Sher on Barish

dhuup ne guzārish kī

ek buuñd bārish kī

dhup ne guzarish ki

ek bund barish ki

us ne bārish meñ bhī khiḌkī khol ke dekhā nahīñ

bhīgne vāloñ ko kal kyā kyā pareshānī huī

us ne barish mein bhi khiDki khol ke dekha nahin

bhigne walon ko kal kya kya pareshani hui

daftar se mil nahīñ rahī chhuTTī vagarna maiñ

bārish kī ek buuñd na be-kār jaane duuñ

daftar se mil nahin rahi chhuTTi wagarna main

barish ki ek bund na be-kar jaane dun

furqat-e-yār meñ insān huuñ maiñ yā ki sahāb

har baras aa ke rulā jaatī hai barsāt mujhe

furqat-e-yar mein insan hun main ya ki sahab

har baras aa ke rula jati hai barsat mujhe

ghaTā dekh kar ḳhush huiiñ laḌkiyāñ

chhatoñ par khile phuul barsāt ke

ghaTa dekh kar KHush huin laDkiyan

chhaton par khile phul barsat ke

bhīgī miTTī kī mahak pyaas baḌhā detī hai

dard barsāt kī būñdoñ meñ basā kartā hai

bhigi miTTi ki mahak pyas baDha deti hai

dard barsat ki bundon mein basa karta hai

ham se pūchho mizāj bārish kā

ham jo kachche makān vaale haiñ

hum se puchho mizaj barish ka

hum jo kachche makan wale hain

tamām raat nahāyā thā shahr bārish meñ

vo rañg utar hī ga.e jo utarne vaale the

tamam raat nahaya tha shahr barish mein

wo rang utar hi gae jo utarne wale the

kachchī dīvāroñ ko paanī kī lahar kaaT ga.ī

pahlī bārish hī ne barsāt kī Dhāyā hai mujhe

kachchi diwaron ko pani ki lahar kaT gai

pahli barish hi ne barsat ki Dhaya hai mujhe

aaj to aise bijlī chamkī bārish aa.ī khiḌkī bhīgī

jaise bādal khīñch rahā ho mere ashkoñ kī tasvīreñ

aaj to aise bijli chamki barish aai khiDki bhigi

jaise baadal khinch raha ho mere ashkon ki taswiren

barsāt ke aate hī tauba na rahī baaqī

bādal jo nazar aa.e badlī merī nīyat bhī

barsat ke aate hi tauba na rahi baqi

baadal jo nazar aae badli meri niyat bhi

aur bāzār se kyā le jā.ūñ

pahlī bārish kā mazā le jā.ūñ

aur bazar se kya le jaun

pahli barish ka maza le jaun

koī kamre meñ aag tāptā ho

koī bārish meñ bhīgtā rah jaa.e

koi kamre mein aag tapta ho

koi barish mein bhigta rah jae

TuuT paḌtī thiiñ ghaTā.eñ jin kī āñkheñ dekh kar

vo bharī barsāt meñ tarse haiñ paanī ke liye

TuT paDti thin ghaTaen jin ki aankhen dekh kar

wo bhari barsat mein tarse hain pani ke liye

kyā kahūñ dīda-e-tar ye to mirā chehrā hai

sañg kaT jaate haiñ bārish kī jahāñ dhaar gire

kya kahun dida-e-tar ye to mera chehra hai

sang kaT jate hain barish ki jahan dhaar gire

ab ke bārish meñ to ye kār-e-ziyāñ honā hī thā

apnī kachchī bastiyoñ ko be-nishāñ honā hī thā

ab ke barish mein to ye kar-e-ziyan hona hi tha

apni kachchi bastiyon ko be-nishan hona hi tha

kaun hai is rim-jhim ke pīchhe chhupā huā

ye aañsū saare ke saare kis ke haiñ

kaun hai is rim-jhim ke pichhe chhupa hua

ye aansu sare ke sare kis ke hain

falak par uḌte jaate bādaloñ ko dekhtā huuñ maiñ

havā kahtī hai mujh se ye tamāshā kaisā lagtā hai

falak par uDte jate baadalon ko dekhta hun main

hawa kahti hai mujh se ye tamasha kaisa lagta hai

maiñ vo sahrā jise paanī kī havas le Duubī

tū vo bādal jo kabhī TuuT ke barsā hī nahīñ

main wo sahra jise pani ki hawas le Dubi

