Sher on Daar

har roz ik āvāza anal-haq kā lagā.eñ

dekheñ to ki hai silsila-e-dār kahāñ tak

har roz ek aawaza anal-haq ka lagaen

dekhen to ki hai silsila-e-dar kahan tak

nasheb-e-hastī se afsos ham ubhar na sake

farāz-e-dār se paiġhām aa.e haiñ kyā kyā

nasheb-e-hasti se afsos hum ubhar na sake

faraaz-e-dar se paigham aae hain kya kya

mere hī ḳhuun meñ nahlā ke 'sharar'

vo salīboñ pe sajā degā mujhe

mere hi KHun mein nahla ke 'sharar'

wo salibon pe saja dega mujhe

ab to zarūrat kī ik pagḌī hai yāroñ ke kandhoñ par

ham logoñ ke saath yahāñ se rasm-e-salīb-o-dār uThī

ab to zarurat ki ek pagDi hai yaron ke kandhon par

hum logon ke sath yahan se rasm-e-salib-o-dar uThi

na jab ahl-e-ḳhirad ne baat maanī

to phir shart-e-salīb-o-dār Thahrī

na jab ahl-e-KHirad ne baat mani

to phir shart-e-salib-o-dar Thahri

sūliyāñ nasb rahīñ qaht-e-junūñ hai bhī to kyā

kuchh na kuchh ab bhī nikal ā.eñge gardan vaale

suliyan nasb rahin qaht-e-junun hai bhi to kya

kuchh na kuchh ab bhi nikal aaenge gardan wale

un kī anjuman bhī hai daar bhī rasan bhī hai

dekhnā hai dīvāne ab kahāñ Thaharte haiñ

un ki anjuman bhi hai dar bhi rasan bhi hai

dekhna hai diwane ab kahan Thaharte hain