پرانا شہر

پرانے شہر کی فصیلیں منہدم ہو چکی ہیں۔ شہر ضرور سلامت ہے۔ اس طرح نور محلہ اور نور مسجد بقید حیات ہیں۔ انہیں لوگ جانتے ہیں۔ بیگم نور حیات کو بھول گئے ہیں۔ اس کی توقبر کا نشان بھی نہیں رہا۔ اسی نے یہ محلہ بسایا اور چھوٹی سی عبادت گاہ بھی بنا دی جس کی مرمت کی ذمہ داری اللہ رکھا نے اپنے چوڑے چکے کاندھوں پر ڈال لی۔ اس کارخیر میں عبدالرحمن فاروقی شریک کار تھا۔ وہ کوچی پھیر دیتا اور اللہ رکھا قلعی منگوا لیتا۔ یوں کام بن جاتا اور پھر سال بھر کے لیے چھٹی ہو جاتی۔

اللہ رکھا نے کچھ سوچ کر مہترانیوں کی گلی کے دہانے پراپنی امپیریل سوڈا واٹر فیکٹری کی داغ بیل ڈالی۔ یہاں گہما گہمی رہتی۔ ہفتے میں کم از کم ایک بار کوئی نہ کوئی مہترانی جلال میں آتی اور کسی اختلافی مسئلے کی بنا پر ہمسائی سے ٹکر لیتی۔ پھر ٹکراؤ کے مظاہرے کو فیصلہ کن بنانے اور ٹریفک روکنے کے لیے گلی سے نکل کر وہ سڑکوں کے بیچوں بیچ آ جاتیں۔ خدا داد ذہانت اور قدرت کے عطاکردہ تخلیقی جوہر کی بدولت نہایت فصیح و بلیغ گالیاں وضع کرتیں۔ گالیوں سے دال نہ گلتی تو ایک دوسرے کے کپڑے پھاڑ دیتیں۔ پھر بھی کیتھارسز نہ ہوتا تو ایک دوسرے پر چڑھ دوڑتیں اور ایسے ایسے داؤ پیچ کام میں لاتیں جن کا ذکر کوک شاستر میں بھی نہیں ملتا۔

اللہ رکھا کبھی بیچ بچاؤ نہ کرتا۔ بس جی خوش کرتا۔ اپنی سفید پوشی کی حفاظت کرتا جو سفید قمیض، سفید شلوار اور ایک رومی ٹوپی پر مشتمل تھی۔ اپنا امیج ابھارنے کے لیے وہ ہر اتوار کی صبح سفید جوڑا زیب تن کرتا۔ یہ معمول عمر بھر رہا۔ بڑا آدمی بننے کے لیے وہ سفید پوشی کو ضروری سمجھتا اور ایک پلان کے تحت کام کرتا۔ قسمت کی بات ہے کہ اسے تین روپے ماہوار پر اصطبل مل گیا اور اس کے ساتھ پندرہ روپے ماہوار پر گھوڑوں کے مالشیے بھیا جی کو بھی رکھ لیا۔

اللہ رکھا کا قد چھوٹا تھا۔ قد آور بننے کی آرزو رکھتا تھا۔ فٹ رول قد بڑھا نہ سکتا تھا۔ مشین ہاتھ سے چلتی تھی۔ اس نے اپنے طول و عرض سے کہیں بڑا سائین بورڈ بنوایا۔ اس پر موٹے قلم سے اردو اور انگریزی میں امپیریل سوڈا فیکٹری لکھوایا۔ جب چمکتا دمکتا یہ بورڈ اصطبل پر آویزاں کیا گیا اور اللہ رکھا کے ہونٹوں پر مونا لزا سے قدرے زیادہ مسکراہٹ نمودار ہوئی، قد آوری کا نسخہ ہاتھ لگا، باہر سڑک پر آرام کرسی رکھوائی، پہلو میں حقہ رکھا، ادائے نخوت سے کش لگانے اور آنے جانے والے کا ردعمل معلوم کرنے لگا۔

حقہ اس کی زندگی کا جزو لاینفک تھا۔ اس کی عادت اسے اپنے مرحوم باپ اللہ وسایا کا حقہ تازہ کرتے کرتے پڑی۔ اپنے باپ کی یاد تازہ رکھنے کی غرض سے وہ اپنا حقہ آپ تازہ کرنے لگا۔ ایک طرف اس نے قدامت پسندی کا ثبوت دیا اور دوسری طرف سوڈا واٹر فیکٹری قائم کرکے صنعتی انقلاب سے استفادہ کیا۔ ویسے اس نے صنعتی انقلاب کی پیداوار۔۔۔ لید بھرے تار اور پیڈرو کے سگریٹ کو منہ نہ لگایا۔ ایک پیسے میں دس سگریٹ کیا برے تھے لیکن کسی نے اس کے دل میں یہ بات بٹھا دی:

یوریائے خود بہ قالینش مدہ

بیذق خود را بہ فرزینش مدہ

اسے سمجھا دیا گیا کہ فرنگی صنعتی انقلاب کی بدولت مشرق سے ابھرنے والے سورج کے ساتھ زیر حراست ممالک کو بڑی بیدردی سے زیرو زبر کر رہا ہے۔

حقے کی گڑگڑ سے اسے یوں محسوس ہوتا جیسے وہ اس سے ہم کلام ہو۔ ایسے میں وہ گہری سوچ میں پڑ کر مستقبل کے سمندر میں ڈوب جاتا اور دیر تک ڈوبا رہتا۔ علاقے کا واحد صنعتکار تھا۔ لوگ اسے اور امپیریل سوڈا واٹر فیکٹری کے بورڈ کو رشک اور حسد کے ملے جلے جذبات سے دیکھتے۔ پاس سے گزرنے والے سلام ضرور کرتے۔ خاموشی کا دورہ شدت اختیار کر لیتا تو اسے اپنی بھی سدھ بدھ نہ رہتی، سلام کا جواب کیسے دیتا؟ دیسے میں وہ کسی کا سلام موصول ہی نہ کرتا۔

عبدالرحمن فاروقی اسے جذب کی کیفیت سے نجات دلانے کی غرض سے لوہے کی کرسی اٹھاکر لانے کی بجائے گھسیٹ کر لاتا۔ یہ ترکیب غیر موثر ثابت ہوتی تو حقے کی نڑی اس کے ہاتھ سے چھین لیتا اور اس کی مہر خاموشی توڑ دیتا۔

عبدالرحمن فاروقی اس کا لنگوٹیا یار تھا۔ سفید پوشی کا بھرم رکھنے کی غرض سے لوگوں کے مکانوں میں سفیدی کرتا۔ اسے دانشور بننے کی بھی دھن تھی، چنانچہ اپنے یار فضل کباڑئیے کی دکان سے نیرنگ خیال، ساقی اور عالمگیر کے پرچے خرید لاتا۔ ل احمد کے افسانے بڑی رغبت سے پڑھتا۔

اب دونوں میں سلسلہ کلام جاری ہوتا۔۔۔

’’حقہ پیتاہے تو حقہ پیا کر! اسے ضائع نہ کیاکرو‘‘۔

’’بلیا! میں نے امپیریل سوڈا واٹر فیکٹری کچھ ضائع کرنے کے لیے نہیں کچھ حاصل کرنے کے لیے بنائی ہے‘‘۔

’’کیا بنایا ہے؟ کیا بنائےگا؟‘‘

’’نور محلہ، یہ تو اپنا گھر ہے۔۔۔ ادھر ٹکسالی دروازہ، عزیز ٹھیڑ تک کا علاقہ۔۔۔۔ ادھر بازار شیخو پوریاں، ہیرا منڈی اور بھاٹی دروازہ فتح کر لیا ہے میں نے۔میرا پانی یہاں لگ جاتا ہے‘‘۔

’’کیسری اور پنجاب سوڈا واٹر فیکٹری کامقابلہ کیسے کریگا؟‘‘

’’اسی سوچ میں تو میں گم رہتا ہوں‘‘۔

’’گم رہتا ہے تو کہیں اپنے آپ کو گم نہ کر بیٹھنا!‘‘

’’فیکٹری نہ بناتا تو ضرور برضرور اپنے آپ کو گم کر بیٹھتا۔ اب تو میں نے اپنے آپ کو پا لیا ہے‘‘۔

عبدالرحمن فاروقی چپ ہو جاتا۔ وہ اتنا ضرور سوچتا کہ اللہ رکھا جیسا کامل بندہ کیا کرےگا؟ فیکٹری چلانا اس کے بس کا روگ نہیں۔ اس کے لیے بڑے چست چالاک، ہوشیار ویلدار بندے کی ضرورت ہے۔

