Sher on Eid

eid kā chāñd tum ne dekh liyā

chāñd kī eid ho ga.ī hogī

eid ka chand tum ne dekh liya

chand ki eid ho gai hogi

eid kā din hai gale aaj to mil le zālim

rasm-e-duniyā bhī hai mauqa.a bhī hai dastūr bhī hai

eid ka din hai gale aaj to mil le zalim

rasm-e-duniya bhi hai mauqa bhi hai dastur bhi hai

tujh ko merī na mujhe terī ḳhabar jā.egī

eid ab ke bhī dabe paañv guzar jā.egī

tujh ko meri na mujhe teri KHabar jaegi

eid ab ke bhi dabe panw guzar jaegi

jis taraf tū hai udhar hoñgī sabhī kī nazreñ

iid ke chāñd kā dīdār bahāna hī sahī

jis taraf tu hai udhar hongi sabhi ki nazren

id ke chand ka didar bahana hi sahi

ham ne tujhe dekhā nahīñ kyā eid manā.eñ

jis ne tujhe dekhā ho use eid mubārak

hum ne tujhe dekha nahin kya eid manaen

jis ne tujhe dekha ho use eid mubarak

eid aa.ī tum na aa.e kyā mazā hai eid kā

eid hī to naam hai ik dūsre kī diid kā

eid aai tum na aae kya maza hai eid ka

eid hi to nam hai ek dusre ki did ka

mil ke hotī thī kabhī eid bhī dīvālī bhī

ab ye hālat hai ki Dar Dar ke gale milte haiñ

mil ke hoti thi kabhi eid bhi diwali bhi

ab ye haalat hai ki Dar Dar ke gale milte hain

falak pe chāñd sitāre nikalte haiñ har shab

sitam yahī hai nikaltā nahīñ hamārā chāñd

falak pe chand sitare nikalte hain har shab

sitam yahi hai nikalta nahin hamara chand

dekhā hilāl-e-eid to aayā terā ḳhayāl

vo āsmāñ kā chāñd hai tū merā chāñd hai

dekha hilal-e-eid to aaya tera KHayal

wo aasman ka chand hai tu mera chand hai

kahte haiñ eid hai aaj apnī bhī eid hotī

ham ko agar mayassar jānāñ kī diid hotī

kahte hain eid hai aaj apni bhi eid hoti

hum ko agar mayassar jaanan ki did hoti

ai havā tū hī use eid-mubārak kahiyo

aur kahiyo ki koī yaad kiyā kartā hai

ai hawa tu hi use eid-mubarak kahiyo

aur kahiyo ki koi yaad kiya karta hai

us se milnā to use eid-mubārak kahnā

ye bhī kahnā ki mirī eid mubārak kar de

us se milna to use eid-mubarak kahna

ye bhi kahna ki meri eid mubarak kar de

jo log guzarte haiñ musalsal rah-e-dil se

din eid kā un ko ho mubārak tah-e-dil se

jo log guzarte hain musalsal rah-e-dil se

din eid ka un ko ho mubarak tah-e-dil se

eid kā din hai so kamre meñ paḌā huuñ 'aslam'

apne darvāze ko bāhar se muqaffal kar ke

eid ka din hai so kamre mein paDa hun 'aslam'

apne darwaze ko bahar se muqaffal kar ke

eid ab ke bhī ga.ī yūñhī kisī ne na kahā

ki tire yaar ko ham tujh se milā dete haiñ

eid ab ke bhi gai yunhi kisi ne na kaha

ki tere yar ko hum tujh se mila dete hain

māh-e-nau dekhne tum chhat pe na jaanā hargiz

shahr meñ eid kī tārīḳh badal jā.egī

mah-e-nau dekhne tum chhat pe na jaana hargiz

shahr mein eid ki tariKH badal jaegi

iid ke ba.ad vo milne ke liye aa.e haiñ

iid kā chāñd nazar aane lagā iid ke ba.ad

id ke baad wo milne ke liye aae hain

id ka chand nazar aane laga id ke baad

us mehrbāñ nazar kī ināyat kā shukriya

tohfa diyā hai eid pe ham ko judā.ī kā

us mehrban nazar ki inayat ka shukriya

tohfa diya hai eid pe hum ko judai ka

va.adoñ hī pe har roz mirī jaan na Taalo

hai eid kā din ab to gale ham ko lagā lo

wadon hi pe har roz meri jaan na Talo

hai eid ka din ab to gale hum ko laga lo

shahr ḳhālī hai kise eid mubārak kahiye

chal diye chhoḌ ke makka bhī madīna vaale

shahr KHali hai kise eid mubarak kahiye

chal diye chhoD ke makka bhi madina wale

eid tū aa ke mire jī ko jalāve afsos

jis ke aane kī ḳhushī ho vo na aave afsos

eid tu aa ke mere ji ko jalawe afsos

jis ke aane ki KHushi ho wo na aawe afsos

aaj yāroñ ko mubārak ho ki sub.h-e-eid hai

raag hai mai hai chaman hai dilrubā hai diid hai

aaj yaron ko mubarak ho ki subh-e-eid hai

rag hai mai hai chaman hai dilruba hai did hai

dekhā hilāl-e-īd to tum yaad aa ga.e

is mahviyat meñ iid hamārī guzar ga.ī

dekha hilal-e-id to tum yaad aa gae

is mahwiyat mein id hamari guzar gai

hai eid kā din aaj to lag jaao gale se

jaate ho kahāñ jaan mirī aa ke muqābil

hai eid ka din aaj to lag jao gale se

jate ho kahan jaan meri aa ke muqabil

iid kā din to hai magar 'ja.afar'

maiñ akele to hañs nahīñ saktā

id ka din to hai magar 'jafar'

