All writings of Sahir Ludhianvi

na mu.nh chhupaa ke jiye ham na sar jhukaa ke jiye sitamgaro.n kii nazar se nazar milaa ke jiye ab ek raat agar kam jiye to kam hii sahii yahii bahut hai ki ham mish.ale.n jalaa ke jiye

jahaa.n jahaa.n tirii nazro.n kii os Tapkii hai vahaa.n vahaa.n se abhii tak Gubaar uThtaa hai jahaa.n jahaa.n tire jalvo.n ke phuul bikhre the vahaa.n vahaa.n dil-e-vahshii pukaar uThtaa hai

miltii hai zindagii me.n mohabbat kabhii kabhii hotii hai dilbaro.n kii inaayat kabhii kabhii sharmaa ke mu.nh na pher nazar ke savaal par laatii hai aise mo.D pe qismat kabhii kabhii khulte nahii.n hai.n roz dariiche bahaar ke aatii hai jaan-e-man ye qayaamat kabhii kabhii tanhaa na kaT sake.nge javaanii ke raaste pesh aa.egii kisii kii zaruurat kabhii kabhii phir kho na jaa.e.n ham kahii.n duniyaa kii bhii.D me.n miltii hai paas aane kii mohlat kabhii kabhii

ye mahlo.n ye taKHto.n ye taajo.n kii duniyaa ye insaa.n ke dushman samaajo.n kii duniyaa ye daulat ke bhuuke rivaajo.n kii duniyaa ye duniyaa agar mil bhii jaa.e to kyaa hai har ik jism ghaayal har ik ruuh pyaasii nigaaho.n me.n uljhan dilo.n me.n udaasii ye duniyaa hai yaa aalam-e-bad-havaasii ye duniyaa agar mil bhii jaa.e to kyaa hai yahaa.n ik khilaunaa hai insaa.n kii hastii ye bastii hai murda-parasto.n kii bastii yahaa.n par to jiivan se hai maut sastii ye duniyaa agar mil bhii jaa.e to kyaa hai javaanii bhaTaktii hai bad-kaar ban kar javaa.n jism sajte hai.n baazaar ban kar yahaa.n pyaar hotaa hai bevpaar ban kar ye duniyaa agar mil bhii jaa.e to kyaa hai ye duniyaa jahaa.n aadmii kuchh nahii.n hai vafaa kuchh nahii.n dostii kuchh nahii.n hai jahaa.n pyaar kii qadr hii kuchh nahii.n hai ye duniyaa agar mil bhii jaa.e to kyaa hai jalaa do ise phuu.nk Daalo ye duniyaa mire saamne se haTaa lo ye duniyaa tumhaarii hai tum hii sambhaalo ye duniyaa ye duniyaa agar mil bhii jaa.e to kyaa hai

mire jahaa.n me.n saman-zaar Dhuu.nDne vaale yahaa.n bahaar nahii.n aatishii.n baguule hai.n dhanak ke ra.ng nahii.n surma.ii fazaa.o.n me.n ufuq se taa-ba-ufuq phaa.nsiyo.n ke jhuule hai.n phir ek manzil-e-KHuu.nbaar kii taraf hai.n ravaa.n vo rahnumaa jo ka.ii baar raah bhuule hai.n buland da.ava-e-jamhuuriyat ke parde me.n faroG-e-majlis-o-zindaa.n hai.n taaziyaane hai.n ba-naam-e-amn hai.n ja.ng-o-jadal ke mansuube ba-shor-e-adl tafaavut ke kaar-KHaane hai.n dilo.n pe KHauf ke pahre labo.n pe qufl sukuut suro.n pe garm salaaKHo.n ke shaamiyaane hai.n magar haTe hai.n kahii.n jabr aur tashaddud miTe vo falsafe ki jilaa de ga.e dimaaGo.n ko ko.ii sipaah-e-sitam pesha chuur kar na sakii bashar kii jaagii hu.ii ruuh ke ayaaGo.n ko qadam qadam pe lahuu nazar de rahii hai hayaat sipaahiyo.n se ulajhte hu.e charaaGo.n ko ravaa.n hai qaafila-e-irtiqaa-e-insaanii nizaam-e-aatish-o-aahan kaa dil hilaa.e hu.e baGaavato.n ke duhal baj rahe hai.n chaar taraf nikal rahe hai.n javaa.n mish.ale.n jalaa.e hu.e tamaam arz-e-jahaa.n kholtaa samundar hai tamaam koh-o-bayaabaa.n hai.n tilmilaa.e hu.e mirii sadaa ko dabaanaa to KHair mumkin hai magar hayaat kii lalkaar kaun rokegaa fasiil-e-aatish-o-aahan bahut buland sahii badalte vaqt kii raftaar kaun rokegaa na.e KHayaal kii parvaaz rokne vaalo na.e avaam kii talvaar kaun rokegaa panaah letaa hai jin majliso.n me.n tiira nizaam vahii.n se sub.h ke lashkar nikalne vaale hai.n ubhar rahe hai.n fazaa.o.n me.n ahmarii.n parcham kinaare mashriq-o-maGrib ke milne vaale hai.n hazaar barq gire laakh aa.ndhiyaa.n uThe.n vo phuul khil ke rahe.nge jo khilne vaale hai.n