Sher on Muflisi

ghar lauT ke ro.eñge maañ baap akele meñ

miTTī ke khilaune bhī saste na the mele meñ

ghar lauT ke roenge man bap akele mein

miTTi ke khilaune bhi saste na the mele mein

siyah-baḳhtī meñ kab koī kisī kā saath detā hai

ki tārīkī meñ saayā bhī judā rahtā hai insāñ se

siyah-baKHti mein kab koi kisi ka sath deta hai

ki tariki mein saya bhi juda rahta hai insan se

farishte aa kar un ke jism par ḳhushbū lagāte haiñ

vo bachche rail ke Dibboñ meñ jo jhāḌū lagāte haiñ

farishte aa kar un ke jism par KHushbu lagate hain

wo bachche rail ke Dibbon mein jo jhaDu lagate hain

khaḌā huuñ aaj bhī roTī ke chaar harf liye

savāl ye hai kitāboñ ne kyā diyā mujh ko

khaDa hun aaj bhi roTi ke chaar harf liye

sawal ye hai kitabon ne kya diya mujh ko

vo aksar din meñ bachchoñ ko sulā detī hai is Dar se

galī meñ phir khilaune bechne vaalā na aa jaa.e

wo aksar din mein bachchon ko sula deti hai is Dar se

gali mein phir khilaune bechne wala na aa jae

bhuuk chehroñ pe liye chāñd se pyāre bachche

bechte phirte haiñ galiyoñ meñ ġhubāre bachche

bhuk chehron pe liye chand se pyare bachche

bechte phirte hain galiyon mein ghubare bachche

aaj phir maañ mujhe māregī bahut rone par

aaj phir gaañv meñ aayā hai khilaune vaalā

aaj phir man mujhe maregi bahut rone par

aaj phir ganw mein aaya hai khilaune wala

eid kā din hai so kamre meñ paḌā huuñ 'aslam'

apne darvāze ko bāhar se muqaffal kar ke

eid ka din hai so kamre mein paDa hun 'aslam'

apne darwaze ko bahar se muqaffal kar ke

bachchoñ kī fees un kī kitābeñ qalam davāt

merī ġharīb āñkhoñ meñ schōl chubh gayā

bachchon ki fees un ki kitaben qalam dawat

meri gharib aankhon mein school chubh gaya

jab chalī ThanDī havā bachcha ThiThur kar rah gayā

maañ ne apne la.al kī taḳhtī jalā dī raat ko

jab chali ThanDi hawa bachcha ThiThur kar rah gaya

man ne apne lal ki taKHti jala di raat ko

jo mere gaañv ke khetoñ meñ bhuuk ugne lagī

mire kisānoñ ne shahroñ meñ naukrī kar lī

jo mere ganw ke kheton mein bhuk ugne lagi

mere kisanon ne shahron mein naukri kar li

ġharīb-e-shahr to faaqe se mar gayā 'ārif'

amīr-e-shahr ne hiire se ḳhud-kushī kar lī

gharib-e-shahr to faqe se mar gaya 'arif'

amir-e-shahr ne hire se KHud-kushi kar li

sharm aatī hai ki us shahr meñ ham haiñ ki jahāñ

na mile bhiik to lākhoñ kā guzārā hī na ho

sharm aati hai ki us shahr mein hum hain ki jahan

na mile bhik to lakhon ka guzara hi na ho

us ke haath meñ ġhubbāre the phir bhī bachchā gum-sum thā

vo ġhubbāre bech rahā ho aisā bhī ho saktā hai

us ke hath mein ghubbare the phir bhi bachcha gum-sum tha

wo ghubbare bech raha ho aisa bhi ho sakta hai

biich saḌak ik laash paḌī thī aur ye likkhā thā

bhuuk meñ zahrīlī roTī bhī mīThī lagtī hai

bich saDak ek lash paDi thi aur ye likkha tha

bhuk mein zahrili roTi bhi miThi lagti hai

bhūke bachchoñ kī tasallī ke liye

maañ ne phir paanī pakāyā der tak

bhuke bachchon ki tasalli ke liye

man ne phir pani pakaya der tak

ġham kī duniyā rahe ābād 'shakīl'

muflisī meñ koī jāgīr to hai

gham ki duniya rahe aabaad 'shakil'

