Sher on Dhoop

dhuup ne guzārish kī

ek buuñd bārish kī

dhup ne guzarish ki

ek bund barish ki

dopahar kī dhuup meñ mere bulāne ke liye

vo tirā koThe pe nañge paañv aanā yaad hai

dopahar ki dhup mein mere bulane ke liye

wo tera koThe pe nange panw aana yaad hai

phir yaad bahut aa.egī zulfoñ kī ghanī shaam

jab dhuup meñ saaya koī sar par na milegā

phir yaad bahut aaegi zulfon ki ghani sham

jab dhup mein saya koi sar par na milega

jaatī hai dhuup ujle paroñ ko sameT ke

zaḳhmoñ ko ab ginūñgā maiñ bistar pe leT ke

jati hai dhup ujle paron ko sameT ke

zaKHmon ko ab ginunga main bistar pe leT ke

ye dhuup to har ruḳh se pareshān karegī

kyuuñ DhūñD rahe ho kisī dīvār kā saaya

ye dhup to har ruKH se pareshan karegi

kyun DhunD rahe ho kisi diwar ka saya

maiñ bahut ḳhush thā kaḌī dhuup ke sannāTe meñ

kyuuñ tirī yaad kā bādal mire sar par aayā

main bahut KHush tha kaDi dhup ke sannaTe mein

kyun teri yaad ka baadal mere sar par aaya

koī tasvīr mukammal nahīñ hone paatī

dhuup dete haiñ to saayā nahīñ rahne dete

koi taswir mukammal nahin hone pati

dhup dete hain to saya nahin rahne dete

vo sardiyoñ kī dhuup kī tarah ġhurūb ho gayā

lipaT rahī hai yaad jism se lihāf kī tarah

wo sardiyon ki dhup ki tarah ghurub ho gaya

lipaT rahi hai yaad jism se lihaf ki tarah

kab dhuup chalī shaam Dhalī kis ko ḳhabar hai

ik umr se maiñ apne hī saa.e meñ khaḌā huuñ

kab dhup chali sham Dhali kis ko KHabar hai

ek umr se main apne hi sae mein khaDa hun

ham faqīroñ kā pairahan hai dhuup

aur ye raat apnī chādar hai

hum faqiron ka pairahan hai dhup

aur ye raat apni chadar hai

us ko bhī merī tarah apnī vafā par thā yaqīñ

vo bhī shāyad isī dhoke meñ milā thā mujh ko

us ko bhi meri tarah apni wafa par tha yaqin

wo bhi shayad isi dhoke mein mila tha mujh ko

ye intiqām hai yā ehtijāj hai kyā hai

ye log dhuup meñ kyuuñ haiñ shajar ke hote hue

ye intiqam hai ya ehtijaj hai kya hai

ye log dhup mein kyun hain shajar ke hote hue

tire aane kā din hai tere raste meñ bichhāne ko

chamaktī dhuup meñ saa.e ikaTThe kar rahā huuñ maiñ

tere aane ka din hai tere raste mein bichhane ko

chamakti dhup mein sae ikaTThe kar raha hun main

naqāb-e-ruḳh uThāyā jā rahā hai

vo niklī dhuup saayā jā rahā hai

naqab-e-ruKH uThaya ja raha hai

wo nikli dhup saya ja raha hai

'alvī' ye mo.ajiza hai december kī dhuup kā

saare makān shahr ke dho.e hue se haiñ

'alwi' ye moajiza hai december ki dhup ka

sare makan shahr ke dhoe hue se hain

jahāñ Daale the us ne dhuup meñ kapḌe sukhāne ko

Tapaktī haiñ abhī tak rassiyāñ āhista āhista

jahan Dale the us ne dhup mein kapDe sukhane ko

Tapakti hain abhi tak rassiyan aahista aahista

zarā ye dhuup Dhal jaa.e to un kā haal pūchheñge

yahāñ kuchh saa.e apne aap ko paikar batāte haiñ

zara ye dhup Dhal jae to un ka haal puchhenge

yahan kuchh sae apne aap ko paikar batate hain

mire saa.e meñ us kā naqsh-e-pā hai

baḌā ehsān mujh par dhuup kā hai

mere sae mein us ka naqsh-e-pa hai

baDa ehsan mujh par dhup ka hai

kaun jaane ki uḌtī huī dhuup bhī

kis taraf kaun sī manziloñ meñ ga.ī

kaun jaane ki uDti hui dhup bhi

kis taraf kaun si manzilon mein gai

saarā din tapte sūraj kī garmī meñ jalte rahe

ThanDī ThanDī havā phir chalī so raho so raho

sara din tapte suraj ki garmi mein jalte rahe

ThanDi ThanDi hawa phir chali so raho so raho

kuchh ab ke dhuup kā aisā mizāj bigḌā hai

daraḳht bhī to yahāñ sā.ebān māñgte haiñ

kuchh ab ke dhup ka aisa mizaj bigDa hai

daraKHt bhi to yahan saeban mangte hain

dīvār un ke ghar kī mirī dhuup le ga.ī

