نے قادر بخش کی ٹھوڑی کو چھوا تو کسی نے گھٹنے کو ہاتھ لگا کر قادر بخش کو رام کرنے کی کوشش کی۔

اُدھر برگد کے نیچے چاچا علی حیدر ابھی چپ نہیں ہوا تھا۔

’’ہمارے بال سفید ہو گئے، پر ایسی بے حیائی! ایسی لوسپائی کہ بیٹی کے گھر آ بیٹھا ہے! بیٹی کے گھر؟اس سے پہلے یہ لنگڑا ڈوب کے نہیں مرا؟‘‘

’’چاچا اب بس کر، اپنا اپنا رواج ہوتا ہے۔ ان کے ہاں آتے جاتے ہوں گے،‘‘ کسی نے چاچے کی بات کاٹ کر کہا۔

’’یہ بے گیرتی ہے یا رواج؟ایسا رواج ہوتا ہے؟اسی لیے تو کہتے ہیں، اپنوں سے باہر نہ جاؤ۔ اپنے کا عیب صواب معلوم ہوتا۔ اس پیرو ٹیرو کو ملا کیا باہر جا کر؟کون سی پگڑیاں بندھ گئیں؟ سارا زمانہ تھوتھو کرے گا کہ حرامی نے کس جگہ سے رشتہ جوڑا ہے۔ باپ دادا کی واہوا عزت کروائی اس نے۔‘‘

’’چاچا، کھلے میں بیٹھے ہیں، چھت کے نیچے نہیں۔ اب بس کر جا۔ اپنا پرایا آ جا رہا ہے۔ چھوڑ۔‘‘

مگر چاچے علی حیدر نے کیا سننا تھا۔ وہ اسی رفتار تھوکیں اڑاتا رہا۔ اِدھر گلی میں گاؤں کے چند لوگ قادر بخش کے پیچھے چلتے پیرل کے گھر تک آئے۔ وہ اس کے سامنے چاچا علی حیدر کی باتوں کی تعبیر اس کی بڑی عمر، بے وقوفی، غصے سے جوڑ کر بات کا اثر کم کرنے میں لگے رہے جس کا اندازہ نہیں ہو پایا کہ کس قدر وہ پُر اثر رہیں۔ قادر بخش کسی سے بات کیے بنا تیز تیز لنگڑاتا پیرل کے گھر اندر داخل ہوگیا۔ ماما پیرل نے دروازے پرآئے ہوؤں کو مجروح نظروں سے دیکھا اور سسر کے پیچھے اندر چلا گیا۔

’’اٹھ بڑھیا، سامان سنبھال!‘‘ قادر بخش گھر میں گھستے ہی بیوی کے اوپر گرجنے لگا۔ وہ جو بیٹی کے ساتھ برآمدے میں بیٹھی باتیں کررہی تھی، اس کے تیور دیکھ کر خوف کھاگئی۔

’’ہوا کیا؟‘‘ اس نے چارپائی سے اٹھتے ہوے پوچھا۔

’’ہوا کیا؟تُو آگے سے پوچھتی ہے کمینی؟بند کر منھ! اٹھ، ابھی کے ابھی سامان باندھ۔‘‘

قادربخش کی بات کے بعد اس نے داماد کی طرف دیکھا تک نہیں، اٹھ کر سامان کو گٹھڑی میں باندھنے لگی۔

’’دیکھ چاچا، ایسے نہ کر۔ رب کا واسطہ ہے۔ ایسے ناراض ہو کر جاؤگے تو کیا عزت رہے گی میری؟‘‘

’’باہر بڑی عزت کروائی نا تم نے! اور کوئی کسر رہ گئی ہے تو ارمان پورے کرلے۔‘‘

’’ابا، ایسے نہ کرو۔ کیوں ناراض ہو کر جا رہے ہو؟‘‘ پیرل کی بیوی باپ کی طرف دوڑی۔

’’دور ہو کتّی رن! تیری وجہ سے ساری خواری ہوئی ہے۔ جلدی کر بڑھیا!‘‘

’’ابا، تجھے دستگیر کا واسطہ ہے، یہ میں اپنا دوپٹا تیرے پاؤں میں ڈالتی ہوں، ایسے نہ جا۔‘‘

سلیمت کے لیے معاملہ ابھی الجھا تھا کہ بات کیا ہے، لیکن یہ بات تو واضح تھی کہ اس کا باپ کسی بات پر غصے ہو کر گھر سے جا رہا تھا۔

