Sher on Aagahi

apne man meñ Duub kar pā jā surāġh-e-zindagī

tū agar merā nahīñ bantā na ban apnā to ban

apne man mein Dub kar pa ja suragh-e-zindagi

tu agar mera nahin banta na ban apna to ban

āgahī karb vafā sabr tamannā ehsās

mere hī siine meñ utre haiñ ye ḳhanjar saare

aagahi karb wafa sabr tamanna ehsas

mere hi sine mein utre hain ye KHanjar sare

apnī hastī hī se ho jo kuchh ho

āgahī gar nahīñ ġhaflat hī sahī

apni hasti hi se ho jo kuchh ho

aagahi gar nahin ghaflat hi sahi

tirā vasl hai mujhe be-ḳhudī tirā hijr hai mujhe āgahī

tirā vasl mujh ko firāq hai tirā hijr mujh ko visāl hai

tera wasl hai mujhe be-KHudi tera hijr hai mujhe aagahi

tera wasl mujh ko firaq hai tera hijr mujh ko visal hai

'saudā' jo be-ḳhabar hai vahī yaañ kare hai aish

mushkil bahut hai un ko jo rakhte haiñ āgahī

'sauda' jo be-KHabar hai wahi yan kare hai aish

mushkil bahut hai un ko jo rakhte hain aagahi

shikva-e-zulmat-e-shab se to kahīñ behtar thā

apne hisse kī koī sham.a jalāte jaate

shikwa-e-zulmat-e-shab se to kahin behtar tha

apne hisse ki koi shama jalate jate

umr jo be-ḳhudī meñ guzrī hai

bas vahī āgahī meñ guzrī hai

umr jo be-KHudi mein guzri hai

bas wahi aagahi mein guzri hai

āgahī se milī hai tanhā.ī

aa mirī jaan mujh ko dhokā de

aagahi se mili hai tanhai

aa meri jaan mujh ko dhoka de

āgahī dām-e-shunīdan jis qadar chāhe bichhā.e

mudda.ā anqā hai apne ālam-e-taqrīr kā

aagahi dam-e-shunidan jis qadar chahe bichhae

muddaa anqa hai apne aalam-e-taqrir ka

agar shu.ūr na ho to bahisht hai duniyā

baḌe azaab meñ guzrī hai āgahī ke saath

agar shuur na ho to bahisht hai duniya

baDe azab mein guzri hai aagahi ke sath

ik zamāne tak badan be-ḳhvāb be-ādāb the

phir achānak apnī uryānī kā andāza huā

ek zamane tak badan be-KHwab be-adab the

phir achanak apni uryani ka andaza hua

ḳhudā kā matlab hai ḳhud meñ aa tū ḳhud-āgahī hai ḳhudā-shanāsī

ḳhudā ko ḳhud se judā samajh kar bhaTak rahā hai idhar udhar kyuuñ

KHuda ka matlab hai KHud mein aa tu KHud-agahi hai KHuda-shanasi

KHuda ko KHud se juda samajh kar bhaTak raha hai idhar udhar kyun

jin se zinda ho yaqīn o āgahī kī aabrū

ishq kī rāhoñ meñ kuchh aise gumāñ karte chalo

jin se zinda ho yaqin o aagahi ki aabru

ishq ki rahon mein kuchh aise guman karte chalo

yahī aa.ina hai vo ā.īna jo liye hai jalva-e-āgahī

ye jo shā.erī kā shu.ūr hai ye payambarī kī talāsh hai

yahi aaina hai wo aaina jo liye hai jalwa-e-agahi

ye jo shaeri ka shuur hai ye payambari ki talash hai

na pūchhiye ki vo kis karb se guzarte haiñ

jo āgahī ke sabab aish-e-bandagī se ga.e

na puchhiye ki wo kis karb se guzarte hain

jo aagahi ke sabab aish-e-bandagi se gae

ujālā 'ilm kā phailā to hai chāroñ taraf yaaro

basīrat aadmī kī kuchh magar kam hotī jaatī hai

ujala 'ilm ka phaila to hai chaaron taraf yaro

basirat aadmi ki kuchh magar kam hoti jati hai

junūñ ke kaif-o-kam se āgahī tujh ko nahīñ nāseh

guzartī hai jo dīvānoñ pe dīvāne samajhte haiñ

junun ke kaif-o-kam se aagahi tujh ko nahin naseh

guzarti hai jo diwanon pe diwane samajhte hain

āgahī bhūlne detī nahīñ hastī kā ma.aal

TuuT ke ḳhvāb bikhartā hai to hañs dete haiñ

aagahi bhulne deti nahin hasti ka maal

TuT ke KHwab bikharta hai to hans dete hain

pahāḌ jaisī azmatoñ kā dāḳhila thā shahr meñ

ki log āgahī kā ishtihār le ke chal diye

pahaD jaisi azmaton ka daKHila tha shahr mein

ki log aagahi ka ishtihaar le ke chal diye

charāġh sāmne vaale makān meñ bhī na thā

ye sāneha mire vahm-o-gumān meñ bhī na thā

charagh samne wale makan mein bhi na tha

ye saneha mere wahm-o-guman mein bhi na tha

is kār-e-āgahī ko junūñ kah rahe haiñ log

mahfūz kar rahe haiñ fazā meñ sadā.eñ ham

is kar-e-agahi ko junun kah rahe hain log

mahfuz kar rahe hain faza mein sadaen hum

jaise jaise āgahī baḌhtī ga.ī vaise 'zahīr'

zehn o dil ik dūsre se munfasil hote ga.e

jaise jaise aagahi baDhti gai waise 'zahir'

zehn o dil ek dusre se munfasil hote gae

Dubo.e detā hai ḳhud-āgahī kā baar mujhe

maiñ Dhaltā nashsha huuñ mauj-e-tarab ubhār mujhe

Duboe deta hai KHud-agahi ka bar mujhe

main Dhalta nashsha hun mauj-e-tarab ubhaar mujhe

kyā ho sake hisāb ki jab āgahī kahe

ab tak to rā.egānī meñ saarā safar kiyā

kya ho sake hisab ki jab aagahi kahe

ab tak to raegani mein sara safar kiya

urūj-e-māh ko insāñ samajh gayā lekin

hanūz azmat-e-insāñ se āgahī kam hai

uruj-e-mah ko insan samajh gaya lekin

hanuz azmat-e-insan se aagahi kam hai

āgahī ne diye ib.hām ke dhoke kyā kyā

sharh-e-alfāz jo likkhī to ishāre likkhe

aagahi ne diye ibham ke dhoke kya kya

sharh-e-alfaz jo likkhi to ishaare likkhe

junūñ kī ḳhair ho tujh ko 'asar' milā sab kuchh

ye kaifiyat bhī zarūrī thī āgahī ke liye

junun ki KHair ho tujh ko 'asar' mila sab kuchh

ye kaifiyat bhi zaruri thi aagahi ke liye

ham āgahī ko rote haiñ aur āgahī hameñ

vāraftagi-e-shauq kahāñ le chalī hameñ

hum aagahi ko rote hain aur aagahi hamein

waraftagi-e-shauq kahan le chali hamein