Sher on Welcome

vo aa.e ghar meñ hamāre ḳhudā kī qudrat hai

kabhī ham un ko kabhī apne ghar ko dekhte haiñ

wo aae ghar mein hamare KHuda ki qudrat hai

kabhi hum un ko kabhi apne ghar ko dekhte hain

guloñ meñ rañg bhare bād-e-nau-bahār chale

chale bhī aao ki gulshan kā kārobār chale

gulon mein rang bhare baad-e-nau-bahaar chale

chale bhi aao ki gulshan ka karobar chale

tum aa ga.e ho to kuchh chāñdnī sī bāteñ hoñ

zamīñ pe chāñd kahāñ roz roz utartā hai

tum aa gae ho to kuchh chandni si baaten hon

zamin pe chand kahan roz roz utarta hai

sau chāñd bhī chamkeñge to kyā baat banegī

tum aa.e to is raat kī auqāt banegī

sau chand bhi chamkenge to kya baat banegi

tum aae to is raat ki auqat banegi

phuul gul shams o qamar saare hī the

par hameñ un meñ tumhīñ bhaa.e bahut

phul gul shams o qamar sare hi the

par hamein un mein tumhin bhae bahut

chāñd bhī hairān dariyā bhī pareshānī meñ hai

aks kis kā hai ki itnī raushnī paanī meñ hai

chand bhi hairan dariya bhi pareshani mein hai

aks kis ka hai ki itni raushni pani mein hai

us ne va.ada kiyā hai aane kā

rañg dekho ġharīb ḳhāne kā

us ne wada kiya hai aane ka

rang dekho gharib KHane ka

tumhāre saath ye mausam farishtoñ jaisā hai

tumhāre ba.ad ye mausam bahut satā.egā

tumhaare sath ye mausam farishton jaisa hai

tumhaare baad ye mausam bahut sataega

der lagī aane meñ tum ko shukr hai phir bhī aa.e to

aas ne dil kā saath na chhoḌā vaise ham ghabrā.e to

der lagi aane mein tum ko shukr hai phir bhi aae to

aas ne dil ka sath na chhoDa waise hum ghabrae to

mil kar tapāk se na hameñ kījiye udaas

ḳhātir na kījiye kabhī ham bhī yahāñ ke the

mil kar tapak se na hamein kijiye udas

KHatir na kijiye kabhi hum bhi yahan ke the

aap aa.e haiñ so ab ghar meñ ujālā hai bahut

kahiye jaltī rahe yā sham.a bujhā dī jaa.e

aap aae hain so ab ghar mein ujala hai bahut

kahiye jalti rahe ya shama bujha di jae

tum aa ga.e ho to ab ā.īna bhī dekheñge

abhī abhī to nigāhoñ meñ raushnī huī hai

tum aa gae ho to ab aaina bhi dekhenge

abhi abhi to nigahon mein raushni hui hai

har galī achchhī lagī har ek ghar achchhā lagā

vo jo aayā shahr meñ to shahr bhar achchhā lagā

har gali achchhi lagi har ek ghar achchha laga

wo jo aaya shahr mein to shahr bhar achchha laga

shukriya terā tire aane se raunaq to baḌhī

varna ye mahfil-e-jazbāt adhūrī rahtī

shukriya tera tere aane se raunaq to baDhi

warna ye mahfil-e-jazbaat adhuri rahti

jis bazm meñ sāġhar ho na sahbā ho na ḳhum ho

rindoñ ko tasallī hai ki us bazm meñ tum ho

jis bazm mein saghar ho na sahba ho na KHum ho

rindon ko tasalli hai ki us bazm mein tum ho

ye kis zohra-jabīñ kī anjuman meñ aamad aamad hai

bichhāyā hai qamar ne chāñdnī kā farsh mahfil meñ

ye kis zohra-jabin ki anjuman mein aamad aamad hai

bichhaya hai qamar ne chandni ka farsh mahfil mein

aap aa.e to bahāroñ ne luTā.ī ḳhushbū

