ik tishna-lab ne ba.Dh ke jo saaGar uThaa liyaa har bul-havas ne mai-kada sar par uThaa liyaa maujo.n ke ittihaad kaa aalam na puuchhiye qatra uThaa aur uTh ke samundar uThaa liyaa tartiib de rahaa thaa mai.n fahrist-e-dushmanaan yaaro.n ne itnii baat pe KHanjar uThaa liyaa mai.n aisaa bad-nasiib ki jis ne azal ke roz phe.nkaa hu.aa kisii kaa muqaddar uThaa liyaa

jab safiina mauj se Takraa gayaa naaKHudaa ko bhii KHudaa yaad aa gayaa

Gam har ik aa.nkh ko chhalkaa.e zaruurii to nahii.n abr uThe aur baras jaa.e zaruurii to nahii.n barq sayyaad ke ghar par bhii to gir saktii hai aashiyaano.n pe hii lahraa.e zaruurii to nahii.n raahbar raah musaafir ko dikhaa detaa hai vahii manzil pe pahu.nch jaa.e zaruurii to nahii.n nok-e-har-KHaar KHatarnaak to hotii hai magar sab ke daaman se ulajh jaa.e zaruurii to nahii.n Gunche murjhaate hai.n aur shaaKH se gir jaate hai.n har kalii phuul hii ban jaa.e zaruurii to nahii.n

jab safiina mauj se Takraa gayaa naaKHudaa ko bhii KHudaa yaad aa gayaa

tire va.ado.n pe kahaa.n tak miraa dil fareb khaa.e ko.ii aisaa kar bahaana mirii aas TuuT jaa.e

duniyaa-e-tasavvur ham aabaad nahii.n karte yaad aate ho tum KHud hii ham yaad nahii.n karte