Sher on New Year

aaj ik aur baras biit gayā us ke baġhair

jis ke hote hue hote the zamāne mere

aaj ek aur baras bit gaya us ke baghair

jis ke hote hue hote the zamane mere

ik saal gayā ik saal nayā hai aane ko

par vaqt kā ab bhī hosh nahīñ dīvāne ko

ek sal gaya ek sal naya hai aane ko

par waqt ka ab bhi hosh nahin diwane ko

na shab o roz hī badle haiñ na haal achchhā hai

kis barhaman ne kahā thā ki ye saal achchhā hai

na shab o roz hi badle hain na haal achchha hai

kis barhaman ne kaha tha ki ye sal achchha hai

tū nayā hai to dikhā sub.h na.ī shaam na.ī

varna in āñkhoñ ne dekhe haiñ na.e saal ka.ī

tu naya hai to dikha subh nai sham nai

warna in aankhon ne dekhe hain nae sal kai

kisī ko sāl-e-nau kī kyā mubārakbād dī jaa.e

calender ke badalne se muqaddar kab badaltā hai

kisi ko sal-e-nau ki kya mubarakbaad di jae

calender ke badalne se muqaddar kab badalta hai

yakum january hai nayā saal hai

december meñ pūchhūñgā kyā haal hai

yakum january hai naya sal hai

december mein puchhunga kya haal hai

kuchh ḳhushiyāñ kuchh aañsū de kar Taal gayā

jīvan kā ik aur sunahrā saal gayā

kuchh KHushiyan kuchh aansu de kar Tal gaya

jiwan ka ek aur sunahra sal gaya

na koī rañj kā lamha kisī ke paas aa.e

ḳhudā kare ki nayā saal sab ko raas aa.e

na koi ranj ka lamha kisi ke pas aae

KHuda kare ki naya sal sab ko ras aae

dekhiye paate haiñ ushshāq butoñ se kyā faiz

ik barahman ne kahā hai ki ye saal achchhā hai

dekhiye pate hain ushshaq buton se kya faiz

ek barahman ne kaha hai ki ye sal achchha hai

phir na.e saal kī sarhad pe khaḌe haiñ ham log

raakh ho jā.egā ye saal bhī hairat kaisī

phir nae sal ki sarhad pe khaDe hain hum log

rakh ho jaega ye sal bhi hairat kaisi

ik ajnabī ke haath meñ de kar hamārā haath

lo saath chhoḌne lagā āḳhir ye saal bhī

ek ajnabi ke hath mein de kar hamara hath

lo sath chhoDne laga aaKHir ye sal bhi

ek baras aur biit gayā

kab tak ḳhaak uḌānī hai

ek baras aur bit gaya

kab tak KHak uDani hai

purāne saal kī ThiThurī huī parchhā.iyāñ simTīñ

na.e din kā nayā sūraj ufuq par uThtā aatā hai

purane sal ki ThiThuri hui parchhaiyan simTin

nae din ka naya suraj ufuq par uThta aata hai

ye kis ne phone pe dī sāl-e-nau kī tahniyat mujh ko

tamannā raqs kartī hai taḳhayyul gungunātā hai

ye kis ne phone pe di sal-e-nau ki tahniyat mujh ko

tamanna raqs karti hai taKHayyul gungunata hai

na.e saal meñ pichhlī nafrat bhulā deñ

chalo apnī duniyā ko jannat banā deñ

nae sal mein pichhli nafrat bhula den

chalo apni duniya ko jannat bana den

ek pattā shajar-e-umr se lo aur girā

log kahte haiñ mubārak ho nayā saal tumheñ

ek patta shajar-e-umr se lo aur gira

log kahte hain mubarak ho naya sal tumhein

jis barahman ne kahā hai ki ye saal achchhā hai

us ko dafnāo mire haath kī rekhāoñ meñ

jis barahman ne kaha hai ki ye sal achchha hai

us ko dafnao mere hath ki rekhaon mein

chehre se jhaaḌ pichhle baras kī kudūrateñ

dīvār se purānā calender utaar de

chehre se jhaD pichhle baras ki kuduraten

