Sher on Dil

dil nā-umīd to nahīñ nākām hī to hai

lambī hai ġham kī shaam magar shaam hī to hai

dil na-umid to nahin nakaam hi to hai

lambi hai gham ki sham magar sham hi to hai

aur kyā dekhne ko baaqī hai

aap se dil lagā ke dekh liyā

aur kya dekhne ko baqi hai

aap se dil laga ke dekh liya

zindagī kis tarah basar hogī

dil nahīñ lag rahā mohabbat meñ

zindagi kis tarah basar hogi

dil nahin lag raha mohabbat mein

kaun is ghar kī dekh-bhāl kare

roz ik chiiz TuuT jaatī hai

kaun is ghar ki dekh-bhaal kare

roz ek chiz TuT jati hai

shaam bhī thī dhuāñ dhuāñ husn bhī thā udaas udaas

dil ko ka.ī kahāniyāñ yaad sī aa ke rah ga.iiñ

sham bhi thi dhuan dhuan husn bhi tha udas udas

dil ko kai kahaniyan yaad si aa ke rah gain

duniyā kī mahfiloñ se uktā gayā huuñ yā rab

kyā lutf anjuman kā jab dil hī bujh gayā ho

duniya ki mahfilon se ukta gaya hun ya rab

kya lutf anjuman ka jab dil hi bujh gaya ho

tumhārā dil mire dil ke barābar ho nahīñ saktā

vo shīsha ho nahīñ saktā ye patthar ho nahīñ saktā

tumhaara dil mere dil ke barabar ho nahin sakta

wo shisha ho nahin sakta ye patthar ho nahin sakta

dil ābād kahāñ rah paa.e us kī yaad bhulā dene se

kamra vīrāñ ho jaatā hai ik tasvīr haTā dene se

dil aabaad kahan rah pae us ki yaad bhula dene se

kamra viran ho jata hai ek taswir haTa dene se

dil ke phaphūle jal uThe siine ke daaġh se

is ghar ko aag lag ga.ī ghar ke charāġh se

dil ke phaphule jal uThe sine ke dagh se

is ghar ko aag lag gai ghar ke charagh se

in hasratoñ se kah do kahīñ aur jā baseñ

itnī jagah kahāñ hai dil-e-dāġh-dār meñ

in hasraton se kah do kahin aur ja basen

itni jagah kahan hai dil-e-dagh-dar mein

faqat nigāh se hotā hai faisla dil kā

na ho nigāh meñ shoḳhī to dilbarī kyā hai

faqat nigah se hota hai faisla dil ka

na ho nigah mein shoKHi to dilbari kya hai

har dhaḌakte patthar ko log dil samajhte haiñ

umreñ biit jaatī haiñ dil ko dil banāne meñ

har dhaDakte patthar ko log dil samajhte hain

umren bit jati hain dil ko dil banane mein

tum zamāne kī raah se aa.e

varna sīdhā thā rāsta dil kā

tum zamane ki rah se aae

warna sidha tha rasta dil ka

shīsha TuuTe ġhul mach jaa.e

dil TuuTe āvāz na aa.e

shisha TuTe ghul mach jae

dil TuTe aawaz na aae

aap pahlū meñ jo baiTheñ to sambhal kar baiTheñ

dil-e-betāb ko aadat hai machal jaane kī

aap pahlu mein jo baiThen to sambhal kar baiThen

dil-e-betab ko aadat hai machal jaane ki

dil kī taklīf kam nahīñ karte

ab koī shikva ham nahīñ karte

dil ki taklif kam nahin karte

ab koi shikwa hum nahin karte

ham ne siine se lagāyā dil na apnā ban sakā

muskurā kar tum ne dekhā dil tumhārā ho gayā

hum ne sine se lagaya dil na apna ban saka

muskura kar tum ne dekha dil tumhaara ho gaya

maiñ huuñ dil hai tanhā.ī hai

tum bhī hote achchhā hotā

main hun dil hai tanhai hai

tum bhi hote achchha hota

dil de to is mizāj kā parvardigār de

jo rañj kī ghaḌī bhī ḳhushī se guzār de

dil de to is mizaj ka parwardigar de

jo ranj ki ghaDi bhi KHushi se guzar de

muddat ke ba.ad aaj use dekh kar 'munīr'

ik baar dil to dhaḌkā magar phir sambhal gayā

muddat ke baad aaj use dekh kar 'munir'