اللہ رکھا کا کام چل نکلا۔ اس نے پنجاب فیکٹری اور کیسری سوڈا واٹر فیکٹری کی پروا نہیں کی۔ سوڈا، لیمن، کیلا، روز، جنجر سبھی قسم کامال سپلائی کرنے لگا۔ بندگولی والی بوتلیں نو آنے درجن کے حساب سے دیتا۔ دکاندار اکنی بوتل کے حساب سے بیچتے۔ شام کی وٹک سے اسے دو اڑھائی روپے کی بچت ہوتی۔ رقم خاصی بڑی تھی۔ وہ روپیہ بارہ آنے خرچ کرتا، باقی الماری میں رکھتا۔

جب اصطبل تھا تو برکتی اس کی صفائی کرتی بلکہ صفائی کم اور نخرہ زیادہ کرتی۔ اللہ رکھا کو بھلی لگی۔ اس نے دو روپے ماہوار پر رکھ لیا۔ وہ بہت خوش ہوئی۔ اپنے آپ کو دلکش بنانے کے لیے ہر روز ایک پیسے کا میٹھا بنارسی پان کھاتی اور دوسرے دن دمڑی کا دنداسہ ملتی۔ ہر اتوار کو ملحقہ باغ کی نہر پر جاکر کپڑے دھوتی اور دوپہر تک سکھا لیتی۔ انہیں پہن کر گلی اور بازار کا چکر ضرور لگاتی، ہنستی مسکراتی، اپنے دام بڑھاتی۔

جوں جوں فیکٹری کی سیل بڑھی، برکتی اور بھیا جی کی تنخواہ بڑھی۔ بھیاجی یہ دیکھ کر رنجیدہ ہواکہ وہ کام کرتے کرتے چور ہو جاتا، اس کی تنخواہ تو بڑھنی چاہیے، برکتی کی تنخواہ کس حساب سے بڑھتی ہے؟ ایک دن اس نے کہہ ہی دیا: میاں! یہ چھوکری کیا پال رکھی ہے؟ کوڑی کا کام نہیں کرتی اور ہر مہینے مہینے پیسے اینٹھ کر لے جاوئے ہے۔ کاہے کو؟‘‘

’’بھیاجی! یہ سیاست ہے۔ تو نہیں سمجھتا‘‘۔

’’سب سمجھوں ہوں میاں! جھاڑو کم لگاوے ہے، نخرہ جیادہ دکھاوے ہے‘‘۔

’’بھیاجی! کبھی اس کا مکھڑا دیکھ!‘‘

’’دیکھا ہے۔ گھروالی کو دیکھت ہوں۔ باہر تانک جھانک ناہیں کرتا ہوں۔ عورت وہ اچھی جو کھونٹے سے بندھی ہووے‘‘۔

’’بھیا جی! اس کا مکھڑا دھلا ہوا چاند ہے۔ پان کھاتی ہے تو بلیا ں لال ہو جاتی ہیں۔ پہلے ہی کم لال نہیں۔ دانداسا ملتی اور دانت موتیوں کی طرح چمکاتی ہے‘‘۔

اتنے میں گاما لالی والا ’’وند موتیاں دے دانے۔ ہس دی تے پھل کھڑوے‘‘ گانا گاتا آیا اور چلاکر بولا:

’’میاں دوپہر کا ویلا آن لگا۔ کب پہنچےگا پانی؟‘‘

’’آتا ہے پانی۔ بھیا جی ذرا دل لگی کر رہا تھا‘‘۔

’’ہم دل لگی ناہیں کرت ہیں۔ لالی والے باؤ! تو چل۔ ڈالا لے کر آتا ہوں‘‘ بھیا جی نے مشین کی جانب جاتے جاتے کہا۔

’’اور تیری خیر ہووے!‘‘ کہ کر گاما لالی والا چلا گیا۔ بھیا جی ڈالا لے کر پیچھے پیچھے گیا۔ ایک دو ڈالے ہوں تو بھیاجی اٹھاکر لے جاتا، ٹھلیے میں رکھ کر نہ لے جاتا، جس کی کھڑ کھڑ دور تک اعلان کرتی جاتی کہ بھیا جی آ رہا ہے۔

میدان خالی ہوا۔ اللہ رکھا اپنے آپ سے ہم کلام ہوا: ’’کیا بے سرا بندہ ہے۔ اچھی چیز بھی اسے بری لگتی ہے‘‘۔

اتنے میں کلام کرنے والی آ گئی اور ہم کلامی کا سلسلہ ٹوٹ گیا۔

درمیانے قد کی عورت۔۔۔ عورت سے سواتھی۔ اللہ رکھا کو دیکھتے ہی مسکرائی۔ مسکراہٹ اور پھر جوانی کی مسکراہٹ، بڑا موثر ہتھیار تھا۔ اللہ رکھا تو کیا، جسے چاہتی اس ہتھیار سے مغلوب کر لیتی بلکہ وہ آپ ہی آپ فتح ہو جاتا۔ دنداسے نے ہونٹ گہرے نسواری کر دئیے تھے۔ مستی سے لبریز بڑی بڑی کجلائی آنکھیں چومکھیا دار کرتیں اور دیکھنے والے چت ہو جاتے۔ بھرپور شباب، کمر سے اوپر زور آوری کے دو نشان، چنی ڈھلک ڈھلک جاتی اور شباب منظر عام پر آ جاتا۔ لمبے بال دو گتوں میں تقسیم کئے ہوئے، غضب کی شان رعنائی تھی۔ ہر عضو سانچے میں ڈھلا ہوا تھا۔ اپنے وقت کی افرو دائتی تھی۔

اللہ رکھا پر اپنے بانکپن کا وار کرتے ہوئے اندر لیمن کے ڈالوں کی طرف چلی گئی۔ انگوٹھے کے زور سے ادھا کھولا، پیا اور اللہ رکھا سے بات چیت کرنے کے لیے آرہی تھی کہ بھیاجی خالی ڈالے لیے فیکٹری میں داخل ہوا۔ اس کے آتے ہی لبریز بدن اور شوخ تیوروں والی برکتی نو دو گیارہ ہو گئی۔ بھیا جی بدذوق سہی، لیکن اخلاقیات کے معاملے میں کھرا بندہ تھا۔ بداخلاقی اسے کسی قیمت پر گوارانہ تھی۔

اللہ رکھا کرسی اور حقہ لے کر سڑک پر آ گیا اور برکتی کی بے بسی پر مسکرایا۔ بھیا جی ہی ایسا بندہ تھا جس پر برکتی کا وار خالی جاتا اور وہ پسپا ہو جاتی۔

بھیا جی نے ڈالے رکھے اور اللہ رکھا کے پاس آیا۔ بولا: ’’میاں! کیا دیوت ہے یہ چلبلی چھوکری؟ کیا بچہ لیوت ہو اس سے؟‘‘

’’ارے نہیں بھیاجی! سارا کھیل پیسے کا ہے۔ پیسہ پلے ہو تو تھوڑی بہت دل لگی کر لینی چاہیے۔ نہیں تو جی خراب ہو جاتا ہے‘‘۔

’’جی کھراب ہووے تو سادی کرلے بندہ۔ جیون بگاڑ دیوت ہے یہ چھوکری‘‘۔

’’نہ نہ بھیا جی! کمر میں ہاتھ ڈالنے اور منہ چومنے سے کیا بگڑتا ہے اس کا یا میرا؟‘‘

بھیاجی اندر چلا گیا۔ سمجھ گیا کے مالک سے الجھنے اور رسوا کرنے کا اسے حق نہیں۔ رمز و کنایہ کا فن اسے آتانہ تھا۔ وہ پردہ ڈالے بغیر کھری بات کرتا۔

اللہ رکھا بڑا اجلا رہتا اور وٹک بھی کھری تھی اس کی۔ حقیقت پر پردہ ڈالنے کے لیے اس نے دانستہ حساب کتاب کے لیے میلی کچیلی کاپی رکھی تھی۔ کاپی لے کر وصولیاں کرنے چلا گیا۔

ہر دکندار اپنی اپنی بولی بولتا۔ گاماں لالی والے کی تو بس ایک ہی رٹ تھی: ’’میاں! میری دکنداری نہ مار! بڑی مشکل سے اچھا ٹھکانہ ملا ہے۔ ادھیلیے زیادہ دیا کر، بوتلیں کم!‘‘

ایک ہی بندہ ہے میرے پاس! تیرے ہاتھوں کو مہندی لگی ہے۔ آکر ڈالا لے جایا کر!‘‘

’’میاں! کبھی موقیا بنے تو آ جاتا ہوں۔ دکان کھلی چھوڑ کر ڈالا لینے نہیں جا سکتا۔ خالی تھاں دیکھ کر جو چوری نہیں کرتا وہ بھی کرتا ہے۔ ادھے تین بار چاہیں مجھے! بنے شک پیسے پہلے لے لے!‘‘

