Sher on Tauba

haa.e 'sīmāb' us kī majbūrī

jis ne kī ho shabāb meñ tauba

hae 'simab' us ki majburi

jis ne ki ho shabab mein tauba

piine se kar chukā thā maiñ tauba magar 'jalīl'

bādal kā rañg dekh ke nīyat badal ga.ī

pine se kar chuka tha main tauba magar 'jalil'

baadal ka rang dekh ke niyat badal gai

ham se mai-kash jo tauba kar baiTheñ

phir ye kār-e-savāb kaun kare

hum se mai-kash jo tauba kar baiThen

phir ye kar-e-sawab kaun kare

hamārī kashtī-e-tauba kā ye huā anjām

bahār aate hī ġharq-e-sharāb ho ke rahī

hamari kashti-e-tauba ka ye hua anjam

bahaar aate hi gharq-e-sharab ho ke rahi

mujhe tauba kā puurā ajr miltā hai usī saa.at

koī zohra-jabīñ piine pe jab majbūr kartā hai

mujhe tauba ka pura ajr milta hai usi saat

koi zohra-jabin pine pe jab majbur karta hai

aap ke hote kisī aur ko chāhūñ tauba

kis taraf dhyān hai kyā aap ye farmāte haiñ

aap ke hote kisi aur ko chahun tauba

kis taraf dhyan hai kya aap ye farmate hain

sāqiyā dil meñ jo tauba kā ḳhayāl aatā hai

duur se aañkh dikhātā hai tirā jaam mujhe

saqiya dil mein jo tauba ka KHayal aata hai

dur se aankh dikhata hai tera jam mujhe

itnī pī hai ki ba.ad-e-tauba bhī

be-piye be-ḳhudī sī rahtī hai

itni pi hai ki baad-e-tauba bhi

be-piye be-KHudi si rahti hai

barsāt ke aate hī tauba na rahī baaqī

bādal jo nazar aa.e badlī merī nīyat bhī

barsat ke aate hi tauba na rahi baqi

baadal jo nazar aae badli meri niyat bhi

ai shaiḳh marte marte bache haiñ piye baġhair

aasī hoñ ab jo tauba kareñ mai-kashī se ham

ai shaiKH marte marte bache hain piye baghair

aasi hon ab jo tauba karen mai-kashi se hum

baat saaqī kī na Taalī jā.egī

kar ke tauba toḌ Daalī jā.egī

baat saqi ki na Tali jaegi

kar ke tauba toD Dali jaegi

tauba khaḌī hai dar pe jo fariyād ke liye

ye mai-kada bhī kyā kisī qaazī kā ghar huā

tauba khaDi hai dar pe jo fariyaad ke liye

ye mai-kada bhi kya kisi qazi ka ghar hua

khanak jaate haiñ jab sāġhar to pahroñ kaan bajte haiñ

are tauba baḌī tauba-shikan āvāz hotī hai

khanak jate hain jab saghar to pahron kan bajte hain

are tauba baDi tauba-shikan aawaz hoti hai

vo kaun haiñ jinheñ tauba kī mil ga.ī fursat

hameñ gunāh bhī karne ko zindagī kam hai

wo kaun hain jinhen tauba ki mil gai fursat

hamein gunah bhi karne ko zindagi kam hai

shirkat gunāh meñ bhī rahe kuchh savāb kī

tauba ke saath toḌiye botal sharāb kī

shirkat gunah mein bhi rahe kuchh sawab ki

tauba ke sath toDiye botal sharab ki

tauba kī rindoñ meñ gunjā.ish kahāñ

jab ye aa.egī nikālī jā.egī

tauba ki rindon mein gunjaish kahan

jab ye aaegi nikali jaegi

fatvā diyā hai muftī-e-abr-e-bahār ne

tauba kā ḳhuun bāda-kashoñ ko halāl hai

fatwa diya hai mufti-e-abr-e-bahaar ne

tauba ka KHun baada-kashon ko halal hai

duḳhtar-e-raz ne diye chhīñTe kuchh aise sāqiyā

paanī paanī ho ga.ī tauba har ik mai-ḳhvār kī

duKHtar-e-raz ne diye chhinTe kuchh aise saqiya

pani pani ho gai tauba har ek mai-KHwar ki

ham ne barsāt ke mausam meñ jo chāhī tauba

abr is zor se garjā ki ilāhī tauba

hum ne barsat ke mausam mein jo chahi tauba

abr is zor se garja ki ilahi tauba

un ke ruḳhsār pe Dhalke hue aañsū tauba

maiñ ne shabnam ko bhī sho.aloñ pe machalte dekhā

un ke ruKHsar pe Dhalke hue aansu tauba

main ne shabnam ko bhi shoalon pe machalte dekha

tark-e-mai hī samajh ise nāseh

itnī pī hai ki pī nahīñ jaatī

tark-e-mai hi samajh ise naseh

itni pi hai ki pi nahin jati

shikast-e-tauba kī tamhīd hai tirī tauba

zabāñ pe tauba 'mubārak' nigāh sāġhar par

shikast-e-tauba ki tamhid hai teri tauba

zaban pe tauba 'mubarak' nigah saghar par

mirī sharāb kī tauba pe jā na ai vaa.iz

nashe kī baat nahīñ e'tibār ke qābil

meri sharab ki tauba pe ja na ai waiz

nashe ki baat nahin e'tibar ke qabil

maiñ to jab mānūñ mirī tauba ke ba.ad

kar ke majbūr pilā de saaqī

main to jab manun meri tauba ke baad

kar ke majbur pila de saqi

jaam hai tauba-shikan tauba mirī jām-shikan

sāmne Dher haiñ TuuTe hue paimānoñ ke

jam hai tauba-shikan tauba meri jam-shikan

samne Dher hain TuTe hue paimanon ke

shab ko mai ḳhuub sī pī sub.h ko tauba kar lī

riñd ke riñd rahe haath se jannat na ga.ī

shab ko mai KHub si pi subh ko tauba kar li

rind ke rind rahe hath se jannat na gai

guzre haiñ mai-kade se jo tauba ke ba.ad ham

kuchh duur ādatan bhī qadam Dagmagā.e haiñ

guzre hain mai-kade se jo tauba ke baad hum

kuchh dur aadatan bhi qadam Dagmagae hain