phuul to phuul the kāñToñ se bhī aa.ī ḳhushbū

aap aae to bahaaron ne luTai KHushbu

phul to phul the kanTon se bhi aai KHushbu

aamad pe terī itr o charāġh o subū na hoñ

itnā bhī būd-o-bāsh ko saada nahīñ kiyā

aamad pe teri itr o charagh o subu na hon

itna bhi bud-o-bash ko sada nahin kiya

mahfil meñ chaar chāñd lagāne ke bāvajūd

jab tak na aap aa.e ujālā na ho sakā

mahfil mein chaar chand lagane ke bawajud

jab tak na aap aae ujala na ho saka

har tarah kī be-sar-o-sāmāniyoñ ke bāvajūd

aaj vo aayā to mujh ko apnā ghar achchhā lagā

har tarah ki be-sar-o-samaniyon ke bawajud

aaj wo aaya to mujh ko apna ghar achchha laga

tum aa ga.e ho ḳhudā kā subūt hai ye bhī

qasam ḳhudā kī abhī maiñ ne tum ko sochā thā

tum aa gae ho KHuda ka subut hai ye bhi

qasam KHuda ki abhi main ne tum ko socha tha

bajā.e siine ke āñkhoñ meñ dil dhaḌaktā hai

ye intizār ke lamhe ajiib hote haiñ

bajae sine ke aankhon mein dil dhaDakta hai

ye intizar ke lamhe ajib hote hain

ḳhush-āmdīd vo aayā hamārī chaukhaT par

bahār jis ke qadam kā tavāf kartī hai

KHush-amdid wo aaya hamari chaukhaT par

bahaar jis ke qadam ka tawaf karti hai

itne din ke baad tū aayā hai aaj

sochtā huuñ kis tarah tujh se milūñ

itne din ke baad tu aaya hai aaj

sochta hun kis tarah tujh se milun

bujhte hue charāġh farozāñ kareñge ham

tum aaoge to jashn-e-charāġhāñ kareñge ham

bujhte hue charagh farozan karenge hum

tum aaoge to jashn-e-charaghan karenge hum

ye intizār kī ghaḌiyāñ ye shab kā sannāTā

is ek shab meñ bhare haiñ hazār saal ke din

ye intizar ki ghaDiyan ye shab ka sannaTa

is ek shab mein bhare hain hazar sal ke din

raqs-e-mai tez karo saaz kī lai tez karo

sū-e-mai-ḳhāna safīrān-e-haram aate haiñ

raqs-e-mai tez karo saz ki lai tez karo

su-e-mai-KHana safiran-e-haram aate hain

muddatoñ ba.ad kabhī ai nazar aane vaale

iid kā chāñd na dekhā tirī sūrat dekhī

muddaton baad kabhi ai nazar aane wale

id ka chand na dekha teri surat dekhi

fareb-e-jalva kahāñ tak ba-rū-e-kār rahe

naqāb uThāo ki kuchh din zarā bahār rahe

fareb-e-jalwa kahan tak ba-ru-e-kar rahe

naqab uThao ki kuchh din zara bahaar rahe

raunaq-e-bazm nahīñ thā koī tujh se pahle

raunaq-e-bazm tire ba.ad nahīñ hai koī

raunaq-e-bazm nahin tha koi tujh se pahle

raunaq-e-bazm tere baad nahin hai koi

suntā huuñ maiñ ki aaj vo tashrīf lā.eñge

allāh sach kare kahīñ jhūTī ḳhabar na ho

sunta hun main ki aaj wo tashrif laenge

allah sach kare kahin jhuTi KHabar na ho

maiñ ne āvāz tumheñ dī hai baḌe naaz ke saath

tum bhī āvāz milā do mirī āvāz ke saath

main ne aawaz tumhein di hai baDe naz ke sath

tum bhi aawaz mila do meri aawaz ke sath

tum aa ga.e to chamakne lagī haiñ dīvāreñ

abhī abhī to yahāñ par baḌā añdherā thā

tum aa gae to chamakne lagi hain diwaren

abhi abhi to yahan par baDa andhera tha

ye aur baat ki raste bhī ho ga.e raushan

diye to ham ne tire vāste jalā.e the