ek bar dil to dhaDka magar phir sambhal gaya

kab Thahregā dard ai dil kab raat basar hogī

sunte the vo ā.eñge sunte the sahar hogī

kab Thahrega dard ai dil kab raat basar hogi

sunte the wo aaenge sunte the sahar hogi

ham to kuchh der hañs bhī lete haiñ

dil hamesha udaas rahtā hai

hum to kuchh der hans bhi lete hain

dil hamesha udas rahta hai

dil bhī pāgal hai ki us shaḳhs se vābasta hai

jo kisī aur kā hone de na apnā rakkhe

dil bhi pagal hai ki us shaKHs se wabasta hai

jo kisi aur ka hone de na apna rakkhe

kuchh to havā bhī sard thī kuchh thā tirā ḳhayāl bhī

dil ko ḳhushī ke saath saath hotā rahā malāl bhī

kuchh to hawa bhi sard thi kuchh tha tera KHayal bhi

dil ko KHushi ke sath sath hota raha malal bhi

dil abhī puurī tarah TuuTā nahīñ

dostoñ kī mehrbānī chāhiye

dil abhi puri tarah TuTa nahin

doston ki mehrbani chahiye

dil pāgal hai roz na.ī nādānī kartā hai

aag meñ aag milātā hai phir paanī kartā hai

dil pagal hai roz nai nadani karta hai

aag mein aag milata hai phir pani karta hai

merī qismat meñ ġham gar itnā thā

dil bhī yā-rab ka.ī diye hote

meri qismat mein gham gar itna tha

dil bhi ya-rab kai diye hote

mohabbat rañg de jaatī hai jab dil dil se miltā hai

magar mushkil to ye hai dil baḌī mushkil se miltā hai

mohabbat rang de jati hai jab dil dil se milta hai

magar mushkil to ye hai dil baDi mushkil se milta hai

diyā ḳhāmosh hai lekin kisī kā dil to jaltā hai

chale aao jahāñ tak raushnī ma.alūm hotī hai

diya KHamosh hai lekin kisi ka dil to jalta hai

chale aao jahan tak raushni malum hoti hai

''aap kī yaad aatī rahī raat bhar''

chāñdnī dil dukhātī rahī raat bhar

aap ki yaad aati rahi raat bhar

chandni dil dukhati rahi raat bhar

baḌā shor sunte the pahlū meñ dil kā

jo chīrā to ik qatra-e-ḳhūñ na niklā

baDa shor sunte the pahlu mein dil ka

jo chira to ek qatra-e-KHun na nikla

jāntā hai ki vo na ā.eñge

phir bhī masrūf-e-intizār hai dil

jaanta hai ki wo na aaenge

phir bhi masruf-e-intizar hai dil

jaane vaale se mulāqāt na hone paa.ī

dil kī dil meñ hī rahī baat na hone paa.ī

jaane wale se mulaqat na hone pai

dil ki dil mein hi rahi baat na hone pai

but-ḳhāna toḌ Dāliye masjid ko Dhā.iye

dil ko na toḌiye ye ḳhudā kā maqām hai

but-KHana toD Daliye masjid ko Dhaiye

dil ko na toDiye ye KHuda ka maqam hai

aap daulat ke tarāzū meñ diloñ ko tauleñ

ham mohabbat se mohabbat kā sila dete haiñ

aap daulat ke taraazu mein dilon ko taulen

hum mohabbat se mohabbat ka sila dete hain

ulfat meñ barābar hai vafā ho ki jafā ho

har baat meñ lazzat hai agar dil meñ mazā ho

ulfat mein barabar hai wafa ho ki jafa ho

har baat mein lazzat hai agar dil mein maza ho

ishq kī choT kā kuchh dil pe asar ho to sahī

dard kam ho yā ziyāda ho magar ho to sahī

ishq ki choT ka kuchh dil pe asar ho to sahi

dard kam ho ya ziyaada ho magar ho to sahi

abhī raah meñ ka.ī moḌ haiñ koī aa.egā koī jā.egā

tumheñ jis ne dil se bhulā diyā use bhūlne kī duā karo

abhi rah mein kai moD hain koi aaega koi jaega

tumhein jis ne dil se bhula diya use bhulne ki dua karo

dil kī vīrānī kā kyā mazkūr hai

ye nagar sau martaba luuTā gayā

dil ki virani ka kya mazkur hai

ye nagar sau martaba luTa gaya

āġhāz-e-mohabbat kā anjām bas itnā hai

jab dil meñ tamannā thī ab dil hī tamannā hai

aaghaz-e-mohabbat ka anjam bas itna hai

jab dil mein tamanna thi ab dil hi tamanna hai

adā se dekh lo jaatā rahe gila dil kā

bas ik nigāh pe Thahrā hai faisla dil kā

ada se dekh lo jata rahe gila dil ka

bas ek nigah pe Thahra hai faisla dil ka

hoshiyārī dil-e-nādān bahut kartā hai

rañj kam sahtā hai elaan bahut kartā hai

hoshiyari dil-e-nadan bahut karta hai

ranj kam sahta hai elan bahut karta hai

dil ke ā.īne meñ hai tasvīr-e-yār

jab zarā gardan jhukā.ī dekh lī

dil ke aaine mein hai taswir-e-yar

jab zara gardan jhukai dekh li

bhuul shāyad bahut baḌī kar lī

dil ne duniyā se dostī kar lī

bhul shayad bahut baDi kar li

dil ne duniya se dosti kar li

dil mohabbat se bhar gayā 'beḳhud'

ab kisī par fidā nahīñ hotā

dil mohabbat se bhar gaya 'beKHud'

ab kisi par fida nahin hota

aarzū terī barqarār rahe

dil kā kyā hai rahā rahā na rahā

aarzu teri barqarar rahe

dil ka kya hai raha raha na raha

dil pe aa.e hue ilzām se pahchānte haiñ

log ab mujh ko tire naam se pahchānte haiñ

dil pe aae hue ilzam se pahchante hain

log ab mujh ko tere nam se pahchante hain

dil to merā udaas hai 'nāsir'

shahr kyuuñ saa.eñ saa.eñ kartā hai

dil to mera udas hai 'nasir'

shahr kyun saen saen karta hai

dil-e-nādāñ tujhe huā kyā hai

āḳhir is dard kī davā kyā hai

dil-e-nadan tujhe hua kya hai

aaKHir is dard ki dawa kya hai

dil bhī toḌā to salīqe se na toḌā tum ne

bevafā.ī ke bhī ādāb huā karte haiñ

dil bhi toDa to saliqe se na toDa tum ne

bewafai ke bhi aadab hua karte hain