حالات پر اشعار

صبح ہوتے ہی نکل آتے ہیں بازار میں لوگ

گٹھریاں سر پہ اٹھائے ہوئے ایمانوں کی

منسوب چراغوں سے طرفدار ہوا کے

تم لوگ منافق ہو منافق بھی بلا کے

مرے حالات کو بس یوں سمجھ لو

پرندے پر شجر رکھا ہوا ہے

جمع کرتی ہے مجھے رات بہت مشکل سے

صبح کو گھر سے نکلتے ہی بکھرنے کے لیے

مجھ سے زیادہ کون تماشہ دیکھ سکے گا

گاندھی جی کے تینوں بندر میرے اندر

کیسے مانوں کہ زمانے کی خبر رکھتی ہے

گردش وقت تو بس مجھ پہ نظر رکھتی ہے

یہ دھوپ تو ہر رخ سے پریشان کرے گی

کیوں ڈھونڈ رہے ہو کسی دیوار کا سایہ

حالات سے خوف کھا رہا ہوں

شیشے کے محل بنا رہا ہوں

بچوں کے ساتھ آج اسے دیکھا تو دکھ ہوا

ان میں سے کوئی ایک بھی ماں پر نہیں گیا

ان گنت خونی مسائل کی ہوا ایسی چلی

رنج و غم کی گرد میں لپٹا ہر اک چہرہ ملا

اگر بدل نہ دیا آدمی نے دنیا کو

تو جان لو کہ یہاں آدمی کی خیر نہیں