’’چاچا، یہ میرے ہاتھوں کو دیکھ، میں تیرے آگے جوڑتا ہوں، ایسے نہ کر!‘‘ پیرل سسر کے آگے ہاتھ جوڑنے لگا۔ اتنی دیر میں قادر بخش کی بیوی سامان لتوں کی پوٹلی باندھ کرشوہر کے حکم کا انتظار کرنے لگی۔

’’دے اِدھر!‘‘ کہہ کر قادر بخش نے بیوی کے ہاتھ سے پوٹلی چھینی اور گھر سے باہر چلنے لگا۔ اس کی بیوی اور بیٹی سرجھکائے اس کے پیچھے چلیں۔

’’ابا، تجھے سرخ قرآن کا واسطہ ہے، نہ جا!‘‘

’’اگر تُو میری بیٹی ہے تو ابھی کے ابھی میرے ساتھ چل! پھر زندگی بھر کبھی اس گھر میں پاؤں نہ رکھنا۔ چل میرے ساتھ!‘‘ قادربخش چند قدم آگے جا کر کھڑا ہو کر بیٹی سے بولا۔

’’چاچا، ایسے نہ کرو۔ کاوڑ تھوک دو۔ سورج اترنے والا ہے، اس وقت کہاں جاؤ گے؟‘‘ پیرل نے پھر سسر کو رام کرنے کے لیے زور لگایا۔

’’جدھر بھی جائیں، تیرا کیا؟ تُو بتا، چلے گی یا نہیں؟‘‘ قادر بخش بیٹی سے سوال کرتے ہوے غرّایا۔ سلیمت جواب دینے کے بجاے اس کے لہجے میں بھرے غصے سے ڈر گئی۔ اس سے بولا نہ گیا۔

’’معنی تو نہیں چلے گی حرامزادی! آج کے بعد توہمارے لیے مر گئی۔ کبھی ہماری طرف منھ نہ کرنا، بھلے مرتی مر جائے۔ تُو کیوں بندھی کھڑی ہے بڑھیا؟‘‘

قادر بخش نے بیوی کو دھکیلا۔ سلیمت نے ڈبڈباتی آنکھوں سے اپنی ماں، بہن اور باپ کو گھر سے نکلتے دیکھا۔ وہ وہیں زمین پر بیٹھ گئی۔ وہیں کھڑا پیرل مخمصے میں آگیا کہ سسر کے پیچھے جائے یا بیوی کو سنبھالے۔

شام ہو رہی تھی۔ گلی میں سے گھروں کو لوٹتی بھینسوں کے ڈکرانے کی آوازیں آرہی تھیں۔ پیرل برآمدے میں پڑی چارپائی پر لیٹا تھا۔ بیوی اندر کمرے میں تھی جہاں جانے کا ابھی پیرل کا من نہ تھا۔ ماں کو کمرے سے نہ نکلتے دیکھ کر سکینہ کھانا پکانے میں لگ گئی۔ مغرب کی اذانوں کی دیر بعد سکینہ نے چاولوں سے بھرا تسلہ اور پسے ہوے گڑ کا پیالہ باپ کے آگے رکھا۔ پیرل اٹھ کر بیٹھ گیا۔ اس نے وہیں بیٹھے بیوی کو پانی لانے کے لیے آواز دی مگر جواب نہ سن کر اس نے چاولوں پر گُڑ بُرکتے ہوے کھانا شروع کردیا۔ بھرا تسلہ خالی کر کے اس نے ڈکار ماری اور پھر سستی سے وہیں لیٹ گیا۔ پیرل کے اندر اب بھی برگد کے نیچے والا واقعہ پھر رہا تھا۔ جو کچھ وہاں پیش آیا وہ اسے زیادہ غلط نہیں لگ رہا تھا۔ اسے چاچے علی حیدر کا بولنا چبھ تو رہا تھا مگر ایسا بھی لگ رہا تھا جیسے اس کی طرف سے بھی چاچے علی حیدر نے دو بول بول دیے ہوں۔ اس نے پیٹ پر زور پڑتا محسوس کیا۔ اس نے کروٹ بدلی اور پہلو کے بل ہو کر زوردار آواز میں ایک پاد داغا۔ ’’ہائے ہائے‘‘ کہہ کر اس نے پیٹ پر ہاتھ پھیرا۔ اب فرحت ہوگئی تھی۔ وہ اٹھ کر بیوی کو منانے کمرے اندر چل دیا۔ کمرے میں داخل ہوا تو بیوی ابھی بھی سسک رہی تھی۔ اس کی سسکیاں سن کر اس پر بوجھ پڑگیا۔ یہ آواز اسے مارے ڈالنے لگی۔ وہ اسے منانے میں جت گیا۔ پھر جب پاؤں کی تلیوں میں گدگدی کرنے، پاد چھوڑنے، مسخری کرنے پر بھی بیوی نہ مانی تو وہ زمین پر بیٹھ کر کان پکڑتے مرغا بنتے ’’ککڑوں کوں‘‘ کی آواز بولنے لگا۔

