Sher on Visaal

vasl kā din aur itnā muḳhtasar

din gine jaate the is din ke liye

wasl ka din aur itna muKHtasar

din gine jate the is din ke liye

kabhī mauj-e-ḳhvāb meñ kho gayā kabhī thak ke ret pe so gayā

yūñhī umr saarī guzār dī faqat ārzū-e-visāl meñ

kabhi mauj-e-KHwab mein kho gaya kabhi thak ke ret pe so gaya

yunhi umr sari guzar di faqat aarzu-e-visal mein

kal vasl meñ bhī niiñd na aa.ī tamām shab

ek ek baat par thī laḌā.ī tamām shab

kal wasl mein bhi nind na aai tamam shab

ek ek baat par thi laDai tamam shab

Thahrī jo vasl kī to huī sub.h shaam se

but mehrbāñ hue to ḳhudā mehrbāñ na thā

Thahri jo wasl ki to hui subh sham se

but mehrban hue to KHuda mehrban na tha

vasl kī shab thī aur ujāle kar rakkhe the

jism o jaañ sab us ke havāle kar rakkhe the

wasl ki shab thi aur ujale kar rakkhe the

jism o jaan sab us ke hawale kar rakkhe the

dekh kar tūl-e-shab-e-hijr duā kartā huuñ

vasl ke roz se bhī umr mirī kam ho jaa.e

dekh kar tul-e-shab-e-hijr dua karta hun

wasl ke roz se bhi umr meri kam ho jae

ik raat dil-jaloñ ko ye aish-e-visāl de

phir chāhe āsmān jahannam meñ Daal de

ek raat dil-jalon ko ye aish-e-visal de

phir chahe aasman jahannam mein Dal de

milne kī ye kaun ghaḌī thī

bāhar hijr kī raat khaḌī thī

milne ki ye kaun ghaDi thi

bahar hijr ki raat khaDi thi

darmiyāñ jo jism kā parda hai kaise hogā chaak

maut kis tarkīb se ham ko milā.egī na pūchh

darmiyan jo jism ka parda hai kaise hoga chaak

maut kis tarkib se hum ko milaegi na puchh

us kī qurbat kā nasha kyā chiiz hai

haath phir jalte tave par rakh diyā

us ki qurbat ka nasha kya chiz hai

hath phir jalte tawe par rakh diya

har ishq ke manzar meñ thā ik hijr kā manzar

ik vasl kā manzar kisī manzar meñ nahīñ thā

har ishq ke manzar mein tha ek hijr ka manzar

ek wasl ka manzar kisi manzar mein nahin tha

nahīñ nigāh meñ manzil to justujū hī sahī

nahīñ visāl mayassar to aarzū hī sahī

nahin nigah mein manzil to justuju hi sahi

nahin visal mayassar to aarzu hi sahi

tum kahāñ vasl kahāñ vasl kī ummīd kahāñ

dil ke bahkāne ko ik baat banā rakhī hai

tum kahan wasl kahan wasl ki ummid kahan

dil ke bahkane ko ek baat bana rakhi hai

kahāñ ham kahāñ vasl-e-jānāñ kī 'hasrat'

bahut hai unheñ ik nazar dekh lenā

kahan hum kahan wasl-e-jaanan ki 'hasrat'

