Sher on Mulaqat

na jī bhar ke dekhā na kuchh baat kī

baḌī aarzū thī mulāqāt kī

na ji bhar ke dekha na kuchh baat ki

baDi aarzu thi mulaqat ki

musāfir haiñ ham bhī musāfir ho tum bhī

kisī moḌ par phir mulāqāt hogī

musafir hain hum bhi musafir ho tum bhi

kisi moD par phir mulaqat hogi

aaj dekhā hai tujh ko der ke ba.ad

aaj kā din guzar na jaa.e kahīñ

aaj dekha hai tujh ko der ke baad

aaj ka din guzar na jae kahin

gaahe gaahe kī mulāqāt hī achchhī hai 'amīr'

qadr kho detā hai har roz kā aanā jaanā

gahe gahe ki mulaqat hi achchhi hai 'amir'

qadr kho deta hai har roz ka aana jaana

kaise kah duuñ ki mulāqāt nahīñ hotī hai

roz milte haiñ magar baat nahīñ hotī hai

kaise kah dun ki mulaqat nahin hoti hai

roz milte hain magar baat nahin hoti hai

jaane vaale se mulāqāt na hone paa.ī

dil kī dil meñ hī rahī baat na hone paa.ī

jaane wale se mulaqat na hone pai

dil ki dil mein hi rahi baat na hone pai

kyā kahūñ us se ki jo baat samajhtā hī nahīñ

vo to milne ko mulāqāt samajhtā hī nahīñ

kya kahun us se ki jo baat samajhta hi nahin

wo to milne ko mulaqat samajhta hi nahin

ġhairoñ se to fursat tumheñ din raat nahīñ hai

haañ mere liye vaqt-e-mulāqāt nahīñ hai

ghairon se to fursat tumhein din raat nahin hai

han mere liye waqt-e-mulaqat nahin hai

naqsha uThā ke koī nayā shahr DhūñDhiye

is shahr meñ to sab se mulāqāt ho ga.ī

naqsha uTha ke koi naya shahr DhunDhiye

is shahr mein to sab se mulaqat ho gai

mil rahī ho baḌe tapāk ke saath

mujh ko yaksar bhulā chukī ho kyā

mil rahi ho baDe tapak ke sath

mujh ko yaksar bhula chuki ho kya

na udaas ho na malāl kar kisī baat kā na ḳhayāl kar

ka.ī saal ba.ad mile haiñ ham tere naam aaj kī shaam hai

na udas ho na malal kar kisi baat ka na KHayal kar

kai sal baad mile hain hum tere nam aaj ki sham hai

ye mulāqāt mulāqāt nahīñ hotī hai

baat hotī hai magar baat nahīñ hotī hai

ye mulaqat mulaqat nahin hoti hai

baat hoti hai magar baat nahin hoti hai

dostoñ se mulāqāt kī shaam hai

ye sazā kaaT kar apne ghar jā.ūñgā

doston se mulaqat ki sham hai

ye saza kaT kar apne ghar jaunga

'farāz' tark-e-ta.alluq to ḳhair kyā hogā

yahī bahut hai ki kam kam milā karo us se

'faraaz' tark-e-talluq to KHair kya hoga

yahi bahut hai ki kam kam mila karo us se

aañkh bhar aa.ī kisī se jo mulāqāt huī

ḳhushk mausam thā magar TuuT ke barsāt huī

aankh bhar aai kisi se jo mulaqat hui

KHushk mausam tha magar TuT ke barsat hui

sunte rahe haiñ aap ke ausāf sab se ham

milne kā aap se kabhī mauqa.a nahīñ milā

sunte rahe hain aap ke ausaf sab se hum

milne ka aap se kabhi mauqa nahin mila

aaj to mil ke bhī jaise na mile hoñ tujh se

chauñk uThte the kabhī terī mulāqāt se ham

aaj to mil ke bhi jaise na mile hon tujh se

chaunk uThte the kabhi teri mulaqat se hum

yuuñ sar-e-rāh mulāqāt huī hai aksar

us ne dekhā bhī nahīñ ham ne pukārā bhī nahīñ

yun sar-e-rah mulaqat hui hai aksar

us ne dekha bhi nahin hum ne pukara bhi nahin

aaj nāgāh ham kisī se mile

ba.ad muddat ke zindagī se mile

aaj nagah hum kisi se mile

baad muddat ke zindagi se mile

muddateñ guzrīñ mulāqāt huī thī tum se

phir koī aur na aayā nazar ā.īne meñ

muddaten guzrin mulaqat hui thi tum se

phir koi aur na aaya nazar aaine mein

kaafī nahīñ ḳhutūt kisī baat ke liye

tashrīf lā.iyegā mulāqāt ke liye

kafi nahin KHutut kisi baat ke liye

tashrif laiyega mulaqat ke liye

Thānī thī dil meñ ab na mileñge kisī se ham

par kyā kareñ ki ho ga.e nā-chār jī se ham

Thani thi dil mein ab na milenge kisi se hum

par kya karen ki ho gae na-chaar ji se hum

yaar sab jam.a hue raat kī ḳhāmoshī meñ

koī ro kar to koī baal banā kar aayā

yar sab jama hue raat ki KHamoshi mein

koi ro kar to koi baal bana kar aaya

milnā jo na ho tum ko to kah do na mileñge

