Sher on Dard

dushman-e-jāñ hī sahī saath to ik umr kā hai

dil se ab dard kī ruḳhsat nahīñ dekhī jaatī

dushman-e-jaan hi sahi sath to ek umr ka hai

dil se ab dard ki ruKHsat nahin dekhi jati

dard-e-dil se uThā nahīñ jaatā

jab se vo haath rakh ga.e dil par

dard-e-dil se uTha nahin jata

jab se wo hath rakh gae dil par

baḌī mushkil se aa ke baiThā huuñ

dard uThte haiñ mat uThā.eñ mujhe

baDi mushkil se aa ke baiTha hun

dard uThte hain mat uThaen mujhe

haath phailā.ūñ maiñ īsā-nafasoñ ke aage

dard pahlū meñ mire hai magar itnā bhī nahīñ

hath phailaun main isa-nafason ke aage

dard pahlu mein mere hai magar itna bhi nahin

mere ham-nafas mere ham-navā mujhe dost ban ke daġhā na de

maiñ huuñ dard-e-ishq se jāñ-ba-lab mujhe zindagī kī duā na de

mere ham-nafas mere ham-nawa mujhe dost ban ke dagha na de

main hun dard-e-ishq se jaan-ba-lab mujhe zindagi ki dua na de

be-nām sā ye dard Thahar kyuuñ nahīñ jaatā

jo biit gayā hai vo guzar kyuuñ nahīñ jaatā

be-nam sa ye dard Thahar kyun nahin jata

jo bit gaya hai wo guzar kyun nahin jata

dostoñ ko bhī mile dard kī daulat yā rab

merā apnā hī bhalā ho mujhe manzūr nahīñ

doston ko bhi mile dard ki daulat ya rab

mera apna hi bhala ho mujhe manzur nahin

tabīboñ kī tavajjoh se maraz hone lagā duunā

davā is dard kī batlā dil-e-āgāh kyā kiije

tabibon ki tawajjoh se maraz hone laga duna

dawa is dard ki batla dil-e-agah kya kije

ab mirī baat jo maane to na le ishq kā naam

tū ne dukh ai dil-e-nākām bahut sā paayā

ab meri baat jo mane to na le ishq ka nam

tu ne dukh ai dil-e-nakaam bahut sa paya

ḳhirad DhūñDhtī rah ga.ī vajah-e-ġham

mazā ġham kā dard āshnā le gayā

KHirad DhunDhti rah gai wajah-e-gham

maza gham ka dard aashna le gaya

ab to ḳhushī kā ġham hai na ġham kī ḳhushī mujhe

be-his banā chukī hai bahut zindagī mujhe

ab to KHushi ka gham hai na gham ki KHushi mujhe

be-his bana chuki hai bahut zindagi mujhe

zindagī kyā kisī muflis kī qabā hai jis meñ

har ghaḌī dard ke paivand lage jaate haiñ

zindagi kya kisi muflis ki qaba hai jis mein

har ghaDi dard ke paiwand lage jate hain

lākhoñ hī baar bujh ke jalā dard kā diyā

so ek baar aur bujhā phir jalā nahīñ

lakhon hi bar bujh ke jala dard ka diya

so ek bar aur bujha phir jala nahin

dard aisā hai ki jī chāhe hai zinda rahiye

zindagī aisī ki mar jaane ko jī chāhe hai

dard aisa hai ki ji chahe hai zinda rahiye

zindagi aisi ki mar jaane ko ji chahe hai

dil par choT paḌī hai tab to aah laboñ tak aa.ī hai

yuuñ hī chhan se bol uThnā to shīshe kā dastūr nahīñ

dil par choT paDi hai tab to aah labon tak aai hai

yun hi chhan se bol uThna to shishe ka dastur nahin

kuchh aise zaḳhm bhī dar-parda ham ne khaa.e haiñ

jo ham ne apne rafīqoñ se bhī chhupā.e haiñ

kuchh aise zaKHm bhi dar-parda hum ne khae hain