’’نہ۔ یہ کام نہیں کرتا میں۔ پیشگی لیتا ہوں نہ ادھار دیتاہوں۔ سودا نقد بہ نقدی کا!‘‘

کامنی کی اور ہی سوچ تھی۔ ٹبی کے دہانے پر دکان تھی اس کی۔ خوشحال تھی۔ فری لانسر تھی۔ عمر کچھی ہوئی تھی۔ جوانی ڈھل چلی تھی۔ پھر بھی طنابیں کھچی ہوئی تھیں۔ کس تھی بدن میں۔ سانچی کے پان اور قینچی کے سگریٹ اسی سے ملتے۔ بٹی کا ڈربہ اس نے لال خاں کی خاطر چھوڑا اور اس کی دکان پر آ بیٹھی۔ لال خاں سودا لینے جاتا تو دکان بند نہ کرتا۔ کامنی سنبھال لیتی۔ وہ تو دکان والے کو بھی سنبھال لیتی جس نے اپنے سمیت دکان اس کے حوالے کر دی تھی، لیکن تابکے؟ جب موت کا ریلا آیا تو وہ اسے سنبھال نہ سکی۔ وہ خود ڈانواں ڈول ہو گئی۔ ٹبی میں اس کا ڈربہ خالی نہ رہا تھا۔ خالی ہوتب بھی وہ لوٹ کر وہاں نہ جاتی۔

اللہ رکھا کو آتے دیکھ کر پڑیامیں رکھے ہوئے دام صندوقچی سے نکالے اور سامنے رکھ دیئے۔ اللہ رکھا نے پڑیا اٹھائی، پیسے گنے اورجیب میں رکھ لیے ۔

’’میاں! میں تیرے پیسوں میں بئی مانی نہیں کرتی‘‘۔

’’کملی ہے تو بھی۔ بھل چک ہو جاتی ہے بندے سے‘‘۔

’’میاں! ایک بات ہے۔ تیرا بڑا فیدہ ہے اس میں۔ اتنی دور فیکٹری بنائی ہے۔ وہاں دن بھر بیٹھا مکھیاں مارتا ہوگا۔ اللہ وسائی کا مکان خالی ہونے والا ہے۔ بڑی کچی جگہ ہے‘‘۔

اللہ وسائی کا نام سن کر وہ چوکس ہوا۔ اس نے پوچھا ’’کہاں جا رہی ہے اللہ وسائی؟‘‘

’’جانا کہاں ہے؟ برابر کے بزار میں چاند خاں مٹھائی والے کی دکان کے سامنے چبارہ خالی پڑا ہے۔ جگہ اچھی ہے اس سے۔ وہاں جا رہی ہے‘‘۔

’’اچھا‘‘۔

خالی ہونے والا چپارہ بکاؤ ہے۔ بڑی ٹھکانے کی تھاں ہے۔ آدھے گاہک تیرے اسی علاقے کے ہیں۔ لے لے یہ چبارہ۔ ہیٹھاں بیٹھک میں فیکٹری لگانا! اوپر اپنا ڈیرہ جمانا!‘‘

’’اچھا‘‘ سوچ لینیدے کامنی! کاروباری معاملہ ہے۔ سوچ وچار کے بعد ہی فیصلہ کرتا ہوں۔ فیکٹری ہے فیکٹری مزاخ نہیں‘‘۔

’’کیا سوچنا ہے تجھے؟ گولڈن چانس ہے یہ ہاتھ سے نکل گیا تو ساری عمر سوچتا ہی رہےگا۔ اللہ وسائی اونچے چبارے میں چلی جائےگی تو دادر کے اصطبل ہی میں پڑا رہےگا‘‘۔

’’کھوتے کا بھی سودا کرنا ہو تو بندہ پھر بھی سوچ وچار کر لیتا ہے‘‘۔

’’مت کر سوچ وچار! یہاں آئےگا تو بھرے میلے میں آئےگا۔ شراب کے ادھے پوے آدھی رات تک بکتے ہیں یہاں۔ سوڈا منوں منہ اٹھتا ہے۔ تیرے آنے سے مجھے ارمان ہو جائےگا‘‘۔

’’ہوں‘‘۔

’’پھر یہاں آکر تیرا جی لگ جائےگا۔ کاروبار دونا ہو جائےگا‘‘۔ پھر ہنس کر بولی ’’تیری خدمت فلا کروں گی۔ تیرا پیسہ مجھ پر حرام۔ پائی لوں گی تو پائی پائی روز کے روز دوں گی۔ علاقہ ادھی رات تک جگمگ جگمگ کرتا ہے۔ عزیز ٹھیٹر کے آگے جو آٹھ، دس دکانیں ہیں وہاں بھبکے جلتے ہیں۔ یہاں کوئی بھبکا نہیں جلتا۔ دن ڈھلتے ہی نیادن چڑھتا ہے۔ لیمپ، لاٹین، ہری کین اور بجلی کے آنڈے جلنے لگتے ہیں‘‘۔ پھر ذرا توقف کیا اور کہا ’’لے پھڑ! قینچی کے سرگٹ پی! عام لوگ پیڈرو کے سرگٹ پیتے ہیں۔ کھاص کھاص لوگ قینچی کے سگرٹ پیتے ہیں‘‘۔

’’میں سگرٹ نہیں پیتا۔ حقہ ٹھیک ہے‘‘۔

’’تو آتو سئی۔ حقے کا بندوبست بھی ہو جائے گا‘‘۔

اتنے میں دلاور شیر فروش آیا اور شکل دکھا کر چلا گیا۔

وہ بولی ’’اللہ رکھا! یہ جو شخش ہے یہ منڈوا ٹوٹنے تک دکا ن کھلی رکھتا ہے۔ پھر کبھی کبھی آدھی آدھی رات کو آکر میرا بوہا کھڑکاتا ہے۔ کم ذات جواری کہیں کا!‘‘

اللہ رکھا کوکامنی کی باتیں اچھی لگیں، خاص طور پر لل فلا والی بات۔ آج اس نے پہلی بار اس کی دکان پر اتنی دیر تک باتیں کیں اور سنیں ورنہ وہ تو کسی سے فالتو بات نہ کرتا۔ پیسے لیے اور اگلی دکان کا راستہ لیا۔ اسے کامنی معقول سیانی معلوم ہوئی۔ اس نے اس کا حدود اربعہ جانچا۔ جب کامنی نے پان بناکے بڑی ادا سے اسے پیش کیا تو اللہ رکھا نے اس کی لانبی لانبی، پتلی پتلی انگلیوں کو دیکھا جن پر کتھے کا پکا لال رنگ چڑھا تھا۔ وہ حمیدا جواری نہ تھا ورنہ انگلیاں پکڑ کر دھیرے دھیرے مروڑتا۔ ان کے لمس سے دل کی دھڑکن تیز کرتا۔ کہنیوں تک چڑھا رکھی تھیں آستینیں اس نے صاف ستھری چمڑی اللہ رکھا کو بھلی لگی۔ ادھیڑ عمر کی تھی لیکن عمر کے آثار عیاں تھے، نمایاں نہ تھے۔ چہرہ بے داغ تھا۔ باتیں کرتی، ہنستی مسکراتی جاتی۔ بہارکے دن ابھی لد نہ گئے تھے۔ آنکھوں میں سویرا جاگ رہا تھا۔ اس نے اس ادا سے انگڑائی لی جیسے جوانی کو بیدار کر رہی ہو۔ عورت کو اس عالم میں دیکھ کر اس مقام پر جا پہنچا جہاں حیرت کے سوا کچھ نہیں ہوتا۔ بےخود ہو گیا۔

فیکٹری کے انتقال کا مسئلہ سودو زیاں کی حدود سے نکل کر دل تک جا پہنچا۔

اللہ وسائی نے مکان چھوڑ دیا۔ اللہ رکھا نے روک لیا۔ بات کل پرزے اکھاڑنے کی نہ رہی، سوچ میں ایک عورت کلبلائی۔ اللہ وسائی توہرجگہ اللہ وسائی تھی۔ اللہ رکھا کی نسبت کچھ نہیں کہا جا سکتا، یہ بھی اللہ رکھا ہر جگہ اللہ رکھا ہی رہےگا۔

وہ پہلے بھی حساب کی میلی کچیلی کاپی لے کر یہاں آتا، چونیاں اٹھنیاں بٹور کر چلا جاتا۔ کامنی نے بھی کبھی جال نہ پھینکا۔ یہ تو سب تقدیر کا کیا دھرا تھا جو اپنے وقت پرکام کر دکھاتی ہے۔

