Sher on Raat

ik raat vo gayā thā jahāñ baat rok ke

ab tak rukā huā huuñ vahīñ raat rok ke

ek raat wo gaya tha jahan baat rok ke

ab tak ruka hua hun wahin raat rok ke

raat to vaqt kī pāband hai Dhal jā.egī

dekhnā ye hai charāġhoñ kā safar kitnā hai

raat to waqt ki paband hai Dhal jaegi

dekhna ye hai charaghon ka safar kitna hai

is safar meñ niiñd aisī kho ga.ī

ham na so.e raat thak kar so ga.ī

is safar mein nind aisi kho gai

hum na soe raat thak kar so gai

har ek raat ko mahtāb dekhne ke liye

maiñ jāgtā huuñ tirā ḳhvāb dekhne ke liye

har ek raat ko mahtab dekhne ke liye

main jagta hun tera KHwab dekhne ke liye

shab-e-visāl hai gul kar do in charāġhoñ ko

ḳhushī kī bazm meñ kyā kaam jalne vāloñ kā

shab-e-visal hai gul kar do in charaghon ko

KHushi ki bazm mein kya kaam jalne walon ka

ye sard raat ye āvārgī ye niiñd kā bojh

ham apne shahr meñ hote to ghar ga.e hote

ye sard raat ye aawargi ye nind ka bojh

hum apne shahr mein hote to ghar gae hote

kuchh bhī bachā na kahne ko har baat ho ga.ī

aao kahīñ sharāb piyeñ raat ho ga.ī

kuchh bhi bacha na kahne ko har baat ho gai

aao kahin sharab piyen raat ho gai

raat ko jiit to paatā nahīñ lekin ye charāġh

kam se kam raat kā nuqsān bahut kartā hai

raat ko jit to pata nahin lekin ye charagh

kam se kam raat ka nuqsan bahut karta hai

bahut dinoñ meñ mohabbat ko ye huā ma.alūm

jo tere hijr meñ guzrī vo raat raat huī

bahut dinon mein mohabbat ko ye hua malum

jo tere hijr mein guzri wo raat raat hui

ik umr kaT ga.ī hai tire intizār meñ

aise bhī haiñ ki kaT na sakī jin se ek raat

ek umr kaT gai hai tere intizar mein

aise bhi hain ki kaT na saki jin se ek raat

raat aa kar guzar bhī jaatī hai

ik hamārī sahar nahīñ hotī

raat aa kar guzar bhi jati hai

ek hamari sahar nahin hoti

ham to raat kā matlab samjheñ ḳhvāb, sitāre, chāñd, charāġh

aage kā ahvāl vo jaane jis ne raat guzārī ho

hum to raat ka matlab samjhen KHwab, sitare, chand, charagh

aage ka ahwal wo jaane jis ne raat guzari ho

ai raat mujhe maañ kī tarah god meñ le le

din bhar kī mashaqqat se badan TuuT rahā hai

ai raat mujhe man ki tarah god mein le le

din bhar ki mashaqqat se badan TuT raha hai

ishq ke sho.ale ko bhaḌkāo ki kuchh raat kaTe

dil ke añgāre ko dahkāo ki kuchh raat kaTe

ishq ke shoale ko bhaDkao ki kuchh raat kaTe

dil ke angare ko dahkao ki kuchh raat kaTe

raat ko raat kah diyā maiñ ne

sunte hī baukhlā ga.ī duniyā

raat ko raat kah diya main ne

sunte hi baukhla gai duniya

pahle nahā.ī os meñ phir āñsuoñ meñ raat

yuuñ buuñd buuñd utrī hamāre gharoñ meñ raat

pahle nahai os mein phir aansuon mein raat

yun bund bund utri hamare gharon mein raat

ye tanhā raat ye gahrī fazā.eñ

use DhūñDeñ ki us ko bhuul jaa.eñ

ye tanha raat ye gahri fazaen

use DhunDen ki us ko bhul jaen

aaj kī raat bhī tanhā hī kaTī

aaj ke din bhī añdherā hogā

aaj ki raat bhi tanha hi kaTi

aaj ke din bhi andhera hoga

har taraf thī ḳhāmoshī aur aisī ḳhāmoshī

raat apne saa.e se ham bhī Dar ke ro.e the

har taraf thi KHamoshi aur aisi KHamoshi

raat apne sae se hum bhi Dar ke roe the

log kahte haiñ raat biit chukī

mujh ko samjhāo! maiñ sharābī huuñ

log kahte hain raat bit chuki

mujh ko samjhao! main sharabi hun

hamāre ḳhvāb chorī ho ga.e haiñ

hameñ rātoñ ko niiñd aatī nahīñ hai

hamare KHwab chori ho gae hain

hamein raaton ko nind aati nahin hai

raat ko roz Duub jaatā hai

chāñd ko tairnā sikhānā hai

raat ko roz Dub jata hai

chand ko tairna sikhana hai

maiñ sote sote ka.ī baar chauñk chauñk paḌā

tamām raat tire pahluoñ se aañch aa.ī

main sote sote kai bar chaunk chaunk paDa

tamam raat tere pahluon se aanch aai

kuchh duur tak to chamkī thī mere lahū kī dhaar

phir raat apne saath bahā le ga.ī mujhe

kuchh dur tak to chamki thi mere lahu ki dhaar

phir raat apne sath baha le gai mujhe

hichkiyāñ raat dard tanhā.ī

aa bhī jaao tasalliyāñ de do

hichkiyan raat dard tanhai

