Sher on Waqt

kal ham ā.īne meñ ruḳh kī jhurriyāñ dekhā kiye

kārvān-e-umr-e-rafta kā nishāñ dekhā kiye

kal hum aaine mein ruKH ki jhurriyan dekha kiye

karwan-e-umr-e-rafta ka nishan dekha kiye

koī Thahartā nahīñ yuuñ to vaqt ke aage

magar vo zaḳhm ki jis kā nishāñ nahīñ jaatā

koi Thaharta nahin yun to waqt ke aage

magar wo zaKHm ki jis ka nishan nahin jata

vo vaqt kā jahāz thā kartā lihāz kyā

maiñ dostoñ se haath milāne meñ rah gayā

wo waqt ka jahaz tha karta lihaz kya

main doston se hath milane mein rah gaya

kitnī bhī pyārī ho har ik shai se jī uktā jaatā hai

vaqt ke saath to chamkīle zevar bhī kaale paḌ jaate haiñ

kitni bhi pyari ho har ek shai se ji ukta jata hai

waqt ke sath to chamkile zewar bhi kale paD jate hain

sab āsān huā jaatā hai

mushkil vaqt to ab aayā hai

sab aasan hua jata hai

mushkil waqt to ab aaya hai

tū mujhe bante bigaḌte hue ab ġhaur se dekh

vaqt kal chaak pe rahne de na rahne de mujhe

tu mujhe bante bigaDte hue ab ghaur se dekh

waqt kal chaak pe rahne de na rahne de mujhe

sub.h hotī hai shaam hotī hai

umr yūñhī tamām hotī hai

subh hoti hai sham hoti hai

umr yunhi tamam hoti hai

ye mohabbat kā fasāna bhī badal jā.egā

vaqt ke saath zamāna bhī badal jā.egā

ye mohabbat ka fasana bhi badal jaega

waqt ke sath zamana bhi badal jaega

chehra o naam ek saath aaj na yaad aa sake

vaqt ne kis shabīh ko ḳhvāb o ḳhayāl kar diyā

chehra o nam ek sath aaj na yaad aa sake

waqt ne kis shabih ko KHwab o KHayal kar diya

yā vo the ḳhafā ham se yā ham haiñ ḳhafā un se

kal un kā zamāna thā aaj apnā zamānā hai

ya wo the KHafa hum se ya hum hain KHafa un se

kal un ka zamana tha aaj apna zamana hai

sab kuchh to hai kyā DhūñDtī rahtī haiñ nigāheñ

kyā baat hai maiñ vaqt pe ghar kyuuñ nahīñ jaatā

sab kuchh to hai kya DhunDti rahti hain nigahen

kya baat hai main waqt pe ghar kyun nahin jata

us vaqt kā hisāb kyā duuñ

jo tere baġhair kaT gayā hai

us waqt ka hisab kya dun

jo tere baghair kaT gaya hai

vaqt kī vahshī havā kyā kyā uḌā kar le ga.ī

ye bhī kyā kam hai ki kuchh us kī kamī maujūd hai

waqt ki wahshi hawa kya kya uDa kar le gai

ye bhi kya kam hai ki kuchh us ki kami maujud hai

vaqt kis tezī se guzrā roz-marra meñ 'munīr'

aaj kal hotā gayā aur din havā hote ga.e

waqt kis tezi se guzra roz-marra mein 'munir'