اللہ رکھا نے نئی مطالعہ گاہ میں قدم رکھا۔ نئی دنیا میں آیا۔

نیکی اور بدی کے طوفانوں سے کھیلتی ہوئی یہ دنیا گورکھ دھندا تھی۔ چاروں کھونٹ بھلے مانسوں کی ماڑیاں تھیں۔ چھوٹی چھوٹی کوٹھڑیوں کے اوپر کوٹھے تھے۔ ڈیرہ دارنیوں اور ٹکیائیوں کے ٹھکانے شرفا کی حویلیوں سے جڑے ہوئے تھے، لیکن دیواریں آپس میں باتیں نہ کرتیں۔ کوئی دیوار نہ پھاندتا، ادھر ادھر نہ جھانکتا ہر ایک کو اپنے کام سے کام تھا۔ اس عدم مداخلت نے عدم تشدد کی صورت اختیار کر لی تھی۔ تشدد کی نوبت آتی تو نیکو کار نیکوکاروں سے لڑتے اور بدکار بدکاروں پر ٹوٹ پڑتے۔ دودھ کا دودھ اور پانی کا پانی کرنے کے لیے علاقے کا تھانیدار بیچ میں کود پڑتا۔ اس کارخیر کے عوض نیکو کاروں سے برائے نام اور بدکاروں سے من مانا مختانہ وصول کرتا۔ بدکاروں کی کارگزاری پیش نظر رکھ کر تھانے کی نیلامی میں بڑھ چڑھ کر بولی دی جاتی۔ سہرا بدکاروں کے سرتھا جو تھانے کی مستقل آسامیاں تھے۔

دنگا فساد کرنے والے پیشہ ور لوگوں نے کبھی امن اور قانون کا مسئلہ کھڑا نہیں کیا کیونکہ تھانے میں پہنچ کر وہ بڑی برخود داری دکھاتے، چپ چاپ لمبے پڑ جاتے، بلا تامل پولیس کے تاریخی چھتر کھاتے، حسب معمول بلبلاتے، چیختے، چلاتے، حسب معمول پیسے دے کر چلے جاتے اور پھر از سرنو پڑھا ہوا سبق دہراتے اور اللہ کو پیارے ہونے تک اسی اسلوب سے زندگی گزارتے جسے وہ تقدیر بندھن کہتے۔

فاروقی نے نقل مکانی کو نا پسند کیا۔ بھیاجی اس کا ہم خیال تھا۔ دونوں نے مل کر پیشگوئی داغی کہ میاں پٹڑی سے اتر گیا ہے۔ وہ دن دور نہیں کہ فیکٹری کو ٹھکانے لگاکر گھر جا بیٹھے گا۔

فاروقی نے اخلاقی لیکچر پلانے کی ٹھانی اور کہا ’’ یار اللہ رکھا! یہ کیا تو نے کہا؟ گشتیوں کے بازار میں آگیا۔ ٹکہ ٹوکری ہیں عورتیں یہاں۔ لوٹ لیں گی تجھے اور تو کچھ کر نہ سکےگا‘‘۔

قبل ازیں کہ معاملہ طول پکڑتا اللہ رکھا نے بھیا جی سے کہا ’’ہاتھ والی بوتل ادھر لے آ! فروقی کو پلا! اس نے رات کوئی خواب دیکھا ہے‘‘۔

بھیا جی تازہ بھری ہوئی جنجر کی بوتل لے آیا اور فاروقی کے سامنے رکھ دی۔

’’کوئی جھوٹا خواب نہیں دیکھا میں نے۔ میرے خواب سچے ہوتے ہیں اللہ رکھا! دیکھ لینا!‘‘

’’سچے خواب دیکھتا ہے تو بن جا سفنا پیر! یہیں فیکٹری میں بیٹھ کر حق ہو کر! دربار جانے سے پہلے بڑی بڑی عورتیں تجھے سلام کرنے آئیں گی۔ چڑھاوے میں آدھا تیرا آدھا میرا۔ سوں رب دی! غرور کے گھوڑوں پر سوار ان عورتوں کی اکڑی تنی گردنیں تیرے آگے جھک جائیں گی۔ بڑی ڈرپوک ہوتی ہیں یہ! پیر فقیر کی مار سے مرجاتی ہیں۔ چھوڑ کوچی پھیرنے کاکام! کوٹھی بنا لےگا کوٹھے والیوں کی مدد سے‘‘۔

فاروقی نے بوتل منہ سے لگانے کے لیے برابر رکھی ہوئی میز سے اٹھائی اور ہنس کر کہا ’’تو نے بات ہی کھو کھاتے میں ڈال دی اللہ رکھا!‘‘

’’بلیا! تو اپنے آپ کو سمجھتا ہے نہ کاروبار کو۔ میں سمجھتا ہوں کاروبار کیا ہوتا ہے‘‘۔

’’تو کیا سمجھتا ہے؟یہ گشتیاں تجھ سے زیادہ سمجھتی ہیں۔ تجھ سے بھی بڑے بڑے کاروباری ان کی مٹھی میں ہوتے ہیں۔ کاروباری لوگ ہمیں لوٹتے ہیں، یہ کاروباری لوگوں کو لوٹتی ہیں، کون بڑا ہوا پھر؟ تو اکیلا ہے اور گشتیوں کے ہیٹر کے ہیٹر ہیں یہاں‘‘۔

’’چھوڑ یار! کیا باتیں لے بیٹھا ہے صبح صبح۔ گشتیاں تو ابھی سوئی پڑی ہیں‘‘۔

فاروقی نے بوتل پی۔ حقے کی گڑگڑ شروع ہوئی۔

اللہ رکھا نئی دنیا میں آ گیا تھا۔ جو قدم اٹھا اب واپس نہ جا سکتا تھا۔

سامنے بھیڑی گلی۔۔۔ اس نے اچھی طرح دیکھی۔ یہاں گناہوں کا کیچڑ تیز رو نالی بہاکر لے جاتی۔ نالی بلندی سے پستی کی طرف بہتی۔ کیا لوگ اور کیا یہاں کی عورتیں، بلندی سے پستی کی طرف جاتیں۔ ان کے گناہوں کا بچا کھچا لاوا مہترانی اور ماشکی صاف کر دیتے۔ گلی کو بھی دھو کر صاف کر دیتے۔ گلی دھل کر یوں چمک اٹھتی جیسے کسی مہمان خصوصی کی آمد آمد ہو۔ جوان مٹیاریں آتیں، شوخی دکھاتیں، ڈالفن کی طرح شرارتیں کرتیں۔ جلد ہی جوانی ڈھل جاتی۔ جوں جو گردوں عمر کی گھڑیاں گھٹاتا توں توں چہروں کی لپائی پتائی بڑھتی۔ اللہ رکھا کمال و زوال کے یہ تماشے دیکھنے لگا۔

دھندا تو دن چڑھے شروع ہوتا، لیکن ہاؤس فل زوال آفتاب کے بعد ہوتا۔ سرشام گلی میں بھیڑ ہو جاتی اور تل رکھنے کی جگہ نہ رہتی۔ چہلوں اور گالیوں کا بیک وقت مزا لوٹنے والے ہلڑ مچاتے۔ مرغیاں ڈربوں سے باہر آ جاتیں۔ پھر جیسے مجمع گیر تماشا دکھا کر سانپ پٹاریوں میں ڈال لیتا اور برسر مطلب آتا تو بھیڑ چھٹنے لگتی اسی طرح دل پشوری کرنے والے ماں بہن کی گالیوں سے تواضع کروا کے لطف اندوز ہو کر رخصت ہو جاتے۔ سچے گاہک بالخصوص سفید پوش اور آنے والی سہاگ رات کے لیے ریہرسل کرنے والے ڈربوں کی مرغیوں اور چوباروں کی کبوتریوں کی طرف لپکتے۔ آدھی رات کے لگ بھگ اپنے اپنے دلوں کودن بھر کا حساب دےکر یوں چارپائی پر جا پڑتیں جیسے دم توڑ گئی ہو۔

اللہ رکھا کے شام کا وقت بہت اہم ہوتا کیونکہ اس وقت وہ دکنداروں سے وصولی کرتا۔ اس کے اندرونی شلوکے کی جیبیں چہرہ شاہی روپوں اور اٹھنیوں چونیوں سے بھری ہوتیں۔ ان کی حفاظت ضرور ی تھی۔ پہلے گلی کے دکنداروں سے وصولی کرتا۔ ساتھ ساتھ تماشا بھی دیکھتا جاتا۔ اصطبل چھوڑ کر وہ گھاٹے میں نہیں رہا۔

فاروقی نے صاف صاف کہا ’’اللہ رکھا! تو کاروبار کرنے نہیں، عاقبت خراب کرنے یہاں آیا ہے۔ میں اس شیطانی کام میں تیرا کیسے ساتھ دے سکتا ہوں؟ تیری تباہی میں میرا نہیں، ان گشتیوں کا ہاتھ ہوگا جو تجھے چمٹنے کی کوشش کرتی رہتی ہیں‘‘۔

