Sher on Paigham

kin rāhoñ se ho kar aa.ī ho kis gul kā sandesa laa.ī ho

ham baaġh meñ ḳhush ḳhush baiThe the kyā kar diyā aa ke sabā tum ne

kin rahon se ho kar aai ho kis gul ka sandesa lai ho

hum bagh mein KHush KHush baiThe the kya kar diya aa ke saba tum ne

paiġhām to un kā aayā hai tum shahr meñ 'tishna' aa jaao

sahrā hai pasandīda ham ko ham shahr meñ jā kar kyā karte

paigham to un ka aaya hai tum shahr mein 'tishna' aa jao

sahra hai pasandida hum ko hum shahr mein ja kar kya karte

zarūr aman ka paiġhām le gayā thā kahīñ

parinda lauTā liye par lahū meñ Duube hue

zarur aman ka paigham le gaya tha kahin

parinda lauTa liye par lahu mein Dube hue

ai rangūn meñ chaltī havā merā sandesa letī jā

terā to un kī galiyoñ meñ ānā-jānā hogā hī

ai rangun mein chalti hawa mera sandesa leti ja

tera to un ki galiyon mein aana-jaana hoga hi

muddat huī us ko ki mirī ḳhalvat-e-shab meñ

paiġhām jo laa.ī thī sabā yaad hai ab tak

muddat hui us ko ki meri KHalwat-e-shab mein

paigham jo lai thi saba yaad hai ab tak

kab vo paiġhām-rasā ho ki mujhe sabr nahīñ

kākul-e-ḳham ke liye she'r raqam kartā huuñ

kab wo paigham-rasa ho ki mujhe sabr nahin

kakul-e-KHam ke liye she'r raqam karta hun