aañkh bhar aa.ī kisī se jo mulāqāt huī

ḳhushk mausam thā magar TuuT ke barsāt huī

aankh bhar aai kisi se jo mulaqat hui

KHushk mausam tha magar TuT ke barsat hui

aap hī kī hai adālat aap hī munsif bhī haiñ

ye to kahiye aap ke aib-o-hunar dekhegā kaun

aap hi ki hai adalat aap hi munsif bhi hain

ye to kahiye aap ke aib-o-hunar dekhega kaun

ab samajh lete haiñ mīThe lafz kī kaḌvāhaTeñ

ho gayā hai zindagī kā tajraba thoḌā bahut

ab samajh lete hain miThe lafz ki kaDwahaTen

ho gaya hai zindagi ka tajraba thoDa bahut

hamāre dil pe jo zaḳhmoñ kā baab likkhā hai

isī meñ vaqt kā saarā hisāb likkhā hai

hamare dil pe jo zaKHmon ka bab likkha hai

isi mein waqt ka sara hisab likkha hai

unhīñ pe saare masā.ib kā bojh rakkhā hai

jo tere shahr meñ īmān le ke aa.e haiñ

unhin pe sare masaib ka bojh rakkha hai

jo tere shahr mein iman le ke aae hain