’’توں دم کی دم ہی رہےگا یار!‘‘

اللہ رکھا اکیلا ہجوم کو چیرتا چیرتا اور وصولی کرتا کرتا گلی میں سے چلا جاتا۔ سفید پوش اور سیٹھ بننے کا بھوت ہر دم اپنے اوپر سوار رکھتا۔ پھر بھی بندہ بشر تھا۔ للا فلا والی بات بھولا نہ تھا۔ ایک رات شیطان نے اسے آن گھیرا اور وہ کامنی کا دروازہ کھٹکھٹانے کی نیت سے ادھر گیا لیکن سراپا شیطان دلاور شیر فروش بلکہ سرفروش دیوانہ وار دروازہ بھڑ بھڑا رہا تھا۔ اللہ رکھا لوٹ آیا۔ اس کی قسمت میں کامنی بھی نہ تھی۔

قسمت مہربان تھی۔ سیٹھ بننے کا منصوبہ کامیاب ہو رہا تھا۔ ابھی گلی سے جی نہیں بھرا تھا کہ وہ ایک قدم اور بڑھا۔ بڑے بازار میں تھانے سے کچھ ہی دور، حافظ ہوٹل کے برابر سنیما کی بیرونی عمارت میں ایک ہال خالی ہوا جو اس کی موجودہ جگہ سے دگنا تگنا تھا۔ کسی سے مشورہ کئے بغیر اس نے فیکٹری اکھاڑ کر یہاں لگا دی۔

حسب دستور تمام دکان داروں کی طرح علی الصبح آ جاتا۔ بھیاجی اس سے پہلے آکر فیکٹری کھول کر کرسی باہر تھڑے پر جما دیتا۔ لمبی میز اور کرسیاں صاف کردیتا۔ داراں مہترانی تھڑا اور فرش صاف کرتی۔ یہ شوخ شرارہ برکتی کا بدل تھی۔

اللہ رکھا اور حقہ دونوں کا نام ایک ساتھ لیا جاتا۔ سیٹھ بننے کے لیے سوچ کا جال بنتا رہتا۔ دن بھر بجلی چمکتی، شعلے اس کے پاس سے گزرتے اور اس کی سوچ میں رخنہ ڈالتے۔

چھوٹے گیٹرسے نکل کر بڑے گیٹر میں آ گیا۔۔۔۔۔ کاوش کے بغیر، کوشش کے بغیر! قسمت کے کام تو پھر ایسے ہی ہوتے ہیں۔

جو سنا سنایا تھا، حقیقت بن کر سامنے آیا۔ سنی سنائی داستانوں کے اصل کردار دریافت ہوئے۔ ٹبی کے پہلو میں بیٹھ کر خواب ہی دیکھے تھے، اب وہ خواب جیتے جاگتے دکھائی دئیے۔ بالی (بعد ازاں ہر ہائی نس اقبال بیگم آف خیرپور) عیدن بائی اکھیاں والی، عیدن بائی ہسیاں والی، عنایت بائی ڈھیرو والی، خورشید بائی حجرو والی۔۔۔ یہ بڑے بڑے نام ہیں۔ حجرو گھرانے کا نام تو اللہ رکھانے بھی سن رکھا تھا۔ اسے پتا تھا کہ اس گھرانے کے لوگ ملک ہی نہیں ملک سے باہر بھی مامور ہیں۔ وہ ان سے تعلق تو قائم نہ کر سکتا تاہم انہیں دیکھ سکتا تھا۔ بڑے کلچرڈ تھے یہ لوگ۔ ہیرا منڈی اس کا کاروباری مرکز ہی نہیں محلہ بھی تھا۔ اس کی فیکٹری سے کچھ دور ایک طرف تھانہ تھا، دوسری طرف مسجد اور مدرسہ نعمانیہ تھا جسے وہ ہر سالانہ جلسے میں چندہ دیتا۔ مدرسے کی دیوار کے برابر وزیر بائی کا ڈیرہ تھا۔ اس سے تو ہر روز سرراہے ملاقات ہو جاتی۔ دو چار جملوں کا تبادلہ بھی ہو جاتا۔ طمنچہ جان جو حافظ ہوٹل کے بالکل سامنے رہتی تھی، باہر نکلتی نہ تھی۔ نیتی سنیارن سے بھی اس کا تعارف ہوا۔۔۔ سبھی شائستہ عورتیں تھیں۔ طاؤس و رباب کی جان تھیں جو اس وقت تک بدن کا تقدس برقرار رکھتیں جب تک گاہک دہلیز پر سجدہ نہ کرتا اور منہ مانگے دام قدموں میں نہ رکھتا۔

ان وفا ناشناس مخلوق تک پہنچنے کے لیے بےحیائی، بے باکی اور مخیر طبعی ایسے اوصاف ضروری تھے۔ اللہ رکھا اس معاملے میں تقریباً صفر تھا۔ اللہ رکھا تو بلند نظری سے کوسوں دور تھا، آنکھوں میں آنکھیں ڈال کر بلندو بالا کوٹھوں کے مکینوں سے وہ کیونکر گفتگو کرتا۔ اس کی چھوٹی چھوٹی آنکھیں اس کا سر اونچا نہ ہونے دیتیں۔ پھر مخیر طبعی تو قطعاً راس نہ تھی اسے۔ کیسے یوں اشرفیاں لٹاتا جیسے اس کی نہ ہوں، کوٹھے والیوں کی ہوں۔ اس طرح تووہ قیامت تک بڑا آدمی نہ بن سکتا۔

یہ کیا کم تھا کہ ہر جمعرات کو وہ ایک روپے کے دھیلوں سے لدا پھندا پیالہ لے کر بیٹھ جاتا۔ فقیر آتے اور دھیلا دھیلا لے کر چلے جاتے۔ جھڑکیں بھی ساتھ کھتے۔ فقیروں کی فقیری اس طرح برقرار تھی۔

وہ امتحان گاہ میں آ گیا تھا۔ سب لوگ اس جیسے نہ تھے۔ کوٹھے پر وہی جاتے جو آنکھیں بند کر کے آتے اور خوشی خوشی اندھے کنویں میں ڈھے جاتے۔ یہاں سے ان کی لاش ہی برآمد ہوتی۔

وہ یہاں کا گورکھ دھندا سمجھ گیا کہ پیسہ ہی کارساز ہے، خدا ہے یہاں کا۔ عورت بکاؤ مال ہے۔ پیسہ ختم، کھیل ختم۔ پیسے کے ذریعے ہر کوئی جلوے خرید سکتا تھا۔ محبت اور وفا جیسی انمول چیزیں بھی قابل فروخت تھیں۔ جب تک پیسہ چلتا، ان کا دکھاوا بھی چلتا۔

وہ عورتوں کو شوق سے دیکھتا۔ بالی عید کا چاند تھی۔ رات کو مجرا خانے میں بیٹھتی جس کے آگے وسیع دالان تھا۔ دروازہ کھل جاتا۔ تازہ ہوا اور راہگیروں کی نظریں یہیں سے اندر جاتیں۔ اللہ رکھا بھی دروازے کے پاس سے گزرتا تو مجراخانے میں قالین پر جلوہ افروز بالی پر نظر ڈالتا جاتا۔ یہ اس علاقے کا فرنج بینفٹ تھا۔

پانی کے حوالے سے نو گزے کی قبر کا علاقہ اللہ رکھا کی عملداری میں تھا۔ آگے کیسری سوڈا واٹر فیکٹری کا علاقہ تھا۔ اپنے علاقے کی مخلوق سے تعلق پیدا ہوتا گیا لیکن یہ تعلق خاطر نہ تھا۔ اللہ رکھا کو حجرو اور ڈھیرو خاندان کی عورتیں اچھی نہ لگتیں جو اسے کبھی گھاس نہ ڈالتیں۔ ویسے بھی وہ کم ہی باہر نکلتیں اور نکلتیں تو بڑی بے نیازی سے گزر جاتیں۔ اللہ رکھا تو کیا وہ تو کسی نظر باز کی نظروں کا جواب نہ دیتیں۔ طمنچہ جان کا تو یہ حال تھا جیسے بزاز ہٹہ کے دکاندار قیمتی زری کی کامدار ساڑھیاں کپڑے میں لپیٹ کر رکھتے۔ وہ بھی اپنی چار دیواری میں لپٹی رہتی۔۔۔ بڑی بڑی حویلیوں والیاں کسی کی طرف نہ دیکھتیں۔ سب انہیں دیکھتے۔

