Sher on Aangan

kaun kahe ma.asūm hamārā bachpan thā

khel meñ bhī to aadhā aadhā āñgan thā

kaun kahe masum hamara bachpan tha

khel mein bhi to aadha aadha aangan tha

ik shajar aisā mohabbat kā lagāyā jaa.e

jis kā ham-sā.e ke āñgan meñ bhī saayā jaa.e

ek shajar aisa mohabbat ka lagaya jae

jis ka ham-sae ke aangan mein bhi saya jae

phailte hue shahro apnī vahshateñ roko

mere ghar ke āñgan par āsmān rahne do

phailte hue shahro apni wahshaten roko

mere ghar ke aangan par aasman rahne do

ḳhamoshī ke haiñ āñgan aur sannāTe kī dīvāreñ

ye kaise log haiñ jin ko gharoñ se Dar nahīñ lagtā

KHamoshi ke hain aangan aur sannaTe ki diwaren

ye kaise log hain jin ko gharon se Dar nahin lagta

āñgan āñgan ḳhuun ke chhīñTe chehra chehra be-chehra

kis kis ghar kā zikr karūñ meñ kis kis ke sadmāt likhūñ

aangan aangan KHun ke chhinTe chehra chehra be-chehra

kis kis ghar ka zikr karun mein kis kis ke sadmat likhun

hamāre ghar ke āñgan meñ sitāre bujh ga.e lākhoñ

hamārī ḳhvāb gāhoñ meñ na chamkā sub.h kā sūraj

hamare ghar ke aangan mein sitare bujh gae lakhon

hamari KHwab gahon mein na chamka subh ka suraj

palaT na jaa.eñ hamesha ko tere āñgan se

gudāz lamhoñ kī be-ḳhvāb āhaToñ se na ruuTh

palaT na jaen hamesha ko tere aangan se

gudaz lamhon ki be-KHwab aahaTon se na ruTh

baras rahī hai udāsī tamām āñgan meñ

vo rat-jagoñ kī havelī baḌe azaab meñ hai

baras rahi hai udasi tamam aangan mein

wo rat-jagon ki haweli baDe azab mein hai

dil ke āñgan meñ ubhartā hai tirā aks-e-jamīl

chāñdnī raat meñ ho raat kī raanī jaise

dil ke aangan mein ubharta hai tera aks-e-jamil

chandni raat mein ho raat ki rani jaise

jaane kis kirdār kī kaa.ī mere ghar meñ aa pahuñchī

ab to 'zafar' chalnā hai mushkil āñgan kī chiknā.ī meñ

jaane kis kirdar ki kai mere ghar mein aa pahunchi

ab to 'zafar' chalna hai mushkil aangan ki chiknai mein

āñgan meñ ye raat kī raanī sāñpoñ kā ghar kaaT ise

kamra albatta suunā hai kone meñ guldān lagā

aangan mein ye raat ki rani sanpon ka ghar kaT ise

kamra albatta suna hai kone mein guldan laga

ḳhākistar-e-jāñ ko mirī mahkā.e thā lekin

juuhī kā vo paudhā mire āñgan meñ nahīñ thā

KHakistar-e-jaan ko meri mahkae tha lekin

juhi ka wo paudha mere aangan mein nahin tha