bahut hai unhen ek nazar dekh lena

bhalā ham mile bhī to kyā mile vahī dūriyāñ vahī fāsle

na kabhī hamāre qadam baḌhe na kabhī tumhārī jhijak ga.ī

bhala hum mile bhi to kya mile wahi duriyan wahi fasle

na kabhi hamare qadam baDhe na kabhi tumhaari jhijak gai

use ḳhabar thī ki ham visāl aur hijr ik saath chāhte haiñ

to us ne aadhā ujaaḌ rakkhā hai aur aadhā banā diyā hai

use KHabar thi ki hum visal aur hijr ek sath chahte hain

to us ne aadha ujaD rakkha hai aur aadha bana diya hai

mirā ġhazāl ki vahshat thī jis ko saa.e se

lipaT gayā mire siine se aadmī kī tarah

mera ghazal ki wahshat thi jis ko sae se

lipaT gaya mere sine se aadmi ki tarah

vo aur va.ada vasl kā qāsid nahīñ nahīñ

sach sach batā ye lafz unhī kī zabāñ ke haiñ

wo aur wada wasl ka qasid nahin nahin

sach sach bata ye lafz unhi ki zaban ke hain

va.ada kiyā hai ġhair se aur vo bhī vasl kā

kullī karo huzūr huā hai dahan ḳharāb

wada kiya hai ghair se aur wo bhi wasl ka

kulli karo huzur hua hai dahan KHarab

aur bhī dukh haiñ zamāne meñ mohabbat ke sivā

rāhateñ aur bhī haiñ vasl kī rāhat ke sivā

aur bhi dukh hain zamane mein mohabbat ke siwa

rahaten aur bhi hain wasl ki rahat ke siwa

rahā ḳhvāb meñ un se shab bhar visāl

mire baḳht jaage maiñ soyā kiyā

raha KHwab mein un se shab bhar visal

mere baKHt jage main soya kiya

vasl kā gul na sahī hijr kā kāñTā hī sahī

kuchh na kuchh to mirī vahshat kā sila de mujh ko

wasl ka gul na sahi hijr ka kanTa hi sahi

kuchh na kuchh to meri wahshat ka sila de mujh ko

guzarne hī na dī vo raat maiñ ne

ghaḌī par rakh diyā thā haath maiñ ne

guzarne hi na di wo raat main ne

ghaDi par rakh diya tha hath main ne

dost dil rakhne ko karte haiñ bahāne kyā kyā

roz jhūTī ḳhabar-e-vasl sunā jaate haiñ

dost dil rakhne ko karte hain bahane kya kya

roz jhuTi KHabar-e-wasl suna jate hain

o vasl meñ muñh chhupāne vaale

ye bhī koī vaqt hai hayā kā

o wasl mein munh chhupane wale

ye bhi koi waqt hai haya ka

armān vasl kā mirī nazroñ se taaḌ ke

pahle hī se vo baiTh ga.e muñh bigāḌ ke

arman wasl ka meri nazron se taD ke

pahle hi se wo baiTh gae munh bigaD ke

ḳhair se dil ko tirī yaad se kuchh kaam to hai

vasl kī shab na sahī hijr kā hañgām to hai

KHair se dil ko teri yaad se kuchh kaam to hai

wasl ki shab na sahi hijr ka hangam to hai

tarġhīb-e-gunāh lahza lahza

ab raat javān ho ga.ī hai

targhib-e-gunah lahza lahza

ab raat jawan ho gai hai

rakh na aañsū se vasl kī ummīd

khāre paanī se daal galtī nahīñ

rakh na aansu se wasl ki ummid

khaare pani se dal galti nahin

kahnā qāsid ki us ke jiine kā

va.ada-e-vasl par madār hai aaj

kahna qasid ki us ke jine ka

wada-e-wasl par madar hai aaj

vasl ho yā firāq ho 'akbar'

jāgnā raat bhar musībat hai

wasl ho ya firaq ho 'akbar'