tu wo baadal jo kabhi TuT ke barsa hi nahin

ham to samjhe the ki barsāt meñ barsegī sharāb

aa.ī barsāt to barsāt ne dil toḌ diyā

hum to samjhe the ki barsat mein barsegi sharab

aai barsat to barsat ne dil toD diya

os se pyaas kahāñ bujhtī hai

mūslā-dhār baras merī jaan

os se pyas kahan bujhti hai

musla-dhaar baras meri jaan

aane vaalī barkhā dekheñ kyā dikhlā.e āñkhoñ ko

ye barkhā barsāte din to bin pirītam be-kār ga.e

aane wali barkha dekhen kya dikhlae aankhon ko

ye barkha barsate din to bin piritam be-kar gae

ab bhī barsāt kī rātoñ meñ badan TūTtā hai

jaag uThtī haiñ ajab ḳhvāhisheñ añgḌā.ī kī

ab bhi barsat ki raaton mein badan TuTta hai

jag uThti hain ajab KHwahishen angDai ki

barsāt kā bādal to dīvāna hai kyā jaane

kis raah se bachnā hai kis chhat ko bhigonā hai

barsat ka baadal to diwana hai kya jaane

kis rah se bachna hai kis chhat ko bhigona hai

yaad aa.ī vo pahlī bārish

jab tujhe ek nazar dekhā thā

yaad aai wo pahli barish

jab tujhe ek nazar dekha tha

kachche makān jitne the bārish meñ bah ga.e

varna jo merā dukh thā vo dukh umr bhar kā thā

kachche makan jitne the barish mein bah gae

warna jo mera dukh tha wo dukh umr bhar ka tha

bārish sharāb-e-arsh hai ye soch kar 'adam'

bārish ke sab hurūf ko ulTā ke pī gayā

barish sharab-e-arsh hai ye soch kar 'adam'

barish ke sab huruf ko ulTa ke pi gaya

gungunātī huī aatī haiñ falak se būñdeñ

koī badlī tirī pāzeb se Takrā.ī hai

gungunati hui aati hain falak se bunden

koi badli teri pazeb se Takrai hai

ajab pur-lutf manzar dekhtā rahtā huuñ bārish meñ

badan jaltā hai aur maiñ bhīgtā rahtā huuñ bārish meñ

ajab pur-lutf manzar dekhta rahta hun barish mein

badan jalta hai aur main bhigta rahta hun barish mein

saath bārish meñ liye phirte ho us ko 'anjum'

tum ne is shahr meñ kyā aag lagānī hai koī

sath barish mein liye phirte ho us ko 'anjum'

tum ne is shahr mein kya aag lagani hai koi

kyuuñ maañg rahe ho kisī bārish kī duā.eñ

tum apne shikasta dar-o-dīvār to dekho

kyun mang rahe ho kisi barish ki duaen

tum apne shikasta dar-o-diwar to dekho

duur tak chhā.e the bādal aur kahīñ saaya na thā

is tarah barsāt kā mausam kabhī aayā na thā

dur tak chhae the baadal aur kahin saya na tha

is tarah barsat ka mausam kabhi aaya na tha

dar-o-dīvār pe shakleñ sī banāne aa.ī

phir ye bārish mirī tanhā.ī churāne aa.ī

dar-o-diwar pe shaklen si banane aai

phir ye barish meri tanhai churane aai

vo ab kyā ḳhaak aa.e haa.e qismat meñ tarasnā thā

tujhe ai abr-e-rahmat aaj hī itnā barasnā thā

wo ab kya KHak aae hae qismat mein tarasna tha

tujhe ai abr-e-rahmat aaj hi itna barasna tha

baras rahī thī bārish bāhar

aur vo bhiig rahā thā mujh meñ

baras rahi thi barish bahar

aur wo bhig raha tha mujh mein

'kaif' pardes meñ mat yaad karo apnā makāñ

ab ke bārish ne use toḌ girāyā hogā

'kaif' pardes mein mat yaad karo apna makan

ab ke barish ne use toD giraya hoga

duur tak phailā huā paanī hī paanī har taraf

ab ke bādal ne bahut kī mehrbānī har taraf

dur tak phaila hua pani hi pani har taraf

ab ke baadal ne bahut ki mehrbani har taraf