jaahilo.n ko salaam karnaa hai
aur phir jhuuT-muuT Darnaa hai
kaash vo raaste me.n mil jaa.e
mujh ko mu.nh pher kar guzarnaa hai
puuchhtii hai sadaa-e-baal-o-par
kyaa zamii.n par nahii.n utarnaa hai
sochnaa kuchh nahii.n hame.n filhaal
un se ko.ii bhii baat karnaa hai
bhuuk se Dagmagaa rahe hai.n paa.nv
aur baazaar se guzarnaa hai
bas tumhaaraa makaa.n dikhaa.ii diyaa
jis me.n saaraa jahaa.n dikhaa.ii diyaa
vo vahii.n thaa jahaa.n dikhaa.ii diyaa
ishq me.n ye kahaa.n dikhaa.ii diyaa
umr bhar par nahii.n mile ham ko
umr bhar aasmaa.n dikhaa.ii diyaa
roz diida-varo.n se kahtaa huu.n
tuu kahaa.n thaa kahaa.n dikhaa.ii diyaa
achchhe-KHaase qafas me.n rahte the
jaane kyuu.n aasmaa.n dikhaa.ii diyaa