aaj kal hota gaya aur din hawa hote gae

jab aa jaatī hai duniyā ghuum phir kar apne markaz par

to vāpas lauT kar guzre zamāne kyuuñ nahīñ aate

jab aa jati hai duniya ghum phir kar apne markaz par

to wapas lauT kar guzre zamane kyun nahin aate

din guzarte jā rahe haiñ aur hujūm-e-ḳhush-gumāñ

muntazir baiThā hai aab o ḳhaak se bichhḌā huā

din guzarte ja rahe hain aur hujum-e-KHush-guman

muntazir baiTha hai aab o KHak se bichhDa hua

vaqt jab karvaTeñ badaltā hai

fitna-e-hashr saath chaltā hai

waqt jab karwaTen badalta hai

fitna-e-hashr sath chalta hai

hameñ har vaqt ye ehsās dāman-gīr rahtā hai

paḌe haiñ Dher saare kaam aur mohlat zarā sī hai

hamein har waqt ye ehsas daman-gir rahta hai

paDe hain Dher sare kaam aur mohlat zara si hai

ye paanī ḳhāmushī se bah rahā hai

ise dekheñ ki is meñ Duub jaa.eñ

ye pani KHamushi se bah raha hai

ise dekhen ki is mein Dub jaen

talātum aarzū meñ hai na tūfāñ justujū meñ hai

javānī kā guzar jaanā hai dariyā kā utar jaanā

talatum aarzu mein hai na tufan justuju mein hai

jawani ka guzar jaana hai dariya ka utar jaana

kahīñ ye apnī mohabbat kī intihā to nahīñ

bahut dinoñ se tirī yaad bhī nahīñ aa.ī

kahin ye apni mohabbat ki intiha to nahin

bahut dinon se teri yaad bhi nahin aai

hai ye vajūd kī numūd apnī nafas nafas gurez

vaqt kī saarī bastiyāñ apnī hazīmatoñ meñ haiñ

hai ye wajud ki numud apni nafas nafas gurez

waqt ki sari bastiyan apni hazimaton mein hain

mujh ko ab kaise pā sakegā koī

vaqt thā aur guzar gayā huuñ maiñ

mujh ko ab kaise pa sakega koi

waqt tha aur guzar gaya hun main

vaqt rahtā nahīñ kahīñ Tik kar

aadat is kī bhī aadmī sī hai

waqt rahta nahin kahin Tik kar

aadat is ki bhi aadmi si hai

umr bhar milne nahīñ detī haiñ ab to ranjisheñ

vaqt ham se ruuTh jaane kī adā tak le gayā

umr bhar milne nahin deti hain ab to ranjishen

waqt hum se ruTh jaane ki ada tak le gaya

hazāroñ saal safar kar ke phir vahīñ pahuñche

bahut zamāna huā thā hameñ zamīñ se chale

hazaron sal safar kar ke phir wahin pahunche

bahut zamana hua tha hamein zamin se chale

un kā zikr un kī tamannā un kī yaad

vaqt kitnā qīmtī hai aaj kal

un ka zikr un ki tamanna un ki yaad

waqt kitna qimti hai aaj kal

vaqt har zaḳhm kā marham to nahīñ ban saktā

dard kuchh hote haiñ tā-umr rulāne vaale

waqt har zaKHm ka marham to nahin ban sakta

dard kuchh hote hain ta-umr rulane wale

shorish-e-vaqt huī vaqt kī raftār meñ gum

din guzarte haiñ tire ḳhvāb ke āsār meñ gum

shorish-e-waqt hui waqt ki raftar mein gum

din guzarte hain tere KHwab ke aasar mein gum

sadā aish daurāñ dikhātā nahīñ

gayā vaqt phir haath aatā nahīñ

sada aish dauran dikhata nahin

gaya waqt phir hath aata nahin

jaise do mulkoñ ko ik sarhad alag kartī huī

vaqt ne ḳhat aisā khīñchā mere us ke darmiyāñ

jaise do mulkon ko ek sarhad alag karti hui

waqt ne KHat aisa khincha mere us ke darmiyan

guzarne hī na dī vo raat maiñ ne

ghaḌī par rakh diyā thā haath maiñ ne