ye kyā kabhī parsoñ hai kabhī kal hai kabhī aaj

milna jo na ho tum ko to kah do na milenge

ye kya kabhi parson hai kabhi kal hai kabhi aaj

tū ne hī to chāhā thā ki miltā rahūñ tujh se

terī yahī marzī hai to achchhā nahīñ miltā

tu ne hi to chaha tha ki milta rahun tujh se

teri yahi marzi hai to achchha nahin milta

hazār talḳh hoñ yādeñ magar vo jab bhī mile

zabāñ pe achchhe dinoñ kā hī zā.iqa rakhnā

hazar talKH hon yaaden magar wo jab bhi mile

zaban pe achchhe dinon ka hi zaiqa rakhna

din bhī hai raat bhī hai sub.h bhī hai shaam bhī hai

itne vaqtoñ meñ koī vaqt-e-mulāqāt bhī hai

din bhi hai raat bhi hai subh bhi hai sham bhi hai

itne waqton mein koi waqt-e-mulaqat bhi hai

ab mulāqāt huī hai to mulāqāt rahe

na mulāqāt thī jab tak ki mulāqāt na thī

ab mulaqat hui hai to mulaqat rahe

na mulaqat thi jab tak ki mulaqat na thi

kabhī mileñge jo rāste meñ to muñh phirā kar palaT paḌeñge

kahīñ suneñge jo naam terā to chup raheñge nazar jhukā ke

kabhi milenge jo raste mein to munh phira kar palaT paDenge

kahin sunenge jo nam tera to chup rahenge nazar jhuka ke

sunā hai aise bhī hote haiñ log duniyā meñ

ki jin se miliye to tanhā.ī ḳhatm hotī hai

suna hai aise bhi hote hain log duniya mein

ki jin se miliye to tanhai KHatm hoti hai

yuuñ to vo har kisī se miltī hai

ham se apnī ḳhushī se miltī hai

yun to wo har kisi se milti hai

hum se apni KHushi se milti hai

zindagī ke vo kisī moḌ pe gaahe gaahe

mil to jaate haiñ mulāqāt kahāñ hotī hai

zindagi ke wo kisi moD pe gahe gahe

mil to jate hain mulaqat kahan hoti hai

chhoḌnā hai to na ilzām lagā kar chhoḌo

kahīñ mil jaao to phir lutf-e-mulāqāt rahe

chhoDna hai to na ilzam laga kar chhoDo

kahin mil jao to phir lutf-e-mulaqat rahe

jam ga.ī dhuul mulāqāt ke ā.īnoñ par

mujh ko us kī na use merī zarūrat koī

jam gai dhul mulaqat ke aainon par

mujh ko us ki na use meri zarurat koi

har mulāqāt kā anjām judā.ī thā agar

phir ye hañgāma mulāqāt se pahle kyā thā

har mulaqat ka anjam judai tha agar

phir ye hangama mulaqat se pahle kya tha

muddat se aarzū hai ḳhudā vo ghaḌī kare

ham tum piyeñ jo mil ke kahīñ ek jā sharāb

muddat se aarzu hai KHuda wo ghaDi kare

hum tum piyen jo mil ke kahin ek ja sharab

maiñ chup khaḌā thā ta.alluq meñ iḳhtisār jo thā

usī ne baat banā.ī vo hoshiyār jo thā

main chup khaDa tha talluq mein iKHtisar jo tha

usi ne baat banai wo hoshiyar jo tha

munhasir vaqt-e-muqarrar pe mulāqāt huī

aaj ye aap kī jānib se na.ī baat huī

munhasir waqt-e-muqarrar pe mulaqat hui

aaj ye aap ki jaanib se nai baat hui

zarā sā mil ke dikhāo ki aise milte haiñ

bahut patā hai tumheñ chhoḌ jaanā aatā hai

zara sa mil ke dikhao ki aise milte hain

bahut pata hai tumhein chhoD jaana aata hai

tujh se milne kī tamannā bhī bahut hai lekin

aane jaane meñ kirāya bhī bahut lagtā hai

tujh se milne ki tamanna bhi bahut hai lekin

aane jaane mein kiraya bhi bahut lagta hai

kis tarah tujh se mulāqāt mayassar hove

ye duā-go tirā ne zor na zar rakhtā hai

kis tarah tujh se mulaqat mayassar howe

ye dua-go tera ne zor na zar rakhta hai

shāḳh-e-mizhgāñ pe mahakne lage zaḳhmoñ ke gulāb

pichhle mausam kī mulāqāt kī bū zinda hai

shaKH-e-mizhgan pe mahakne lage zaKHmon ke gulab

pichhle mausam ki mulaqat ki bu zinda hai

tere milāp bin nahīñ 'fā.ez' ke dil ko chain

jyuuñ ruuh ho basā hai tū us ke badan meñ aa

tere milap bin nahin 'faez' ke dil ko chain

jyun ruh ho basa hai tu us ke badan mein aa

is qadar bas-ki roz milne se

ḳhātiroñ meñ ġhubār aave hai

is qadar bas-ki roz milne se

KHatiron mein ghubar aawe hai

kyā kahegā kabhī milne bhī agar aa.egā vo

ab vafādārī kī qasmeñ to nahīñ khā.egā vo

kya kahega kabhi milne bhi agar aaega wo

ab wafadari ki qasmen to nahin khaega wo