ye baat bhūlne meñ zamāna lagā mujhe

diwar un ke ghar ki meri dhup le gai

ye baat bhulne mein zamana laga mujhe

is dasht-e-suḳhan meñ koī kyā phuul khilā.e

chamkī jo zarā dhuup to jalne lage saa.e

is dasht-e-suKHan mein koi kya phul khilae

chamki jo zara dhup to jalne lage sae

kis ne sahrā meñ mire vāste rakkhī hai ye chhāñv

dhuup roke hai mirā chāhne vaalā kaisā

kis ne sahra mein mere waste rakkhi hai ye chhanw

dhup roke hai mera chahne wala kaisa

dhuup bolī ki maiñ ābā.ī vatan huuñ terā

maiñ ne phir sāya-e-dīvār ko zahmat nahīñ dī

dhup boli ki main aabai watan hun tera

main ne phir saya-e-diwar ko zahmat nahin di

ab shahr-e-ārzū meñ vo ra.anā.iyāñ kahāñ

haiñ gul-kade niDhāl baḌī tez dhuup hai

ab shahr-e-arzu mein wo ranaiyan kahan

hain gul-kade niDhaal baDi tez dhup hai

niiñd TuuTī hai to ehsās-e-ziyāñ bhī jaagā

dhuup dīvār se āñgan meñ utar aa.ī hai

nind TuTi hai to ehsas-e-ziyan bhi jaga

dhup diwar se aangan mein utar aai hai

bastī bastī parbat parbat vahshat kī hai dhuup 'ziyā'

chāroñ jānib vīrānī hai dil kā ik vīrāna kyā

basti basti parbat parbat wahshat ki hai dhup 'ziya'

chaaron jaanib virani hai dil ka ek virana kya

dhuup baḌhte hī judā ho jā.egā

sāya-e-dīvār bhī dīvār se

dhup baDhte hi juda ho jaega

saya-e-diwar bhi diwar se

kamre meñ aa ke baiTh ga.ī dhuup mez par

bachchoñ ne khilkhilā ke mujhe bhī jagā diyā

kamre mein aa ke baiTh gai dhup mez par

bachchon ne khilkhila ke mujhe bhi jaga diya

shāḳh par shab kī lage is chāñd meñ hai dhuup jo

vo mirī ā.ankhoñ kī hai so vo samar merā bhī hai

shaKH par shab ki lage is chand mein hai dhup jo

wo meri aaankhon ki hai so wo samar mera bhi hai

vo aur hoñge jo kār-e-havas pe zinda haiñ

maiñ us kī dhuup se saaya badal ke aayā huuñ

wo aur honge jo kar-e-hawas pe zinda hain

main us ki dhup se saya badal ke aaya hun

maiñ bārishoñ meñ bahut bhīgtā rahā 'ābid'

sulagtī dhuup meñ ik chhat bahut zarūrī hai

main barishon mein bahut bhigta raha 'abid'

sulagti dhup mein ek chhat bahut zaruri hai

dasht-e-vafā meñ jal ke na rah jaa.eñ apne dil

vo dhuup hai ki rañg haiñ kaale paḌe hue

dasht-e-wafa mein jal ke na rah jaen apne dil

wo dhup hai ki rang hain kale paDe hue

tārīkiyoñ ne ḳhud ko milāyā hai dhuup meñ

saaya jo shaam kā nazar aaya hai dhuup meñ

tarikiyon ne KHud ko milaya hai dhup mein

saya jo sham ka nazar aaya hai dhup mein

zāviya dhuup ne kuchh aisā banāyā hai ki ham

saa.e ko jism kī jumbish se judā dekhte haiñ

zawiya dhup ne kuchh aisa banaya hai ki hum

sae ko jism ki jumbish se juda dekhte hain

paanī ne jise dhuup kī miTTī se banāyā

vo dā.era-e-rabt bigaḌne ke liye thā

pani ne jise dhup ki miTTi se banaya

wo daera-e-rabt bigaDne ke liye tha

vo tapish hai ki jal uThe saa.e

dhuup rakkhī thī sā.ebān meñ kyā

wo tapish hai ki jal uThe sae

dhup rakkhi thi saeban mein kya

us zāviye se dekhiye ā.īna-e-hayāt

jis zāviye se maiñ ne lagāyā hai dhuup meñ

us zawiye se dekhiye aaina-e-hayat

jis zawiye se main ne lagaya hai dhup mein

hamāre muñh pe us ne aa.ine se dhuup tak pheñkī

abhī tak ham samajh kar us ko bachcha chhoḌ dete haiñ

hamare munh pe us ne aaine se dhup tak phenki

abhi tak hum samajh kar us ko bachcha chhoD dete hain

ham tire saa.e meñ kuchh der Thaharte kaise

ham ko jab dhuup se vahshat nahīñ karnī aa.ī

hum tere sae mein kuchh der Thaharte kaise

hum ko jab dhup se wahshat nahin karni aai

dhuup mujh ko jo liye phirtī hai saa.e saa.e

hai to āvāra magar zehn meñ ghar rakhtī hai

dhup mujh ko jo liye phirti hai sae sae

hai to aawara magar zehn mein ghar rakhti hai