Sher on Paan

lagāvaT kī adā se un kā kahnā paan hāzir hai

qayāmat hai sitam hai dil fidā hai jaan hāzir hai

lagawaT ki ada se un ka kahna pan hazir hai

qayamat hai sitam hai dil fida hai jaan hazir hai

uThāyā us ne biiḌā qatl kā kuchh dil meñ Thānā hai

chabānā paan kā bhī ḳhuuñ bahāne kā bahāna hai

uThaya us ne biDa qatl ka kuchh dil mein Thana hai

chabana pan ka bhi KHun bahane ka bahana hai

jab ham-kalām ham se hotā hai paan khā kar

kis rang se kare hai bāteñ chabā chabā kar

jab ham-kalam hum se hota hai pan kha kar

kis rang se kare hai baaten chaba chaba kar

gilaurī raqīboñ ne bhejī hai sāhab

kisī aur ko bhī khilā lījiyegā

gilauri raqibon ne bheji hai sahab

kisi aur ko bhi khila lijiyega

hoñThoñ meñ daab kar jo gilaurī dī yaar ne

kyā daañt piise ġhairoñ ne kyā kyā chabā.e hoñTh

honThon mein dab kar jo gilauri di yar ne

kya dant pise ghairon ne kya kya chabae honTh

sunā ke koī kahānī hameñ sulātī thī

duāoñ jaisī baḌe pān-dān kī ḳhushbū

suna ke koi kahani hamein sulati thi

duaon jaisi baDe pan-dan ki KHushbu

bāloñ meñ bal hai aañkh meñ surma hai muñh meñ paan

ghar se nikal ke paañv nikāle nikal chale

baalon mein bal hai aankh mein surma hai munh mein pan

ghar se nikal ke panw nikale nikal chale

bahut se ḳhūn-ḳharābe macheñge ḳhāna-ḳharāb

yahī hai rañg agar tere paan khāne kā

bahut se KHun-KHarabe machenge KHana-KHarab

yahi hai rang agar tere pan khane ka

kājal mehñdī paan misī aur kañghī choTī meñ har aan

kyā kyā rañg banāvegī aur kyā kyā naqshe Dhālegī

kajal mehndi pan misi aur kanghi choTi mein har aan

kya kya rang banawegi aur kya kya naqshe Dhaalegi

paan ke Thele hotel logoñ kā jamghaT

apne tanhā hone kā ehsās bhī kyā

pan ke Thele hotel logon ka jamghaT

apne tanha hone ka ehsas bhi kya

thā bahut un ko gilaurī kā uThānā mushkil

dast-e-nāzuk se diyā paan baḌī mushkil se

tha bahut un ko gilauri ka uThana mushkil

dast-e-nazuk se diya pan baDi mushkil se

kab paan raqīboñ ko ināyat nahīñ hote

kis roz mire qatl kā biiḌā nahīñ uThtā

kab pan raqibon ko inayat nahin hote

kis roz mere qatl ka biDa nahin uThta

paan khā kar jo ugaal aap ne thūkā sāhab

jauharī mahv hue la.al-e-yaman yaad aayā

pan kha kar jo ugal aap ne thuka sahab

jauhari mahw hue lal-e-yaman yaad aaya

tumhāre lab kī surḳhī la.al kī mānind aslī hai

agar tum paan ai pyāre na khāoge to kyā hogā

tumhaare lab ki surKHi lal ki manind asli hai

agar tum pan ai pyare na khaoge to kya hoga

paan ban ban ke mirī jaan kahāñ jaate haiñ

ye mire qatl ke sāmān kahāñ jaate haiñ

pan ban ban ke meri jaan kahan jate hain

ye mere qatl ke saman kahan jate hain

mire qatl par tum ne biiḌā uThāyā

mire haath kā paan khāyā to hotā

mere qatl par tum ne biDa uThaya

mere hath ka pan khaya to hota

jabhī tū paan khā kar muskurāyā

tabhī dil khil gayā gul kī kalī kā

jabhi tu pan kha kar muskuraya

tabhi dil khil gaya gul ki kali ka

ham na uThte haiñ na vo dete haiñ

haath meñ paan hai kyā mushkil hai

hum na uThte hain na wo dete hain

hath mein pan hai kya mushkil hai

tere hoñThoñ ke ta.iiñ paan se laal

dekh kar ḳhūn-e-jigar khātā huuñ

tere honThon ke tain pan se lal

dekh kar KHun-e-jigar khata hun

aa.e bhī to khaa.e na gilaurī na malā itr

rokī mirī dāvat mujhe mehmāñ se gilā hai

aae bhi to khae na gilauri na mala itr

roki meri dawat mujhe mehman se gila hai

ḳhūn-e-ushshāq hai ma.ānī meñ

shauq se paan khā.iye sāhab

KHun-e-ushshaq hai maani mein

shauq se pan khaiye sahab

sadā paan khā khā ke nikle hai bāhar

zamāne meñ ḳhūñ-ḳhvār paidā huā hai

sada pan kha kha ke nikle hai bahar

zamane mein KHun-KHwar paida hua hai

haath meñ le kar gilaurī mujh ko dikhlā kar kahā

muñh to banvā.e koī is paan khāne ke liye

hath mein le kar gilauri mujh ko dikhla kar kaha

munh to banwae koi is pan khane ke liye

gar maza chāho to katro dil saraute se mirā

tum supārī kī Dalī rakhte ho nāhaq paan meñ

gar maza chaho to katro dil saraute se mera

tum supari ki Dali rakhte ho nahaq pan mein

aate haiñ vo kahīñ se to ai 'mehr' qarz daam

chiknī Dalī ilā.ichī mañgā paan chhāliyā

aate hain wo kahin se to ai 'mehr' qarz dam

chikni Dali ilaichi manga pan chhaaliya

ḳhūn-e-ushshāq kā uThā biiḌā

be-sabab kab vo paan khātā hai

KHun-e-ushshaq ka uTha biDa

be-sabab kab wo pan khata hai

paan khāne kī adā ye hai to ik aalam ko

ḳhuuñ rulā.egā mirī jaañ dahan-e-surkh tirā

pan khane ki ada ye hai to ek aalam ko

KHun rulaega meri jaan dahan-e-surkh tera

kyā hai mujhe dete ho gilaurī

chūne meñ kahīñ na sañkhiyā ho

kya hai mujhe dete ho gilauri

chune mein kahin na sankhiya ho