سیٹھ بننے کے عزم سے لدے پھندے اور سفید پوشی کے بوجھ تلے دبے ہوئے اللہ رکھا کے لیے جینا عذاب تھا۔ چلتی پھرتی حوریں سامنے آتی رہتیں اور وہ تلملاتا رہتا۔ بالاخر گلزار بائی، اس کی بہن سردار بائی، وزیر بائی اور متوسط طبقے کی عورتوں سے علیک سلیک ہونے لگی۔ انہیں وہ اپنے لیے موزوں سمجھتا۔ کبھی کبھی ان کے کوٹھوں پر چلا جاتا ہے۔ وہ اس کی آنکھوں میں آنکھیں ڈال ڈال کر دیکھتیں۔۔۔ شاید کہ اتر جائے ترے دل میں میری بات! کیا عجب کہ اس کا دل پگھل جائے اور وہ دن بھر کی کمائی ان کے قدموں میں ڈال دے لیکن وہ تو بس تھالی میں سے پان اٹھا کر منہ میں رکھتا اور چہر ہ شناسی اس میں دھر دیتا، باتیں کرتا اور کپڑے جھاڑ کر لوٹ آتا۔ جہاں تک گانے کا تعلق تھا وہ فیکٹری کے تھڑے پر بیٹھے بیٹھے صبح کو، تلیم کے وقت اور نماز عشاء کے بعد سن لیتا۔ رات کو مجرا خانے سرتال کے سرچشمے بن جاتے۔ درمیان میں حقے کی موسیقی اس کا جی بہلاتی۔

گلزار بائی جسے اپنی لبریز جوانی، نیلگوں اور جنسی دلکشی پر ناز تھا اسے گزند پہنچاتی رہتی۔ کبھی درزی، کبھی لانڈری والے، کبھی پان فروش اور کبھی خوانچہ فروش کو سودے کے پیسے وصول کرنے کے لیے بھیج دیتی۔ اللہ رکھا حیلے بہانے تو کرتا لیکن ان کے بلند بانگ تقاضوں اور غل غپاڑے سے بچنے کے لیے دام دینے ہی پڑتے۔ آخر عزت دار اور معزز بندہ تھا۔ وہ بازار میں ٹٹ پونجیا کہلانا نہ چاہتا۔ ہیرا لانڈری والا اس کے پاس فیکٹری پر نہ جاتا بلکہ جب وہ پانی کی وصولی کر کے نو گزے سے پلٹنے لگتا تو وہ سامنے آ جاتا۔۔۔ اس کے حیلوں بہانوں کی کاٹ یوں کرتا ’’کیا کہے گی گلزار بائی کہ سیٹھ کے پاس دھلائی کے دو روپے بھی نہیں‘‘۔

’’نہیں ہوتے کسی وقت پیسے‘‘۔

’’اب تو وصولی کی ہے، اب تو پیسے دے!‘‘

’’خاک وصولی کی ہے‘‘۔

دام لینے کے لیے ہیرا لانڈری والا کبھی اونچی آواز سے نہ بولتا۔ وہ جانتا تھا کہ دلیل میں تلوار کی کاٹ ہے۔ اللہ رکھا کو اپنی عزت کا پاس ہے۔ لیت و لعل کرےگا تواس کی عزت کے پرخچے اڑ جائیں گے سرعام۔ وہ جیب میں ہاتھ ڈالتا اور روپیہ ڈیڑھ نکال کر اس کے حوالے کرتا۔

مکھی چوس ہوتے ہوئے بھی اسے مکھی چوس کا طعنہ گوارا نہ تھا۔ دس روپے کماتا، ایک خرچ کرتا، باقی بچاتا۔ بچت میں سے کبھی کبھی کٹوتی کر لیتا اور اس سے بازار کی تتلیوں کو نوازتا۔ اس کی پہلی کوشش تو یہ ہوتی کہ لیمن کی ایک بوتل ہی سے پروانہ راہداری مل جائے لیکن ایسی احمق کوئی نہ تھی جو ایک بوتل پر ریجھ جائے۔ وہ تو ایک آدھ میٹھے بول سے بوتل ڈکار جاتیں اور اتنا کہہ کر چل دیتیں: ’’کدی ساڈے ول وی آئیں سجنا!‘‘

وزیر بائی خاص وضع کی عورت تھی۔ دو وڈیروں کے درمیان رہتی تھی۔ ایک جانب عنایت بائی ڈھیرو والی کا ڈیرہ تھا، دوسری جانب خورشید بائی حجرو والی کی حویلی تھی۔ دیوار کے برابر مدرسہ نعمانیہ تھا۔ دو چار قدم پر مسجد تھی۔ روا داری کے سیمنٹ سے ان کی جڑیں ایک دوسرے سے جڑی تھیں، مضبوط و مستحکم تھیں۔ ایک کو دوسرے سے سروکار نہ تھا۔ کفر اور اسلام میں خوب نبھ رہی تھی۔

بائی پنجابی اور اردو دونوں زبانیں روانی سے بولتی۔ پنجابی میں ذرا زیادہ روانی تھی۔ اردو میں شائستگی قائم رکھتی، بڑے تکلف اور وقار سے لفظوں کی مار دیتی۔ گلے پر چھری پھیرتی تو ہنس ہنس کر پنجابی میں گفتگو کرتی۔ اردو اور پنجابی میں جو لسانی فرق ہے اسے وہ بخوبی سمجھتی۔ جانتی تھی کہ اردو میں شائستگی ہے تو پنجابی میں بےساختگی ہے۔ بڑی سلجھی ہوئی عورت تھی۔۔۔ حاضر جواب، پرکشش اور پرگو۔ صاف ستھرے او ر مہذب گاہک کو پسند کرتی لیکن کاروبار میں برے بھلے، لیچڑ کیچڑ سبھی سے واسطہ پڑتا۔

اللہ رکھا کو وزیر بائی اچھی لگتی۔ اس کی اداؤں سے واقف ہو چکا تھا لیکن اللہ رکھا کے پاس پیسہ تھا، دل نہ تھا۔ دریا دلی کہاں سے آتی؟ ادا فروشی کی قیمت نہ ملنے پر وزیر بائی کو وہ کیسے اچھا لگتا؟

اللہ رکھا آتا جاتا رہتا، وہ مسکرا کر خیر مقدم کرتی رہتی، لیکن جب پانچ سات بار آنے کے بعد اس نے پانچ سات روپے بھی خرچ نہ کئے اور اردو نواز وزیر بائی کی کاروباری شائستگی رنگ نہ لائی تو ٹھیٹ پنجابی پر اترآئی۔ اس نے پوچھا ’’کیہ کریں گا ایسی کمائی نال؟ کرسی تے بیٹھا بیٹھا سک جانا ایں۔ توں تے پاساوی نئیں موڑدا‘‘۔

’’کاروبار تے فیرانج ہی ہوندا ہے‘‘۔

’’میرا کاروبار انج نہیں ہوندا۔ دل کھول، کھسیہ کھول!‘‘

’’میں کیہڑا کچھ کرنا ہوندا ہے‘‘۔

’’اب تو وزیر بائی جلال میں آئی اور بولی ’’کالے منہ والے نے کیہ منہ کالا کرنا؟‘‘

اللہ رکھا نے بظاہر برا نہ مانا اور ہنس کر چلا گیا مجرا خانے کا ماحول صاف ہو گیا۔

بڑے استاد جی نے کہا ’’بی بی! ایسی سختی نہ کیا کریں! کون جانے کب پتھر موم ہوتا ہے؟‘‘

’’یہ ساری عمر پتھر رہےگا‘‘۔

’’پھر بھی منہ توڑ جواب دینا ٹھیک نہیں‘‘۔

’’یہ تو نرمی سرپیڑ ہے۔ پہلے ہی مندا ہے۔ اس مفت برکاجی کیسے بہلاؤں؟‘‘

’’مجبوری ہے بی بی‘‘۔

’’استاد جی! اسے تو اتنی تمیز نہیں کہ منہ میں پان رکھ کر رنڈی کے ڈیرے پر نہیں آنا چاہیے۔ وہ تو میرا پان بھی نہیں کھاتا کہ کہیں ایک روپیہ نہ دینا پڑے‘‘۔

’’گندہ بندہ ہے۔ کیا کریں؟ بازار میں بیٹھے ہیں۔ ڈیرہ بھی ہے کام سے طعام ہے‘‘۔

’’نہ استاد جی! اس پھوکے بندے سے ہمیں کام نہیں‘‘۔

وزیر خود ہی ڈیرہ چلاتی تھی۔ خود ہی رنڈی تھی، خود ہی نائیکہ استاد جی صلاح کار تھے۔

وزیر بائی نے بے اعتنائی برتی۔۔۔ کاروباری حربے کے طور پر نہیں اللہ رکھا اس کے نزدیک کنڈم مال تھا۔ گو اس کے لیے وہ پھوکا تھا لیکن اپنے لیے وہ بڑا ٹھوس تھا۔ اللہ رکھا کو سیٹھ بننا تھا اور کوٹھوں پر جانے والے رئیس کنگال بن جاتے ہیں۔ یہ قصے روز دیکھنے میں آتے۔ اہل دل کی جنت میں یہی کچھ ہوتا۔ وہ اگر منہ کاذائقہ بدلنے کے لیے وزیر بائی کے کوٹھے کا رخ کرتے تو وہ سمجھتا کہ اس کا اپنی پڑوس پر حق شفعہ ہے۔ سیٹھ بننے والا ایسی ہی سوچ رکھتا ہے۔