jo hum ne apne rafiqon se bhi chhupae hain

aisā na ho ye dard bane dard-e-lā-davā

aisā na ho ki tum bhī mudāvā na kar sako

aisa na ho ye dard bane dard-e-la-dawa

aisa na ho ki tum bhi mudawa na kar sako

tumhārī yaad meñ duniyā ko huuñ bhulā.e hue

tumhāre dard ko siine se huuñ lagā.e hue

tumhaari yaad mein duniya ko hun bhulae hue

tumhaare dard ko sine se hun lagae hue

dard-e-dil kī unheñ ḳhabar kyā ho

jāntā kaun hai parā.ī choT

dard-e-dil ki unhen KHabar kya ho

jaanta kaun hai parai choT

haath rakh rakh ke vo siine pe kisī kā kahnā

dil se dard uThtā hai pahle ki jigar se pahle

hath rakh rakh ke wo sine pe kisi ka kahna

dil se dard uThta hai pahle ki jigar se pahle

agar dard-e-mohabbat se na insāñ āshnā hotā

na kuchh marne kā ġham hotā na jiine kā mazā hotā

agar dard-e-mohabbat se na insan aashna hota

na kuchh marne ka gham hota na jine ka maza hota

kabhī sahar to kabhī shaam le gayā mujh se

tumhārā dard ka.ī kaam le gayā mujh se

kabhi sahar to kabhi sham le gaya mujh se

tumhaara dard kai kaam le gaya mujh se

talḳhiyāñ is meñ bahut kuchh haiñ mazā kuchh bhī nahīñ

zindagī dard-e-mohabbat ke sivā kuchh bhī nahīñ

talKHiyan is mein bahut kuchh hain maza kuchh bhi nahin

zindagi dard-e-mohabbat ke siwa kuchh bhi nahin

ab mirā dard mirī jaan huā jaatā hai

ai mire chāragaro ab mujhe achchhā na karo

ab mera dard meri jaan hua jata hai

ai mere chaaragaro ab mujhe achchha na karo

chāñd tanhā hai āsmāñ tanhā

dil milā hai kahāñ kahāñ tanhā

chand tanha hai aasman tanha

dil mila hai kahan kahan tanha

raas aane lagī duniyā to kahā dil ne ki jā

ab tujhe dard kī daulat nahīñ milne vaalī

ras aane lagi duniya to kaha dil ne ki ja

ab tujhe dard ki daulat nahin milne wali

rah ga.ī zindagī dard ban ke

dard dil meñ chhupā.e chhupā.e

rah gai zindagi dard ban ke

dard dil mein chhupae chhupae

ik ye bhī to andāz-e-ilāj-e-ġham-e-jāñ hai

ai chāragaro dard baḌhā kyuuñ nahīñ dete

ek ye bhi to andaz-e-ilaj-e-gham-e-jaan hai

ai chaaragaro dard baDha kyun nahin dete

mire laboñ kā tabassum to sab ne dekh liyā

jo dil pe biit rahī hai vo koī kyā jaane

mere labon ka tabassum to sab ne dekh liya

jo dil pe bit rahi hai wo koi kya jaane

ishq us dard kā nahīñ qaa.il

jo musībat kī intihā na huā

ishq us dard ka nahin qail

jo musibat ki intiha na hua

ġham se bahal rahe haiñ aap aap bahut ajiib haiñ

dard meñ Dhal rahe haiñ aap aap bahut ajiib haiñ

gham se bahal rahe hain aap aap bahut ajib hain

dard mein Dhal rahe hain aap aap bahut ajib hain

is meñ koī mirā sharīk nahīñ

merā dukh aah sirf merā hai

is mein koi mera sharik nahin

mera dukh aah sirf mera hai

dard merāj ko pahuñchtā hai

jab koī tarjumāñ nahīñ miltā

dard meraj ko pahunchta hai

jab koi tarjuman nahin milta

diida o dil ne dard kī apne baat bhī kī to kis se kī

