Sher on Bachpan

bachchoñ ke chhoTe hāthoñ ko chāñd sitāre chhūne do

chaar kitābeñ paḌh kar ye bhī ham jaise ho jā.eñge

bachchon ke chhoTe hathon ko chand sitare chhune do

chaar kitaben paDh kar ye bhi hum jaise ho jaenge

uḌne do parindoñ ko abhī shoḳh havā meñ

phir lauT ke bachpan ke zamāne nahīñ aate

uDne do parindon ko abhi shoKH hawa mein

phir lauT ke bachpan ke zamane nahin aate

mere rone kā jis meñ qissa hai

umr kā behtarīn hissa hai

mere rone ka jis mein qissa hai

umr ka behtarin hissa hai

merā bachpan bhī saath le aayā

gaañv se jab bhī aa gayā koī

mera bachpan bhi sath le aaya

ganw se jab bhi aa gaya koi

farishte aa kar un ke jism par ḳhushbū lagāte haiñ

vo bachche rail ke Dibboñ meñ jo jhāḌū lagāte haiñ

farishte aa kar un ke jism par KHushbu lagate hain

wo bachche rail ke Dibbon mein jo jhaDu lagate hain

duā.eñ yaad karā dī ga.ī thiiñ bachpan meñ

so zaḳhm khāte rahe aur duā diye ga.e ham

duaen yaad kara di gai thin bachpan mein

so zaKHm khate rahe aur dua diye gae hum

kitāboñ se nikal kar titliyāñ ġhazleñ sunātī haiñ

tiffin rakhtī hai merī maañ to basta muskurātā hai

kitabon se nikal kar titliyan ghazlen sunati hain

tiffin rakhti hai meri man to basta muskuraata hai

'jamāl' har shahr se hai pyārā vo shahr mujh ko

jahāñ se dekhā thā pahlī baar āsmān maiñ ne

'jamal' har shahr se hai pyara wo shahr mujh ko

jahan se dekha tha pahli bar aasman main ne

ham to bachpan meñ bhī akele the

sirf dil kī galī meñ khele the

hum to bachpan mein bhi akele the

sirf dil ki gali mein khele the

bhuuk chehroñ pe liye chāñd se pyāre bachche

bechte phirte haiñ galiyoñ meñ ġhubāre bachche

bhuk chehron pe liye chand se pyare bachche

bechte phirte hain galiyon mein ghubare bachche

asīr-e-panja-e-ahd-e-shabāb kar ke mujhe

kahāñ gayā mirā bachpan ḳharāb kar ke mujhe

asir-e-panja-e-ahd-e-shabab kar ke mujhe

kahan gaya mera bachpan KHarab kar ke mujhe

baḌī hasrat se insāñ bachpane ko yaad kartā hai

ye phal pak kar dobāra chāhtā hai ḳhaam ho jaa.e

baDi hasrat se insan bachpane ko yaad karta hai

ye phal pak kar dobara chahta hai KHam ho jae

chup-chāp baiThe rahte haiñ kuchh bolte nahīñ

bachche bigaḌ ga.e haiñ bahut dekh-bhāl se

chup-chap baiThe rahte hain kuchh bolte nahin

bachche bigaD gae hain bahut dekh-bhaal se

maiñ bachpan meñ khilaune toḌtā thā

mire anjām kī vo ibtidā thī

main bachpan mein khilaune toDta tha

mere anjam ki wo ibtida thi

bachpan meñ ham hī the yā thā aur koī

vahshat sī hone lagtī hai yādoñ se

bachpan mein hum hi the ya tha aur koi

wahshat si hone lagti hai yaadon se

faqat māl-o-zar-e-dīvār-o-dar achchhā nahīñ lagtā

jahāñ bachche nahīñ hote vo ghar achchhā nahīñ lagtā

faqat mal-o-zar-e-diwar-o-dar achchha nahin lagta

jahan bachche nahin hote wo ghar achchha nahin lagta

ab tak hamārī umr kā bachpan nahīñ gayā

ghar se chale the jeb ke paise girā diye

ab tak hamari umr ka bachpan nahin gaya

ghar se chale the jeb ke paise gira diye

kaun kahe ma.asūm hamārā bachpan thā

khel meñ bhī to aadhā aadhā āñgan thā

kaun kahe masum hamara bachpan tha

khel mein bhi to aadha aadha aangan tha

jis ke liye bachcha royā thā aur poñchhe the aañsū baabā ne

vo bachcha ab bhī zinda hai vo mahñgā khilaunā TuuT gayā

jis ke liye bachcha roya tha aur ponchhe the aansu baba ne

wo bachcha ab bhi zinda hai wo mahnga khilauna TuT gaya

ik khilaunā jogī se kho gayā thā bachpan meñ

DhūñDhtā phirā us ko vo nagar nagar tanhā

ek khilauna jogi se kho gaya tha bachpan mein

DhunDhta phira us ko wo nagar nagar tanha

ye zindagī kuchh bhī ho magar apne liye to

kuchh bhī nahīñ bachchoñ kī sharārat ke alāva

ye zindagi kuchh bhi ho magar apne liye to

kuchh bhi nahin bachchon ki shararat ke alawa

ek hāthī ek raaja ek raanī ke baġhair

niiñd bachchoñ ko nahīñ aatī kahānī ke baġhair

ek hathi ek raja ek rani ke baghair

nind bachchon ko nahin aati kahani ke baghair

apne bachchoñ ko maiñ bātoñ meñ lagā letā huuñ

jab bhī āvāz lagātā hai khilaune vaalā

apne bachchon ko main baaton mein laga leta hun

jab bhi aawaz lagata hai khilaune wala

khilaunoñ kī dukāno rāstā do

mire bachche guzarnā chāhte haiñ

khilaunon ki dukano rasta do

mere bachche guzarna chahte hain

sātoñ aalam sar karne ke ba.ad ik din kī chhuTTī le kar

ghar meñ chiḌiyoñ ke gaane par bachchoñ kī hairānī dekho

saton aalam sar karne ke baad ek din ki chhuTTi le kar

ghar mein chiDiyon ke gane par bachchon ki hairani dekho

mohalle vaale mere kār-e-be-masraf pe hañste haiñ

maiñ bachchoñ ke liye galiyoñ meñ ġhubbāre banātā huuñ

mohalle wale mere kar-e-be-masraf pe hanste hain

main bachchon ke liye galiyon mein ghubbare banata hun

hamāre muñh pe us ne aa.ine se dhuup tak pheñkī

abhī tak ham samajh kar us ko bachcha chhoḌ dete haiñ

hamare munh pe us ne aaine se dhup tak phenki

abhi tak hum samajh kar us ko bachcha chhoD dete hain