ye aur baat ki raste bhi ho gae raushan

diye to hum ne tere waste jalae the

ye zulf-bar-dosh kaun aayā ye kis kī aahaT se gul khile haiñ

mahak rahī hai fazā-e-hastī tamām aalam bahār sā hai

ye zulf-bar-dosh kaun aaya ye kis ki aahaT se gul khile hain

mahak rahi hai faza-e-hasti tamam aalam bahaar sa hai

abhī to us kā koī tazkira huā bhī nahīñ

abhī se bazm meñ ḳhushbū kā raqs jaarī hai

abhi to us ka koi tazkira hua bhi nahin

abhi se bazm mein KHushbu ka raqs jari hai

sehn-e-chaman ko apnī bahāroñ pe naaz thā

vo aa ga.e to saarī bahāroñ pe chhā ga.e

sehn-e-chaman ko apni bahaaron pe naz tha

wo aa gae to sari bahaaron pe chha gae

muntazir chashm bhī hai qalb bhī hai jaan bhī hai

aap ke aane kī hasrat bhī hai armān bhī hai

muntazir chashm bhi hai qalb bhi hai jaan bhi hai

aap ke aane ki hasrat bhi hai arman bhi hai

aayā ye kaun sāya-e-zulf-e-darāz meñ

peshāni-e-sahar kā ujālā liye hue

aaya ye kaun saya-e-zulf-e-daraaz mein

peshani-e-sahar ka ujala liye hue

bhare haiñ tujh meñ vo lākhoñ hunar ai majma-e-ḳhūbī

mulāqātī tirā goyā bharī mahfil se miltā hai

bhare hain tujh mein wo lakhon hunar ai majma-e-KHubi

mulaqati tera goya bhari mahfil se milta hai

fazā-e-dil pe kahīñ chhā na jaa.e yaas kā rañg

kahāñ ho tum ki badalne lagā hai ghaas kā rañg

faza-e-dil pe kahin chha na jae yas ka rang

kahan ho tum ki badalne laga hai ghas ka rang

saaqī sharāb jām-o-subū mutrib o bahār

sab aa ga.e bas aap ke aane kī der hai

saqi sharab jam-o-subu mutrib o bahaar

sab aa gae bas aap ke aane ki der hai

daaġh ik aadmī hai garmā-garm

ḳhush bahut hoñge jab mileñge aap

dagh ek aadmi hai garma-garm

KHush bahut honge jab milenge aap

tum jo aa.e ho to shakl-e-dar-o-dīvār hai aur

kitnī rañgīn mirī shaam huī jaatī hai

tum jo aae ho to shakl-e-dar-o-diwar hai aur

kitni rangin meri sham hui jati hai

ham ne ba-sad ḳhulūs pukārā hai aap ko

ab dekhnā hai kitnī kashish hai ḳhulūs meñ

hum ne ba-sad KHulus pukara hai aap ko

ab dekhna hai kitni kashish hai KHulus mein

yūñhī har shaam agar aap ko ham yaad raheñ

sohbateñ garm raheñ mahfileñ ābād raheñ

yunhi har sham agar aap ko hum yaad rahen

sohbaten garm rahen mahfilen aabaad rahen

shajar ne lahlahā kar aur havā ne chuum kar mujh ko

tirī aamad ke afsāne sunā.e jhuum kar mujh ko

shajar ne lahlaha kar aur hawa ne chum kar mujh ko

teri aamad ke afsane sunae jhum kar mujh ko

aap agar yūñhī charāġhoñ ko jalāte hue aa.eñ

ham bhī har shaam na.ī bazm sajāte hue aa.eñ

aap agar yunhi charaghon ko jalate hue aaen

hum bhi har sham nai bazm sajate hue aaen

hamārī zindagī-o-maut kī ho tum raunaq

charāġh-e-bazm bhī ho aur charāġh-e-fan bhī ho

hamari zindagi-o-maut ki ho tum raunaq

charagh-e-bazm bhi ho aur charagh-e-fan bhi ho

kaun ho saktā hai aane vaalā

ek āvāz sī aa.ī thī abhī

kaun ho sakta hai aane wala

ek aawaz si aai thi abhi