Sher on Charagar

mujhe chhoḌ de mere haal par tirā kyā bharosa hai chāragar

ye tirī navāzish-e-muḳhtasar merā dard aur baḌhā na de

mujhe chhoD de mere haal par tera kya bharosa hai chaaragar

ye teri nawazish-e-muKHtasar mera dard aur baDha na de

goyā tumhārī yaad hī merā ilaaj hai

hotā hai pahroñ zikr tumhārā tabīb se

goya tumhaari yaad hi mera ilaj hai

hota hai pahron zikr tumhaara tabib se

kis se ummīd kareñ koī ilāj-e-dil kī

chārāgar bhī to bahut dard kā maarā niklā

kis se ummid karen koi ilaj-e-dil ki

chaaragar bhi to bahut dard ka mara nikla

vo dil-navāz hai lekin nazar-shanās nahīñ

mirā ilaaj mire chāra-gar ke paas nahīñ

wo dil-nawaz hai lekin nazar-shanas nahin

mera ilaj mere chaara-gar ke pas nahin

kis se jā kar māñgiye dard-e-mohabbat kī davā

chāra-gar ab ḳhud hī bechāre nazar aane lage

kis se ja kar mangiye dard-e-mohabbat ki dawa

chaara-gar ab KHud hi bechaare nazar aane lage

koī davā na de sake mashvara-e-duā diyā

chāragaroñ ne aur bhī dard dil kā baḌhā diyā

koi dawa na de sake mashwara-e-dua diya

chaaragaron ne aur bhi dard dil ka baDha diya

ik ye bhī to andāz-e-ilāj-e-ġham-e-jāñ hai

ai chāragaro dard baḌhā kyuuñ nahīñ dete

ek ye bhi to andaz-e-ilaj-e-gham-e-jaan hai

ai chaaragaro dard baDha kyun nahin dete

chāragarī kī baat kisī aur se karo

ab ho ga.e haiñ yaaro purāne marīz ham

chaaragari ki baat kisi aur se karo

ab ho gae hain yaro purane mariz hum

is maraz se koī bachā bhī hai

chārāgar ishq kī davā bhī hai

is maraz se koi bacha bhi hai

chaaragar ishq ki dawa bhi hai

ab mirā dard mirī jaan huā jaatā hai

ai mire chāragaro ab mujhe achchhā na karo

ab mera dard meri jaan hua jata hai

ai mere chaaragaro ab mujhe achchha na karo

ai mire chārāgar tire bas meñ nahīñ mo.āmla

sūrat-e-hāl ke liye vāqif-e-hāl chāhiye

ai mere chaaragar tere bas mein nahin moamla

surat-e-haal ke liye waqif-e-haal chahiye

kabhī jo zahmat-e-kār-e-rafū nahīñ kartā

hamāre zaḳhm usī chārāgar ke naam tamām

kabhi jo zahmat-e-kar-e-rafu nahin karta

hamare zaKHm usi chaaragar ke nam tamam

na.ī nahīñ hai ye tanhā.ī mere hujre kī

maraz ho koī bhī hai chārāgar se Dar jaanā

nai nahin hai ye tanhai mere hujre ki

maraz ho koi bhi hai chaaragar se Dar jaana

ḳhabar hai koī chārāgar aa.egā

salīqe se baiThe haiñ bīmār sab

KHabar hai koi chaaragar aaega

saliqe se baiThe hain bimar sab

tabīboñ kī tavajjoh se maraz hone lagā duunā

davā is dard kī batlā dil-e-āgāh kyā kiije

tabibon ki tawajjoh se maraz hone laga duna

dawa is dard ki batla dil-e-agah kya kije

ek din tujh ko āchānak ye ḳhabar aa.egī

tere bīmār shifā-yāb nahīñ ho paa.e

ek din tujh ko aachanak ye KHabar aaegi

tere bimar shifa-yab nahin ho pae