jagna raat bhar musibat hai

chand kaliyāñ nashāt kī chun kar muddatoñ mahv-e-yās rahtā huuñ

terā milnā ḳhushī kī baat sahī tujh se mil kar udaas rahtā huuñ

chand kaliyan nashat ki chun kar muddaton mahw-e-yas rahta hun

tera milna KHushi ki baat sahi tujh se mil kar udas rahta hun

zarā visāl ke ba.ad aa.ina to dekh ai dost

tire jamāl kī doshīzgī nikhar aa.ī

zara visal ke baad aaina to dekh ai dost

tere jamal ki doshizgi nikhar aai

vo gale se lipaT ke sote haiñ

āj-kal garmiyāñ haiñ jāḌoñ meñ

wo gale se lipaT ke sote hain

aaj-kal garmiyan hain jaDon mein

use ḳhabar hai ki anjām-e-vasl kyā hogā

vo qurbatoñ kī tapish fāsle meñ rakhtī hai

use KHabar hai ki anjam-e-wasl kya hoga

wo qurbaton ki tapish fasle mein rakhti hai

sard rātoñ kā taqāza thā badan jal jaa.e

phir vo ik aag jo siine se lagā.ī maiñ ne

sard raaton ka taqaza tha badan jal jae

phir wo ek aag jo sine se lagai main ne

jān-levā thiiñ ḳhvāhisheñ varna

vasl se intizār achchhā thā

jaan-lewa thin KHwahishen warna

wasl se intizar achchha tha

vasl meñ rañg uḌ gayā merā

kyā judā.ī ko muñh dikhā.ūñgā

wasl mein rang uD gaya mera

kya judai ko munh dikhaunga

ye na thī hamārī qismat ki visāl-e-yār hotā

agar aur jiite rahte yahī intizār hotā

ye na thi hamari qismat ki visal-e-yar hota

agar aur jite rahte yahi intizar hota

sau chāñd bhī chamkeñge to kyā baat banegī

tum aa.e to is raat kī auqāt banegī

sau chand bhi chamkenge to kya baat banegi

tum aae to is raat ki auqat banegi

tire badan meñ haiñ kitnī qayāmateñ pinhāñ

baḌe shadīd azāboñ meñ qaid rahtā huuñ

tere badan mein hain kitni qayamaten pinhan

baDe shadid azabon mein qaid rahta hun

os se pyaas kahāñ bujhtī hai

mūslā-dhār baras merī jaan

os se pyas kahan bujhti hai

musla-dhaar baras meri jaan

kahāñ kā vasl tanhā.ī ne shāyad bhes badlā hai

tire dam bhar ke mil jaane ko ham bhī kyā samajhte haiñ

kahan ka wasl tanhai ne shayad bhes badla hai

tere dam bhar ke mil jaane ko hum bhi kya samajhte hain

aap to muñh pher kar kahte haiñ aane ke liye

vasl kā va.ada zarā āñkheñ milā kar kījiye

aap to munh pher kar kahte hain aane ke liye

wasl ka wada zara aankhen mila kar kijiye

vasl ho jaa.e yahīñ hashr meñ kyā rakkhā hai

aaj kī baat ko kyuuñ kal pe uThā rakkhā hai

wasl ho jae yahin hashr mein kya rakkha hai

aaj ki baat ko kyun kal pe uTha rakkha hai

dhaḌaktī qurbatoñ ke ḳhvāb se jaage to jaanā

zarā se vasl ne kitnā akelā kar diyā hai

dhaDakti qurbaton ke KHwab se jage to jaana

zara se wasl ne kitna akela kar diya hai

vasl kī raat hai bigḌo na barābar to rahe

phaT gayā merā garebān tumhārā dāman

wasl ki raat hai bigDo na barabar to rahe

phaT gaya mera gareban tumhaara daman

vasl kī bantī haiñ in bātoñ se tadbīreñ kahīñ

ārzūoñ se phirā kartī haiñ taqdīreñ kahīñ

wasl ki banti hain in baaton se tadbiren kahin

aarzuon se phira karti hain taqdiren kahin

mirī bahār meñ aalam ḳhizāñ kā rahtā hai

huā jo vasl to khaTkā rahā judā.ī kā

meri bahaar mein aalam KHizan ka rahta hai

hua jo wasl to khaTka raha judai ka

hijr ik vaqfa-e-bedār hai do nīñdoñ meñ

vasl ik ḳhvāb hai jis kī koī ta.abīr nahīñ

hijr ek waqfa-e-bedar hai do nindon mein

wasl ek KHwab hai jis ki koi tabir nahin