muflisi mein koi jagir to hai

muflisī sab bahār khotī hai

mard kā e'tibār khotī hai

muflisi sab bahaar khoti hai

mard ka e'tibar khoti hai

apne bachchoñ ko maiñ bātoñ meñ lagā letā huuñ

jab bhī āvāz lagātā hai khilaune vaalā

apne bachchon ko main baaton mein laga leta hun

jab bhi aawaz lagata hai khilaune wala

khilaunoñ kī dukāno rāstā do

mire bachche guzarnā chāhte haiñ

khilaunon ki dukano rasta do

mere bachche guzarna chahte hain

khilaunoñ ke liye bachche abhī tak jāgte hoñge

tujhe ai muflisī koī bahāna DhūñD lenā hai

khilaunon ke liye bachche abhi tak jagte honge

tujhe ai muflisi koi bahana DhunD lena hai

aayā hai ik rāh-numā ke istiqbāl ko ik bachcha

peT hai ḳhālī aañkh meñ hasrat hāthoñ meñ gul-dasta hai

aaya hai ek rah-numa ke istiqbaal ko ek bachcha

peT hai KHali aankh mein hasrat hathon mein gul-dasta hai

ġhurbat kī tez aag pe aksar pakā.ī bhuuk

ḳhush-hāliyoñ ke shahr meñ kyā kuchh nahīñ kiyā

ghurbat ki tez aag pe aksar pakai bhuk

KHush-haaliyon ke shahr mein kya kuchh nahin kiya

haTo kāñdhe se aañsū poñchh Daalo vo dekho rail-gāḌī aa rahī hai

maiñ tum ko chhoḌ kar hargiz na jaatā ġharībī mujh ko le kar jā rahī hai

haTo kandhe se aansu ponchh Dalo wo dekho rail-gaDi aa rahi hai

main tum ko chhoD kar hargiz na jata gharibi mujh ko le kar ja rahi hai

muflisoñ kī zindagī kā zikr kyā

muflisī kī maut bhī achchhī nahīñ

muflison ki zindagi ka zikr kya

muflisi ki maut bhi achchhi nahin

maiñ ojhal ho ga.ī maañ kī nazar se

galī meñ jab koī bārāt aa.ī

main ojhal ho gai man ki nazar se

gali mein jab koi baraat aai

jur.at-e-shauq to kyā kuchh nahīñ kahtī lekin

paañv phailāne nahīñ detī hai chādar mujh ko

jurat-e-shauq to kya kuchh nahin kahti lekin

panw phailane nahin deti hai chadar mujh ko

muflisī bhuuk ko shahvat se milā detī hai

gandumī lams meñ hai zā.iqa-e-nān-e-javīñ

muflisi bhuk ko shahwat se mila deti hai

gandumi lams mein hai zaiqa-e-nan-e-jawin

maiñ 'zafar' tā-zindagī biktā rahā pardes meñ

apnī ghar-vālī ko ik kañgan dilāne ke liye

main 'zafar' ta-zindagi bikta raha pardes mein

apni ghar-wali ko ek kangan dilane ke liye

apnī ġhurbat kī kahānī ham sunā.eñ kis tarah

raat phir bachcha hamārā rote rote so gayā

apni ghurbat ki kahani hum sunaen kis tarah

raat phir bachcha hamara rote rote so gaya

be-zarī fāqa-kashī muflisī be-sāmānī

ham faqīroñ ke bhī haañ kuchh nahīñ aur sab kuchh hai

be-zari faqa-kashi muflisi be-samani

hum faqiron ke bhi han kuchh nahin aur sab kuchh hai

jab aayā iid kā din ghar meñ bebasī kī tarah

to mere phuul se bachchoñ ne mujh ko gher liyā

jab aaya id ka din ghar mein bebasi ki tarah

to mere phul se bachchon ne mujh ko gher liya

duniyā meñ ġharīboñ ko do kaam hī aate haiñ

khāne ke liye jiinā jiine ke liye khānā

duniya mein gharibon ko do kaam hi aate hain

khane ke liye jina jine ke liye khana

ab zamīnoñ ko bichhā.e ki falak ko oḌhe

muflisī to bharī barsāt meñ be-ghar huī hai

ab zaminon ko bichhae ki falak ko oDhe

muflisi to bhari barsat mein be-ghar hui hai

ġharīboñ par to mausam bhī hukūmat karte rahte haiñ

kabhī bārish kabhī garmī kabhī ThanDak kā qabza hai

gharibon par to mausam bhi hukumat karte rahte hain

kabhi barish kabhi garmi kabhi ThanDak ka qabza hai

muflisī hiss-e-latāfat ko miTā detī hai

bhuuk ādāb ke sāñchoñ meñ nahīñ Dhal saktī

muflisi hiss-e-latafat ko miTa deti hai

bhuk aadab ke sanchon mein nahin Dhal sakti

muflisī siiñ ab zamāne kā rahā kuchh haal na.iiñ

āsmāñ charḳhī ke juuñ phirtā hai lekin maal na.iiñ

muflisi sin ab zamane ka raha kuchh haal nain

aasman charKHi ke jun phirta hai lekin mal nain

bhaTaktī hai havas din-rāt sone kī dukānoñ meñ

ġharībī kaan chhidvātī hai tinkā Daal detī hai

bhaTakti hai hawas din-raat sone ki dukanon mein

gharibi kan chhidwati hai tinka Dal deti hai

muflisī meñ mizāj shāhāna

kis maraz kī davā kare koī

muflisi mein mizaj shahana

kis maraz ki dawa kare koi

do-shāla shaal kashmīrī amīroñ ko mubārak ho

galīm-e-kohna meñ jaaḌā faqīroñ kā basar hogā

do-shaala shaal kashmiri amiron ko mubarak ho

galim-e-kohna mein jaDa faqiron ka basar hoga

ham hasīn ġhazloñ se peT bhar nahīñ sakte

daulat-e-suḳhan le kar be-farāġh haiñ yaaro

hum hasin ghazlon se peT bhar nahin sakte

daulat-e-suKHan le kar be-faragh hain yaro

dev parī ke qisse sun kar

bhūke bachche so lete haiñ

dew pari ke qisse sun kar

bhuke bachche so lete hain

chaman meñ ḳhushk-sālī par hai ḳhush sayyād ki ab ḳhud

parinde peT kī ḳhātir asīr-e-dām hote haiñ

chaman mein KHushk-sali par hai KHush sayyaad ki ab KHud

parinde peT ki KHatir asir-e-dam hote hain