Sher on Shahr

tamām raat nahāyā thā shahr bārish meñ

vo rañg utar hī ga.e jo utarne vaale the

tamam raat nahaya tha shahr barish mein

wo rang utar hi gae jo utarne wale the

hai ajiib shahr kī zindagī na safar rahā na qayām hai

kahīñ kārobār sī dopahar kahīñ bad-mizāj sī shaam hai

hai ajib shahr ki zindagi na safar raha na qayam hai

kahin karobar si dopahar kahin bad-mizaj si sham hai

dil to merā udaas hai 'nāsir'

shahr kyuuñ saa.eñ saa.eñ kartā hai

dil to mera udas hai 'nasir'

shahr kyun saen saen karta hai

jo mere gaañv ke khetoñ meñ bhuuk ugne lagī

mire kisānoñ ne shahroñ meñ naukrī kar lī

jo mere ganw ke kheton mein bhuk ugne lagi

mere kisanon ne shahron mein naukri kar li

sunā hai shahr kā naqsha badal gayā 'mahfūz'

to chal ke ham bhī zarā apne ghar ko dekhte haiñ

suna hai shahr ka naqsha badal gaya 'mahfuz'

to chal ke hum bhi zara apne ghar ko dekhte hain

bhiiḌ ke ḳhauf se phir ghar kī taraf lauT aayā

ghar se jab shahr meñ tanhā.ī ke Dar se niklā

bhiD ke KHauf se phir ghar ki taraf lauT aaya

ghar se jab shahr mein tanhai ke Dar se nikla

ik aur khet pakkī saḌak ne nigal liyā

ik aur gaañv shahar kī vus.at meñ kho gayā

ek aur khet pakki saDak ne nigal liya

ek aur ganw shahar ki wusat mein kho gaya

dosto tum se guzārish hai yahāñ mat aao

is baḌe shahr meñ tanhā.ī bhī mar jaatī hai

dosto tum se guzarish hai yahan mat aao

is baDe shahr mein tanhai bhi mar jati hai

aisā hañgāma na thā jañgal meñ

shahr meñ aa.e to Dar lagtā thā

aisa hangama na tha jangal mein

shahr mein aae to Dar lagta tha

tum bhī is shahr meñ ban jāoge patthar jaise

hañsne vaalā yahāñ koī hai na rone vaalā

tum bhi is shahr mein ban jaoge patthar jaise

hansne wala yahan koi hai na rone wala

mere hī sañg-o-ḳhisht se ta.amīr-e-bām-o-dar

mere hī ghar ko shahr meñ shāmil kahā na jaa.e

mere hi sang-o-KHisht se tamir-e-baam-o-dar

mere hi ghar ko shahr mein shamil kaha na jae

shahr kā bhī dastūr vahī jañgal vaalā

khojne vaale hī akasr kho jaate haiñ

shahr ka bhi dastur wahi jangal wala

khojne wale hi akasr kho jate hain

ye dil-fareb charāġhāñ ye qahqahoñ ke hujūm

maiñ Dar rahā huuñ ab is shahar se guzarte hue

ye dil-fareb charaghan ye qahqahon ke hujum

main Dar raha hun ab is shahar se guzarte hue

ab shahr-e-ārzū meñ vo ra.anā.iyāñ kahāñ

haiñ gul-kade niDhāl baḌī tez dhuup hai

ab shahr-e-arzu mein wo ranaiyan kahan

hain gul-kade niDhaal baDi tez dhup hai

'azm' is shahr meñ ab aisī koī aañkh nahīñ

girne vaale ko yahāñ jis ne sambhalte dekhā

'azm' is shahr mein ab aisi koi aankh nahin

girne wale ko yahan jis ne sambhalte dekha

majnūñ se ye kahnā ki mire shahar meñ aa jaa.e

vahshat ke liye ek bayābān abhī hai

majnun se ye kahna ki mere shahar mein aa jae

wahshat ke liye ek bayaban abhi hai

kaisā hangāma bapā hai ki mire shahr ke log

ḳhāmushī DhūñDhne ġhāroñ kī taraf jaate hue

kaisa hangama bapa hai ki mere shahr ke log

KHamushi DhunDhne ghaaron ki taraf jate hue

hasīñ hai shahr to ujlat meñ kyuuñ guzar jaa.eñ

junūn-e-shauq use bhī nihāl kar jaa.eñ

hasin hai shahr to ujlat mein kyun guzar jaen

junun-e-shauq use bhi nihaal kar jaen

kuchh bhī hoñ dillī ke kūche

tujh bin mujh ko ghar kāTegā

kuchh bhi hon dilli ke kuche

tujh bin mujh ko ghar kaTega

ham ek shahr meñ the ik nadī kī duurī par

aur us nadī meñ koī aur vaqt bahtā thā

hum ek shahr mein the ek nadi ki duri par

aur us nadi mein koi aur waqt bahta tha

ai muzaffar kis liye bhopal yaad aane lagā

kyā samajhte the ki dillī meñ na hogā āsmāñ

ai muzaffar kis liye bhopal yaad aane laga

kya samajhte the ki dilli mein na hoga aasman

yuuñ bhī dillī meñ log rahte haiñ

jaise dīvān-e-mīr chaak shuda

yun bhi dilli mein log rahte hain

jaise diwan-e-mir chaak shuda

dil se duur hue jaate haiñ ġhālib ke kalkatte vaale

guwahati meñ dekhe ham ne aise aise chehre vaale

dil se dur hue jate hain ghaalib ke kalkatte wale

guwahati mein dekhe hum ne aise aise chehre wale

itnā dil-e-'na.īm' ko vīrāñ na kar hijāz

ro.egī mauj-e-gañg jo us tak ḳhabar ga.ī

itna dil-e-'naim' ko viran na kar hijaz

roegi mauj-e-gang jo us tak KHabar gai