Sher on Saqi

piitā huuñ jitnī utnī hī baḌhtī hai tishnagī

saaqī ne jaise pyaas milā dī sharāb meñ

pita hun jitni utni hi baDhti hai tishnagi

saqi ne jaise pyas mila di sharab mein

ijāzat ho to maiñ tasdīq kar luuñ terī zulfoñ se

sunā hai zindagī ik ḳhūb-sūrat daam hai saaqī

ijazat ho to main tasdiq kar lun teri zulfon se

suna hai zindagi ek KHub-surat dam hai saqi

baat saaqī kī na Taalī jā.egī

kar ke tauba toḌ Daalī jā.egī

baat saqi ki na Tali jaegi

kar ke tauba toD Dali jaegi

saaqī zarā nigāh milā kar to dekhnā

kambaḳht hosh meñ to nahīñ aa gayā huuñ maiñ

saqi zara nigah mila kar to dekhna

kambaKHt hosh mein to nahin aa gaya hun main

abhī raat kuchh hai baaqī na uThā naqāb saaqī

tirā rind girte girte kahīñ phir sambhal na jaa.e

abhi raat kuchh hai baqi na uTha naqab saqi

tera rind girte girte kahin phir sambhal na jae

āñkheñ saaqī kī jab se dekhī haiñ

ham se do ghūñT pī nahīñ jaatī

aankhen saqi ki jab se dekhi hain

hum se do ghunT pi nahin jati

tez hai aaj dard-e-dil saaqī

talḳhī-e-mai ko tez-tar kar de

tez hai aaj dard-e-dil saqi

talKHi-e-mai ko tez-tar kar de

kisī kī bazm ke hālāt ne samjhā diyā mujh ko

ki jab saaqī nahīñ apnā to mai apnī na jaam apnā

kisi ki bazm ke haalat ne samjha diya mujh ko

ki jab saqi nahin apna to mai apni na jam apna

azaañ ho rahī hai pilā jald saaqī

ibādat kareñ aaj maḳhmūr ho kar

azan ho rahi hai pila jald saqi

ibaadat karen aaj maKHmur ho kar

koī samjhā.e ki kyā rang hai maiḳhāne kā

aañkh saaqī kī uThe naam ho paimāne kā

koi samjhae ki kya rang hai maiKHane ka

aankh saqi ki uThe nam ho paimane ka

aatā hai jī meñ sāqi-e-mah-vash pe baar baar

lab chuum luuñ tirā lab-e-paimāna chhoḌ kar

aata hai ji mein saqi-e-mah-wash pe bar bar

lab chum lun tera lab-e-paimana chhoD kar

ye dushmanī hai saaqī yā dostī hai saaqī

auroñ ko jaam denā mujh ko dikhā dikhā ke

ye dushmani hai saqi ya dosti hai saqi

auron ko jam dena mujh ko dikha dikha ke

zabān-e-hosh se ye kufr sarzad ho nahīñ saktā

maiñ kaise bin piye le luuñ ḳhudā kā naam ai saaqī

zaban-e-hosh se ye kufr sarzad ho nahin sakta

main kaise bin piye le lun KHuda ka nam ai saqi

sharāb band ho saaqī ke bas kī baat nahīñ

tamām shahar hai do chaar das kī baat nahīñ

sharab band ho saqi ke bas ki baat nahin

tamam shahar hai do chaar das ki baat nahin

fareb-e-sāqi-e-mahfil na pūchhiye 'majrūh'

sharāb ek hai badle hue haiñ paimāne

fareb-e-saqi-e-mahfil na puchhiye 'majruh'