diwar se purana calender utar de

ḳhudā kare ki ye din baar baar aatā rahe

aur apne saath ḳhushī kā ḳhazāna laatā rahe

KHuda kare ki ye din bar bar aata rahe

aur apne sath KHushi ka KHazana lata rahe

umr kā ek aur saal gayā

vaqt phir ham pe ḳhaak Daal gayā

umr ka ek aur sal gaya

waqt phir hum pe KHak Dal gaya

guzishta saal koī maslahat rahī hogī

guzishta saal ke sukh ab ke saal de maulā

guzishta sal koi maslahat rahi hogi

guzishta sal ke sukh ab ke sal de maula

dulhan banī huī haiñ rāheñ

jashn manāo sāl-e-nau ke

dulhan bani hui hain rahen

jashn manao sal-e-nau ke

nayā saal dīvār par Taañg de

purāne baras kā calendar girā

naya sal diwar par Tang de

purane baras ka calendar gira

pichhlā baras to ḳhuun rulā kar guzar gayā

kyā gul khilā.egā ye nayā saal dosto

pichhla baras to KHun rula kar guzar gaya

kya gul khilaega ye naya sal dosto

is ga.e saal baḌe zulm hue haiñ mujh par

ai na.e saal masīhā kī tarah mil mujh se

is gae sal baDe zulm hue hain mujh par

ai nae sal masiha ki tarah mil mujh se

ab ke baar mil ke yuuñ sāl-e-nau manāeñge

ranjisheñ bhulā kar ham nafrateñ miTā.eñge

ab ke bar mil ke yun sal-e-nau manaenge

ranjishen bhula kar hum nafraten miTaenge

ik pal kā qurb ek baras kā phir intizār

aa.ī hai january to december chalā gayā

ek pal ka qurb ek baras ka phir intizar

aai hai january to december chala gaya

mubārak mubārak nayā saal aayā

ḳhushī kā samāñ saarī duniyā pe chhāyā

mubarak mubarak naya sal aaya

KHushi ka saman sari duniya pe chhaya

palaT sī ga.ī hai zamāne kī kaayā

nayā saal aayā nayā saal aayā

palaT si gai hai zamane ki kaya

naya sal aaya naya sal aaya

karne ko kuchh nahīñ hai na.e saal meñ 'yashab'

kyoñ nā kisī se tark-e-mohabbat hī kījiye

karne ko kuchh nahin hai nae sal mein 'yashab'

kyon na kisi se tark-e-mohabbat hi kijiye

nayā saal aayā hai ḳhushiyāñ manāo

na.e āsmānoñ se āñkheñ milāo

naya sal aaya hai KHushiyan manao

nae aasmanon se aankhen milao

sāl-e-nau aatā hai to mahfūz kar letā huuñ maiñ

kuchh purāne se calender zehn kī dīvār par

sal-e-nau aata hai to mahfuz kar leta hun main

kuchh purane se calender zehn ki diwar par

aur kam yaad aaogī agle baras tum

ab ke kam yaad aa.ī ho pichhle baras se

aur kam yaad aaogi agle baras tum

ab ke kam yaad aai ho pichhle baras se

ai jaate baras tujh ko sauñpā ḳhudā ko

mubārak mubārak nayā saal sab ko

ai jate baras tujh ko saunpa KHuda ko

mubarak mubarak naya sal sab ko

munhadim hotā chalā jaatā hai dil sāl-ba-sāl

aisā lagtā hai girah ab ke baras TūTtī hai

munhadim hota chala jata hai dil sal-ba-sal

aisa lagta hai girah ab ke baras TuTti hai

ek lamha lauT kar aayā nahīñ

ye baras bhī rā.egāñ ruḳhsat huā

ek lamha lauT kar aaya nahin

ye baras bhi raegan ruKHsat hua

saal guzar jaatā hai saarā

aur calender rah jaatā hai

sal guzar jata hai sara

aur calender rah jata hai

sitāroñ āsmāñ ko jagmagā do raushnī se

december aaj milne jā rahā hai january se

sitaron aasman ko jagmaga do raushni se

december aaj milne ja raha hai january se