Sher on Raushni

chāñd bhī hairān dariyā bhī pareshānī meñ hai

aks kis kā hai ki itnī raushnī paanī meñ hai

chand bhi hairan dariya bhi pareshani mein hai

aks kis ka hai ki itni raushni pani mein hai

añdheroñ ko nikālā jā rahā hai

magar ghar se ujālā jā rahā hai

andheron ko nikala ja raha hai

magar ghar se ujala ja raha hai

nahīñ hai mere muqaddar meñ raushnī na sahī

ye khiḌkī kholo zarā sub.h kī havā hī lage

nahin hai mere muqaddar mein raushni na sahi

ye khiDki kholo zara subh ki hawa hi lage

bahut sukūn se rahte the ham añdhere meñ

fasād paidā huā raushnī ke aane se

bahut sukun se rahte the hum andhere mein

fasad paida hua raushni ke aane se

ulfat kā hai maza ki 'asar' ġham bhī saath hoñ

tārīkiyāñ bhī saath raheñ raushnī ke saath

ulfat ka hai maza ki 'asar' gham bhi sath hon

tarikiyan bhi sath rahen raushni ke sath

raushnī phailī to sab kā rañg kaalā ho gayā

kuchh diye aise jale har-sū añdherā ho gayā

raushni phaili to sab ka rang kala ho gaya

kuchh diye aise jale har-su andhera ho gaya

raushan-dān se dhuup kā TukḌā aa kar mere paas girā

aur phir sūraj ne koshish kī mujh se aañkh milāne kī

raushan-dan se dhup ka TukDa aa kar mere pas gira

aur phir suraj ne koshish ki mujh se aankh milane ki

ghar se bāhar nahīñ niklā jaatā

raushnī yaad dilātī hai tirī

ghar se bahar nahin nikla jata

raushni yaad dilati hai teri

raushnī mujh se gurezāñ hai to shikva bhī nahīñ

mere ġham-ḳhāne meñ kuchh aisā añdherā bhī nahīñ

raushni mujh se gurezan hai to shikwa bhi nahin

mere gham-KHane mein kuchh aisa andhera bhi nahin

ḳhud hī parvāne jal ga.e varna

sham.a jaltī hai raushnī ke liye

KHud hi parwane jal gae warna

shama jalti hai raushni ke liye

dalīl-e-tābish-e-īmāñ hai kufr kā ehsās

charāġh shaam se pahle jalā nahīñ karte

dalil-e-tabish-e-iman hai kufr ka ehsas

charagh sham se pahle jala nahin karte

raushnī meñ apnī shaḳhsiyat pe jab bhī sochnā

apne qad ko apne saa.e se bhī kam-tar dekhnā

raushni mein apni shaKHsiyat pe jab bhi sochna

apne qad ko apne sae se bhi kam-tar dekhna

kahīñ koī charāġh jaltā hai

kuchh na kuchh raushnī rahegī abhī

kahin koi charagh jalta hai

kuchh na kuchh raushni rahegi abhi

numūd-e-sub.h se shab kī vo tīrgī to ga.ī

ye aur baat ki sūraj meñ raushnī kam hai

numud-e-subh se shab ki wo tirgi to gai

ye aur baat ki suraj mein raushni kam hai

dete nahīñ sujhā.ī jo duniyā ke ḳhatt-o-ḳhāl

aa.e haiñ tīrgī meñ magar raushnī se ham

dete nahin sujhai jo duniya ke KHatt-o-KHal

aae hain tirgi mein magar raushni se hum

raushnī jab se mujhe chhoḌ ga.ī

sham.a rotī hai sirhāne mere

raushni jab se mujhe chhoD gai

shama roti hai sirhane mere

na.ī sahar ke hasīn sūraj tujhe ġharīboñ se vāsta kyā

jahāñ ujālā hai sīm-o-zar kā vahīñ tirī raushnī milegī

nai sahar ke hasin suraj tujhe gharibon se wasta kya

jahan ujala hai sim-o-zar ka wahin teri raushni milegi

manzaroñ se bahalnā zarūrī nahīñ ghar se bāhar nikalnā zarūrī nahīñ

dil ko raushan karo raushanī ne kahā raushnī ke liye ek taaza ġhazal

manzaron se bahalna zaruri nahin ghar se bahar nikalna zaruri nahin

dil ko raushan karo raushani ne kaha raushni ke liye ek taza ghazal

ek surūd-e-raushanī nīma-e-shab kā ḳhvāb thā

ek ḳhamosh tīrgī sāneha-āshnā bhī thī

ek surud-e-raushani nima-e-shab ka KHwab tha

ek KHamosh tirgi saneha-ashna bhi thi

anginat safīnoñ meñ diip jagmagāte haiñ

raat ne luTāyā hai rañg-o-nūr paanī par

anginat safinon mein dip jagmagate hain

raat ne luTaya hai rang-o-nur pani par

ghuTan to dil kī rahī qasr-e-marmarīñ meñ bhī

na raushnī se huā kuchh na kuchh havā se huā

ghuTan to dil ki rahi qasr-e-marmarin mein bhi

na raushni se hua kuchh na kuchh hawa se hua

savāl ye hai raushnī vahāñ pe rok dī ga.ī

jahāñ pe har kisī ke haath meñ nayā charāġh thā

sawal ye hai raushni wahan pe rok di gai

jahan pe har kisi ke hath mein naya charagh tha

dalīl-e-tābish-e-īmāñ hai kufr kā ehsās

charāġh shaam se pahle jalā nahīñ karte

dalil-e-tabish-e-iman hai kufr ka ehsas

charagh sham se pahle jala nahin karte

ek ujāle ne mujhe jaltā huā dekh liyā

varna maiñ ab bhī usī taab meñ dekhā jaatā

ek ujale ne mujhe jalta hua dekh liya

warna main ab bhi usi tab mein dekha jata

raushnī kī agar alāmat hai

raakh uḌtī hai kyuuñ sharāre par

raushni ki agar alamat hai

rakh uDti hai kyun sharare par

'ajīb shaḳhs thā apnā pata batāyā nahīñ

diyā jalāyā magar raushnī meñ aayā nahīñ

'ajib shaKHs tha apna pata bataya nahin

diya jalaya magar raushni mein aaya nahin