aa bhi jao tasalliyan de do

mirī nazar meñ vahī mohnī sī mūrat hai

ye raat hijr kī hai phir bhī ḳhūb-sūrat hai

meri nazar mein wahi mohni si murat hai

ye raat hijr ki hai phir bhi KHub-surat hai

tanhā.ī ke lamhāt kā ehsās huā hai

jab tāroñ bharī raat kā ehsās huā hai

tanhai ke lamhat ka ehsas hua hai

jab taron bhari raat ka ehsas hua hai

raat kyā so.e ki baaqī umr kī niiñd uḌ ga.ī

ḳhvāb kyā dekhā ki dhaḌkā lag gayā tābīr kā

raat kya soe ki baqi umr ki nind uD gai

KHwab kya dekha ki dhaDka lag gaya tabir ka

abhī raat kuchh hai baaqī na uThā naqāb saaqī

tirā rind girte girte kahīñ phir sambhal na jaa.e

abhi raat kuchh hai baqi na uTha naqab saqi

tera rind girte girte kahin phir sambhal na jae

thā va.ada shaam kā magar aa.e vo raat ko

maiñ bhī kivāḌ kholne fauran nahīñ gayā

tha wada sham ka magar aae wo raat ko

main bhi kiwaD kholne fauran nahin gaya

niiñd aisī ki raat kam paḌ jaa.e

ḳhvāb aisā ki muñh khulā rah jaa.e

nind aisi ki raat kam paD jae

KHwab aisa ki munh khula rah jae

raat kī baat kā mazkūr hī kyā

chhoḌiye raat ga.ī baat ga.ī

raat ki baat ka mazkur hi kya

chhoDiye raat gai baat gai

aaj na jaane raaz ye kyā hai

hijr kī raat aur itnī raushan

aaj na jaane raaz ye kya hai

hijr ki raat aur itni raushan

ham faqīroñ kā pairahan hai dhuup

aur ye raat apnī chādar hai

hum faqiron ka pairahan hai dhup

aur ye raat apni chadar hai

maut bar-haq hai ek din lekin

niiñd rātoñ ko ḳhuub aatī hai

maut bar-haq hai ek din lekin

nind raaton ko KHub aati hai

sub.h tak kaun jiyegā shab-e-tanhā.ī meñ

dil-e-nādāñ tujhe ummīd-e-sahar hai bhī to kyā

subh tak kaun jiyega shab-e-tanhai mein

dil-e-nadan tujhe ummid-e-sahar hai bhi to kya

chāñd bhī niklā sitāre bhī barābar nikle

mujh se achchhe to shab-e-ġham ke muqaddar nikle

chand bhi nikla sitare bhi barabar nikle

mujh se achchhe to shab-e-gham ke muqaddar nikle

raat aa jaa.e to phir tujh ko pukārūñ yā-rab

merī āvāz ujāle meñ bikhar jaatī hai

raat aa jae to phir tujh ko pukarun ya-rab

meri aawaz ujale mein bikhar jati hai

baḌī hī karbnāk thī vo pahlī raat hijr kī

dobāra dil meñ aisā dard aaj tak nahīñ huā

baDi hi karbnak thi wo pahli raat hijr ki

dobara dil mein aisa dard aaj tak nahin hua

ḳhvāboñ se na jaao ki abhī raat bahut hai

pahlū meñ tum aao ki abhī raat bahut hai

KHwabon se na jao ki abhi raat bahut hai

pahlu mein tum aao ki abhi raat bahut hai

āñkhoñ ko sab kī niiñd bhī dī ḳhvāb bhī diye

ham ko shumār kartī rahī dushmanoñ meñ raat

aankhon ko sab ki nind bhi di KHwab bhi diye

hum ko shumar karti rahi dushmanon mein raat

din kaTā jis tarah kaTā lekin

raat kaTtī nazar nahīñ aatī

din kaTa jis tarah kaTa lekin

raat kaTti nazar nahin aati

raat aa.ī hai balāoñ se rihā.ī degī

ab na dīvār na zanjīr dikhā.ī degī

raat aai hai balaon se rihai degi

ab na diwar na zanjir dikhai degi

pūchhnā chāñd kā patā 'āzar'

jab akele meñ raat mil jaa.e

puchhna chand ka pata 'azar'

jab akele mein raat mil jae

kaash koī ham se bhī pūchhe

raat ga.e tak kyuuñ jaage ho

kash koi hum se bhi puchhe

raat gae tak kyun jage ho

shab ke sannāTe meñ ye kis kā lahū gaatā hai

sarhad-e-dard se ye kis kī sadā aatī hai

shab ke sannaTe mein ye kis ka lahu gata hai

sarhad-e-dard se ye kis ki sada aati hai

tū hī batā de kaise kāTūñ

raat aur aisī kaalī raat

tu hi bata de kaise kaTun

raat aur aisi kali raat

hijr meñ milne shab-e-māh ke ġham aa.e haiñ

chārasāzoñ ko bhī bulvāo ki kuchh raat kaTe

hijr mein milne shab-e-mah ke gham aae hain

chaarasazon ko bhi bulwao ki kuchh raat kaTe

aap ne din banā diyā thā jise

zindagī bhar vo raat yaad aa.ī

aap ne din bana diya tha jise

zindagi bhar wo raat yaad aai

bas itnī sī baat thī us kī zulf zarā lahrā.ī thī

ḳhauf-zada har shaam kā manzar sahmī sī har raat milī

bas itni si baat thi us ki zulf zara lahrai thi

KHauf-zada har sham ka manzar sahmi si har raat mili