’’اللہ سائیں مافی! یہ کیا قہر کر رہے ہو سائیں؟لوگ سنیں گے تو کیا بولیں گے!‘‘

بیوی گھبرا کر اٹھ کھڑی ہوئی اور اس کا منھ دبایا۔

’’کہیں گے مرغا بول رہا ہے، اور کیا!‘‘

’’سب کو پتا ہے، ہمارے پاس مرغا ہے ہی نہیں۔‘‘

’’یہ تمھارے سامنے اتنا بڑا بیٹھا ہوا ہے، نظر نہیں آتا؟ایک بار پھر بولوں؟ککڑوں کوں!‘‘

’’بس کرو سائیں۔ توبہ ہے میری۔ اوپر بیٹھو۔‘‘

بیوی نے کھینچ کر اٹھایا۔ پیرل اٹھ کر چارپائی پر بیٹھ گیا۔ اس نے بیوی کو بازوؤں میں لے کر اس کا گال چوما۔ بیوی کی غمزدگی میں کمی آئی۔ وہ شرما کر ہنس دی۔

’’اس طرح ہنسا کرو۔ تُو دکھی ہوتی ہے تو میرا سورج ڈوب جاتا ہے۔ سکینہ، چاول لے کر آ۔‘‘ اس نے سکینہ کو پکارا۔ ’’آج میں تمھیں اپنے ہاتھ سے کھلاتا ہوں۔‘‘

بیوی پھرہنس دی۔ اس کا غم کم ہوا تھا مگر اتنا بھی نہیں کہ سکھ پا سکے۔ اس نے پیرل سے شام والی بات پوچھی۔ پیرل اس کے کہنے پر واقعہ بتاتا گیا اور اس دوران جہاں تک ممکن تھا، وہ چاچا علی حیدر کی باتیں کم کرتا گیا۔ یہ سنتے سنتے بیوی کے غم پر غصہ حاوی ہونے لگا۔ وہ علی حیدر کو گالیاں اور کوسنے دینے لگی۔

’’کالا منھ ہو اس بڈھے کا! رب کرے اسے کفن بھی نہ ملے! دستگیر کرے ڈوب کے مر جائے، اندھا ہو جائے، اس کی ٹانگ ٹوٹے مردار کی! جنازہ قبر بھی نہ ملے کسی کو اس کی! اللہ سائیں اسے کالا سانپ کاٹ جائے! کوڑھ ہو جائے اس کو!‘‘ وہ جھولی بھر بھر کے بددعائیں کرنے لگی۔

’’اب چھوڑ۔ بڑا ہے، سفید داڑھی والا۔‘‘

’’تیرا ہوگا بڑا۔ ایسے ہی چھوڑ دوں اسے؟اس بدبخت نے میرے اپنے چھین لیے مجھ سے۔ یہ میری جھولی دیکھ رہا ہے نا مولا؟اس سے میرا ایک ایک حساب لینا۔‘‘

’’اب اٹھ۔ روٹی ووٹی کھالے۔‘‘ پیرل نے بیوی کو نیچے سے زبردستی اٹھایا جو جھولی پھیلا کر گڑگڑاتی ہوئی زمین پر بیٹھ گئی تھی۔ بیوی کی آنکھیں آنسوؤں سے بھری تھیں۔

’’فکرات نہ کر دِلڑی۔ ہم چلیں گے، تیرے باپ والوں کو منا کر آئیں گے۔ میں نہیں ہوں؟‘‘