چنددن گزر گئے۔ اللہ رکھا کے دل پربائی نے جو لفظی چوٹ لگائی تھی، اس کا درد جاتا رہا۔

وزیر بائی مجرا خانے میں بیٹھی تھی۔ گاہک کا انتظار تھا۔ یہ انتظار بڑا کرب ناک ہوتا۔ موت اور گاہک کا وقت مقرر نہیں۔ گاہک آئے نہ آئے، آدھی رات تک بیٹھی رہتی، گاہک کی آس لگائے۔ سیڑھیوں کے اوپر آنے کی آواز آئی۔ پینترا بدل کر سیدھی ہوئی تا کہ آنے والے کا خیر مقدم کرے۔ اللہ رکھا نمودار ہوا سامنے آکر بیٹھ گیا۔ کلف دار استری شدہ سفید براق پوشاک زیب تن تھی۔ سیاہ سفید کا مالک نظر آ رہا تھا۔ سفید کپڑوں کی وجہ سے چہرے کی سیاہ رنگت اور بھی نمایاں ہو گئی۔ وزیر بائی نے سگرٹ کا دھواں منہ پر مارا جھلسے ہوئے چہرے کو دیکھا اور پھر کہا ’’کپڑے تے بڑے چٹے دھوتے نیں، منہ وہی ڈرائی کلین کرا لینا سی‘‘۔

’’کپڑے میں سوائے نیں تے منہ اللہ نے بنایا اے‘‘۔

’’تیرے نال میچ کرن والیاں پرلے بزار وچ ہیگیاں نیں‘‘۔

اللہ رکھا اٹھ کر چلا گیا۔

وزیر بائی کی زبان کی کاٹ جوں کی توں رہی۔ طنز و مزاح کا یہ شہکار اپنی فطرت سے انحراف نہ کرتا۔ بری طرح ڈسا گیا تھا، اس نے وزیر بائی کو اپنی عملداری سے خارج کر دیا۔ دل تو پہلے ہی تابع تھا اب او ربھی تابع ہو گیا۔ ویسے اس نے دل کو خاصا ناکارہ بنا رکھا، اب وزیر بائی کے حوالے سے رہی سہی کسر بھی نکال دی۔

بڑا نام تھا امپیریل سوڈا واٹر فیکٹری کا علاقے میں۔ایسا گیا گزرا تو نہ تھا اللہ رکھا کہ کوئی اس کی طرف توجہ ہی نہ دے۔ دھیرے دھیرے بشرط استواری منزل بہ منزل مارتا چلا گیا۔ میل جول کا دائرہ متوسط طبقے میں بڑھتا گیا۔ وہ خود متوسط طبقے میں سے تھا۔ یہ طبقہ اس کے اندر تک دھنس گیا تھا اور اس کا نظریہ یہ تھا کہ بےشک لکھ پتی ہو جاؤ، رہو متوسط طبقے میں، اس کی مخلوق کے انداز سے زندگی سوکھی گزرےگی۔

چوکھا پیسہ بنا لیا اس نے لیکن کرسی نہ بدلی، لمبی میز نہ بدلی۔ وہ آپ بھی نہ بدلا۔ اس سمیت سب کچھ کباڑئیے کا مال لگتا۔ پہلے بھی آٹھویں دن کپڑے بدلتا تھا، اب بھی آٹھویں دن بدلتا تھا۔ پہلے بھی حافظ کے ہوٹل دونی کا کھانا کھاتا تھا، اب بھی کھاتا تھا۔ لاہوری کے تنور پر کبھی نہ گیا جہاں دو پیسے میں پیٹ بھرتا تھا۔۔۔ دو پیسے کی یہ ڈبل دو روٹیاں اور دال کا پیالہ مفت۔

وہ کسی کو دیکھنے نہ جاتا۔ آپ ہی دن سوئی عورتیں سج دھج سے نکلتیں اور اس کے سامنے آ جاتیں۔ اسے تو آنکھوں کا زاویہ بھی بدلنا نہ پڑتا۔ وہ ایک ہی نظریہ، ایک ہی زاویہ نظر رکھتا۔ تھڑے پر بیٹھا بیٹھا پوری ہیرا منڈی کا نظارہ کر لیتا۔ رہی سہی کسر اس وقت نکل جاتی جب وہ میلی کچیلی کاپی لے کر وصولی کے لیے دکانوں پر جاتا۔ نجو بائی کو بھی اس نے چلتے پھرتے وقت دیکھا۔ بڑی منفرد عورت تھی۔ نازک اندام تھی، ترشے ہوئے اعضا تھے، جنسی کشش غضب کی تھی۔ جی چاہتا کہ ہنستی مسکراتی ہیلن آف ٹرائے سامنے کھڑی رہے اور اسے دیکھتے ہی رہو۔ تماشائیوں کی ترستی ہوئی نظریں چیرتی گزر جاتی۔ اللہ رکھا نے اسے حیرت سے دیکھا تو حیرت کے دریا میں ڈوب گیا۔ ایسے میں انا الحق کا نعرہ داغا جاتا ہے۔ لیکن وہ تو بالکل کورا تھا اس معاملے میں۔ اس کے پاس انا تھی نہ حق تھا۔ ان کے بغیر ہی زندگی گزارتا۔

وہ کیا جانے حیرت اور اناالحق کا رشتہ؟

پیار والے اس کے پاس آتے، وہ پیار والوں کے پاس جاتا لیکن پیار اور پیسے کے رشتے سے بےتعلق ہوکر۔ اس میں اس کی سلامتی ہے۔ ایک دن کی کمائی کے عوض مہینے بھر کا پیار چاہتا۔ گلزار بائی ہی اسے نمٹتی۔ ایک دن کی کمائی ہتھیائی اور ساتویں آٹھویں دن چیخنے چلانے لگتی بلکہ وہ کیا چیختی چلاتی، پان سگریٹ، دودھ دہی والے اور دوسرے تیسرے قرض خواہ چیختے چلاتے، جس سے اللہ رکھا کے سر میں درد ہو جاتا اور اس کا امیج خطرے میں پڑ جاتا تو وہ ان کے مطالبے اونے پونے پورے کرکے پیچھا چھڑاتا۔

پیار والے پیارکی دکانیں سجاتے۔۔۔ پیارکے گاہک آتے۔۔۔ اور بقدر ظرف یا زر پیارلے لیتے۔۔۔ اللہ رکھا کبھی مستفید ہوتا لیکن سنبھل سنبھل کر۔

ہیرا منڈی میں آکر اللہ رکھا خاصی حد تک کھلی کتاب ہو گیا لیکن حساب کتاب کی میلی کتاب کی میلی کچیلی کاپی ہمیشہ بندہی رہی۔ لاہور کے بارہ دروازوں اور تیرہویں موہری میں سے ہیرا منڈی سمیت دو دروازے اور موہری اس کے تسلط میں تھی اور پھر ایک ہیرا منڈی اس کی باقی سلطنت پر بھاری تھی۔ یہاں کی تو مٹی بھی سونے کے بھاؤ بکتی۔ سوہا بازار کے جوہری یہاں آکر اپنا سارا ذاتی صفاتی جوہر بیچ ڈالتے، عورتوں کو سونے چاندی سے لاد دیتے اور انجام کار سوہا بازار کا رخ کرنے کی بجائے یہاں کے چانڈو خانوں میں بھٹکتے پھرتے۔ یہاں تو وہی آتا جو جان بوجھ کر جھوٹی اداؤں، وفاؤں اور جھوٹے پیار کا طلبگار ہوتا اور کھوٹی جنسوں کی ہر قیمت پر سستا سمجھتا۔ اللہ رکھا میں دھوکا کھانے کا یہ وصف ہی نہ تھا۔ اس کے اندر ایسی تجوری تھی جب وہ موج میں آتا اور کوئی طوفانی موج اسے آ لیتی تو وہ ہوا نکالنے کے لیے تجوری کا ذرا کی ذرا کے لیے پٹ کھولتا۔