guzarne hi na di wo raat main ne

ghaDi par rakh diya tha hath main ne

ham ek shahr meñ the ik nadī kī duurī par

aur us nadī meñ koī aur vaqt bahtā thā

hum ek shahr mein the ek nadi ki duri par

aur us nadi mein koi aur waqt bahta tha

'aḳhtar' guzarte lamhoñ kī aahaT pe yuuñ na chauñk

is mātamī julūs meñ ik zindagī bhī hai

'aKHtar' guzarte lamhon ki aahaT pe yun na chaunk

is matami julus mein ek zindagi bhi hai

vaqt barbād karne vāloñ ko

vaqt barbād kar ke chhoḌegā

waqt barbaad karne walon ko

waqt barbaad kar ke chhoDega

ik saal gayā ik saal nayā hai aane ko

par vaqt kā ab bhī hosh nahīñ dīvāne ko

ek sal gaya ek sal naya hai aane ko

par waqt ka ab bhi hosh nahin diwane ko

gayā jo haath se vo vaqt phir nahīñ aatā

kahāñ umiid ki phir din phireñ hamāre ab

gaya jo hath se wo waqt phir nahin aata

kahan umid ki phir din phiren hamare ab

vaqt fursat de to mil baiTheñ kahīñ bāham do dam

ek muddat se diloñ meñ hasrat-e-tarfain hai

waqt fursat de to mil baiThen kahin baham do dam

ek muddat se dilon mein hasrat-e-tarfain hai

aur kyā chāhtī hai gardish-e-ayyām ki ham

apnā ghar bhuul ga.e un kī galī bhuul ga.e

aur kya chahti hai gardish-e-ayyam ki hum

apna ghar bhul gae un ki gali bhul gae

vaqt ko bas guzār lenā hī

dosto koī zindagānī hai

waqt ko bas guzar lena hi

dosto koi zindagani hai

guzarte vaqt ne kyā kyā na chāra-sāzī kī

vagarna zaḳhm jo us ne diyā thā kaarī thā

guzarte waqt ne kya kya na chaara-sazi ki

wagarna zaKHm jo us ne diya tha kari tha

zulf thī jo bikhar ga.ī ruḳh thā ki jo nikhar gayā

haa.e vo shaam ab kahāñ haa.e vo ab sahar kahāñ

zulf thi jo bikhar gai ruKH tha ki jo nikhar gaya

hae wo sham ab kahan hae wo ab sahar kahan

kaise mānūñ ki zamāne kī ḳhabar rakhtī hai

gardish-e-vaqt to bas mujh pe nazar rakhtī hai

kaise manun ki zamane ki KHabar rakhti hai

gardish-e-waqt to bas mujh pe nazar rakhti hai

vaqt achchhā bhī aa.egā 'nāsir'

ġham na kar zindagī paḌī hai abhī

waqt achchha bhi aaega 'nasir'

gham na kar zindagi paDi hai abhi

bachchoñ ke saath aaj use dekhā to dukh huā

un meñ se koī ek bhī maañ par nahīñ gayā

bachchon ke sath aaj use dekha to dukh hua

un mein se koi ek bhi man par nahin gaya

vaqt ne kis aag meñ itnā jalāyā hai mujhe

jis qadar raushan thā maiñ us se sivā raushan huā

waqt ne kis aag mein itna jalaya hai mujhe

jis qadar raushan tha main us se siwa raushan hua

bekār gayā ban meñ sonā mirā sadiyoñ kā

is shahr meñ to ab tak sikka bhī nahīñ badlā

bekar gaya ban mein sona mera sadiyon ka

is shahr mein to ab tak sikka bhi nahin badla

ye na socho kal kyā ho

kaun kahe is pal kyā ho

ye na socho kal kya ho

kaun kahe is pal kya ho

vaqt ab dastaras meñ hai 'aḳhtar'

ab to maiñ jis jahān tak ho aa.uuñ

waqt ab dastaras mein hai 'aKHtar'

ab to main jis jahan tak ho aaun

vaqt kartā hai parvarish barsoñ

hādisa ek dam nahīñ hotā

waqt karta hai parwarish barson

hadisa ek dam nahin hota