Sher on Haalaat

sub.h hote hī nikal aate haiñ bāzār meñ log

gaThriyāñ sar pe uThā.e hue īmanoñ kī

subh hote hi nikal aate hain bazar mein log

gaThriyan sar pe uThae hue imanon ki

hālāt se ḳhauf khā rahā huuñ

shīshe ke mahal banā rahā huuñ

haalat se KHauf kha raha hun

shishe ke mahal bana raha hun

ye dhuup to har ruḳh se pareshān karegī

kyuuñ DhūñD rahe ho kisī dīvār kā saaya

ye dhup to har ruKH se pareshan karegi

kyun DhunD rahe ho kisi diwar ka saya

bachchoñ ke saath aaj use dekhā to dukh huā

un meñ se koī ek bhī maañ par nahīñ gayā

bachchon ke sath aaj use dekha to dukh hua

un mein se koi ek bhi man par nahin gaya

mire hālāt ko bas yuuñ samajh lo

parinde par shajar rakkhā huā hai

mere haalat ko bas yun samajh lo

parinde par shajar rakkha hua hai

agar badal na diyā aadmī ne duniyā ko

to jaan lo ki yahāñ aadmī kī ḳhair nahīñ

agar badal na diya aadmi ne duniya ko

to jaan lo ki yahan aadmi ki KHair nahin

jam.a kartī hai mujhe raat bahut mushkil se

sub.h ko ghar se nikalte hī bikharne ke liye

jama karti hai mujhe raat bahut mushkil se

subh ko ghar se nikalte hi bikharne ke liye

an-ginat ḳhūnī masā.il kī havā aisī chalī

ranj-o-ġham kī gard meñ lipTā har ik chehra milā

an-ginat KHuni masail ki hawa aisi chali

ranj-o-gham ki gard mein lipTa har ek chehra mila

mujh se ziyāda kaun tamāsha dekh sakegā

gāñdhī-jī ke tīnoñ bandar mere andar

mujh se ziyaada kaun tamasha dekh sakega

gandhi-ji ke tinon bandar mere andar

kaise mānūñ ki zamāne kī ḳhabar rakhtī hai

gardish-e-vaqt to bas mujh pe nazar rakhtī hai

kaise manun ki zamane ki KHabar rakhti hai

gardish-e-waqt to bas mujh pe nazar rakhti hai

mansūb charāġhoñ se taraf-dār havā ke

tum log munāfiq ho munāfiq bhī balā ke

mansub charaghon se taraf-dar hawa ke

tum log munafiq ho munafiq bhi bala ke