vo to dard kā baanī Thahrā vo kyā dard baTā.egā

dida o dil ne dard ki apne baat bhi ki to kis se ki

wo to dard ka bani Thahra wo kya dard baTaega

kis liye kam nahīñ hai dard-e-firāq

ab to vo dhyān se utar bhī ga.e

kis liye kam nahin hai dard-e-firaq

ab to wo dhyan se utar bhi gae

ab ke safar meñ dard ke pahlū ajiib haiñ

jo log ham-ḳhayāl na the ham-safar hue

ab ke safar mein dard ke pahlu ajib hain

jo log ham-KHayal na the ham-safar hue

aan ke is bīmār ko dekhe tujh ko bhī taufīq huī

lab par us ke naam thā terā jab bhī dard shadīd huā

aan ke is bimar ko dekhe tujh ko bhi taufiq hui

lab par us ke nam tha tera jab bhi dard shadid hua

yaaro na.e mausam ne ye ehsān kiye haiñ

ab yaad mujhe dard purāne nahīñ aate

yaro nae mausam ne ye ehsan kiye hain

ab yaad mujhe dard purane nahin aate

shab ke sannāTe meñ ye kis kā lahū gaatā hai

sarhad-e-dard se ye kis kī sadā aatī hai

shab ke sannaTe mein ye kis ka lahu gata hai

sarhad-e-dard se ye kis ki sada aati hai

dard biktā nahīñ bāzār-e-jahāñ meñ varna

jaan tak bech ke letā maiñ tire dil ke liye

dard bikta nahin bazar-e-jahan mein warna

jaan tak bech ke leta main tere dil ke liye

dil hijr ke dard se bojhal hai ab aan milo to behtar ho

is baat se ham ko kyā matlab ye kaise ho ye kyūñkar ho

dil hijr ke dard se bojhal hai ab aan milo to behtar ho

is baat se hum ko kya matlab ye kaise ho ye kyunkar ho

dil sarāpā dard thā vo ibtidā-e-ishq thī

intihā ye hai ki 'fānī' dard ab dil ho gayā

dil sarapa dard tha wo ibtida-e-ishq thi

intiha ye hai ki 'fani' dard ab dil ho gaya

kuchh dard kī shiddat hai kuchh pās-e-mohabbat hai

ham aah to karte haiñ fariyād nahīñ karte

kuchh dard ki shiddat hai kuchh pas-e-mohabbat hai

hum aah to karte hain fariyaad nahin karte

dard tū mere paas se marte talak na jā.iyo

tāqat-e-sabr ho na ho tāb-o-qarār ho na ho

dard tu mere pas se marte talak na jaiyo

taqat-e-sabr ho na ho tab-o-qarar ho na ho

ulfat ke badle un se milā dard-e-lā-ilāj

itnā baḌhe hai dard maiñ jitnī davā karūñ

ulfat ke badle un se mila dard-e-la-ilaj

itna baDhe hai dard main jitni dawa karun

dard-e-dil pahle to vo sunte na the

ab ye kahte haiñ zarā āvāz se

dard-e-dil pahle to wo sunte na the

ab ye kahte hain zara aawaz se

'firāq' dauḌ ga.ī ruuh sī zamāne meñ

kahāñ kā dard bharā thā mire fasāne meñ

'firaq' dauD gai ruh si zamane mein

kahan ka dard bhara tha mere fasane mein

tez hai aaj dard-e-dil saaqī

talḳhī-e-mai ko tez-tar kar de

tez hai aaj dard-e-dil saqi

talKHi-e-mai ko tez-tar kar de

dukh de yā rusvā.ī de

ġham ko mire gahrā.ī de

dukh de ya ruswai de

gham ko mere gahrai de

nāvak-e-nāz se mushkil hai bachānā dil kā

dard uTh uTh ke batātā hai Thikānā dil kā

nawak-e-naz se mushkil hai bachana dil ka

dard uTh uTh ke batata hai Thikana dil ka