اس بات سے سلیمت کی دل پر ٹھنڈے چھینٹے پڑے۔

’’اب تو خوش؟‘‘ سلیمت نے سر ہلایا۔ ’’بھلا ہنس کر دکھا!‘‘ پیرل کے الفاظ میں چاہت کا جادو تھا۔ بیوی مسکرائی۔ پیرل کا من کھل اٹھا۔ اٹ پٹے واقعات سے پیدا ہونے والی مشکل صورتحال کا اختتام پیرل کی طبیعت میں وہی جولانی لانے لگا۔ اس نے بیوی کو ہنسا ہنسا کر پیٹ میں بل پڑنے تک نہیں چھوڑا۔ بعد ازاں دونوں لیٹ پیٹ کرسوگئے۔

پیرل حسب عادت پو پھٹنے کے وقت جاگا تو آسمان سیاہ بھرے بادلوں سے اٹا ہوا تھا۔ روز چلنے والی ٹھنڈی ہوا کے جھونکوں کا نام نہ تھا جو صبح کو اور بامعنی بناتے تھے۔ ماحول میں بھاری پن تھا اور حبس کی اولین کیفیت چھائی تھی۔ مطلب کہ بارش کی جملہ نشانیاں موجود تھیں۔ یہ اشارے دیکھ کر پیرل کا جی خوش ہو گیا۔ لوٹا اٹھائے وقت اس نے پاد داغا۔ پاخانے سے نکلتے وقت ’’ہائے ہائے‘‘ کی آواز ایک خوش آہنگی کے ساتھ اس کے منھ سے نکل رہی تھی۔ ’’اتنا تو کھا کر مزہ نہیں آتا جتنا ہگ کر آتا ہے،‘‘ اس نے خود کلامی کی۔ ’’واہ مولا واہ! خوش رہ سدا۔ بس آج ایسا کوئی مینھ برسا، دل میں ٹھنڈ پڑ جائے۔ بوند گرے کوئی وقت ہو گیا ہے۔ جو انڈے تھے وہ بچوں والے ہوگئے ہوں گے۔ ابھی اور کتنا ترسائے گا؟ کوئی ہے حساب کتاب تو بول۔ ہے کوئی؟مسیت (مسجد)ہے، ملّا ہے۔ ملّا کو اَن پانی ملتا ہے۔ ملّا آذان نماز سب کر رہا ہے، تو پھر اور کیا بات ہے؟اگر کوئی اور ناراضگی ہے تو بتا دے بھلا۔ بنا بتائے ناراضگی کا کوئی فائدہ؟یار، بات سن! اگر کوئی ایسی ویسی چھوٹی موٹی ناراضگی ہے تو معاف کر کے اپنا قرب کر۔ مینھ پڑے گا ناں تو چھوٹا بڑا بہت خوش ہوگا۔ دعا کریں گے تجھے۔ مولا نہیں ہے؟بس پھر آج دمادم مست قلندر ہو جائے۔ چل بھلا، یہ بھی وعدہ ہے، آج مینھ برسا تو اس جمعے نماز پڑھوں گا۔ پکّا وعدہ ہے داڑھی کا!‘‘ پیرل نے سیدھا ہاتھ داڑھی پر پھیرا۔ ’’ایسے نہیں کہہ رہا، پکّا پڑھوں گا۔ وہ پچھلی بار اونچ نیچ ہوگئی تھی لیکن اب بالکل ایسا نہ ہوگا۔‘‘ پیرل نیم روشنی میں کھڑا آسمان کی طرف منھ کیے بولے جا رہا تھا۔ ’’پھر کیا کہتا ہے؟ہوگا کام یا نہیں؟ہوگا نا؟وَہوا سائیں، وَہوا! آج میں ہٹی پر ہی نہیں جاتا۔ یا جاؤں؟ اگر مینھ میں تھوڑی دیر کردے تو میں سامان لے آؤں؟ایسے بچوں کی شے شغل ہو جائے گی۔ بچے خوش۔ ٹھیک ہے؟ اچھا پھر میں جاتا ہوں۔ ابھی جاتا ہوں اور جودمیں سامان سڑو لے کر واپس آجاؤں گا۔ سائیکل ایسے بھگاؤں گا جو ریل کار، دیکھنا تم! کیوں، یقین نہیں آیا کیا؟اب ایسی بات بھی نہیں۔ صفا گیا گزرا نہ سمجھ۔ دیکھنا کیسے اڑاتا ہوں۔‘‘