main akele to hans nahin sakta

hāsil us mah-laqā kī diid nahīñ

eid hai aur ham ko eid nahīñ

hasil us mah-laqa ki did nahin

eid hai aur hum ko eid nahin

tū aa.e to mujh ko bhī

iid kā chāñd dikhā.ī de

tu aae to mujh ko bhi

id ka chand dikhai de

eid kā chāñd jo dekhā to tamannā lipTī

un se taqrīb-e-mulāqāt kā rishta niklā

eid ka chand jo dekha to tamanna lipTi

un se taqrib-e-mulaqat ka rishta nikla

mahak uThī hai fazā pairahan kī ḳhushbū se

chaman diloñ kā khilāne ko eid aa.ī hai

mahak uThi hai faza pairahan ki KHushbu se

chaman dilon ka khilane ko eid aai hai

aa.ī eid va dil meñ nahīñ kuchh havā-e-eid

ai kaash mere paas tū aatā bajā.e eid

aai eid wa dil mein nahin kuchh hawa-e-eid

ai kash mere pas tu aata bajae eid

abrū kā ishāra kiyā tum ne to huī iid

ai jaan yahī hai mah-e-shavval hamārā

abru ka ishaara kiya tum ne to hui id

ai jaan yahi hai mah-e-shawwal hamara

iid kā din hai gale mil liije

iḳhtilāfāt haTā kar rakhiye

id ka din hai gale mil lije

iKHtilafat haTa kar rakhiye

kisī kī yaad manāne meñ iid guzregī

so shahr-e-dil meñ bahut duur tak udāsī hai

kisi ki yaad manane mein id guzregi

so shahr-e-dil mein bahut dur tak udasi hai

raas aa jātīñ hameñ bhī iid kī ḳhushiyāñ tamām

kaash tū bhī paas hotā iid ke lamhāt meñ

ras aa jatin hamein bhi id ki KHushiyan tamam

kash tu bhi pas hota id ke lamhat mein

iid meñ iid huī aish kā sāmāñ dekhā

dekh kar chāñd jo muñh aap kā ai jaañ dekhā

id mein id hui aish ka saman dekha

dekh kar chand jo munh aap ka ai jaan dekha

eid ko bhī vo nahīñ milte haiñ mujh se na mileñ

ik baras din kī mulāqāt hai ye bhī na sahī

eid ko bhi wo nahin milte hain mujh se na milen

ek baras din ki mulaqat hai ye bhi na sahi

vahāñ iid kyā vahāñ diid kyā

jahāñ chāñd raat na aa.ī ho

wahan id kya wahan did kya

jahan chand raat na aai ho

hai eid mai-kade ko chalo dekhtā hai kaun

shahd o shakar pe TuuT paḌe roza-dār aaj

hai eid mai-kade ko chalo dekhta hai kaun

shahd o shakar pe TuT paDe roza-dar aaj

jahāñ na apne azīzoñ kī diid hotī hai

zamīn-e-hijr pe bhī koī iid hotī hai

jahan na apne azizon ki did hoti hai

zamin-e-hijr pe bhi koi id hoti hai

ka.ī fāqoñ meñ eid aa.ī hai

aaj tū ho to jaan ham-āġhosh

kai faqon mein eid aai hai

aaj tu ho to jaan ham-aghosh

agar hayāt hai dekheñge ek din dīdār

ki māh-e-eid bhī āḳhir hai in mahīnoñ meñ

agar hayat hai dekhenge ek din didar

ki mah-e-eid bhi aaKHir hai in mahinon mein

jab aayā iid kā din ghar meñ bebasī kī tarah

to mere phuul se bachchoñ ne mujh ko gher liyā

jab aaya id ka din ghar mein bebasi ki tarah

to mere phul se bachchon ne mujh ko gher liya

ḳhud to aayā nahīñ aur iid chalī aa.ī hai

iid ke roz mujhe yuuñ na satā.e koī

KHud to aaya nahin aur id chali aai hai

id ke roz mujhe yun na satae koi

iid par masrūr haiñ donoñ miyāñ biivī bahut

ik ḳharīdārī se pahle ik ḳharīdārī ke ba.ad

id par masrur hain donon miyan biwi bahut

ek KHaridari se pahle ek KHaridari ke baad

chhup gayā eid kā chāñd nikal kar der huī par jaane kyoñ

nazreñ ab tak Tikī huī haiñ masjid ke mīnāroñ par

chhup gaya eid ka chand nikal kar der hui par jaane kyon

nazren ab tak Tiki hui hain masjid ke minaron par

kyā lutf-e-īd hai jo agar tum se duur hoñ

guzregā roz-e-īd tasavvur meñ aap ke

kya lutf-e-id hai jo agar tum se dur hon

guzrega roz-e-id tasawwur mein aap ke

ishq-e-mizhgāñ meñ hazāroñ ne gale kaTvā.e

īd-e-qurbāñ meñ jo vo le ke chhurī baiTh gayā

ishq-e-mizhgan mein hazaron ne gale kaTwae

id-e-qurban mein jo wo le ke chhuri baiTh gaya

shaam ke saa.e bālishtoñ se naape haiñ

chāñd ne kitnī der lagā dī aane meñ

sham ke sae baalishton se nape hain

chand ne kitni der laga di aane mein

mujh ko to iid meñ bhī farāġhat kahāñ milī

laḌtī rahī hai saas savere se shaam tak

mujh ko to id mein bhi faraghat kahan mili

laDti rahi hai sas sawere se sham tak

vo sub.h-e-īd kā manzar tire tasavvur meñ

vo dil meñ aa ke adā tere muskurāne kī

wo subh-e-id ka manzar tere tasawwur mein

wo dil mein aa ke ada tere muskurane ki