Sher on Political

maiñ aaj zad pe agar huuñ to ḳhush-gumān na ho

charāġh sab ke bujheñge havā kisī kī nahīñ

main aaj zad pe agar hun to KHush-guman na ho

charagh sab ke bujhenge hawa kisi ki nahin

aisā gulshan kī siyāsat ne kiyā hai pāband

ham asīrān-e-qafas aah bhī karne ke nahīñ

aisa gulshan ki siyasat ne kiya hai paband

hum asiran-e-qafas aah bhi karne ke nahin

na.ī lāsheñ bichhāne ke liye hī

gaḌe murde ukhāḌe jā rahe haiñ

nai lashen bichhane ke liye hi

gaDe murde ukhaDe ja rahe hain

tumhāre saath ta'alluq to dostāna thā

tum is meñ rang-e-siyāsat kahāñ se le aa.e

tumhaare sath ta'alluq to dostana tha

tum is mein rang-e-siyasat kahan se le aae

milegī seat election meñ aap ko ik din

agar ye chamcha-garī kāmyāb ho jaa.e

milegi seat election mein aap ko ek din

agar ye chamcha-gari kaamyab ho jae

dastaḳhat to mujhe bhī aatā hai

kaash maiñ bhī vazīr ho jā.ūñ

dastaKHat to mujhe bhi aata hai

kash main bhi wazir ho jaun

jab shaiḳh-o-barahman se huā dil māyūs

shaitān ne netāoñ ko tayyār kiyā

jab shaiKH-o-barahman se hua dil mayus

shaitan ne netaon ko tayyar kiya

ḳhātūn rahnumā se jo shādī huī mirī

jamhūriyat kā husn mire ghar meñ aa gayā

KHatun rahnuma se jo shadi hui meri

jamhuriyat ka husn mere ghar mein aa gaya

netā hai dil kā chāhe to dil se nikāl de

lekin hamāre ghaploñ kī fard-e-sazā na maañg

neta hai dil ka chahe to dil se nikal de

lekin hamare ghaplon ki fard-e-saza na mang

kuchh bhī piite nahīñ ye qaum kī yaḳhnī ke sivā

nāshta millat-e-baizā kā kiyā karte haiñ

kuchh bhi pite nahin ye qaum ki yaKHni ke siwa

nashta millat-e-baiza ka kiya karte hain

koī achchhī vazārat gar kisī member ko mil jaa.e

to baaqī ke vazīroñ ko baḌī taklīf hotī hai

koi achchhi wazarat gar kisi member ko mil jae

to baqi ke waziron ko baDi taklif hoti hai

hālāt badal sakte haiñ 'mannān' kisī vaqt

ban jā.eñge ab sāhab-e-dastār tamāsha

haalat badal sakte hain 'mannan' kisi waqt

ban jaenge ab sahab-e-dastar tamasha

haiñ hamāre jitne leader sabhī bhuTTe chor kyoñ haiñ

koī chāra-sāz hotā koī ġham-gusār hotā

hain hamare jitne leader sabhi bhuTTe chor kyon hain

koi chaara-saz hota koi gham-gusar hota

zindagī ho mirī netāoñ kī sūrat yā-rab

ho faqat apnī ġharaz se hī mohabbat yā-rab

zindagi ho meri netaon ki surat ya-rab

ho faqat apni gharaz se hi mohabbat ya-rab

hai bajaT ghāTe meñ jurmāne zarūrī haiñ yahāñ

is liye sarkār merī luuT kar khāne ko hai

hai bajaT ghaTe mein jurmane zaruri hain yahan

is liye sarkar meri luT kar khane ko hai

cake biscuit khā.eñge ullū ke paTThe rāt-din

aur sharīfoñ ke liye aaTā garāñ ho jā.egā

cake biscuit khaenge ullu ke paTThe raat-din

aur sharifon ke liye aaTa garan ho jaega

baat manvanī hai arbāb-e-hukūmat se agar

nit-na.e Dhoñg rachā dhuum machā my dear

baat manwani hai arbab-e-hukumat se agar

nit-nae Dhong racha dhum macha my dear

azmat-e-mulk is siyāsat ke

haath nīlām ho rahī hai ab

azmat-e-mulk is siyasat ke

hath nilam ho rahi hai ab

haiñ kavākib kuchh nazar aate haiñ kuchh

dete haiñ dhoka ye bāzīgar khulā

hain kawakib kuchh nazar aate hain kuchh

dete hain dhoka ye bazigar khula