اس نے جو نپے تلے انداز سے پر پرزے نکالے تو عبدالرحمان فاروقی پہلے سے زیادہ گھبرایا۔ قاضی کو شہر کا غم کھا رہا تھا، فاروقی کو امپیریل سوڈا واٹر فیکٹری کا۔ جوں جوں اللہ رکھا کی فتوحات کا سلسلہ بڑھا، عورتوں کی آمدو رفت بڑھی۔ اب وہ ان سے بلا تکلف کلام کرتا۔ فاروقی نیرنگ خیال اور ساقی پڑھ پڑھ کر ان پڑھ نہ رہا تھا۔ اللہ رکھا کے مقابل وہ سکالر بن گیا تھا۔ ہر پرچہ الف سے یے تک پڑھتا۔ ل احمد کی کہانیوں کا عاشق تھا۔ فضل دین کباڑئیے سے گاڑھی چھنتی تھی اس کی۔ کہانیوں اور ڈراموں کے مطالعے کے بعد کامیڈی اور ٹریجڈی کے انجام سے اچھی طرح آگاہ ہو گیا۔ بندوں اور قوموں کے زوال و کمال اور طاؤس و رباب کے کارناموں کا پتا چل گیا اسے۔ گو اللہ رکھا پرائمری فیل تھا تاہم اس کا تجربہ بہت زیادہ تھا اور وہ تجربے کی دانش سے مالا مال تھا۔ بہرحال فاروقی کو اپنے علم کی روشنی میں اللہ رکھا کی صورت حال تشویشناک دکھائی دی۔ اس نے بھانپ لیا کہ اللہ رکھا طوفانی لہروں کی جانب پیش قدمی کر رہا ہے۔ آخر اس نے ایک دن کہہ ہی دیا ’’اللہ رکھا بچ! یہ عورتیں نہیں، وش کنیائیں ہیں‘‘۔

’’وہ کیا ہوتی ہیں؟‘‘

’’تونے نہ تو ان کی کہانیاں پڑھی ہیں، نہ دیکھ کر انہیں پہچانتاہے۔ وش کنیائیں وہ ہوتی ہیں جنہیں بچپن سے زہر پلایا جاتا ہے۔ ان کے ہونٹوں اور زبان میں زہر بھرا ہوتا ہے۔ جسے ڈس لیں وہ پانی نہیں مانگتا۔ اللہ رکھا تو نے جانتے بوجھتے ہوئے بھی اپنا تجربہ کھوٹا کیا ہے‘‘۔

تردید محال تھی۔ بات سولہ آنے سچ تھی۔ رنڈی پیدا ہوتے ہی کوٹھے کے زہریلے ماحول میں پلتی ہے۔ اس کی توگھٹی میں زہر ہوتا ہے۔ اللہ رکھا کے ہونٹ کانپے اور ان پر مونالزا سے قدرے زیادہ مسکراہٹ نمودار ہوئی۔ حقہ پینے اور توانائی اکٹھی کرنے لگا۔ آخر طبیعت رواں ہوئی تو بولا ’’فروقی! تو بہت بھولا بلکہ بھولاہے۔ بلیا! کاروباری بندہ ہوں۔ یہ عورتیں کچھ بھی ہوں، مجھے چار نہیں سکتیں۔ ان کو مکو ٹھپ دوں گا‘‘۔

’’اللہ رکھا! بڑا بول نہ بول! مارا جائےگا۔ یہ ناگنیں ہیں، ناگنیں۔ لوگ انہیں دودھ پلاتے ہیں پوجتے ہیں پر یہ انہیں، اپنے پجاریوں کو ڈسنے سے نہیں رہتیں۔ بلاقی شاہ کے پاس لاکھوں کی جائیدادیں رہن پڑی ہیں ان کے ڈسے ہوئے لوگوں کی۔ وہ خدائی خوار پھر رہے ہیں اور یہ دندناتی، خرمستیاں کرتی پھرتی ہیں‘‘۔

اللہ رکھا پہلے کی طرح مسکرایا اور زیاد ہ مجذوبیت سے حقہ پینے لگا۔ فاروقی نے تابڑتوڑ حملہ کیا ’’بڑے بڑے خرانٹ، نامی گرامی نوسرباز، مانے ہوئے چارسو بیس ان کے سامنے ہیچ ہیں۔ اگر تکڑی میں ایک طرف تجھے اور تیری فیکٹری کو اور دوسری طرف ہیرا منڈی کی عورت کورکھیں تو تیرا اور فیکٹری کا نام و نشان نہ رہےگا‘‘۔

اللہ رکھا اٹھا۔ مقفل ڈسک کھول کر اور حساب کتاب کی میلی کچیلی کاپی نکال کر بولا ’’فروقی! جدتیکر یہ کاپی سلامت ہے، کوئی خطرہ نہیں مجھے‘‘۔

خطرہ ٹل گیا جو فاروقی کی شکل میں رونما ہوا تھا۔ کاپی سنبھال کر وہ وصولی کے لیے چلا گیا۔

بھیا جی نے الگ دنیا بسا رکھی تھی۔ مشین بجلی سے چلتی۔ کھٹاکھٹ بوتلیں بھرتیں۔ کبھی کبھی بوتل ٹوٹتی تو دھماکہ سا ہوتا۔ شیشے کے ٹکڑے ادھر ادھر بکھر جاتے۔ بھیاجی کے کان پر جوں نہ رینگتی۔ وہ اس شور میں پوربی گیت گاتا۔ اس کی تنخواہ بڑھ گئی تھی۔ بےفکری سے زندگی گزر رہی تھی اس کی۔

عبدالرحمان فاروقی نے کہا ’’بھیا جی! تو نے کیوں چونچ بند کرلی ہے؟ میاں کیا کر رہا ہے، تم کچھ کہتے ہی نہیں‘‘۔

’’تنکھاہ ملتی ہے اپن کو جس کام کی وہ کرت ہیں۔ جس کی تنکھاہ نہیں ملتی وہ ہم ناہیں کرت ہیں۔ میاں! بڑا سیانا ہے۔ چمڑی چلی جائے، دمڑی نہ جائے‘‘۔

فاروقی چپ ہو گیا اور حقہ پینے لگا۔ چند دن امن سے گزر گئے۔ پھر ایک دن نیتی سنیاری ادھر سے گزری۔ بڑی دھانسو عورت تھی۔ جوالا مکھی کا لپکتا ہوا شعلہ تھی۔ بدن ریشم اور گلاب تھا۔ ہاتھ لگائے بندہ تو پھسل کر گر پڑے اور پھر اٹھ نہ سکے۔۔۔ بلند قامت، سرخی پوڈر سے بےنیاز، سجری سجیلی، شاداب معشوقہ۔۔۔ دانتوں کی سفید چمکدار لڑی میں سونے کا ایک دانت۔ اللہ رکھا نے اسے دیکھا تو بےاختیار کہا۔ ’’سبحان اللہ!‘‘

فاروقی نے فوراً فیصلہ دیا: ’’بھیا جی! تیرا میاں گیا۔ کون اس عورت کی تاب جھیل سکتا ہے۔ لاکھوں میں ایک ہے۔ پوری ہیرا منڈی میں اس جیسی عورت نہیں۔ پور پور جوانی اور حسن سے بھرپور ہے‘‘۔

’’اپن کی بلاسے۔ میاں جانے اور یہ گستیاں جانیں۔ اپن کو بوتلیں بھرنے سے کام‘‘۔

فاروقی جو رسالہ پڑھتے پڑھتے اللہ رکھا کی نظر بازی پر نکتہ چین ہوا تھا، پھر رسالہ پڑھنے لگا۔

اللہ رکھا نے نیتی سنیاری کو دیکھا، نیتی سنیاری نے فاروقی کو دیکھا۔ نیتی سنیاری سیل سحر تھی جو گزر گئی۔ میک اپ کے بغیر دشمن ایمان و آگہی تھی۔ سرمے، کاجل اور عطر کا پھلیل کا شوق ضرور رکھتی لیکن سرخی پوڈر کے قریب نہ پھٹکتی۔ جسے قدرت نے ایسے دلاویز نین نقش دئیے ہوں اسے سرخی پوڈر سے کیا سروکار۔

اللہ رکھا نئی اقلیم حسن و رعنائی میں آیا تو اس نے ٹبی سے منہ موڑ لیا جہاں ٹکیائیاں ڈربوں میں بیٹھتیں اور چھوٹی چھوٹی کارگاہوں میں رہ کر روزی کماتیں، اپنا اور اپنے دلوں کا پیٹ بھرتیں، جلد جلد اپنا آپ گنواتیں، چار دن گلی میں شوخی اور شرارتیں بکھیرتیں اور پھر ان کی چاندنی اندھیرے کی لپیٹ میں آ جاتی۔ جوں جوں وقت گزرتا گیا، لپائی پتائی بڑھنے لگی۔ بڑے بازار کی بات ہی اور تھی۔ چاہتیں تو وقت کو قابو میں رکھتیں۔ کمال و زوال کاعمل بل مپت لے میں ہوتا۔ سہے سہے دت گل کھلاتا۔ کبھی کبھی اسے گل کھلانے کا موقع ہی نہ ملتا۔ نیتی سنیاری ایسی عورتیں وقت کے دھارے کے اوپر سے گزرتیں۔