Sher on Maikashi

kuchh bhī bachā na kahne ko har baat ho ga.ī

aao kahīñ sharāb piyeñ raat ho ga.ī

kuchh bhi bacha na kahne ko har baat ho gai

aao kahin sharab piyen raat ho gai

be piye hī sharāb se nafrat

ye jahālat nahīñ to phir kyā hai

be piye hi sharab se nafrat

ye jahaalat nahin to phir kya hai

itnī pī jaa.e ki miT jaa.e maiñ aur tū kī tamīz

yaanī ye hosh kī dīvār girā dī jaa.e

itni pi jae ki miT jae main aur tu ki tamiz

yani ye hosh ki diwar gira di jae

shab jo ham se huā muaaf karo

nahīñ pī thī bahak ga.e hoñge

shab jo hum se hua muaf karo

nahin pi thi bahak gae honge

shab ko mai ḳhuub sī pī sub.h ko tauba kar lī

riñd ke riñd rahe haath se jannat na ga.ī

shab ko mai KHub si pi subh ko tauba kar li

rind ke rind rahe hath se jannat na gai

tark-e-mai hī samajh ise nāseh

itnī pī hai ki pī nahīñ jaatī

tark-e-mai hi samajh ise naseh

itni pi hai ki pi nahin jati

pahle sharāb ziist thī ab ziist hai sharāb

koī pilā rahā hai piye jā rahā huuñ maiñ

pahle sharab zist thi ab zist hai sharab

koi pila raha hai piye ja raha hun main

ai 'zauq' dekh duḳhtar-e-raz ko na muñh lagā

chhuTtī nahīñ hai muñh se ye kāfar lagī huī

ai 'zauq' dekh duKHtar-e-raz ko na munh laga

chhuTti nahin hai munh se ye kafar lagi hui

'ġhālib' chhuTī sharāb par ab bhī kabhī kabhī

piitā huuñ roz-e-abr o shab-e-māhtāb meñ

'ghaalib' chhuTi sharab par ab bhi kabhi kabhi

pita hun roz-e-abr o shab-e-mahtab mein

vo mile bhī to ik jhijhak sī rahī

kaash thoḌī sī ham piye hote

wo mile bhi to ek jhijhak si rahi

kash thoDi si hum piye hote

ḳhushk bātoñ meñ kahāñ hai shaiḳh kaif-e-zindagī

vo to pī kar hī milegā jo mazā piine meñ hai

KHushk baaton mein kahan hai shaiKH kaif-e-zindagi

wo to pi kar hi milega jo maza pine mein hai

sab ko maarā 'jigar' ke sheroñ ne

aur 'jigar' ko sharāb ne maarā

sab ko mara 'jigar' ke sheron ne

aur 'jigar' ko sharab ne mara

azaañ ho rahī hai pilā jald saaqī

ibādat kareñ aaj maḳhmūr ho kar

azan ho rahi hai pila jald saqi

ibaadat karen aaj maKHmur ho kar

be-piye shaiḳh farishta thā magar

pī ke insān huā jaatā hai

be-piye shaiKH farishta tha magar

pi ke insan hua jata hai

har shab shab-e-barāt hai har roz roz-e-īd

sotā huuñ haath gardan-e-mīnā meñ Daal ke

har shab shab-e-baraat hai har roz roz-e-id

sota hun hath gardan-e-mina mein Dal ke

rind-e-ḳharāb-nosh kī be-adabī to dekhiye

niyyat-e-mai-kashī na kī haath meñ jaam le liyā

rind-e-KHarab-nosh ki be-adabi to dekhiye

niyyat-e-mai-kashi na ki hath mein jam le liya

zabān-e-hosh se ye kufr sarzad ho nahīñ saktā

maiñ kaise bin piye le luuñ ḳhudā kā naam ai saaqī

zaban-e-hosh se ye kufr sarzad ho nahin sakta

main kaise bin piye le lun KHuda ka nam ai saqi

jaam le kar mujh se vo kahtā hai apne muñh ko pher

rū-ba-rū yuuñ tere mai piine se sharmāte haiñ ham

jam le kar mujh se wo kahta hai apne munh ko pher

ru-ba-ru yun tere mai pine se sharmate hain hum

itnī pī hai ki ba.ad-e-tauba bhī

be-piye be-ḳhudī sī rahtī hai

itni pi hai ki baad-e-tauba bhi

be-piye be-KHudi si rahti hai

uThā surāhī ye shīsha vo jaam le saaqī

phir is ke baad ḳhudā kā bhī naam le saaqī

uTha surahi ye shisha wo jam le saqi

phir is ke baad KHuda ka bhi nam le saqi

pilā mai āshkārā ham ko kis kī sāqiyā chorī

ḳhudā se jab nahīñ chorī to phir bande se kyā chorī

pila mai aashkara hum ko kis ki saqiya chori

KHuda se jab nahin chori to phir bande se kya chori

mai-kashī ke bhī kuchh ādāb baratnā sīkho

haath meñ apne agar jaam liyā hai tum ne

mai-kashi ke bhi kuchh aadab baratna sikho

hath mein apne agar jam liya hai tum ne

mujhe tauba kā puurā ajr miltā hai usī saa.at

koī zohra-jabīñ piine pe jab majbūr kartā hai

mujhe tauba ka pura ajr milta hai usi saat

koi zohra-jabin pine pe jab majbur karta hai

tum sharāb pī kar bhī hosh-mand rahte ho

jaane kyuuñ mujhe aisī mai-kashī nahīñ aa.ī

tum sharab pi kar bhi hosh-mand rahte ho

jaane kyun mujhe aisi mai-kashi nahin aai

zāhid sharāb-e-nāb ho yā bāda-e-tuhūr

piine hī par jab aa.e harām o halāl kyā

zahid sharab-e-nab ho ya baada-e-tuhur

pine hi par jab aae haram o halal kya

ġharq kar de tujh ko zāhid terī duniyā ko ḳharāb

kam se kam itnī to har mai-kash ke paimāne meñ hai

gharq kar de tujh ko zahid teri duniya ko KHarab

kam se kam itni to har mai-kash ke paimane mein hai

mai-kashī gardish-e-ayyām se aage na baḌhī

merī madhoshī mire jaam se aage na baḌhī

mai-kashi gardish-e-ayyam se aage na baDhi

meri madhoshi mere jam se aage na baDhi

ai shaiḳh marte marte bache haiñ piye baġhair

aasī hoñ ab jo tauba kareñ mai-kashī se ham

ai shaiKH marte marte bache hain piye baghair

aasi hon ab jo tauba karen mai-kashi se hum

mai-kashī se najāt mushkil hai

mai kā Duubā kabhī ubhar na sakā

mai-kashi se najat mushkil hai

mai ka Duba kabhi ubhar na saka

mai-kasho der hai kyā daur chale bismillāh

aa.ī hai shīsha-o-sāġhar kī talabgār ghaTā

mai-kasho der hai kya daur chale bismillah

aai hai shisha-o-saghar ki talabgar ghaTa

pī ke jiite haiñ jī ke piite haiñ

ham ko raġhbat hai aise jiine se

pi ke jite hain ji ke pite hain

hum ko raghbat hai aise jine se

mai-kashī meñ rakhte haiñ ham mashrab-e-durd-e-sharāb

jām-e-mai chaltā jahāñ dekhā vahāñ par jam ga.e

mai-kashi mein rakhte hain hum mashrab-e-durd-e-sharab

jam-e-mai chalta jahan dekha wahan par jam gae