sharab ek hai badle hue hain paimane

saaqī tujhe ik thoḌī sī taklīf to hogī

sāġhar ko zarā thaam maiñ kuchh soch rahā huuñ

saqi tujhe ek thoDi si taklif to hogi

saghar ko zara tham main kuchh soch raha hun

ruuh kis mast kī pyāsī ga.ī mai-ḳhāne se

mai uḌī jaatī hai saaqī tire paimāne se

ruh kis mast ki pyasi gai mai-KHane se

mai uDi jati hai saqi tere paimane se

saaqī mire bhī dil kī taraf Tuk nigāh kar

lab-tishna terī bazm meñ ye jaam rah gayā

saqi mere bhi dil ki taraf Tuk nigah kar

lab-tishna teri bazm mein ye jam rah gaya

asar na pūchhiye saaqī kī mast āñkhoñ kā

ye dekhiye ki koī hoshyār baaqī hai

asar na puchhiye saqi ki mast aankhon ka

ye dekhiye ki koi hoshyar baqi hai

chashm-e-sāqī mujhe har gaam pe yaad aatī hai

rāstā bhuul na jā.ūñ kahīñ maiḳhāne kā

chashm-e-saqi mujhe har gam pe yaad aati hai

rasta bhul na jaun kahin maiKHane ka

vaa.iz kī āñkheñ khul ga.iiñ piite hī sāqiyā

ye jām-e-mai thā yā koī dariyā-e-nūr thā

waiz ki aankhen khul gain pite hi saqiya

ye jam-e-mai tha ya koi dariya-e-nur tha

dard-e-sar hai ḳhumār se mujh ko

jald le kar sharāb aa saaqī

dard-e-sar hai KHumar se mujh ko

jald le kar sharab aa saqi

saaqī ne nigāhoñ se pilā dī hai ġhazab kī

rindān-e-azal dekhiye kab hosh meñ aa.eñ

saqi ne nigahon se pila di hai ghazab ki

rindan-e-azal dekhiye kab hosh mein aaen

mast karnā hai to ḳhud muñh se lagā de saaqī

tū pilā.egā kahāñ tak mujhe paimāne se

mast karna hai to KHud munh se laga de saqi

tu pilaega kahan tak mujhe paimane se

maiñ to jab mānūñ mirī tauba ke ba.ad

kar ke majbūr pilā de saaqī

main to jab manun meri tauba ke baad

kar ke majbur pila de saqi

na vaa.iz hajv kar ek din duniyā se jaanā hai

are muñh sāqi-e-kausar ko bhī āḳhir dikhānā hai

na waiz hajw kar ek din duniya se jaana hai

are munh saqi-e-kausar ko bhi aaKHir dikhana hai

ye thoḌī thoḌī mai na de kalā.ī moḌ moḌ kar

bhalā ho terā sāqiyā pilā de ḳhum nichoḌ kar

ye thoDi thoDi mai na de kalai moD moD kar

bhala ho tera saqiya pila de KHum nichoD kar

aatī jaatī hai jā-ba-jā badlī

sāqiyā jald aa havā badlī

aati jati hai ja-ba-ja badli

saqiya jald aa hawa badli

paḌ ga.ī kyā nigah-e-mast tire saaqī kī

laḌkhaḌāte hue mai-ḳhvār chale aate haiñ

paD gai kya nigah-e-mast tere saqi ki

laDkhaDate hue mai-KHwar chale aate hain

shaiḳh-e-haram kā zikr nahīñ hai mire nadīm

pīr-e-muġhāñ ke kashf-o-karāmat kī baat hai

shaiKH-e-haram ka zikr nahin hai mere nadim

pir-e-mughan ke kashf-o-karamat ki baat hai

āñkhoñ ke gulābī Doroñ meñ ik kaif sā paayā jaatā hai

mai-ḳhvār-e-mohabbat hosh meñ aa saaqī kī nazar hai jaam nahīñ

aankhon ke gulabi Doron mein ek kaif sa paya jata hai

mai-KHwar-e-mohabbat hosh mein aa saqi ki nazar hai jam nahin

sāqiyā muhr-ba-lab kar ke sila kyā paayā

hashr kuchh aur ḳhamoshī ne bapā rakkhā hai

saqiya muhr-ba-lab kar ke sila kya paya

hashr kuchh aur KHamoshi ne bapa rakkha hai

terī āñkhoñ ke kaif se saaqī

raqs meñ hai tamām mai-ḳhāna

teri aankhon ke kaif se saqi

raqs mein hai tamam mai-KHana

yuuñ bhī kaT sakte haiñ ye tishna-labī ke lamhāt

baiTh kar bazm meñ saaqī ko duā deñ ham log

yun bhi kaT sakte hain ye tishna-labi ke lamhat

baiTh kar bazm mein saqi ko dua den hum log

ham na piyeñge bhiik kī saaqī

le ye tirā paimāna paḌā hai

hum na piyenge bhik ki saqi

le ye tera paimana paDa hai

ham bahakte kabhī na yuuñ saaqī

tere hāthoñ jo pī nahīñ hotī

hum bahakte kabhi na yun saqi

tere hathon jo pi nahin hoti

nazar se pilānā hī kaafī hai saaqī

mujhe jaam kī ab zarūrat nahīñ hai

nazar se pilana hi kafi hai saqi

mujhe jam ki ab zarurat nahin hai

sunā iqbāl-e-isyāñ ḳhalvatoñ meñ vaj.h-e-baḳhshish hai

kalīsāoñ meñ ye tarz-e-ibādat aam hai saaqī

suna iqbaal-e-isyan KHalwaton mein wajh-e-baKHshish hai

kalisaon mein ye tarz-e-ibaadat aam hai saqi

jo haiñ mast-e-alast un ko ḳhumār-o-sukr kā Dar kyā

nigāh-e-tishna-kām-e-ishq hī dast-e-muġhāñ tak hai

jo hain mast-e-alast un ko KHumar-o-sukr ka Dar kya

nigah-e-tishna-kaam-e-ishq hi dast-e-mughan tak hai

mayassar hai nigāh-e-lutf-e-sāqī

hameñ kyā daur-e-jām aa.e na aa.e

mayassar hai nigah-e-lutf-e-saqi

hamein kya daur-e-jam aae na aae

saaqī sharāb Daal magar naap kar nahīñ

hotī hai sharmsār mohabbat usuul se

saqi sharab Dal magar nap kar nahin

hoti hai sharmsar mohabbat usul se